నటుడు ధర్మ మహేష్ ఇంట్లోకి దూసుకెళ్లిన కారు
By DK· 10 Jul 2026
TG: హైదరాబాద్లోని ఫిల్మ్నగర్లో గురువారం అర్ధరాత్రి ఓ కారు బీభత్సం సృష్టించింది. కొంతమంది యువకులు కారులో అతివేగంగా ఫిల్మ్నగర్ రోడ్డుపై ప్రయాణిస్తున్నారు. ఓవర్ స్పీడ్తో వచ్చిన కారు మలుపు వద్ద అదుపుతప్పి రోడ్డు పక్కనున్న డివైడర్ను దాటి నేరుగా నటుడు ధర్మ మహేష్ ఇంటి కాంపౌండ్ గోడను, గేటును ఢీకొట్టి లోపలికి దూసుకెళ్లింది. భారీ శబ్దం రావడంతో నటుడు ధర్మ కుటుంబసభ్యులు, స్థానికులు బయటకు పరుగులు తీశారు. ఎవరికీ ఎలాంటి గాయాలు కాలేదు. ఘటనపై నటుడు ధర్మ పోలీసులకు ఫిర్యాదు చేశారు. కారులో ఉన్న యువకులు మద్యం మత్తులో ఉన్నట్లుగా పోలీసులు గుర్తించారు.
