AP

AP· 8 Aug 2026

బీసీల రుణం తీర్చుకుంటాం: చంద్రబాబు

ఆంధ్రప్రదేశ్‌లో బీసీల సంక్షేమం, సంరక్షణకు త్వరలో ప్రత్యేక చట్టం తీసుకురానున్నట్లు CM చంద్రబాబు ప్రకటించారు. బీసీలు 45 ఏళ్లుగా తెలుగుదేశం పార్టీకి వెన్నెముకగా నిలిచారని, కూటమి ప్రభుత్వం ఏర్పాటులో కీలక పాత్ర పోషించారని అన్నారు. వారి రుణం తీర్చుకుంటామని తెలిపారు. బాపట్ల జిల్లా చీరాల సమీపంలోని కొత్తపేటలో జాతీయ చేనేత దినోత్సవం సందర్భంగా ‘నేతన్నల సేవలో’ పథకాన్ని CM ప్రారంభించారు. రాష్ట్రంలోని 71,536 అర్హులైన చేనేత కుటుంబాలకు రూ.25 వేల చొప్పున మొత్తం రూ.179 కోట్లను విడుదల చేశారు.

AP· 7 Aug 2026

రేపు కర్నూలులో అక్షరం లీటరరీ పురస్కార కార్యక్రమం

AP: రేపు(శనివారం) ఉదయం 10 గంటలకు కర్నూలు నగరంలోని సర్వేపల్లి స్కూలులో అక్షరం లీటరరీ పురస్కారం-2026 కార్యక్రమం నిర్వహిస్తున్నారు. సభ నిర్వహణ జి.వెంకటకృష్ణ, అధ్యక్షత బాధ్యతలు కెంగార మోహన్ నిర్వహిస్తారు. పురస్కారాన్ని కవి, కథకుడు అనిల్ డ్యానీ అందుకుంటారు. కార్యక్రమంలో రచయితలు పలమనేరు బాలాజీ, శ్రీరామ్ పుప్పాల పాల్గొంటారు. రచయిత దివంగత కాశీభట్ల వేణుగోపాల్ కథల్లో మనోవైజ్ఞానిక అంశాల గురించి మారుతి పౌరోహితం మాట్లాడతారు.

AP· 7 Aug 2026

ఆశ్రమ పాఠశాలలో కరెంట్ షాక్‌తో విద్యార్థిని మృతి

AP: ఏలూరు జిల్లా వేలేరుపాడు మండలం శివకాశిపురం గిరిజన ఆశ్రమ పాఠశాల గర్ల్స్ హాస్టల్‌లో 8వ తరగతి విద్యార్థిని కరెంట్ షాక్‌తో మృతి చెందింది. చిట్టిరెడ్డిపాలెం గ్రామానికి చెందిన లక్ష్మీపార్వతి హాస్టల్‌లో ఉంటూ చదువుకుంటోంది. ఉదయం కిటికీపై ఆరేసిన బట్టలు తీస్తుండగా విద్యుత్ షాక్ తగిలి అక్కడికక్కడే మృతి చెందింది. హాస్టల్ యాజమాన్యం, పాఠశాల సిబ్బంది నిర్లక్ష్యం వల్లే ప్రమాదం జరిగిందని ఆరోపిస్తూ బంధువులు, ఆదివాసీ సంఘాలు ఆందోళన చేపట్టారు.

AP· 7 Aug 2026

స్థానిక ఎన్నికల నిర్వహణకు గ్రీన్ సిగ్నల్

ఆంధ్రప్రదేశ్‌లో స్థానిక సంస్థల ఎన్నికల నిర్వహణకు అధికారులు సిద్ధంగా ఉండాలని రాష్ట్ర ఎన్నికల కమిషనర్ అనిల్‌చంద్ర పునేఠా ఆదేశించారు. ఎన్నికలు ఎప్పుడైనా జరిగే అవకాశం ఉన్నందున అవసరమైన అన్ని ఏర్పాట్లు పూర్తిచేయాలని సూచించారు. విజయవాడలో జరిగిన సమీక్ష సమావేశంలో మున్సిపల్, పంచాయతీరాజ్ శాఖల అధికారులు పాల్గొన్నారు. మొత్తం 123 మున్సిపాలిటీలు, కార్పొరేషన్లు, నగర పంచాయతీలకు ఎన్నికలు నిర్వహించే దిశగా చర్యలు కొనసాగుతున్నాయని తెలిపారు. ఓటర్ల తుది జాబితా, పోలింగ్ కేంద్రాల ఏర్పాటుపై సన్నద్ధత కొనసాగుతోందన్నారు.

AP· 7 Aug 2026

APలో కొత్త పాలసీకి గ్రీన్ సిగ్నల్

APలో ప్రభుత్వ-ప్రైవేట్ భాగస్వామ్య (PPP) ప్రాజెక్టులకు కొత్త విధానానికి రాష్ట్ర మంత్రిమండలి ఆమోదం తెలిపింది. CM చంద్రబాబు అధ్యక్షతన జరిగిన సమావేశంలో భారీ పెట్టుబడుల సమీకరణ, ప్రాజెక్టుల వేగవంతమైన అమలు, సమర్థ పర్యవేక్షణ లక్ష్యంగా కొత్త పాలసీకి గ్రీన్‌సిగ్నల్ ఇచ్చారు. ప్రస్తుతం రాష్ట్రంలో రూ.1.23 లక్షల కోట్ల విలువైన PPP ప్రాజెక్టులు కొనసాగుతున్నాయి. ఆర్థికంగా సాధ్యంకాని ప్రాజెక్టులకు వయబిలిటీ గ్యాప్ ఫండింగ్‌తోపాటు వడ్డీలేని రుణాలు అందించేందుకు ప్రత్యేక బ్రిడ్జ్‌ఫండ్ ఏర్పాటు చేయాలని నిర్ణయించారు.

AP· 6 Aug 2026

17 నుంచి 20 వరకు ఏపీ అసెంబ్లీ సమావేశాలు

AP: ఈనెల 17 నుంచి 20వ తేదీ వరకు ఏపీ వర్షాకాల అసెంబ్లీ సమావేశాలు నిర్వహించాలని కేబినెట్ నిర్ణయించింది. ఇందులో వివిధ అంశాల మీద చర్చించాలని తీర్మానించింది. విశాఖలో మురికివాడల అభివృద్ధికి కొత్త పథకానికి కేబినెట్ గ్రీన్ సిగ్నల్ ఇచ్చింది. మూడు సహకార షుగర్ ఫ్యాక్టరీల లిక్విడేషన్‌కు నిర్ణయం తీసుకుంది.

AP· 6 Aug 2026

హైవేపై అదుపుతప్పిన కారు.. పొలాల్లో బోల్తా

AP: తిరుపతి జిల్లాలో జరిగిన ఘోర రోడ్డు ప్రమాదంలో అక్కాచెల్లెలు మృతి చెందారు. బెంగళూరులో సాఫ్ట్‌వేర్ ఇంజినీర్‌గా పనిచేస్తున్న చిన్నగొట్టిగల్లు మండలంలోని బోడిరెడ్డి గారిపల్లెకి చెందిన అనిల్‌కుమార్ తన భార్య మానస, మరదలు గౌతమితో కలిసి స్వగ్రామానికి కారులో బయలుదేరారు. వి.కోట మండలం రామాపురం సమీపంలో కారు అదుపుతప్పి పొలాల్లోకి దూసుకెళ్లి బోల్తా పడింది. గౌతమి అక్కడికక్కడే మృతిచెందగా, తీవ్రంగా గాయపడిన మానసను ఆస్పత్రికి తరలిస్తుండగా ప్రాణాలు కోల్పోయింది. అనిల్‌కుమార్ గాయాలతో చికిత్స పొందుతున్నారు.

AP· 6 Aug 2026

పెద్దపులి సంచారం.. గ్రామంలో భయం భయం

AP: నంద్యాల జిల్లా బండి ఆత్మకూరు మండలం సింగవరం గ్రామంలో పెద్దపులి సంచారం కలకలం రేపింది. గ్రామ శివారులోని చెరువు సమీపంలో ఆవుల మందపై పెద్దపులి దాడి చేయడంతో రెండు ఆవులు అక్కడికక్కడే మృతి చెందాయి. సమాచారం అందుకున్న అటవీ శాఖ అధికారులు ఘటనాస్థలానికి చేరుకుని పరిశీలించారు. పులి అడుగుజాడలను గుర్తించి దాడి చేసినది పెద్దపులేనని ప్రాథమికంగా నిర్ధారించారు. పులి ఇంకా పరిసర ప్రాంతాల్లో సంచరించే అవకాశం ఉన్నందున గ్రామస్థులు అప్రమత్తంగా ఉండాలని, ఒంటరిగా అడవి లేదా చెరువు ప్రాంతాలకు వెళ్లొద్దని సూచించారు.

AP· 6 Aug 2026

హస్తకళలకు క్యూఆర్ కోడ్‌.. దేశంలోనే తొలిసారిగా!

AP: రాష్ట్రంలో హస్తకళలకు టెక్నాలజీని జోడిస్తూ ప్రభుత్వం కీలక నిర్ణయం తీసుకుంది. డిప్యూటీ CM పవన్ కల్యాణ్ సూచనలతో దేశంలో తొలిసారిగా హ్యాండీక్రాఫ్ట్ ప్రొడక్ట్స్‌కు క్యూఆర్ కోడ్‌ విధానాన్ని తీసుకొచ్చింది. ‘లేపాక్షి’ ఆధ్వర్యంలో స్పెషల్‌గా డిజైన్ చేసిన క్యూఆర్ కోడ్‌ వ్యవస్థను స్టార్ట్ చేశారు. కళాఖండంపై ఉన్న క్యూఆర్ కోడ్‌ను స్కాన్ చేయగానే పూర్తి ఇన్ఫర్మేషన్ అందుబాటులోకి వస్తుంది. దీంతో ఫేక్ హ్యాండీక్రాఫ్ట్ ప్రొడక్ట్స్‌కు అడ్డుకట్ట పడటంతో పాటు, ఏపీ కళలకు మంచి గుర్తింపు వస్తుందని అధికారులు తెలిపారు.

AP· 6 Aug 2026

విశాఖ డెవలప్‌మెంట్‌కు CM గ్రీన్ సిగ్నల్

విశాఖపట్నం ఎకనమిక్ రీజియన్(VER) సమగ్ర అభివృద్ధికి CM చంద్రబాబు కీలక ఆదేశాలు జారీ చేశారు. అన్ని ప్రాంతాలు, అన్ని రంగాలను కలుపుకొని సూక్ష్మ ప్రణాళికలు రూపొందించాలని అధికారులను ఆదేశించారు. ఉండవల్లి క్యాంప్ కార్యాలయంలో సమీక్షించారు. విద్యాసంస్థలు, విశ్వవిద్యాలయాలను కూడా అభివృద్ధి ప్రణాళికల్లో భాగం చేయాలని సూచించారు. VER పరిధిలో రూ.9.50 లక్షల కోట్ల పెట్టుబడులకు అవకాశం ఉందన్నారు. గూగుల్ ఏఐ డేటా సెంటర్, ఆర్సెలార్ మిత్తల్, నిప్పన్ స్టీల్ ప్లాంట్ వంటి ప్రాజెక్టులతో విశాఖ పారిశ్రామికంగా ఎదుగుతోందన్నారు.

AP· 5 Aug 2026

సీఎం చంద్రబాబు ఘనాపాటి: YS షర్మిల

AP: అబద్ధాలను అందంగా చెప్పడంలో సీఎం చంద్రబాబు ఘనాపాటి అని ఏపీసీసీ అధ్యక్షురాలు వైఎస్ షర్మిల విమర్శించారు. రెండేళ్ల పాలనపై కుటమి ప్రోగ్రెస్ రిపోర్టు ఈ దశాబ్దపు అతి పెద్ద జోక్ అని ‘ఎక్స్’లో రాశారు. అది పూర్తిగా గతి తప్పిన నివేదిక అన్నారు. నాలుగు సూత్రాల పాలన అపహాస్యమని, అభివృద్ధి బూటకం, సంపద సృష్టి మోసం, సమతుల్యత పచ్చి అబద్ధం అంటూ కూటమి ప్రభుత్వంపై ఆరోపణలు చేశారు. రెండేళ్ల కూటమి పాలన 24 మోసాలమయం అని పేర్కొన్నారు.

AP· 4 Aug 2026

ఆరు దాటాక బయటకు రావాలంటే హడల్

AP: శ్రీకాకుళం జిల్లా పాత్రునివలస టిడ్కో కాలనీలో ఆరుగురు యువకుల వల్ల సాయంత్రం ఆరు గంటలు దాటిన తర్వాత కాలనీవాసులు హడలిపోతున్నారు. ఈ నెల 2న రోడ్డుపై పిల్లలు ఆడుతుండగా కొందరు యువకులు బైక్‌ల మీద వేగంగా వచ్చారు. శెట్టి చిన్నారావు వాళ్లని నిలదీయడంతో ఆయన్ని కొట్టారు. బైక్‌లపై వచ్చేవాళ్లని ఎవరైనా ఆపితే అంతు చూస్తామని బెదిరించారు. దీంతో జనాలు హడలిపోతున్నారు.

▶

AP· 4 Aug 2026

నందిగామలో పసుపు రంగు కప్పల కలకలం!

ఆంధ్రప్రదేశ్‌లోని NTR జిల్లా నందిగామలో వర్షాల కారణంగా వింత సంఘటన వెలుగుచూసింది. అర్ధరాత్రి కురిసిన భారీ వర్షానికి పసుపు రంగు కప్పలు గుంపులుగా బయటకు రావడంతో స్థానికులు ఆశ్చర్యపోయారు. అయితే ఇవి 'ఇండియన్ బుల్‌ఫ్రాగ్' జాతికి చెందిన మగ కప్పలని, మేటింగ్ సీజన్ (సంభోగ కాలం) లో ఆడ కప్పలను అట్రాక్ట్ చేసేందుకే ఇలా బ్రైట్ ఎల్లో కలర్‌లోకి మారతాయి. మీకు ఈ ఇండియన్ బుల్‌ఫ్రాగ్ గురుంచి తెలిస్తే కామెంట్ చేయండి.

AP· 4 Aug 2026

ప్రోటోకాల్ పాటించలేదని MLA వాకౌట్

AP: NTR జిల్లా ఎ.కొండూరు మండలం అట్లప్రగడలో నిర్వహించిన పట్టాదారు పాసుపుస్తకాల పంపిణీ కార్యక్రమంలో ప్రోటోకాల్ వివాదం నెలకొంది. కార్యక్రమానికి హాజరైన MLA కొలికపూడి శ్రీనివాసరావు, MROతో పాటు సంబంధిత అధికారులు గైర్హాజరైన విషయంపై తీవ్ర అసంతృప్తి వ్యక్తం చేశారు. డిప్యూటీ తహసీల్దార్ మాత్రమే హాజరుకావడంతో ప్రోటోకాల్ పాటించలేదని ఆరోపిస్తూ కార్యక్రమాన్ని బహిష్కరించారు. అనంతరం సంబంధిత అధికారులు తన కార్యాలయానికి వచ్చి వివరణ ఇవ్వాలని ఆదేశిస్తూ MLA అక్కడి నుంచి వెళ్లిపోయారు.

AP· 4 Aug 2026

శ్రీశైలం ప్రాజెక్టులోకి 100 టీఎంసీలు

AP: ఎగువ కురుస్తున్న వర్షాల కారణంగా శ్రీశైలం జలాశయానికి కృష్ణా నది ప్రవాహం భారీగా వస్తోంది. ఉదయం జలాశయం నీటిమట్టం 858.70 అడుగులుగా, నీటి నిల్వ 101.9210 టీఎంసీలుగా నమోదైంది. ప్రస్తుతం ఇన్‌ఫ్లో 1,53,543 క్యూసెక్కులు, అవుట్‌ఫ్లో 924 క్యూసెక్కులుగా ఉంది. కర్ణాటక నుంచి దిగువకు నీటి విడుదల పెరుగుతుండటంతో జూరాలకు వరద మరింత పెరిగే అవకాశం ఉందని అధికారులు తెలిపారు.

AP· 4 Aug 2026

తెలుగు రాష్ట్రాల్లోనే ఎక్కువగా విదేశీ ఉద్యోగాల మోసాలు

AP: గత మూడేళ్లలో దేశవ్యాప్తంగా వచ్చిన విదేశీ ఉద్యోగ మోసాల కంప్లైంట్లలో తెలుగు రాష్ట్రాలే టాప్‌లో ఉన్నాయని విదేశీ వ్యవహారాల మంత్రిత్వ శాఖ తెలిపింది. 1,495 ఫిర్యాదులతో ఆంధ్రప్రదేశ్ టాప్‌లో ఉండగా, 339 ఫిర్యాదులతో తెలంగాణ నాలుగో స్థానంలో ఉంది. 625తో కేరళ రెండు, 357తో తమిళనాడు మూడు స్థానాల్లో ఉన్నాయి. దేశవ్యాప్తంగా 4,000 ఫిర్యాదుల్లో ఏపీ వాటా దాదాపు 37 శాతం.

▶

AP· 4 Aug 2026

భద్రత కరువు.. భయం నీడలో కాలనీలు

AP: విశాఖపట్నం భీమునిపట్నం పరిధిలోని మారికవలస రాజీవ్ గృహకల్ప కాలనీ, బక్కన్నపాలెం ప్రాంతాల్లో భద్రతా సమస్యలు తీవ్ర ఆందోళన కలిగిస్తున్నాయి. 5,200కుపైగా కుటుంబాలు నివసిస్తున్న ఈ ప్రాంతాల్లో వీధి దీపాలు, CC కెమెరాలు లేకపోవడంతో దొంగతనాలు, వాహనాల నుంచి పెట్రోల్ చోరీలు పెరుగుతున్నాయని స్థానికులు వాపోతున్నారు. రాత్రివేళల్లో మద్యం మత్తులో అల్లర్లు, రాష్ డ్రైవింగ్ కారణంగా మహిళలు, వృద్ధులు భయంతో బయటకు రావడం లేదని ఆవేదన వ్యక్తం చేశారు.

AP· 4 Aug 2026

పంట దిగుబడి రాక.. అప్పులు తీర్చలేక

AP: మార్కాపురం జిల్లా పెద్దకందుకూరు గ్రామంలో అప్పుల భారంతో మనస్తాపానికి గురైన రైతు కోడావత్ పెద్ద రామయ్య (46) చికిత్స పొందుతూ మృతి చెందాడు. మూడు ఎకరాల సొంత భూమితో పాటు మరో మూడు ఎకరాలు కౌలుకు తీసుకుని సాగు చేసిన ఆయనకు గత కొన్నేళ్లుగా పంట దిగుబడి రాక, గిట్టుబాటు ధరలు లేక తీవ్ర అప్పులు అయ్యాయి. మనస్తాపంతో గత నెల 23న పొలం వద్ద పురుగుల మందు తాగగా, కుటుంబసభ్యులు ఆసుపత్రికి తరలించారు. గుంటూరులో చికిత్స పొందుతూ కన్నుమూశారు. మృతుడికి భార్య, ముగ్గురు పిల్లలు ఉన్నారు.