AP

AP· 13 Aug 2026

VB-GRAM-Gలో నిర్లక్ష్యం.. 36 మంది ఏపీవోలకు షాక్‌

AP: రాష్ట్రంలో VB-GRAM-G పథకంలో వర్కర్స్‌కు పని కల్పించడంలో నెగ్లిజెన్స్ చేసిన 36 మంది ఏపీవోలపై డిసిప్లినరీ యాక్షన్స్ తీసుకోవాలని SRDS మెంబర్‌ సెక్రటరీ ఆదేశించారు. 12 జిల్లాలకు చెందిన ఏపీవోలపై యాక్షన్ తీసుకోవాలని ఆయా జిల్లాల డ్వామా పీడీలను ఆదేశించారు. జూలై 1 నుంచి ఈ స్కీమ్ అమల్లోకి వచ్చిన పనులు కల్పించడంలో నెగ్లిజెన్స్ చేసినట్లు అధికారులు గుర్తించారు. ఏపీవోల ఎక్స్‌ప్లనేషన్స్ సాటిస్‌ఫాక్షన్‌గా లేకపోవడంతో చర్యలకు ఆదేశించారు.

AP· 13 Aug 2026

పులి మృతి కేసులో అటవీ అధికారి సస్పెండ్

AP: నంద్యాల జిల్లా ఆత్మకూరు అటవీ డివిజన్‌లో పెద్దపులి మృతి ఘటన కలకలం రేపింది. వేటగాళ్లు ఏర్పాటు చేసిన ఉచ్చులో చిక్కుకుని పులి మృతి చెందగా, అటవీ సిబ్బంది ఉన్నతాధికారులకు సమాచారం ఇవ్వకుండా కళేబరాన్ని దహనం చేసినట్లు అధికారులు గుర్తించారు. ఈ వ్యవహారంలో ఇందిరేశ్వరం బీట్ ఫారెస్ట్ సెక్షన్ ఆఫీసర్ మెహబూబ్ బాషాను సస్పెండ్ చేశారు. గతేడాది సెప్టెంబర్‌లోనే పులి మృతి చెందినట్లు అధికారులు వెల్లడించారు. బాషాతో పాటు ఏడుగురు ప్రొటెక్షన్ వాచర్ల ప్రమేయంపైనా విచారణ జరుగుతోంది.

▶

AP· 13 Aug 2026

కానిస్టేబుల్‌పై అటాక్.. ఇద్దరు యువకులు అరెస్ట్

AP: తిరుపతి జిల్లా శ్రీకాళహస్తిలో ఆగస్టు 11న రోడ్డు ప్రమాదం జరిగిన ప్రాంతంలో ట్రాఫిక్‌ను క్లియర్ చేస్తున్న హెడ్ కానిస్టేబుల్ రమణయ్యతో ఇద్దరు యువకులు వాగ్వాదానికి దిగారు. వారిలో అచ్చి శ్రీనివాసులు<a href="https://www.theclearcutnews.com/n/bgHVjsn"> కత్తితో</a> దాడికి యత్నించగా, అప్రమత్తమైన రమణయ్య తృటిలో తప్పించుకున్నారు. కేసును సీరియస్‌గా తీసుకున్న పోలీసులు అచ్చి శ్రీనివాసులు (22), బీటెక్ విద్యార్థి సముద్రాల జితేంద్ర కుమార్ (20)ను అరెస్ట్ చేశారు. ప్రధాన నిందితుడు శ్రీనివాసులును పట్టణ వీధుల్లో నడిపించుకుంటూ తీసుకెళ్లి కోర్టులో హాజరుపరిచారు.

AP· 13 Aug 2026

పరిశ్రమలకు బిగ్ బూస్ట్

ఆంధ్రప్రదేశ్‌లో పరిశ్రమలకు మరింత ఊతమిచ్చేలా ప్రభుత్వం కీలక నిర్ణయం తీసుకుంది. ఈ ఏడాది డిసెంబరు నుంచి పరిశ్రమలకు అందించే ప్రోత్సాహకాలను ఎస్క్రో ఖాతా ద్వారా చెల్లించాలని CM చంద్రబాబు అధికారులను ఆదేశించారు. సచివాలయంలో జరిగిన 20వ రాష్ట్ర పెట్టుబడుల ప్రోత్సాహక బోర్డు (SIPB) సమావేశంలో ఇంధనం, ఐటీ, ఎలక్ట్రానిక్స్, ఫుడ్ ప్రాసెసింగ్ రంగాలకు చెందిన 25 ప్రాజెక్టులకు రూ.2.08 లక్షల కోట్ల పెట్టుబడుల ప్రతిపాదనలను SIPB ఆమోదించింది. ఈ ప్రాజెక్టుల ద్వారా 21,667 మందికి ప్రత్యక్ష ఉపాధి అవకాశాలు లభించనున్నాయి.

AP· 13 Aug 2026

కడపలో భారీ ఖనిజ నిక్షేపాలపై ఫోకస్

AP: కడప బేసిన్‌లో కీలకమైన ఖనిజాల అన్వేషణకు ఆంధ్రప్రదేశ్ ప్రభుత్వం చర్యలు చేపట్టింది. వేంపల్లి, వేముల ప్రాంతాల్లో లిథియం, గాలియం నిక్షేపాలపై పరిశోధనలు నిర్వహించేందుకు రాష్ట్ర గనులశాఖ నేషనల్ జియోఫిజికల్ రీసెర్చ్ ఇన్‌స్టిట్యూట్‌తో ఒప్పందం కుదుర్చుకుంది. CM చంద్రబాబు సమక్షంలో ఒప్పంద ప్రక్రియ పూర్తయింది. ఇదే సమయంలో గనుల రంగంలో పరిశోధన, ఆధునిక సాంకేతికత, నైపుణ్యాభివృద్ధి కోసం ధన్‌బాద్ ఐఐటీతో మరో ఒప్పందం జరిగింది. రాష్ట్రంలో గనుల రంగానికి సంబంధించిన సెంటర్ ఫర్ ఎక్స్‌లెన్స్ ఏర్పాటు చేయాలని నిర్ణయించారు.

AP· 12 Aug 2026

స్టూడెంట్స్‌కు నీళ్ల చారు, ఉడకని అన్నం

AP: కర్నూలు జిల్లా హొళగుంద ప్రభుత్వ పాఠశాల, కళాశాలల్లో మధ్యాహ్న భోజనం నాణ్యతపై SFI నాయకులు ఆగ్రహం వ్యక్తం చేశారు. విద్యార్థులకు నీళ్ల చారు, సరిగ్గా ఉడకని అన్నం అందిస్తున్నారని ఆరోపిస్తూ విద్యార్థులతో కలిసి తహసీల్దార్ కార్యాలయాన్ని ముట్టడించారు. ప్రభుత్వ జూనియర్ కళాశాల నుంచి ఎమ్మార్వో కార్యాలయం వరకు భారీ ర్యాలీ నిర్వహించి, అనంతరం కార్యాలయం ఎదుట ధర్నా చేపట్టారు. ప్రస్తుత వంట ఏజెన్సీని వెంటనే రద్దు చేసి, నాణ్యమైన, పౌష్టికాహారం అందించే ఏజెన్సీని ఏర్పాటు చేయాలని డిమాండ్ చేశారు.

AP· 12 Aug 2026

మనవడి కోసం 400 KM పాదయాత్ర

AP: గుంటూరు కృష్ణానగర్‌కు చెందిన ఆకుల కామేశ్వరి మనవడు ధనుష్‌(20) రెండేళ్ల క్రితం అనారోగ్యానికి గురై కాళ్లు, చేతులు చచ్చుబడిన పరిస్థితికి చేరుకున్నాడు. వైద్యులు కోలుకోవడం కష్టమని చెప్పడంతో వెంకన్నపై భారం వేసిన కామేశ్వరి, మనవడి ఆరోగ్యం మెరుగుపడితే గుంటూరు నుంచి తిరుమలకు నడిచి వస్తానని మొక్కుకున్నారు. ఆరోగ్యంలో కొంత మార్పు రావడంతో జూన్‌ 11న పాదయాత్ర ప్రారంభించారు. 57రోజుల పాటు గోవింద నామస్మరణ చేస్తూ 400కిలో మీటర్లు ప్రయాణించి తిరుమలకు చేరుకుని శ్రీవారిని దర్శించుకున్నారు.

AP· 12 Aug 2026

ఆక్వా రైతులకు ప్రభుత్వం భరోసా: అచ్చెన్నాయుడు

AP: రాష్ట్రంలోని ఆక్వా రంగాన్ని దేశానికే రోల్ మోడల్‌గా తీర్చిదిద్దేందుకు కూటమి ప్రభుత్వం చర్యలు తీసుకుంటోందని మంత్రి అచ్చెన్నాయుడు తెలిపారు. పశ్చిమగోదావరి జిల్లా పాలకొల్లులో నిర్వహించిన ఆక్వా రైతు మహాసభలో ఆయన మాట్లాడారు. రొయ్యల మేత ధరలను తగ్గించేందుకు ప్రభుత్వం ప్రత్యేక కార్యాచరణ రూపొందించిందన్నారు. మేత తయారీ పరిశ్రమలు, రైతులు, అధికారులు, ప్రతినిధులతో కమిటీ ఏర్పాటు చేసి, ధరల్లో మార్పులు చేయాలంటే అందరి ఆమోదం తీసుకునే విధానం తీసుకొచ్చామని చెప్పారు.

AP· 12 Aug 2026

రైతుల కోసం కమాండ్ కంట్రోల్ రూమ్

AP: ఎల్‌నినో ప్రభావంతో వర్షాభావ పరిస్థితులు నెలకొన్న నేపథ్యంలో సాగునీటి కంటే తాగునీటి సరఫరాకే ప్రభుత్వం అధిక ప్రాధాన్యం ఇస్తుందని మంత్రి నాదెండ్ల మనోహర్ తెలిపారు. విజయవాడ పౌరసరఫరాలశాఖ కార్యాలయంలో ఆయన మాట్లాడారు. ఏలూరు జిల్లాలో సాధారణం కంటే 74శాతం తక్కువ వర్షపాతం నమోదైనా వరిసాగు 400శాతం పెరగడంపై ఆందోళన వ్యక్తంచేశారు. తక్కువ నీటితో పండే పంటల వైపు రైతులను ప్రోత్సహించాలని అధికారులను ఆదేశించారు. ధాన్యం కొనుగోళ్లలో జాప్యాన్ని నివారించేందుకు ప్రత్యేక కమాండ్ కంట్రోల్ రూమ్ ఏర్పాటు చేస్తున్నట్లు చెప్పారు.

▶

AP· 11 Aug 2026

లారీ బోల్తా.. కోళ్ల కోసం ఎగబడ్డ జనాలు

AP: తిరుపతి జిల్లా చంద్రగిరి మండలం భాకరాపేట ఘాట్‌రోడ్డులో కోళ్ల లారీ అదుపుతప్పి బోల్తాపడింది. భాకరాపేట నుంచి తిరుపతి వైపు వెళ్తుండగా ఈ ఇన్సిడెంట్ జరిగింది. లారీ బోల్తాపడటంతో అందులోని కోళ్లు రోడ్డుపై చెల్లాచెదురుగా పడిపోయాయి. దీంతో కోళ్లను ఎత్తుకెళ్లేందుకు స్థానికులు, వాహనదారులు పెద్ద సంఖ్యలో అక్కడికి వచ్చారు. రోడ్డుపై పడిపోయిన కోళ్లను బస్తాల్లో నింపుకుని కొందరు తీసుకెళ్లారు. ప్రమాదంతో ఘాట్‌రోడ్డుపై కొంతసేపు రాకపోకలకు ఇబ్బందులు కలిగాయి.

AP· 11 Aug 2026

నీటి కోసం రోడ్డెక్కిన కాలనీవాసులు

AP: సత్యసాయి జిల్లా నల్లచెరువు మండలంలో తాగునీటి సమస్యపై కాలనీవాసులు ఆందోళనకు దిగారు. నెలరోజులుగా పలు కాలనీల్లో నీటి సరఫరా సరిగా లేక ప్రజలు తీవ్ర ఇబ్బందులు పడుతున్నామని వారు తెలిపారు. సమస్యను పలుమార్లు అధికారుల దృష్టికి తీసుకెళ్లినా సమస్య పరిష్కరించలేదని వాపోయారు. ఖాళీ బిందెలతో MPDO కార్యాలయం వద్ద బైఠాయించి నిరసన చేపట్టారు. MPDO అశోక్‌కుమార్‌రెడ్డి లేకపోవడంతో ఈఓఆర్‌డీ, పంచాయతీ కార్యదర్శి వారితో చర్చించారు. నీటి సమస్యకు శాశ్వత పరిష్కారం చూపిస్తామని అధికారులు హామీ ఇవ్వడంతో ఆందోళన విరమించారు.

▶

AP· 11 Aug 2026

భగ్గుమన్న వెలుగొండ ప్రాజెక్ట్ నిర్వాసితులు

AP: నష్ట పరిహారం ఇవ్వకుండా, ఇళ్ల నిర్మాణం పూర్తి కాకుండానే గ్రామాలు వదిలి వెళ్లిపోయాలని అధికారులు ఆదేశించడంపై వెలుగొండ ప్రాజెక్ట్ నిర్వాసితులు భగ్గుమన్నారు. మార్కాపురం జిల్లా కలెక్టర్ కార్యాలయాన్ని ముట్టడించారు. కలెక్టరేట్‌లోకి ప్రవేశించి, తమకు న్యాయం చేయాలని డిమాండ్ చేశారు. నిర్వాసితులకు సీపీఎం కేంద్ర కమిటీ సభ్యురాలు రమాదేవితోపాటు జిల్లా కార్యదర్శి సోమయ్య సంఘీభావం తెలిపారు. ‘పరదాలు కట్టుకుని, బిక్కుబిక్కుమంటూ బతికితే ఆ బాధ మీకు తెలుస్తుందని’ అధికారులు, పాలకులను ఉద్దేశించి రమాదేవి విమర్శించారు.

AP· 11 Aug 2026

కలిసి ఉండలేక.. విడిపోలేక..

AP: పశ్చిమగోదావరి జిల్లా పాలకోడేరు మండలంలో ప్రేమజంట ఆత్మహత్యాయత్నం విషాదంగా మారింది. ప్రేమ వివాహానికి కుటుంబసభ్యులు అంగీకరించకపోవడంతో తీవ్ర మనస్తాపానికి గురైన ఇద్దరూ కలిసి అడవికోడి కాల్వలోకి దూకారు. ఘటనలో యువతి జగదాంబిక మృతి చెందగా, యువకుడు ప్రాణాలతో బయటపడ్డాడు. కాల్వలో కొట్టుకుపోతున్న యువకుడిని గుర్తించిన స్థానికులు వెంటనే రక్షించారు. పోలీసులు, అగ్నిమాపక సిబ్బంది ఘటనా స్థలానికి చేరుకుని యువతి కోసం గాలింపు చేపట్టారు. ఘటనపై పోలీసులు కేసు నమోదు చేసి దర్యాప్తు చేస్తున్నారు.

AP· 11 Aug 2026

AIతో పులి ఫొటో.. భయపెట్టేందుకు బిగ్ స్కెచ్

AP: విశాఖపట్నం ఆరిలోవ PSలోని చిన్నగదిలి కొండ ప్రాంతంలో పులి సంచరిస్తోందంటూ సోషల్ మీడియాలో జరుగుతున్న ప్రచారం ఫేక్ అని ఆరిలోవ CI శ్రీనివాస్ స్పష్టం చేశారు. ఇటీవల 112కు సమాచారం అందడంతో స్పందించిన పోలీసులు, ఫొటో, వీడియో విడుదల చేసిన అప్పలరాజును విచారించారు. అతని సహచరుడైన రాజు అనే వ్యక్తి, ఇతర ఖలాసీలు, కోడ్రైవర్లను భయపెట్టేందుకు AIతో సృష్టించిన నకిలీ పులి ఫోటోను చూపించినట్లు విచారణలో తేలింది. సదరు వ్యక్తిని అదుపులోకి తీసుకున్నామని తెలిపారు. ఆ ఫేక్ న్యూస్‌ను ప్రజలు నమ్మొద్దని సూచించారు.

AP· 11 Aug 2026

యువకుల రక్షణకు లోకేశ్ బిగ్ యాక్షన్

AP: ఉద్యోగాల పేరుతో థాయ్‌లాండ్ వెళ్లి మోసపోయి బ్యాంకాక్‌లో చిక్కుకున్న తెలుగు యువకులకు మంత్రి నారా లోకేశ్ అండగా నిలిచారు. తమను బలవంతంగా మయన్మార్‌కు తరలించేందుకు ప్రయత్నిస్తున్నారని, వెంటనే రక్షించాలని బాధితులు సోషల్‌మీడియాలో వేడుకున్నారు. విషయంపై మంత్రి లోకేశ్ ఎక్స్ వేదికగా స్పందించారు. బాధితుల ఆవేదనను అర్థం చేసుకున్నానని, వారిని సురక్షితంగా స్వరాష్ట్రానికి తీసుకొచ్చేందుకు అధికారులతో మాట్లాడి చర్యలు తీసుకుంటామని భరోసా ఇచ్చారు. వారి రక్షణకు అవసరమైన చర్యలను వేగవంతం చేయాలని అధికారులను ఆదేశించారు.

AP· 11 Aug 2026

సంప్రదాయ కళలకు ఊతం: పవన్ కల్యాణ్

AP: సంప్రదాయ హస్త కళాకారులకు అండగా నిలిచేందుకు రాష్ట్రంలో క్రాఫ్ట్ ఉడ్ బ్యాంకులను ఏర్పాటు చేస్తున్నామని ఉపముఖ్యమంత్రి పవన్ కల్యాణ్ తెలిపారు. సచివాలయంలో క్రాఫ్ట్‌ ఉడ్‌ బ్యాంకుల ఏర్పాటుపై ఆయన సమీక్ష నిర్వహించారు. కళాకారులకు అవసరమైన నాణ్యమైన కలపను తక్కువ ధరకు అందించి, వారి ఉత్పత్తి ఖర్చును తగ్గించడమే లక్ష్యమన్నారు. తొలిదశలో కొండపల్లి, ఏటికొప్పాక, బొబ్బిలి, శెట్టిగుంట, మాధవమాల, ఉదయగిరి ప్రాంతాల్లో ఉడ్ బ్యాంకులు అందుబాటులోకి రానున్నాయి. కళాకారులకు నిరంతరం కలప అందేలా చర్యలు తీసుకుంటున్నట్లు తెలిపారు.

AP· 11 Aug 2026

రాజధాని పనుల్లో వేగం పెంచాలి: అమిత్ షా

AP: అమరావతి నిర్మాణ పనులను త్వరగా పూర్తి చేయాలని కేంద్ర హోంమంత్రి అమిత్ షా TDP MPలకు సూచించారు. TDP పార్లమెంటరీ పార్టీ నేత లావు శ్రీకృష్ణదేవరాయలు నేతృత్వంలో MPలు ఢిల్లీలోని పార్లమెంట్‌లో అమిత్ షాను కలిశారు. ఈ సందర్భంగా అమరావతి నిర్మాణ పురోగతిపై రూపొందించిన కాఫీ టేబుల్ బుక్‌ను ఆయనకు అందజేశారు. రాజధానిలో ప్రస్తుతం జరుగుతున్న నిర్మాణ పనులు, ఇప్పటివరకు సాధించిన పురోగతిని వారు వివరించారు. అమరావతి నిర్మాణానికి కేంద్రప్రభుత్వం ఆర్థిక, చట్టపరమైన సహకారం అందిస్తున్నందుకు ఎంపీలు కృతజ్ఞతలు తెలిపారు.

AP· 11 Aug 2026

రీసర్వేతో భూరికార్డుల ప్రక్షాళన: చంద్రబాబు

AP: సుపరిపాలన అందిస్తామని ఎన్నికల సమయంలో ఇచ్చిన హామీకి కట్టుబడి ప్రజల సమస్యలు తెలుసుకునేందుకు ప్రతినెలా సమావేశాలు నిర్వహిస్తున్నామని CM చంద్రబాబు స్పష్టం చేశారు. గత పాలనలో అస్తవ్యస్తంగా మారిన భూరికార్డులను ప్రక్షాళన చేసేందుకు రెవెన్యూ సంస్కరణలు చేపట్టామని చెప్పారు. ఏలూరు జిల్లా కలిదిండిలో ఆయన పట్టాదారు పాసు పుస్తకాలను పంపిణీ చేశారు. 2027 నాటికి రీసర్వే పూర్తి చేసి రైతులు, భూ యజమానులకు రాజముద్రతో కూడిన పట్టాదారు పాసుపుస్తకాలు అందిస్తామని హామీ ఇచ్చారు.