Local

Local· 18 Aug 2026

కొత్త పంచాయతీ భవనానికి శంకుస్థాపన

TG: మంచిర్యాల జిల్లా కన్నెపల్లి మండలం జన్కపూర్ గ్రామంలో రూ.20 లక్షల వ్యయంతో నిర్మించనున్న నూతన గ్రామపంచాయతీ కార్యాలయ భవనానికి కాంగ్రెస్ మండల అధ్యక్షుడు ఎల్పుల మల్లేష్, సర్పంచ్ బోరిగామ వెంకటేష్ శంకుస్థాపన చేశారు. గ్రామ అభివృద్ధికి అవసరమైన నిధులు మంజూరు చేయించిన ఎమ్మెల్యే గడ్డం వినోద్ వెంకటస్వామికి గ్రామస్తులు కృతజ్ఞతలు తెలిపారు. గ్రామ అభివృద్ధికి నిరంతరం కృషి చేస్తున్న మాజీ మార్కెట్ కమిటీ వైస్ చైర్మన్ మాధవరపు నర్సింగరావుకు ప్రత్యేక ధన్యవాదాలు తెలిపారు.

Local· 18 Aug 2026

కస్తూర్బా గాంధీ స్కూల్‌లో కలెక్టర్ సడన్ చెకింగ్

TG: రాజన్నసిరిసిల్ల జిల్లా వేములవాడ పట్టణంలోని కస్తూర్బాగాంధీ బాలికల విద్యాలయాన్ని కలెక్టర్ గరిమా అగర్వాల్ తనిఖీ చేశారు. ముందుగా ఉపాధ్యాయులు, సిబ్బంది, విద్యార్థుల హాజరు రిజిస్టర్లను పరిశీలించారు. అనంతరం వంటగదిని సందర్శించి కూరగాయలు, పండ్లు, కోడిగుడ్లు, పప్పులు, బియ్యం తదితర ఆహార పదార్థాల నాణ్యతను తనిఖీ చేశారు. వాటి గడువు తేదీలను పరిశీలించారు. విద్యార్థులతో కలిసి భోజనం చేస్తూ, నాణ్యమైన ఆహారం అందుతున్నదా అని ఆరా తీశారు. మెనూ ప్రకారం నాణ్యమైన భోజనం అందించాలని సిబ్బందిని ఆదేశించారు.

Local· 17 Aug 2026

అదర్శ గంగదేవిపల్లి ఎందరికో నేర్పుతోంది!

TG: గ్రామాభివృద్ధిలో అదర్శంగా నిలిచిన వరంగల్ జిల్లా గీసుకొండ మండలం గంగదేవిపల్లి గ్రామానికి సందర్శకులు పెరుగుతున్నారు. నందిపేట్ మండల సర్పంచ్‌లు, ఫోరం ప్రతినిధులు ఈ గ్రామాన్ని సందర్శించారు. అధ్యక్షుడు లింగం అధ్వర్యంలో వివిధ గ్రామాల సర్పంచ్‌లు గంగదేవిపల్లిలో అమలవుతున్న అభివృద్ధి కార్యక్రమాలను చూసి తెలుసుకున్నారు. ఈ గ్రామం 100 శాతం అక్షరాస్యత సాధించడంతోపాటు, సంపూర్ణ మద్యపాన నిషేధం, పరిశుభ్ర నిర్వహణ, స్వయం సమృద్ధిలో ముందుంది.<br>ప్రజల భాగస్వామ్యంతో ఈ విజయాలను ఎలా సాధించారో సర్పంచ్‌లు తెలుసుకున్నారు.

Local· 17 Aug 2026

పులివెందులలో పెరట్లో గంజాయి సాగు

AP: కడప జిల్లా పులివెందుల మండలం ఎర్రబెల్లి గ్రామంలో ఇంటి పెరట్లోనే గంజాయి సాగు చేస్తున్న చింత శేఖర్, చింత రమణను పోలీసులు అరెస్ట్ చేశారు. వారి నుంచి 5 గంజాయి మొక్కలు, సుమారు 500 గ్రాముల గంజాయిని స్వాధీనం చేసుకున్నారు. న్యాయమూర్తి వాళ్లకు రిమాండ్ విధించారు.

Local· 17 Aug 2026

నాగర్ కర్నూల్ జిల్లాలో SIR డ్రాఫ్ట్ ఓటర్ల జాబితా విడుదల

నాగర్‌కర్నూల్ జిల్లాలో SIRలో భాగంగా నాగర్‌కర్నూల్, అచ్చంపేట, కొల్లాపూర్ నియోజకవర్గాలకు సంబంధించిన డ్రాఫ్ట్ ఓటర్ల జాబితాను జిల్లా ఎన్నికల అధికారి, కలెక్టర్ హేమంత్ కేశవ్ పాటీల్ విడుదల చేశారు. జిల్లాలో 910 పోలింగ్ కేంద్రాల పరిధిలో 6,18,592 మంది ఓటర్లు ఉన్నట్లు తెలిపారు. డ్రాఫ్ట్ జాబితాపై ఆగస్టు 17 నుంచి సెప్టెంబర్ 16 వరకు క్లెయిమ్స్, అభ్యంతరాలు స్వీకరిస్తామని, అక్టోబర్ 19న తుది ఓటర్ల జాబితా విడుదల చేస్తామని వెల్లడించారు.

Local· 17 Aug 2026

దళితుల భూములపై ఆక్రమణల చర్యలు అవసరం

AP: పల్నాడు జిల్లా శావల్యాపురం మండలం పిచికలపాలెం గ్రామంలో దళితులకు కేటాయించిన భూములను ఆక్రమించేందుకు ప్రయత్నిస్తున్న వారిపై చర్యలు తీసుకోవాలని దళితులు, ప్రజాసంఘాలు పల్నాడు జిల్లా కలెక్టరేట్ వద్ద ధర్నా నిర్వహించారు. జాయింట్ కలెక్టర్‌కు వినతిపత్రం అందజేశారు. సర్వే నంబర్ 246/సి పరిధిలో 73 మంది దళితులకు ఒక్కొక్కరికి మూడు సెంట్ల చొప్పున ఇంటి స్థల పట్టాలు మంజూరైనా, పొజిషన్ చూపించలేదని ఆరోపించారు. ఈ భూమిపై ఆక్రమణలకు పాల్పడుతున్న వారిపై చర్యలు తీసుకుని ప్లాట్లను లబ్ధిదారులకు అప్పగించాలని కోరారు.

Local· 17 Aug 2026

‘శక్తి’ పథకాన్ని తక్షణమే రద్దు చేయాలి

TG: పాలిటెక్నిక్‌ విద్యార్థుల ప్రయోజనాలను పరిరక్షించాలని డిమాండ్‌ చేస్తూ నిజామాబాద్ జిల్లా నందిపేట మండల కేంద్రంలోని వివేకానంద చౌరస్తాలో విద్యార్థులు రాస్తారోకో నిర్వహించారు. ఈ రాస్తారోకోకు బీఆర్‌ఎస్‌ నందిపేట మండల అధ్యక్షుడు మచ్చర్ల సాగర్‌ మద్దతు ప్రకటించారు. విద్యార్థులతో కలిసి ఆందోళనలో పాల్గొన్నారు. మూడు సంవత్సరాలపాటు ప్రత్యేక సాంకేతిక విద్యను చదివే పాలిటెక్నిక్‌ విద్యార్థులను ఐటీఐ విద్యార్థులతో సమానంగా చూసేలా ప్రభుత్వం తీసుకొస్తున్న నిబంధనలు సరికావని అన్నారు. ‘శక్తి’ పథకం రద్దు చేయాలన్నారు.

Local· 17 Aug 2026

విద్యార్థుల సమస్యలు పరిష్కరించాలని వినతి

AP: కాకినాడ కలెక్టరేట్‌లో నిర్వహించిన PGRS కార్యక్రమంలో SFI విద్యార్థి సంఘం నేతలు జిల్లాలోని విద్యార్థుల సమస్యలను కలెక్టర్ హరేంద్ర ప్రసాద్‌కు దృష్టికి తీసుకెళ్లారు. శంఖవరంలో ఉన్న సాంఘిక సంక్షేమ హాస్టల్‌ను తిరిగి ప్రారంభించాలని అన్నారు. కాకినాడ పి.ఆర్ డిగ్రీ కాలేజ్‌లో బి.బి.ఏ కోర్సును ఈ ఏడాది నుంచి నిలిపివేశారన్నారు. బీబీఏ కోర్సును తిరిగి ప్రారంభించాలన్నారు. విద్యార్థి సంఘాలను హాస్టల్స్‌లోకి వెళ్లకుండా నిషేధిస్తూ రాజ్యాంగానికి వ్యతిరేకమైన జీవోను రద్దు చెయ్యాలని కలెక్టర్‌కు వినతి పత్రం అందజేశారు.

▶

Local· 17 Aug 2026

మైలవరం భూనిర్వాసితుల నిరాహార దీక్ష

AP: ఎన్టీఆర్ జిల్లా మైలవరం తహసీల్దార్ కార్యాలయం వద్ద సిపిఎం ఆధ్వర్యంలో చంద్రాల, వెల్వడం, భూ నిర్వాసితులు నిరాహార దీక్ష చేపట్టారు. 2016లో రోడ్డు వైండింగ్‌లో భాగంగా తమ ఇల్లు, స్థలాలు కోల్పోయామని, 11 ఏళ్లుగా నష్టపరిహారం కోసం ఎదురుచూస్తున్నమని బాధితులు తెలిపారు. 60 కుటుంబాలకు వెంటనే న్యాయం చేయాలని డిమాండ్ చేశారు. మంత్రి లోకేశ్ గ్రామానికి వచ్చి బాధితుల పరిస్థితిని గమనించాలని కోరారు. సమస్య పరిష్కరించుకుంటే దీక్షను విరమించేది లేదంటూ హెచ్చరించారు.

Local· 17 Aug 2026

నర్సాపూర్-యాదగిరిగుట్ట ఆర్టీసీ బస్సు సర్వీసు ప్రారంభం

TG: మెదక్ జిల్లా నర్సాపూర్ నియోజకవర్గ ప్రజల కోసం నర్సాపూర్-యాదగిరిగుట్ట ఆర్టీసీ బస్సు సర్వీసును కాంగ్రెస్ పార్టీ నియోజకవర్గ ఇంచార్జ్ ఆవుల రాజిరెడ్డి ప్రారంభించారు. నర్సాపూర్-వెల్దుర్తి-తూప్రాన్-గజ్వేల్ మీదుగా యాదగిరిగుట్ట వరకు ఈ బస్సు సర్వీస్ కొనసాగనుంది. భక్తులు, మహిళలు, వృద్ధులకు ఈ బస్సు సర్వీస్ ఉపయోగకరంగా ఉంటుందని రాజిరెడ్డి తెలిపారు. కార్యక్రమంలో ఆర్టీసీ అధికారులు, కాంగ్రెస్ పార్టీ నాయకులు, కార్యకర్తలు, ప్రజలు పాల్గొన్నారు.

Local· 17 Aug 2026

రేపు సర్దార్ సర్వాయి పాపన్న గౌడ్ జయంతి

TG: బహుజన వీరుడు సర్దార్ సర్వాయి పాపన్న గౌడ్ 374వ జయంతి వేడుకలకు రేపు జోగులాంబ గద్వాలలో ఘనంగా నిర్వహించనున్నారు. జిల్లా గౌడ సంఘం, ఎస్సీ, ఎస్టీ, బీసీ మైనారిటీ కుల సంఘాల ఆధ్వర్యంలో ఈ వేడుకలు జరగనున్నాయి. కార్యక్రమంలో జిల్లావ్యాప్తంగా ఉన్న గౌడ సోదరులు, ఎస్సీ, ఎస్టీ, బీసీ, మైనారిటీ సంఘ నాయకులు, ప్రజలు అధిక సంఖ్యలో పాల్గొని కార్యక్రమాన్ని విజయవంతం చేయాలని నిర్వాహకులు TGSGDCFL చైర్‌పర్సన్ శ్రీమతి సరితా తిరుపతయ్య కోరుతున్నారు.

Local· 17 Aug 2026

పులివెందులలో ఇకపై 40 వార్డులు

AP: కడప జిల్లా పులివెందుల మున్సిపాలిటీని 40 వార్డులుగా విభజించే ప్రపోజల్‌కు మున్సిపల్ అడ్మినిస్ట్రేషన్ &amp; అర్బన్ డెవలప్‌మెంట్ శాఖ పరిధిలోని కమిషనర్ &amp; డైరెక్టర్ ఆఫ్ మున్సిపల్ అడ్మినిస్ట్రేషన్ ఆమోదం తెలిపింది. 2005 వరకు మేజర్ గ్రామపంచాయతీగా ఉన్న పులివెందుల అనంతరం గ్రేడ్-3 మున్సిపాలిటీగా మారింది. 2019లో గ్రేడ్-2 మునిసిపాలిటీ అయ్యింది. పులివెందులలో ఇకపై 40 వార్డులు ఉంటాయి.

Local· 17 Aug 2026

కల్యాణ లక్ష్మి, షాదీ ముబారక్‌ పథకాలను కాపాడుకోవాలి

TG: కల్యాణ లక్ష్మి, షాదీ ముబారక్‌ పథకాలను కాపాడుకోవాలని, రాష్ట్ర ప్రభుత్వ బాధ్యతారాహిత్యాన్ని నిరసిస్తూ హనుమకొండ జిల్లా పరకాల బస్టాండ్‌ సెంటర్‌లో బీఆర్‌ఎస్‌ ఆధ్వర్యంలో రాస్తారోకో, ధర్నా నిర్వహించారు. మాజీ ఎమ్మెల్యే ధర్మారెడ్డి నేతృత్వంలో కార్యక్రమం చేపట్టారు. మున్సిపల్ కౌన్సిలర్‌ దుబాసి వెంకటస్వామి, బీఆర్‌ఎస్‌ పరకాల పట్టణ ఉపాధ్యక్షుడు నాగరాజు మాట్లాడుతూ కేసీఆర్‌ కల్యాణ లక్ష్మి, షాదీ ముబారక్‌ పథకాలను ప్రవేశపెట్టారని తెలిపారు. ఆ పథకాలను నిలిపేయాలని కాంగ్రెస్ ప్రభుత్వం చూస్తోందని ఆరోపించారు.

Local· 17 Aug 2026

స్ట్రీట్ లైట్స్ వెలగక ప్రజల అవస్థలు

AP: శ్రీకాకుళం జిల్లా మందస మేజర్ గ్రామ పంచాయతీ పరిధిలో స్ట్రీట్ లైట్స్ పనిచెయ్యట్లేదని, రాత్రుల్లో హైస్కూల్ నుంచి కాలేజ్ రోడ్డు జంక్షన్ దారిలో వెళ్లాలంటే విద్యార్థులు, మహిళలు, వృద్ధులు, వాహనదారులు భయాందోళనలకు గురవుతున్నారని జనసేన జిల్లా ప్రధాన కార్యదర్శి సంతోష్ కుమార్ పండా ఆవేదన వ్యక్తం చేశారు. వెంటనే ఈ సమస్య పరిష్కరించాలంటూ మందస MPDO వెంకటరమణను కోరుతూ విజ్ఞాపనా పత్రం అందజేశారు. పన్నుల డబ్బుతో లేదా ఆర్థిక సంఘం నిధులతో గ్రామాల్లో కచ్చితంగా వీధి దీపాలను గ్రామ పంచాయతీ ఏర్పాటు చెయ్యాలని కోరారు.

Local· 17 Aug 2026

ఆర్టీవో ఆఫీస్‌లో అవస్థలు

TG: జోగులాంబ గద్వాల జిల్లా రవాణా శాఖ కార్యాలయంలో ఇంటర్నెట్ సర్వర్లు నిలిచిపోవడంతో సేవలు స్తంభించిపోయాయి. గంటల తరబడి టెక్నికల్ సమస్య తలెత్తడంతో కార్యాలయానికి వచ్చిన వాహనదారులు, ప్రజలు తీవ్ర అవస్థలు పడుతున్నారు. లైసెన్స్ టెస్టులు, లెర్నింగ్ లైసెన్స్‌ల(LLR) జారీ, వాహనాల రిజిస్ట్రేషన్లు, యాజమాన్య బదిలీ వంటి కీలక ప్రక్రియలన్నీ నిలిచిపోయాయి. ముందుగానే స్లాట్లు బుక్ చేసుకుని సమయానికి వచ్చినవాళ్లు టైం, ఫీజు వృథా అవుతోందని ఆవేదన వ్యక్తం చేస్తున్నారు.

▶

Local· 17 Aug 2026

కరువు మండలంగా ప్రకటించాలి

AP: శ్రీకాకుళం జిల్లా మందస మండలాన్ని కరువు మండలంగా ప్రకటించాలని మహేంద్ర రైతు సంఘం, చైతన్య రైతు సంఘాల ప్రతినిధులు డిమాండ్ చేశారు. తహసీల్దార్‌ బి.శ్రీహరికి వినతిపత్రం అందించారు. రైతు సంఘ నాయకులు మాట్లాడుతూ ఎల్‌నినో ప్రభావంతో ఈ ఏడాది సాధారణ వర్షపాతం కంటే 50 శాతం తక్కువ వర్షాలు కురవడంతో వరినారులు, ఇతర పంటలు పూర్తిగా దెబ్బతిన్నాయని తెలిపారు. రైతులకు తక్కువ కాలంలో పండే వరి విత్తనాలతో పాటు చోడి, కంది, కొర్రలు, సామలు, అరికెలు, పొద్దుతిరుగుడు వంటి పంటల విత్తనాలను ఉచితంగా అందించాలని కోరారు.

Local· 17 Aug 2026

షాప్ బోర్డు పెడుతుండగా షాకింగ్ ఘటన

TG: హైదరాబాద్‌ బాలానగర్‌లో షాప్ బోర్డు ఏర్పాటు చేస్తుండగా విద్యుత్‌ తీగలు తగలడంతో సంజు చౌదరి(26) అనే యువకుడు ప్రాణాలు కోల్పోయాడు. బాలానగర్‌ PS పరిధిలోని గురుకృప ప్లైవుడ్‌ అండ్‌ హార్డ్‌వేర్‌ షాప్ వద్ద ఈ ప్రమాదం జరిగింది. బోర్డు ఏర్పాటు చేస్తుండగా పైనున్న కరెంట్ వైర్లు సంజు చౌదరికి తగలడంతో షాక్‌ వచ్చింది. తీవ్రంగా గాయపడిన అతడు అక్కడికక్కడే మృతి చెందాడు. సమాచారం అందుకున్న పోలీసులు ఘటనాస్థలానికి చేరుకుని వివరాలు సేకరించారు. మృతదేహాన్ని పోస్టుమార్టం నిమిత్తం ఆస్పత్రికి తరలించారు.

▶

Local· 17 Aug 2026

ప్రజావాణి ఫిర్యాదులను వెంటనే పరిష్కరించాలి

TG: నిజామాబాద్ జిల్లా నందిపేట్‌లో సోమవారం నిర్వహించిన మండల స్థాయి ప్రజావాణి కార్యక్రమానికి ప్రజల నుంచి విశేష స్పందన లభించింది. MPDO కార్యాలయంలో MPDO బి.శ్రీనివాసరావు అధ్యక్షతన జరిగిన కార్యక్రమంలో వివిధ గ్రామాల ప్రజలు తమ సమస్యలపై అధికారులకు వినతులు అందజేశారు. భూ, రెవెన్యూ, పంచాయతీరాజ్, విద్య, వ్యవసాయం, వైద్యం, గృహ నిర్మాణం, సంక్షేమం తదితర అంశాలపై ఫిర్యాదులు స్వీకరించారు. డిప్యూటీ తహసీల్దార్ అనంత లక్ష్మణ్‌తో పాటు వివిధ శాఖల అధికారులు ప్రజల నుంచి దరఖాస్తులు స్వీకరించారు.