AP

AP· 30 Jun 2026

6 నెలల్లో 78 కేసులు.. ACB రికార్డ్

AP: రాష్ట్రంలో ACB దూకుడు పెంచింది. జనవరి నుంచి జూన్‌ వరకూ రాష్ట్రవ్యాప్తంగా 78కి పైగా కేసులు నమోదు చేసి రికార్డు సృష్టించింది. నెలకు పదికి తగ్గకుండా ACB అధికారులు ట్రాప్‌ కేసులు నమోదు చేస్తున్నారు. ఆరు నెలల్లో 13 మంది అవినీతి అధికారులను అక్రమాస్తుల కేసుల్లో జైలుకు పంపారు. సబ్‌ రిజిస్ట్రార్‌ కార్యాలయాలు, మున్సిపాలిటీల్లోని పట్టణ ప్రణాళిక విభాగాల్లో ప్రజల్ని పీడించే అవినీతి ఆఫీసర్స్‌కు చెక్ పెడుతున్నారు. ప్రభుత్వ కార్యాలయాల్లో ఎవరైనా లంచం అడిగితే తమకు ఫిర్యాదు చేయాలని ACB DG అతుల్‌ సింగ్‌ ప్రజలకు సూచించారు.

AP· 30 Jun 2026

రెండేళ్లు గడిచినా తమ సమస్యలు పరిష్కరించలేదు

AP: కూటమి ప్రభుత్వం అధికారంలోకి వచ్చి రెండేళ్లు గడిచినా ఇప్పటివరకు తమ సమస్యలు పరిష్కరించలేదని AP రెవెన్యూ అసోసియేషన్ అధ్యక్షుడు బొప్పరాజు వెంకటేశ్వర్లు విమర్శించారు. తూర్పుగోదావరి జిల్లా కలెక్టర్ కీర్తి చేకూరిని కలిసి ఉద్యోగుల సమస్యలపై వినతిపత్రం అందజేశారు. చంద్రబాబు ప్రభుత్వం వస్తే బకాయిలు చెల్లిస్తారని ఉద్యోగులంతా ఆశించారని కానీ, ప్రభుత్వం ఏ ఉద్యోగికి ఎంత బకాయి ఇవ్వాలో చెప్పాలని కోరినా కనీస స్పందనలేదని ఫైరయ్యారు. ఆరు నెలలకోసారి పెరగాల్సిన DAను రెండేళ్లుగా ప్రభుత్వం ప్రకటించలేదన్నారు. అలాగే, PRC కమిషన్‌ను ఇప్పటివరకు నియమించలేదన్నారు.

AP· 30 Jun 2026

ప్రాజెక్టులు వెలవెల.. సాగునీటిపై ఆందోళన

AP: రాష్ట్రంలోని గోదావరి, కృషా నదుల పరీవాహక ప్రాంతాల్లోని జలాశయాల్లోకి జూన్ నెల దాటుతున్నా నీటి ప్రవాహాలు పెద్దగా రాలేదు. మిగతా ప్రాజెక్టులదీ అదే పరిస్థితి. దీంతో వాటి పరిధిలో ఉన్న ఆయకట్టుకు జులైలో వివిధ తేదీల్లో సాగునీటి విడుదల ప్రణాళికలపై పునరాలోచన తప్పేలా లేదు. గత ఏడాది రాష్ట్రంలోని వివిధ జలాశయాల్లో ఈ పాటికి 564.39 TMCల నీటి నిల్వలుండగా.. ఈ ఏడాది ఇప్పటివరకు 416 TMCలే ఉన్నాయి. భారీ సాగునీటి ప్రాజెక్టుల్లో గత సంవత్సరం 524 TMCల నీటి నిల్వలుంటే.. ప్రస్తుతం 381.33 TMCలు మాత్రమే ఉండటం ఆందోళనకు గురిచేస్తుంది.

AP· 29 Jun 2026

అరకు సీట్లన్నీ జనసేనకేనా? నాగబాబు ఓపెన్ స్టేట్‌మెంట్!

రాబోయే ఎలక్షన్స్ లో అరకు పార్లమెంట్ పరిధిలోని అన్ని నియోజకవర్గాల్లో జనసేన పోటీ చేస్తుందని ఆ పార్టీ MLC నాగబాబు అనౌన్స్ చేశారు. కేవలం గిరిజన ప్రజల బాగు కోసమే పవన్ కళ్యాణ్ పంచాయతీరాజ్ మంత్రిగా బాధ్యతలు తీసుకున్నారని ఆయన క్లియర్ చేశారు. అరకు ఏరియా డెవలప్‌మెంట్ కోసం డిప్యూటీ సీఎం పవన్ కళ్యాణ్ పక్కా ప్లాన్‌తో ఉన్నారని, రాబోయే రోజుల్లో అక్కడ జనసేన గెలవడం ఖాయమని నాగబాబు ధీమా వ్యక్తం చేశారు.

AP· 28 Jun 2026

విశాఖ ఎయిర్‌పోర్ట్‌కు గుడ్‌బై

జూలై 8వ తేదీ నుంచి విశాఖపట్నం పాత ఎయిర్‌పోర్ట్ నుంచి వాణిజ్య విమాన ప్రయాణాలు నిలిపివేస్తున్నట్లు అధికారులు ప్రకటించారు. ఇప్పటివరకు భారత నౌకాదళం ఆధీనంలో ఉన్న పాత ఎయిర్‌పోర్టు నుంచి సాగుతున్న ప్రయాణాలన్నీ, ఇకపై 50కిలోమీటర్ల దూరంలో ఉన్న అల్లూరి సీతారామరాజు జిల్లాలోని భోగాపురం ఇంటర్నేషనల్ ఎయిర్‌పోర్ట్ నుంచి జరగనున్నాయి. ఈ కొత్త విమానాశ్రయం అత్యాధునిక సౌకర్యాలతో, పబ్లిక్-ప్రైవేట్ పార్టనర్‌షిప్ మోడల్‌లో రూపొందించారు. విశాఖపట్నం నగరం నడిబొడ్డున ఉన్న పాత విమానాశ్రయం ఇకపై కేవలం ఇండియన్ నేవీ కార్యకలాపాలకే పరిమితం కానుంది.

▶

AP· 28 Jun 2026

వెలిగొండ ప్రాజెక్టు 4 జిల్లాల తలరాతను మారుస్తుంది: CM

AP: వెలిగొండ ప్రాజెక్టు నిర్మాణంలో ఏ ఒక్కరూ నష్టపోకుండా నిర్వాసితులందరినీ ఆదుకుంటామని CM చంద్రబాబు భరోసా ఇచ్చారు. మార్కాపురం జిల్లా దోర్నాల మండలంలోని ఫీడర్ కాల్వ లైనింగ్ పనులను ఆయన పరిశీలించారు. అనంతరం కొత్తూరు పొలాల్లో ప్రాజెక్టు నిర్వాసితులకు రూ.300 కోట్ల పరిహారం చెక్కులు అందించారు. వెలిగొండ ప్రాజెక్టు నాలుగు జిల్లాల ప్రజల తలరాతను మారుస్తుందన్నారు. ప్రాజెక్టులో ప్రధానమైన ఫీడర్ కాల్వ లైనింగ్ పనులపై సీఎం సీరియస్ అయ్యారు. జులై చివరి నాటికి పనులు పూర్తి చేయాలని, లేదంటే సంస్థను బ్లాక్ లిస్టులో పెడతామన్నారు.

AP· 27 Jun 2026

సాయికృష్ణ లాకప్‌డెత్ కేసు.. CI ఫ్రెండ్ సురేష్ అరెస్ట్

AP: సంచలనం సృష్టించిన విజయవాడ సాయికృష్ణ లాకప్‌డెత్ కేసులో సిట్ విచారణ వేగవంతం చేసింది. పరారీలో ఉన్న CI నాగరాజు స్నేహితుడు సురేష్‌ను సిట్ అధికారులు అదుపులోకి తీసుకున్నారు. అతడిని ఓ రహస్య ప్రదేశంలో విచారిస్తూ కీలక సమాచారాన్ని రాబడుతున్నట్లు సమాచారం. సాయికృష్ణ లాకప్‌డెత్ అనంతరం డెడ్‌బాడీని మాయం చేయడంలోనూ, కుటుంబసభ్యులతో రాజీకి రాయబారం నడపడంలోనూ CI నాగరాజుకు సురేష్ సహకరించినట్లు అధికారులు గుర్తించారు. పరారీలో ఉన్న హెడ్ కానిస్టేబుళ్లు అశోక్, జంగం నానిల కోసం సెంట్రల్ డివిజన్ టాస్క్‌ఫోర్స్ ప్రత్యేక బృందాలు గాలిస్తున్నాయి.

AP· 27 Jun 2026

కిడ్నాప్ చేసి.. తలకిందులుగా వేలాడదీసి దాడి

AP: ఏలూరు జిల్లా జంగారెడ్డిగూడెం మండలంలోని ఎ పోలవరం గ్రామానికి చెందిన తమ్మిలేటి అంజిబాబు అనే వ్యక్తి అదే గ్రామంలో పందెంకోడి పుంజులను దొంగిలించాడనే నెపంతో కొంతమంది యువకులు దాడిచేశారు. అంజిబాబును కిడ్నాప్ తరహాలో కొంతమంది వ్యక్తులు కారులో తీసుకువెళ్లి తలకిందులుగా వేలాడతీసి కొట్టినట్లు సమాచారం. బాధితుడు చికిత్స అనంతరం పోలీసులకు ఫిర్యాదు చేస్తే పట్టించుకోవడం లేదని గ్రామస్తులు రోడ్డెక్కారు. కేసు నమోదు చేయడంలో పోలీసులు అలసత్వం చేస్తూ దాడిచేసిన వారికే కొమ్ము కాస్తున్నారని PS ఎదుట గ్రామస్తులు ధర్నా చేశారు.

AP· 27 Jun 2026

సాయికృష్ణ కేసు.. పోలీసులకు NHRC నోటీసులు

AP: విజయవాడ సాయికృష్ణ మిస్సింగ్ కేసులో ప్రధాన నిందితుడిగా ఉన్న CI నాగరాజును అరెస్ట్ చేసి కోర్టులో హాజరుపర్చిన విషయం తెలిసిందే. CI నాగరాజుకు అతడి స్నేహితుడు, ఇద్దరు సిబ్బంది సహకరించినట్టు సిట్ దర్యాప్తులో తేలింది. నాగరాజు అరెస్ట్ తరవాత ఆరోపణలు ఎదుర్కొంటున్న నాని, అశోక్ అజ్ఞాతంలోకి వెళ్లిపోయారు. వీరి కోసం అధికారులు గాలిస్తున్నారు. మరోవైపు పోలీసులపై NHRC ఆగ్రహం వ్యక్తం చేసింది. ఏపీ DGP, విజయవాడ CPలకు నోటీసులు జారీ చేసింది. డిలీట్ చేసిన CCTV ఫుటేజీని రికవరీ చేయాలని, సాయికృష్ణ అస్థికలను వెలికితీయాలని ఆదేశించింది.

AP· 27 Jun 2026

రోడ్డెక్కిన అవుట్‌సోర్సింగ్ టీచర్లు.. మంత్రి ఇంటి ముట్టడి

AP: ప్రభుత్వం ఇచ్చిన మాట నిలబెట్టుకోవాలని, తమకు ఉద్యోగ భద్రత కల్పించాలని డిమాండ్ చేస్తూ గిరిజన గురుకులాల అవుట్‌సోర్సింగ్ ఉపాధ్యాయులు ధర్నా చేశారు. పార్వతీపురం మన్యం జిల్లా సాలూరులోని మంత్రి గుమ్మిడి సంధ్యారాణి ఇంటిని ముట్టడించారు. 15 ఏళ్లుగా సేవలందిస్తున్న ఉపాధ్యాయులను తొలగించడం దారుణమన్నారు. అవుట్‌సోర్సింగ్ ఉపాధ్యాయులకు న్యాయం చేసేవరకు కదిలేది లేదంటూ బైఠాయించారు. న్యాయం చేయండి.. మా ఉద్యోగాల్ని కాపాడండి అని నినాదాలు చేశారు. రాష్ట్రంలో DSC-2025 వల్ల తమ ఉద్యోగ భవిష్యత్ ప్రశ్నార్థకమవుతుండటంతో 40రోజులుగా ఆందోళనలు చేస్తున్నామన్నారు.

AP· 27 Jun 2026

అల్లూరి జిల్లాలో మలేరియా అలజడి

AP: రాష్ట్రంలో సీజనల్ వ్యాధుల తీవ్రత పెరుగుతోంది. దోమల బెడద, కలుషిత నీరు, పారిశుద్ధ్య లోపం తదితర సమస్యలతో ఇన్ఫెక్షన్ల ప్రభావం ఎక్కువవుతోంది. సాధారణ జ్వరాలతో పాటు మలేరియా, డెంగీ, గన్యా జ్వరాలతో ఆసుపత్రులకు తాకిడి పెరుగుతోంది. రాష్ట్రంలో ఈ ఏడాది ఇప్పటివరకు మలేరియాతో ఏడుగురు మృతి చెందారు. రాష్ట్రంలో గతేడాది 7,119 మలేరియా కేసులు నమోదవ్వగా.. వారిలో ఎనిమిది మంది మరణించారు. ఈ ఏడాది జూన్ వరకు 2,392 కేసులు నమోదయ్యాయి. వీటిలో ఏడుగురు మృతి చెందారు. అత్యధికంగా అల్లూరి సీతారామరాజు జిల్లాలో 1,133 మలేరియా కేసులు నమోదయ్యాయి.

AP· 26 Jun 2026

డ్రగ్స్‌ వద్దు బ్రో: సీఎం చంద్రబాబు

AP: అంతర్జాతీయ డ్రగ్స్ వ్యతిరేక దినోత్సవం సందర్భంగా సీఎం చంద్రబాబు ఎక్స్‌ ద్వారా తన సందేశం ఇచ్చారు. డ్రగ్స్‌పై పోరాటం అంటే యువత భవిష్యత్తును కాపాడటమే అన్నారు. ఏపీలో డ్రగ్ ట్రాఫికింగ్‌పై కఠిన చర్యలు కొనసాగుతున్నాయని చెప్పారు. డ్రగ్స్ అక్రమ రవాణాదారులను చట్టం ముందు నిలబెడతామని అన్నారు. డ్రగ్స్ బారినపడ్డ వారికి సహాయం అందించి..పునరావాసం కల్పించడమే ప్రభుత్వ లక్ష్యమని చెప్పారు.

▶

AP· 26 Jun 2026

నెల్లూరులో రొట్టెల పండుగ కోలాహలం

AP: నెల్లూరు బారా షాహీద్‌ దర్గా రొట్టెల పండుగతో జిల్లాలో పండుగ వాతావరణం నెలకొంది. తమ కోర్కెలు నెరవేరాలని ఆకాంక్షిస్తూ వివిధ సుదూర ప్రాంతాల నుంచి భక్తులు పెద్దఎత్తున తరలివస్తుండటంతో ప్రసిద్ధ స్వర్ణాల చెరువు ఘాట్లు ఆధ్యాత్మిక శోభను సంతరించుకున్నాయి. AP ప్రభుత్వం ఈ ఉత్సవాలను ప్రతిష్టాత్మకంగా తీసుకుని అధికారికంగా నిర్వహిస్తోంది. ఈ నెల 26 నుంచి 30 వరకు ఐదురోజుల పాటు వివిధ రకాల సంప్రదాయ కార్యక్రమాలు ఇక్కడ జరగనున్నాయి. పండుగ ప్రారంభమైన తొలిరోజే దాదాపు 3లక్షల మంది భక్తులు దర్గాను దర్శించుకుంటారని అధికారులు అంచనా వేస్తున్నారు.

AP· 26 Jun 2026

షార్ట్ సర్క్యూట్.. క్షణాల్లో కాలిబూడిదైన దుకాణాలు

AP: అంబేద్కర్ కోనసీమ జిల్లాలో ద్రాక్షారామం సమీపంలోని మార్కెట్లో భారీ అగ్నిప్రమాదం చోటు చేసుకుంది. అర్ధరాత్రి దాటిన తర్వాత ఒక్కసారిగా ఎగిసిపడిన మంటలు క్షణాల్లోనే కూరగాయల మార్కెట్ అంతటా వ్యాపించి 40కి పైగా దుకాణాలు కాలి బూడిదయ్యాయి. మార్కెట్లోని ఒక షాపులో జరిగిన షార్ట్ సర్క్యూట్ కారణంగానే మంటలు చెలరేగినట్లు అధికారులు గుర్తించారు. వ్యాపారులకు చెందిన వస్తువులు, నగదు, కూరగాయల నిల్వలు అగ్నికి ఆహుతి కావడంతో సుమారు రూ.2 కోట్ల మేర ఆస్తినష్టం వాటిల్లినట్లు ప్రాథమికంగా గుర్తించారు.

AP· 26 Jun 2026

చిన్నారి మిస్సింగ్ కేసు.. వీడిన కుక్క మృతి మిస్టరీ

AP: కాకినాడ జిల్లా తుని మండలం CH అగ్రహారంలో చిన్నారి జ్ఞానేశ్వరి మిస్సింగ్ కేసులో కీలక మలుపు చోటు చేసుకుంది. కేసు దర్యాప్తులో కీలక ఆధారంగా భావించిన వారి పెంపుడు కుక్క మృతిపై సస్పెన్స్ వీడింది. పెంపుడు కుక్క ఎలాంటి విష ప్రయోగానికి గురికాలేదని, అది కేవలం అనారోగ్యంతోనే మరణించిందని ఫోరెన్సిక్ నివేదికలో నిర్ధారణ అయింది. దీంతో ఈ కేసులో కుక్కను ఎవరైనా కావాలనే చంపేసి ఉంటారనే కోణంలో సాగిన అనుమానాలకు బ్రేక్ పడింది. మిస్సైన చిన్నారి ఆచూకీ కోసం పోలీసుల దర్యాప్తు కొనసాగుతుంది.

AP· 26 Jun 2026

ఆకాశ మార్గంలో మెడిసిన్ డెలివరీ

AP: ట్రాఫిక్‌ చిక్కులు లేకుండా ఆర్డర్‌ చేసిన మందులు ఆకాశ మార్గాన వేగంగా ఇంటికి డెలివరీ చేయనున్నారు. అమరావతి, విజయవాడ, గుంటూరు మధ్య తేలికపాటి హెల్త్‌కేర్‌, కమర్షియల్‌ సరుకులు రవాణా చేసేందుకు వీలుగా బెంగళూరుకు చెందిన ఏరో స్పేస్‌ కంపెనీ ఎయిర్‌బౌండ్‌తో రాష్ట్ర డ్రోన్‌ కార్పొరేషన్‌ ఒప్పందం చేసుకుంది. ఈ మేరకు రోజుకు 10,000 డ్రోన్ల ద్వారా అమరావతి ప్రాంతంలో హెల్త్‌ కేర్‌, తేలికపాటి వాణిజ్య సరుకులను డెలివరీ చేస్తారు. ఇందుకోసం ప్రత్యేకంగా డ్రోన్‌ డెలివరీ నెట్‌వర్క్‌ను త్వరలో ఏర్పాటు చేయనున్నారు.

AP· 25 Jun 2026

20రోజులైనా దొరకని చిన్నారి ఆచూకీ.. తల్లి ఆస్పత్రిపాలు

AP: కాకినాడ జిల్లా తుని మండలం CH అగ్రహారంలో మిస్సైన చిన్నారి జ్ఞానేశ్వరి (జాను) ఆచూకీ 20 రోజులు దాటినా దొరకలేదు. చిన్నారి ఆచూకీ కోసం గాలింపు చర్యలు ముమ్మరంగా జరుగుతున్నప్పటికీ, బిడ్డ దూరమవడంతో జ్ఞానేశ్వరి తల్లి భవానికి తీవ్రమైన దిగులుతో మంచాన పడ్డారు. నిద్ర, ఆహారం లేక ఆమె ఆరోగ్యం క్షీణించడంతో కుటుంబసభ్యులు స్థానిక ఆసుపత్రికి తరలించి వైద్యం అందించారు. చిన్నారి ఆచూకీ కోసం అధికారులు, పోలీసులు గాలింపు చర్యలు కొనసాగిస్తున్నారు. ఏ చిన్న ఆధారాన్నీ వదిలిపెట్టకుండా ముమ్మరంగా గాలిస్తున్నారు.

AP· 25 Jun 2026

అవనిగడ్డ డిపోలో బస్సులు నిలిపివేత

AP: రాష్ట్ర ప్రభుత్వం మహిళలకు తెచ్చిన ఫ్రీ బస్సు స్కీమ్ వల్ల RTC సిబ్బంది, మహిళా ప్రయాణికుల మధ్య వివాదాలు రోజురోజుకూ పెరుగుతున్నాయి. మహిళా ప్రయాణికులు తమపై దురుసుగా ప్రవర్తిస్తూ దాడులకు దిగుతున్నారని కృష్ణా జిల్లా అవనిగడ్డ డిపోలో ఆర్టీసీ డ్రైవర్లు, కండక్టర్లు బస్సు సర్వీసులను నిలిపివేశారు. డిపో గేటు వద్దే నిరసనకు దిగడంతో వందలాది మంది ప్రయాణికులు, పాఠశాలలు, కాలేజీలకు వెళ్లే విద్యార్థులు బస్టాండ్‌లోనే తీవ్ర ఇబ్బందులు పడ్డారు. డ్యూటీలో ఉన్న సిబ్బందిపై కొందరు మహిళలు దాడులు చేస్తున్నారని, తమకు కనీస రక్షణ కరువైందని వాపోయారు.