Local

▶

Local· 20 Aug 2026

చెవుటూరు రోడ్డుపై వాహనదారుల అవస్థలు

AP: NTR జిల్లా జి.కొండూరు మండలం చెవుటూరు గ్రామ ప్రధాన రహదారి అధ్వానంగా మారడంతో ప్రజలు తీవ్ర ఇబ్బందులు ఎదుర్కొంటున్నారు. రహదారిపై భారీ గుంతలు ఏర్పడి, ఇటీవల కురుస్తున్న వర్షాలకు అవి నీటితో నిండిపోయాయి. గుంతల లోతు కనిపించకపోవడంతో వాహనదారులు ప్రమాదాలకు గురవుతున్నారని గ్రామస్తులు చెబుతున్నారు. ముఖ్యంగా ద్విచక్ర వాహనదారులు అదుపుతప్పి జారిపడుతున్న ఘటనలు జరుగుతున్నాయని ఆవేదన వ్యక్తం చేస్తున్నారు. పాఠశాల బస్సులు, అంబులెన్సులు సైతం ఈ మార్గంలో నెమ్మదిగా ప్రయాణించాల్సి వస్తోంది.

Local· 20 Aug 2026

మాకవరపాలెంలో అవగాహన ర్యాలీ

AP: అనకాపల్లి జిల్లా మాకవరపాలెంలో ప్రపంచ దోమల దినోత్సవాన్ని ఆరోగ్యశాఖ అధికారులు అవగాహన కార్యక్రమాలతో నిర్వహించారు. స్థానిక ప్రాథమిక ఆరోగ్య కేంద్రం నుంచి సిబ్బంది ర్యాలీ చేపట్టి ప్రజలకు దోమల వల్ల కలిగే అనారోగ్య సమస్యలపై వివరించారు. వైద్యాధికారి శ్రీనివాసరావు మాట్లాడుతూ.. దోమల ద్వారా మలేరియా, డెంగ్యూ వంటి ప్రమాదకర వ్యాధులు వ్యాపించే అవకాశం ఉందని, ప్రజలు అప్రమత్తంగా ఉండాలని సూచించారు. ఇళ్ల పరిసరాల్లో నీరు నిల్వ ఉండకుండా చూడటం, పరిసరాలను పరిశుభ్రంగా ఉంచడం వల్ల వ్యాధులను నివారించవచ్చని తెలిపారు.

Local· 20 Aug 2026

ఇళ్ల మంజూరు పత్రాల పంపిణీ

TG: నిర్మల్ జిల్లా కౌట్లకే గ్రామంలో ఇందిరమ్మ ఇళ్ల పథకం లబ్ధిదారులకు మంజూరు పత్రాలను అందజేశారు. గ్రామ పంచాయతీ ఆవరణలో నిర్వహించిన కార్యక్రమంలో అర్హులైన లబ్ధిదారులకు పత్రాలను పంపిణీ చేశారు. ఈ సందర్భంగా లబ్ధిదారులు సంతోషం వ్యక్తం చేస్తూ ప్రభుత్వానికి కృతజ్ఞతలు తెలిపారు. ఇందిరమ్మ ఇళ్ల నిర్మాణంతో ఎన్నో పేద కుటుంబాలకు సొంతింటి కల నెరవేరుతుందని గ్రామస్తులు పేర్కొన్నారు. అర్హులైన ప్రతి కుటుంబానికి పథకం ప్రయోజనం అందేలా చర్యలు తీసుకోవాలని వారు కోరారు. కార్యక్రమం

▶

Local· 20 Aug 2026

నర్సంపేటలో హైఅలర్ట్.. ప్రధాన కూడళ్లలో పోలీసులు

TG: వరంగల్ జిల్లా నర్సంపేటలో పోలీసు బందోబస్తు కొనసాగుతోంది. మాజీ ఎమ్మెల్యే పెద్ది సుదర్శన్‌రెడ్డి విగ్రహం తొలగింపు నేపథ్యంలో ఎలాంటి ఉద్రిక్తతలకు తావులేకుండా పోలీసులు మూడోరోజూ పట్టణంలో విస్తృతంగా బందోబస్తు ఏర్పాటు చేశారు. ప్రధాన కూడళ్లు, కీలక ప్రాంతాల్లో సిబ్బందిని మోహరించి పరిస్థితులను నిరంతరం పర్యవేక్షిస్తున్నారు. పోలీసులు పట్టణంలోని పలు ప్రాంతాల్లో గస్తీ నిర్వహిస్తూ అవాంఛనీయ ఘటనలు జరగకుండా ముందస్తు చర్యలు చేపట్టారు.

▶

Local· 20 Aug 2026

రాజీవ్ గాంధీ ఆశయాలను ముందుకు తీసుకెళ్లాలి: పొన్నం

TG: మాజీ ప్రధాని, భారతరత్న రాజీవ్ గాంధీ జయంతి సందర్భంగా హనుమకొండ జిల్లా భీమదేవరపల్లి మండలం ముల్కనూర్ అంబేద్కర్ చౌరస్తాలో ఆయన చిత్రపటానికి మంత్రి పొన్నం ప్రభాకర్ పూలమాల వేసి నివాళులర్పించారు. ఈ సందర్భంగా మంత్రి మాట్లాడుతూ.. దేశ భవిష్యత్తు యువత చేతుల్లోనే ఉందని రాజీవ్ గాంధీ బలంగా విశ్వసించారని పేర్కొన్నారు. యువత అభివృద్ధికి అనేక అవకాశాలు కల్పించేందుకు ఆయన తీసుకున్న చర్యలను గుర్తు చేశారు. దేశ ప్రగతిలో యువత భాగస్వామ్యాన్ని పెంచేందుకు రాజీవ్ గాంధీ చేసిన కృషి చిరస్మరణీయమని అన్నారు.

Local· 20 Aug 2026

రాజీవ్ గాంధీ సేవలు మరువలేనివి: ఎమ్మెల్యే శంకర్

TG: రాజీవ్ గాంధీ దేశంలో సాంకేతిక రంగానికి కొత్త దిశ చూపిన నాయకుడని షాద్‌నగర్ ఎమ్మెల్యే వీర్లపల్లి శంకర్ కొనియాడారు. రాజీవ్ గాంధీ జయంతి సందర్భంగా రంగారెడ్డి జిల్లా షాద్‌నగర్‌లోని రాజీవ్ కూడలిలో ఆయన విగ్రహానికి పూలమాల వేసి నివాళులర్పించారు. అనంతరం ప్రభుత్వ ఆసుపత్రికి వెళ్లి చికిత్స పొందుతున్న రోగులను పరామర్శించి పండ్లు, బ్రెడ్ పంపిణీ చేశారు. ఈ సందర్భంగా ఎమ్మెల్యే మాట్లాడుతూ.. దేశ అభివృద్ధిలో సాంకేతికతకు ప్రాధాన్యం పెంచి, ఆధునిక భారత నిర్మాణానికి రాజీవ్ గాంధీ బాటలు వేశారని పేర్కొన్నారు.

Local· 20 Aug 2026

గేదెలను తప్పించబోయి గూడ్స్ వాహనం బోల్తా

TG: నల్గొండ జిల్లా మిర్యాలగూడ శివారులో గూడ్స్ వాహనం బోల్తాపడింది. తమిళనాడు నుంచి హైదరాబాద్‌కు వెళ్తున్న వాహనం మార్గమధ్యంలో ఒక్కసారిగా గేదెలు రోడ్డుపైకి రావడంతో డ్రైవర్ వాటిని తప్పించేందుకు ప్రయత్నించాడు. ఈ క్రమంలో వాహనం అదుపుతప్పి రహదారిపై బోల్తా పడింది. డ్రైవర్‌కు ఎలాంటి ప్రాణాపాయం జరగకపోవడంతో స్థానికులు ఊపిరిపీల్చుకున్నారు. ఘటనలో వాహనం కొంతమేర దెబ్బతింది. రహదారులపై పశువులు అకస్మాత్తుగా రావడంతో ప్రమాదాలు జరుగుతున్నాయని స్థానికులు ఆందోళన వ్యక్తం చేస్తున్నారు.

▶

Local· 20 Aug 2026

జాతీయ జెండాపై నిర్లక్ష్యం.. అధికారులపై చర్యలకు డిమాండ్

AP: నెల్లూరు జిల్లా ఇందుకూరుపేట మండలంలో జాతీయ జెండా పట్ల అధికారులు నిర్లక్ష్యంగా వ్యవహరించారని ఆరోపిస్తూ భీం భారత్ సైనిక్స్ ఆధ్వర్యంలో నిరసన చేపట్టారు. ఎం.పి.డి.ఓ. కార్యాలయం ఎదుట నిర్వహించిన కార్యక్రమంలో సంస్థ అధ్యక్షుడు పోలవరపు ఖాజావలి మాట్లాడుతూ.. డేవిస్‌పేట గ్రామ సచివాలయం వద్ద ఆగస్టు 15న ఎగురవేసిన జాతీయ జెండాను నిబంధనల ప్రకారం అదేరోజు సాయంత్రం దించాల్సి ఉన్నప్పటికీ, రెండురోజుల పాటు చీకట్లోనే ఉంచారని ఆరోపించారు. జాతీయ జెండాను గౌరవించడంలో నిర్లక్ష్యం చేసిన బాధ్యులపై చర్యలు తీసుకోవాలన్నారు.

Local· 20 Aug 2026

నూతనకల్‌లో రాజీవ్ గాంధీ జయంతి!

TG : నూతనకల్ మండల కేంద్రంలో మాజీ ప్రధాని రాజీవ్ గాంధీ జయంతి వేడుకలను కాంగ్రెస్ పార్టీ నిర్వహించింది. మండల అధ్యక్షులు కట్టా మల్లారెడ్డి ఆయన ఫోటోకి పూలమాల వేసి నివాళులు అర్పించారు. ఈ సందర్భంగా మల్లారెడ్డి మాట్లాడుతూ, మన దేశానికి కంప్యూటర్ సాంకేతికతను పరిచయం చేసి, 18 ఏళ్లకే ఓటు హక్కు కల్పించిన మహనీయుడు రాజీవ్ గాంధీ అని అన్నారు. నవభారత నిర్మాణం కోసం చేసిన ఆయన సేవలను ఎప్పటికీ మరవలేమన్నారు. ఈ కార్యక్రమంలో కాంగ్రెస్ నాయకులు, కార్యకర్తలు పాల్గొన్నారు.

▶

Local· 20 Aug 2026

ఎస్కార్ట్ వాహనానికి ప్రమాదం.. 10 మందికి గాయాలు

AP: విశాఖపట్నంలో విధులకు వెళ్తున్న పోలీస్ సిబ్బంది వాహనం ప్రమాదానికి గురైంది. గురువారం ఉదయం జూ పార్క్ సమీపంలో పోలీస్ ఎస్కార్ట్ వాహనాన్ని లారీ ఢీకొట్టింది. ఈ ఘటనలో వాహనంలో ఉన్న ఏఆర్ విభాగానికి చెందిన సుమారు 10 మంది కానిస్టేబుళ్లు గాయపడ్డారు. ప్రమాదం జరిగిన వెంటనే తోటి పోలీస్ సిబ్బంది, స్థానికులు స్పందించి క్షతగాత్రులను చికిత్స కోసం అపోలో ఆసుపత్రికి తరలించారు. ప్రమాదానికి దారితీసిన కారణాలపై పోలీసులు దర్యాప్తు ప్రారంభించారు.

Local· 20 Aug 2026

కపటిలో పశువులకు వైద్యం కరువు.. రైతుల ఆవేదన

AP: కర్నూలు జిల్లా ఆదోని మండలం కపటి గ్రామంలో పశువులకు అత్యవసర వైద్యం అందక రైతులు ఇబ్బందులు ఎదుర్కొంటున్నారు. గ్రామంలో వెటర్నరీ డాక్టర్ అందుబాటులో ఉన్నప్పటికీ, అవసరమైన మందులు, వైద్య పరికరాలు లేవని చెప్పి పశువులను ఆదోని పశు వైద్యశాలకు తీసుకెళ్లాలని సూచిస్తున్నారని రైతులు వాపోతున్నారు. దీంతో అత్యవసర సమయాల్లో పశువులను దూరంగా తరలించాల్సి రావడం వల్ల సమయం, డబ్బు వృథా అవుతున్నాయని ఆవేదన వ్యక్తం చేస్తున్నారు. వైద్యం ఆలస్యం కావడంతో పశువుల ప్రాణాలకు కూడా ముప్పు ఏర్పడే పరిస్థితి ఉందన్నారు.

Local· 20 Aug 2026

ఉద్యోగాలు కోల్పోయిన 607 మందికి న్యాయం చేయాలి

AP: విజయవాడలో అర్బన్ ఈ–సేవ ఉద్యోగుల సమస్య మరోసారి తెరపైకి వచ్చింది. 2003 నుంచి ప్రభుత్వ అర్బన్ ఈ–సేవ కేంద్రాల్లో సుమారు 18 ఏళ్లపాటు సేవలందించిన 607 మంది ఉద్యోగులను తిరిగి విధుల్లోకి తీసుకోవాలని ఏపీ ఈ–సేవ కాంట్రాక్ట్ ఎంప్లాయిస్ అసోసియేషన్ డిమాండ్ చేసింది. గత వైసీపీ ప్రభుత్వ హయాంలో ఉద్యోగాలు కోల్పోయిన తమకు న్యాయం చేయాలని ఆగస్టు 17 నుంచి 20 వరకు ఈఎస్‌డీ రాష్ట్ర కార్యాలయం వద్ద ఉద్యోగ సాధన సంకల్ప దీక్షలు చేపట్టారు. కార్యక్రమానికి సీఐటీయూ రాష్ట్ర ప్రధాన కార్యదర్శి ఏవి. నాగేశ్వరరావు మద్దతు తెలిపారు.

Local· 20 Aug 2026

గొల్లప్రోలు మున్సిపాలిటీలో పునర్విభజన

AP: కాకినాడ జిల్లా గొల్లప్రోలు మున్సిపాలిటీలో వార్డుల పునర్విభజన పూర్తయింది. ఇప్పటివరకు ఉన్న 20 వార్డులను 23 వార్డులుగా పునర్వ్యవస్థీకరిస్తూ ఆంధ్రప్రదేశ్ ప్రభుత్వం గెజిట్ నోటిఫికేషన్ విడుదల చేసింది. 2011 జనాభా లెక్కలను ప్రాతిపదికగా తీసుకుని వార్డుల సరిహద్దులను నిర్ణయించారు. పునర్విభజనకు సంబంధించిన సరిహద్దులతో కూడిన 23 వార్డుల వివరాలను పట్టణంలోని ప్రభుత్వ కార్యాలయాల్లో ప్రజల పరిశీలనకు అందుబాటులో ఉంచారు. మున్సిపల్ కమిషనర్ సంపత్తి దివిజ ఆధ్వర్యంలో నోటీస్ బోర్డులో గెజిట్ వివరాలను ప్రదర్శించారు.

Local· 20 Aug 2026

క్రీడా మైదానాలపై నిర్లక్ష్యం.. అధికారులపై స్థానికుల ఆగ్రహం

TG: రంగారెడ్డి జిల్లా శంషాబాద్ సర్కిల్ పరిధిలోని క్రీడా మైదానాల నిర్వహణపై విమర్శలు వెల్లువెత్తుతున్నాయి. కొత్వాల్‌గూడ, శంషాబాద్ డివిజన్లలోని పలు మైదానాలు పిచ్చి మొక్కలు, చెత్తాచెదారంతో నిండిపోయి ఆటలకు అనుకూలంగా లేకుండా మారాయని స్థానికులు చెబుతున్నారు. యువత, చిన్నారుల కోసం ఏర్పాటు చేసిన క్రీడా పరికరాలు కూడా భద్రత లేకపోవడంతో దొంగల పాలయ్యాయని ఆరోపించారు. మైదానాల దుస్థితిపై పలుమార్లు అధికారులకు ఫిర్యాదు చేసినా పట్టించుకోవడం లేదని వాపోయారు.

Local· 20 Aug 2026

ఆఫర్ చూసి మోసపోకండి.. టాస్క్ ఫ్రాడ్‌పై అలర్ట్

AP: టాస్క్ పేరుతో వచ్చే ఆకర్షణీయమైన మెసేజ్‌లకు స్పందిస్తే క్షణాల్లో డబ్బులు కోల్పోయే ప్రమాదం ఉందని పోలీసులు హెచ్చరించారు. ఎన్‌టీఆర్ పోలీస్ కమిషనరేట్ పరిధిలో టాస్క్ ఆధారిత సైబర్ మోసాలపై వారం రోజుల ప్రత్యేక అవగాహన కార్యక్రమాలను ప్రారంభించారు. మైలవరం పోలీస్ స్టేషన్ పరిధిలోని మార్సుమిల్లి గ్రామంలో సీఐ కిషోర్ బాబు ఆధ్వర్యంలో ప్రజలు, యువత, విద్యార్థులకు సైబర్ మోసాలపై అవగాహన కల్పించారు. గుర్తుతెలియని లింకులను క్లిక్ చేయవద్దని, అపరిచితులకు నగదు బదిలీ చేయవద్దని సూచించారు.

Local· 20 Aug 2026

మాంసం వ్యర్థాలతో ప్రజారోగ్యంపై ఆందోళన

TG: జోగులాంబ గద్వాల జిల్లా అయిజ మున్సిపాలిటీ పరిధిలో మాంసం వ్యర్థాల సమస్య స్థానికులను ఇబ్బందులకు గురిచేస్తోంది. ఉప్పల గ్రామానికి వెళ్లే ప్రధాన రహదారి పక్కన ఏర్పాటు చేసిన ప్రైవేట్ కంటైనర్‌లో మాంసం వ్యర్థాలను నిల్వ చేస్తున్నట్లు స్థానికులు చెబుతున్నారు. వ్యర్థాలు కుళ్లిపోవడంతో చుట్టుపక్కల ప్రాంతాల్లో తీవ్రమైన దుర్వాసన వ్యాపిస్తోందని, అటుగా వెళ్లే ప్రయాణికులు, వాహనదారులు ఇబ్బందులు పడుతున్నారని ఆవేదన వ్యక్తం చేస్తున్నారు.

Local· 20 Aug 2026

బొలెరో ఢీకొని దంపతులు మృతి

AP: పల్నాడు జిల్లా వినుకొండ సమీపంలో జరిగిన ఘోర రోడ్డు ప్రమాదం ఓ కుటుంబంలో విషాదాన్ని నింపింది. వెల్లటూరు రోడ్డులోని హనుమాన్ నగర్ వద్ద గురువారం తెల్లవారుజామున బైక్‌పై వెళ్తున్న దంపతులను వెనుక నుంచి వచ్చిన బొలెరో వాహనం బలంగా ఢీకొట్టింది. ఈ ప్రమాదంలో వల్లూరి రవి (58), ఆయన భార్య సావిత్రి (55) తీవ్రంగా గాయపడి అక్కడికక్కడే మృతి చెందారు. మిద్దెబావి కాలనీలోని కుమార్తె ఇంటి నుంచి తిరిగి వస్తుండగా ఈ ఘటన జరిగింది. పోలీసులు ఘటనాస్థలికి చేరుకుని మృతదేహాలను పోస్టుమార్టం కోసం ప్రభుత్వ ఆసుపత్రికి తరలించారు.

Local· 20 Aug 2026

పదేళ్ల సేవలకు గుర్తింపు.. బీర గాంధీకి కీలక పదవి

AP: కాకినాడ జిల్లా రౌతులపూడి మండలం లచ్చిరెడ్డిపాలెం గ్రామానికి చెందిన బీర గాంధీకి అంబేడ్కర్స్ ఇండియా మిషన్‌లో కీలక బాధ్యత దక్కింది. సంస్థతో దాదాపు పదేళ్లుగా కొనసాగుతూ డాక్టర్ బీఆర్ అంబేడ్కర్ ఆశయాలు, సమానత్వం, సామాజిక న్యాయం కోసం పలు కార్యక్రమాల్లో చురుకుగా పనిచేసిన ఆయన సేవలను గుర్తించి సంస్థ వ్యవస్థాపకులు పీవీ సునీల్ కుమార్ రాష్ట్ర సలహా కమిటీ సభ్యుడిగా నియమించారు. ఈ సందర్భంగా బీర గాంధీకి పలువురు నాయకులు, కార్యకర్తలు అభినందనలు తెలిపారు.