Latest
చాక్లెట్ల ఆశచూపి బాలికపై అత్యాచారం
TG: హైదరాబాద్లోని KPHB పోలీస్స్టేషన్ పరిధిలో ఓ బాలిక ఇంటి ముందు ఉత్తరప్రదేశ్కు చెందిన రెహాన్ అనే వ్యక్తి పండ్లు అమ్ముకుంటూ ఉండేవాడు. మే నెలలో బాలికతో పరిచయం పెంచుకున్న రెహాన్ తన ఇంట్లో చాక్లెట్లు, బిస్కెట్లు ఉన్నాయని నమ్మించి అత్యాచారానికి పాల్పడ్డాడు. విషయం ఎవరికీ చెప్పొద్దని బెదిరించాడు. దీంతో ఆమె విషయాన్ని ఎవరికీ చెప్పకుండా దాచింది. రెహాన్ మరోసారి ఆమెను వేధించడంతో జరిగిన విషయాన్ని తల్లిదండ్రులకు తెలిపింది. తల్లిదండ్రులు పోలీసులకు ఫిర్యాదు చేశారు. నిందితుడిపై పోక్సో కేసు నమోదు చేసి అరెస్ట్ చేశారు.
ట్యాలీపై ప్రత్యేక వర్క్షాప్ ప్రారంభం
TG: ఆధునిక వ్యాపార రంగంలో అకౌంటింగ్ విధానాలు వేగంగా మారుతున్నాయని, విద్యార్థులు సంప్రదాయ పరిజ్ఞానంతోపాటు ట్యాలీ వంటి నూతన అకౌంటింగ్ సాంకేతికతలను తప్పనిసరిగా నేర్చుకోవాలని VC ఉమేష్కుమార్ సూచించారు. కరీంనగర్లోని శాతవాహన యూనివర్సిటీ కామర్స్ డిపార్ట్మెంట్ ఆధ్వర్యంలో ప్రభుత్వ డిగ్రీ కళాశాలల కోసం నిర్వహించిన అకాడమిక్ ఎంపవర్మెంట్ ప్రోగ్రామ్లో ఆయన మాట్లాడారు. కంప్యూటరైజ్డ్ అకౌంటింగ్ యూజింగ్ ట్యాలీ ERP9 – ఏ స్కిల్ డెవలప్మెంట్ వర్క్షాప్ అనే 3రోజుల శిక్షణా కార్యక్రమం ప్రారంభమైంది.
గోదాంలో చెలరేగిన మంటలు.. క్షణాల్లోనే దగ్ధం
TG: హైదరాబాద్లోని మీర్పేట్ పోలీస్స్టేషన్ పరిధిలోని నందనవనం శ్రీరమణ కాలనీలో మంగళవారం అర్ధరాత్రి భారీ అగ్నిప్రమాదం జరిగింది. మెట్రోబార్ ఎదురుగా ఉన్న ప్లాస్టిక్, పాత సామాన్ల గోదాంలో ఒక్కసారిగా పెద్దఎత్తున మంటలు ఎగిసిపడ్డాయి. మంటలు క్షణాల్లోనే తీవ్రరూపం దాల్చి పక్కనే ఉన్న ఇంటికి వ్యాపించాయి. గోదాం పూర్తిగా దగ్ధమైంది. ఫైర్ సిబ్బంది మంటలను అదుపు చేశారు. ఇంటికి మంటలు వ్యాపించడంతో ఫర్నిచర్, టీవీ, ఇతర వస్తువులు, వాహనాలు పూర్తిగా కాలిపోయాయి. మూడంతస్తుల భవనం పాక్షికంగా దెబ్బతింది.
ముద్రగడ కుమార్తెను అడ్డుకున్న పోలీసులు.. ఉద్రిక్తత
AP: కాపు ఉద్యమనేత, ప్రముఖ రాజకీయవేత్త ముద్రగడ పద్మనాభరెడ్డి భౌతికకాయం కాకినాడ జిల్లాలోని స్వగ్రామం కిర్లంపూడికి చేరుకోవడంతో ఆయన అభిమానులు, అనుచరులు భారీగా తరలివచ్చారు. చివరిచూపు చూసేందుకు వచ్చిన ఆయన కుమార్తె క్రాంతి శీలను పోలీసులు అడ్డుకున్నారు. ఆమె కిర్లంపూడి రావడానికి వీల్లేదని కుటుంబసభ్యులు సూచించడంతో ప్రత్తిపాడు వద్దే క్రాంతి కార్లను నిలిపివేశారు. దీంతో అక్కడ ఉద్రిక్తత నెలకుంది. ఎట్టకేలకు క్రాంతి కిర్లంపూడికి చేరుకోగా, ఆమెను ముద్రగడ అభిమానులు, అనుచరులు మళ్లీ అడ్డుకున్నారు.
9మంది విద్యార్థులకు 8మంది టీచర్లు
TG: కరీంనగర్ జిల్లా వీణవంక మండలం ఘన్ముక్కుల ప్రభుత్వ ఉన్నత పాఠశాలలో HMతో పాటు 8 మంది ఉపాధ్యాయులుండగా ఒకరు డిప్యుటేషన్పై వెళ్లారు. దీంతో HMతో కలిపి ఏడుగురు ఉపాధ్యాయులు, తొమ్మిది మంది విద్యార్థులు మాత్రమే ఉన్నారు. 6వ తరగతిలో ఇద్దరు, 7వ తరగతిలో ఒకరు, ఎనిమిదిలో ఇద్దరు, తొమ్మిదిలో ఒకరు, పదిలో ముగ్గురు విద్యార్థులు ఉన్నారు. పాఠశాలలో కంప్యూటర్ ల్యాబ్, డిజిటల్ బోర్డుతో పాటు అన్నీ మౌలికవసతులున్నా విద్యార్థుల్లేరు. రెండేళ్లుగా విద్యార్థులు సరిపడా లేకున్నా ఉపాధ్యాయులు మాత్రం కొలువు తీయడంపై విమర్శలు వస్తున్నాయి.
రీసర్వేలో అవకతవకలు జరిగాయని రైతులు నిరసన
AP: ప్రభుత్వం నిర్వహిస్తున్న రీసర్వేలో అవకతవకలు జరిగాయని ఆరోపిస్తూ పల్నాడు జిల్లా ఈపూరు మండలం కొచ్చెర్ల గ్రామ రైతులు ఆందోళన చేశారు. మంగళవారం రాత్రి ఈపూరు రహదారిపై బైక్లను అడ్డంగా నిలిపి బైఠాయించి నిరసన తెలిపారు. గ్రామంలో మొత్తం 885 మంది రైతులకు రావాల్సిన అన్నదాత సుఖీభవ నిధులు నిలిచిపోయాయని, కేవలం 65మందికే నగదు జమ అయిందని ఆవేదన వ్యక్తం చేశారు. రీసర్వే సమయంలో పొలాల కొలతల్లో జరిగిన తప్పుల కారణంగానే తమ పేర్లు నమోదు కాక అన్నదాత సుఖీభవను కోల్పోయామని రైతులు ఆరోపించారు.
CWC షాకింగ్ రిపోర్ట్.. ప్రమాద స్థాయిలో నీటినిల్వలు
TG: తీవ్ర వర్షాభావ పరిస్థితుల కారణంగా తెలంగాణలోని ప్రధాన జలాశయాలు అడుగంటడంతో ఆందోళన మొదలైంది. వర్షాలు కురవకపోవడం, వరద ప్రవాహం లేకపోవడంతో ప్రాజెక్టుల్లో నీటినిల్వలు ప్రమాదకర స్థాయికి పడిపోయాయి. కేంద్ర జలసంఘం విడుదల చేసిన తాజా వారపు బులెటిన్ ప్రకారం దక్షిణాది రాష్ట్రాల్లో తెలంగాణ పరిస్థితి అత్యంత ఆందోళనకరంగా మారింది. రాష్ట్రంలోని ఎనిమిది ప్రధాన జలాశయాల్లో నీటినిల్వ తగ్గిందని, గతేడాదితో పోలిస్తే ఏకంగా 33శాతం మేర నీటి తగ్గుదల నమోదైందని పేర్కొంది.
తల్లికి వందనం తొలి విడతకు గ్రీన్ సిగ్నల్
AP: స్కూల్కు వెళ్లే పిల్లలున్న తల్లిదండ్రులకు ‘తల్లికి వందనం’ పథకం అమలుకు ప్రభుత్వం చర్యలు చేపట్టింది. ఈ నెల 24న మెగా పేరెంట్, టీచర్స్ సమావేశాలు నిర్వహించనున్నారు. తొలి విడతలో రూ.10,049 కోట్లకు అనుమతులు ఇవ్వనున్నారు. దీంతో సుమారు 66.9లక్షల మంది విద్యార్థులకు లబ్ధి చేకూరనుంది. ఒక్కో విద్యార్థికి రూ.13వేలు చొప్పున తల్లుల ఖాతాలో జమచేయనున్నారు. అడ్మిషన్లకు ఇంకా సమయం ఉన్నందున కొత్తగా చేరేవారికి రెండో విడతలో నిధులు విడుదల చేయనున్నారు. ఈ నెల 24న రంపచోడవరంలో మెగా పేరేంట్స్, టీచర్స్ మీటింగ్ నిర్వహించాలని నిర్ణయించారు.
కరెంట్ ఛార్జీలు పెంచం
AP: కూటమి ప్రభుత్వం మూడో ఏడాదిలోకి అడుగు పెట్టినప్పటికీ విద్యుత్ ఛార్జీలు పెంచలేదని, ఐదేళ్లపాటు విద్యుత్ ఛార్జీలు పెంచబోమని CM చంద్రబాబు స్పష్టం చేశారు. సచివాలయంలో మంత్రులు, వివిధ విభాగాల అధికారులతో నిర్వహించిన సమావేశంలో ఆయన మాట్లాడారు. ప్రజల సమస్యలు, వాస్తవాలు తెలియాలంటే ఉన్నతస్థాయి అధికారులు క్షేత్రస్థాయికి వెళ్లాలన్నారు. వినూత్న ఆలోచనలతో ప్రజలకు సుపరిపాలనను అందించాలని సూచించారు. పట్టిసీమ నీటితో గోదావరి నుంచి కృష్ణా డెల్టా ఆయకట్టుకు నీరు అందిస్తున్నట్లు పేర్కొన్నారు.
HMDA చీఫ్ ఇంజినీర్ అరెస్ట్
TG: HMDA చీఫ్ ఇంజనీర్ బచ్చు రవీందర్ ఆదాయానికి మించి భారీగా ఆస్తులు కూడబెట్టినట్లు ACB అధికారులు గుర్తించారు. ఆయన ఇల్లు, ఆఫీసు, మిత్రులు, బంధువులు, బినామీల ఇళ్లల్లో మొత్తం 10 చోట్ల ఏకకాలంలో సోదాలు నిర్వహించారు. రవీందర్ అక్రమార్జన మార్కెట్ విలువ మొత్తం సుమారు రూ.100 కోట్లకు పైగా ఉంటుందన్నారు. పోలీసులు రవీందర్ను అరెస్ట్ చేశారు. ఐదు ఇళ్ల స్థలాలు కొండకల్, కిష్టాపూర్, పసుమాములలో, నార్సింగ్, నానక్రాం గూడలోని ఖరీదైన ప్రాజెక్టుల్లో రూ.2 కోట్ల విలువైన నాలుగు ఫ్లాట్లు ఉన్నాయని ACB అధికారులు గుర్తించారు.
ఎన్నికల వరకే రాజకీయాలు
TG: రాజకీయాలను కేవలం ఎన్నికల సమయానికి మాత్రమే పరిమితం చేయాలని, అభివృద్ధి విషయంలో రాజకీయాలకు తావివ్వకూడదని CM రేవంత్రెడ్డి అన్నారు. తెలంగాణ రాష్ట్ర ప్రయోజనాలే లక్ష్యంగా కేంద్రప్రభుత్వంతో కలిసి ముందుకెళ్తున్నట్లు ఆయన తెలిపారు. CM ఢిల్లీలో కేంద్ర మంత్రులు రామ్మోహన్నాయుడు, నితిన్ గడ్కరీలతో భేటీ అయ్యారు. అనంతరం మీడియాతో మాట్లాడారు. వరంగల్, ఆదిలాబాద్ విమనాశ్రయాల నిర్మాణ పనులు ప్రారంభం, మెట్రో, RRR తదితర అంశాలపై చర్చించినట్లు ఆయన పేర్కొన్నారు.
హర్మూజ్ జలసంధి దగ్గర క్షిపణి దాడి భయం
పశ్చిమాసియాలోని ఉద్రిక్తతల నేపథ్యంలో హార్ముజ్ జలసంధి (Strait of Hormuz) గుండా ప్రయాణించడం అత్యంత ప్రమాదకరంగా మారింది. ఒకవేళ క్షిపణి వచ్చి తమ సూపర్ట్యాంకర్ కార్గోను ఢీకొడితే ఏమవుతుందనేదే ప్రస్తుతం అక్కడ పనిచేస్తున్న ఒక భారతీయ నావికుల అతిపెద్ద భయం. కోట్లాది లీటర్ల ముడి చమురు ఉన్న ట్యాంకర్లపై దాడి జరిగితే భారీ పేలుడు సంభవించి, ప్రాణనష్టం జరగడమే కాకుండా సముద్ర పర్యావరణం పూర్తిగా దెబ్బతింటుందని నావికులు తీవ్ర ఆందోళన వ్యక్తం చేస్తున్నారు.
చైనాలో బావి టైఫూన్ విలయతాండవం
చైనాలో బావి టైఫూన్ విలయ తాండవం చేస్తోంది. ఊళ్లకు ఊళ్లే ఈ విలయానికి నీట మునిగి అల్లాడుతున్నాయి. నీటి ఉథృతికి కార్లు బొమ్మ కార్లలా కొట్టుకుపోతూ కనిపిస్తున్నాయి. భారీ వర్షాలకు ఇళ్లు కూలి అనేక మంది నానా ఇబ్బందులు పడుతున్నారు. లియావోనింగ్ ప్రావిన్స్ లో రెండు లక్షల 60 వేలమందిని సురక్షిత ప్రాంతాలకు తరలించాల్సి వచ్చింది. పసిఫిక్ మహా సముద్రంలో ఏర్పడిన ఈ టైఫూన్ ప్రభావం ఇంకా కొనసాగుతుందని చైనా వాతావరణ శాఖ చెబుతోంది.
ఏపీలో మరో భారీ గుప్త నిధి గుర్తింపు ?
ఏపీలోని రాయలసీమలో మరో భారీ ఖనిజ నిధి బయట పడింది. అన్నమయ్య జిల్లా పీలేరు నియోజకవర్గం ఒంటెల్లులో రక్షణ, ఎలక్ట్రానిక్స్ రంగాలకు ఉపయోగపడే 24 రకాల అత్యంత విలువైన రేర్ ఎర్త్ మినరల్స్ ఉన్నట్లు కేంద్ర గనుల శాఖ నిర్ధారించింది. సుమారు 250 చదరపు కిలోమీటర్ల విస్తీర్ణంలో ఉన్న ఈ వనరులను వెలికితీసేందుకు ప్రభుత్వ రంగ సంస్థ కోల్ ఇండియా మైనింగ్ అన్వేషణ లైసెన్స్ దక్కించుకుంది.
'ది ఒడిస్సీ' మూవీలో ట్రూ 70mm అనుభూతికి ఇండియా దూరం !
ప్రముఖ దర్శకుడు క్రిస్టోఫర్ నోలన్ రాబోయే చిత్రం 'ది ఒడిస్సీ' (The Odyssey) ని తన మార్క్ 'ట్రూ 70 mm' ఐమాక్స్ (IMAX) ఫార్మాట్లో రూపొందిస్తున్నారు. అయితే, మన దేశంలోని ఐమాక్స్ థియేటర్లలో ఈ సాంకేతికతను పూర్తిగా ప్రదర్శించే స్క్రీన్లు లేకపోవడంతో, ఇండియన్ మూవీ లవర్స్ ఆ అసలైన విజువల్స్ అనుభూతిని కోల్పోను న్నారు. ఇక్కడి థియేటర్లలో కేవలం సినిమాలోని కొంత భాగాన్ని (స్లైస్) మాత్రమే చూసే ఛాన్స్ ఉంది.
షారూక్ బిల్డింగ్ మన్నత్ ను రినోవేట్ చేసుకోవచ్చు- సుప్రీం కోర్ట్
బాలీవుడ్ నటుడు షారుఖ్ ఖాన్ 'మన్నత్' బిల్డింగ్ రినోవేషన్ పర్యావరణ నిబంధనలకు విరుద్ధంగా ఉందంటూ వేసిన పిల్ ను ఇవాళ సుప్రీం కోర్టు కొట్టేసింది. మన్నత్ ఇంటికి తన ఇష్టమైన మార్పులు షారూక్ చేసుకోవచ్చని తీర్పు చెప్పింది. షారూక్ ఇల్లు మన్నత్ ముంబైలో ఒక ఐకానిక్ ల్యాండ్ మార్క్. 2001లో ఆయన దీనిని సుమారు ₹18 కోట్లకు కొనుగోలు చేశారు. మొదట్లో 'విల్లా వియన్నా' అని పిలిచే ఈ హెరిటేజ్ బంగ్లాను, షారుఖ్ భార్య గౌరీ ఖాన్ స్వయంగా రీడిజైన్ చేశారు. ఈ విలాసవంతమైన భవనం విలువ మార్కెట్లో ₹300 కోట్లకు పైగానే ఉంటుంది.
కార్గో షిప్స్ పై టోల్ ప్రపోజల్ వెనక్కి- ట్రంప్
హార్ముజ్ జలసంధి గుండా వెళ్లే కార్గో షిప్్సపై 20%టోల్ ఫీజు కలెక్ట్ చేయాలనే ప్రపోజల్ ను అమెరికా అధ్యక్షుడు డొనాల్డ్ ట్రంప్ విత్ డ్రా చేసుకున్నారు. గల్ఫ్ దేశాల నేతలతో చర్చల తర్వాత , టోల్ ఫీజుకు బదులుగా ఆయా దేశాలతో అమెరికాలో భారీ పెట్టుబడులు, వాణిజ్య ఒప్పందాలు చేసుకోనున్నట్లు ఆయన ప్రకటించారు. అమెరికా సైన్యం ఇచ్చే రక్షణకు ప్రతిఫలంగా గల్ఫ్ దేశాలు ఈ ఒప్పందాలకు అంగీకరించాయి.
RAW NTR సంస్థతో సంబంధం లేదు - ఎన్టీఆర్ టీమ్
జూనియర్ ఎన్టీఆర్ ఈనెల 18న రాజకీయ అరంగేట్రం చేస్తారంటూ వచ్చిన వార్తలను ఎన్టీఆర్ కార్యాలయం ఖండించింది. ఎన్టీఆర్ అభిమాన సంఘాల ద్వారా ముందు ప్రజా సేవ , సహాయ కార్యక్రమాలు ప్రారంభి స్తారంటూ RAW NTR అనే సంస్థ చేసిన ప్రకటనలకు తమకు సంబంధం లేదని జూనియర్ కార్యాలయం క్లారిటీ ఇచ్చింది.ఎన్టీఆర్ పేరుతో ప్రకటనలు చేయడానికి గానీ, కార్యక్రమాలు చేపట్టడానికి గానీ RAW NTRసంస్థకు ఎలాంటి అధికారాలు లేవని స్పష్టం చేసింది.ఎన్టీఆర్ కి సంబంధించిన యాక్టివిటీస్ అన్నీ అధికారిక టీమ్ ద్వారానే అనౌన్స్ అవుతాయని ప్రకటించింది.
ఢిల్లీలో ఒక్కసారిగా తగ్గిన బంగారం, వెండి ధరలు
ఢిల్లీ బులియన్ మార్కెట్లో బంగారం, వెండి ధరలు ఒక్క సారిగా భారీగా తగ్గాయి. స్థానిక జువెలర్స్, పారిశ్రామిక కొనుగోలుదారుల నుంచి డిమాండ్ తగ్గడమే దీనికి ప్రధాన కారణం. బంగారం 10 గ్రాములకు రూ. 700 తగ్గి, 99.9% స్వచ్ఛమైన బంగారం ధర రూ. 1,46,300 కి చేరింది. వెండి కిలోపై ఏకంగా రూ. 8,900 స్లంప్ అయి, రూ. 2,26,100 వద్ద ముగిసింది. అంతర్జాతీయ మార్కెట్లో రేట్లు నిలకడగా ఉన్నప్పటికీ, స్థానిక మార్కెట్ ఒత్తిడి వల్ల ఈ ధరల తగ్గుదల నమోదైంది.
స్పేస్ లోకి దూసుకెళ్లిన భారత సంతతి ఆస్ట్రోనాట్ అనిల్ మీనన్ !
ఆస్ట్రోనాట్ డాక్టర్ అనిల్ మీనన్ తన తొలి స్పేస్ టూర్ ను విజయవంతంగా ప్రారంభించారు. కజకిస్తాన్లోని బైకనూర్ కాస్మోడ్రోమ్ నుండి ఇద్దరు రష్యా వ్యోమగాములతో కలిసి సోయుజ్ MS-29 నౌక ద్వారా అంతర్జాతీయ అంతరిక్ష కేంద్రానికి (ISS) ఆయన దూసుకెళ్లారు. ఎనిమిది నెలల పాటు సాగే ఈ మిషన్లో భాగంగా ఆయన మైక్రోగ్రావిటీలో రక్త ప్రసరణ, అంతరిక్ష వైద్యం మరియు సెమీకండక్టర్ల తయారీపై కీలక పరిశోధనలు చేయనున్నారు.
CM రేవంత్ రెడ్డి ఓట్ వివాదం.. క్లారిటీ ఇచ్చిన EC!
CM రేవంత్ రెడ్డి ఓటర్ నమోదుపై వస్తున్న వార్తలపై ECI క్లారిటీ ఇచ్చింది. ఒకే EPIC నంబర్తో రెండు చోట్ల పేరు ఉండటం కేవలం సాంకేతిక లోపం మాత్రమేనని స్పష్టం చేసింది. దీనివల్ల రెండు చోట్లా ఓటు హక్కు ఉన్నట్లు కాదని DEO తెలిపారు. కొండారెడ్డిపల్లిలో ఓటును తొలగించి, కొడంగల్లో ఓటర్ నమోదును కొనసాగించాలని CM కుటుంబం కోరింది. SIR ప్రక్రియ ద్వారా ఇలాంటి డూప్లికేట్, పాత ఎంట్రీల గుర్తింపు, తొలగింపు ప్రక్రియ ప్రస్తుతం కొనసాగుతోందని తెలంగాణ CEO పేర్కొన్నారు.