AP

AP· 18 Jul 2026

ఐదుగురు మత్స్యకారులు మృతి

AP: పోలవరం జిల్లా ఎటపాక మండలం గొల్లగూడెం వద్ద గోదావరిలో ఘోర విషాదం చోటుచేసుకుంది. చేపల వేటకు వెళ్లిన గొమ్ముకొత్తగూడెం గ్రామానికి చెందిన ఐదుగురు మత్స్యకారులు నీటిలో మునిగి మృతి చెందారు. మృతులు ఊకె సుశీల (37), లక్ష్మి (37), తుర్రం భారతి (40), భాసుబోయిన బాలరాజు (38), ఊకె రమేష్ (38)లుగా గుర్తించారు. గోదావరిలో లోతైన ప్రాంతంలో చేపల వేటకు వెళ్లగా ఈ ప్రమాదం జరిగింది. ఘటనాస్థలానికి చేరుకున్న పోలీసులు మృతదేహాలను వెలికితీశారు. ఒకే గ్రామానికి చెందిన ఐదుగురు మృతితో గొమ్ముకొత్తగూడెంలో విషాదఛాయలు అలుముకున్నాయి.

AP· 18 Jul 2026

ఎల్‌నినో ఎఫెక్ట్.. ఎండిపోతున్న పంటలు

AP: ఎల్‌నినో ప్రభావంతో ఖరీఫ్ సాగు తీవ్ర సంక్షోభంలో పడింది. వర్షాభావం, పెరుగుతున్న ఉష్ణోగ్రతలు, వేడిగాలులతో రైతులు ఆందోళన చెందుతున్నారు. పంటలు ఎండిపోతున్నాయి. రాష్ట్రంలోని 591 మండలాల్లో వర్షాభావ పరిస్థితులు నెలకొన్నాయి. రాయలసీమ, దక్షిణ కోస్తా జిల్లాల్లో రైతులు బోర్లు, బావులు తవ్విస్తున్నారు. గోదావరి డెల్టాలో సాగు కొనసాగుతున్నా, మిగిలిన ప్రాంతాల్లో వరి నాట్లు ప్రశ్నార్థకంగా మారాయి. ఖరీఫ్‌లో వరి సాగు 10–15 శాతం తగ్గి, ధాన్యం ఉత్పత్తి కూడా 15 శాతం వరకు పడిపోవచ్చని ఆచార్య NG రంగా వ్యవసాయ విశ్వవిద్యాలయం పేర్కొంది.

AP· 18 Jul 2026

పల్నాడును ఇండస్ట్రియల్ హబ్‌గా మారుస్తాం

AP: పల్నాడులో ఇకపై రక్తపాతం కాదు, పారిశ్రామిక విప్లవం జరగాలని CM చంద్రబాబు ఆకాంక్షించారు. పల్నాడు జిల్లా నరసరావుపేటలో జరిగిన రుణ వితరణ కార్యక్రమంలో కేంద్రమంత్రి నిర్మలా సీతారామన్‌తో కలిసి ఆయన పాల్గొన్నారు. 1,03,246 మంది లబ్ధిదారులకు రూ.3,216 కోట్ల రుణాలను వారు పంపిణీ చేశారు. బహిరంగ సభలో CM మాట్లాడుతూ... రాష్ట్రానికి పూర్వ వైభవం తీసుకువస్తామని స్పష్టం చేశారు. ఒకప్పుడు బ్యాంకు లోన్ పొందడం కష్టంగా ఉండేదని, ఇప్పుడు ప్రజల వద్దకే బ్యాంకులు వెళ్లి లోన్స్ అందించడం, ఇటువంటి రుణ మేళాలు నిర్వహించడం గర్వకారణమన్నారు.

AP· 17 Jul 2026

ఏపీలో మళ్లీ కరోనా కేసులు

AP: ఏపీలో మళ్లీ కరోనా కేసులు నమోదవుతున్నాయి. జూన్ 26 నుంచి ఇప్పటివరకు మొత్తం 13 పాజిటివ్ కేసులు గుర్తించారు. కడపలో 8, గుంటూరులో 3, విశాఖ, కాకినాడలో ఒక్కో కేసు నమోదయ్యాయి. వైరస్ ఏ వేరియంట్ అనేది తెలుసుకోవడానికి ఐదు శాంపిల్స్‌ను పూణె ల్యాబ్‌కు పంపించారు. ప్రస్తుతం బాధితులు హోమ్ ఐసోలేషన్‌లో ఉండగా ప్రజలు జాగ్రత్తగా ఉండాలని హెల్త్ డిపార్ట్‌మెంట్ సూచించింది.

AP· 17 Jul 2026

రాజ్యాంగం గురించి చెప్పే అరుదైన ఈవెంట్‌

రాజ్యాంగం అంటే ఏంటి, అది మనకెందుకు ముఖ్యం అని తెలుసుకోవాలనుకునే యూత్ కోసం తిరుపతిలో ఓ స్పెషల్ మీట్ జరగనుంది. జులై 26న (ఆదివారం) రేణిగుంటలోని విష్ణు గ్రాండ్‌లో ఉదయం 11 నుంచి సాయంత్రం 5:30 వరకు "డిగ్నిఫైడ్ ఇండియా" ఈ ఈవెంట్‌ నిర్వహిస్తోంది. లాయర్ శ్రీకాంత్ చింతల, డాక్టర్ ఆరోగ్య నాదుడు, రాజు అరుముగం లాంటి స్పీకర్లు రాజ్యాంగం గురించి, ఈవీఎం-ఓటింగ్ గురించి సింపుల్‌గా వివరిస్తారు. క్వశ్చన్-ఆన్సర్ సెషన్ కూడా ఉంటుంది. తిరుపతి మూవ్‌మెంట్ 21 నిర్వహిస్తున్న ఈ ఫ్రీ ఈవెంట్‌కి యూత్ అందరూ రావొచ్చని నిర్వాహకులు చెప్పారు.

AP· 17 Jul 2026

సాయికృష్ణ లాకప్ డెత్ కేసులో NHRC కీలక ఆదేశాలు

AP: సంచలనం సృష్టించిన విజయవాడ గాదె సాయికృష్ణ అనుమానాస్పద కస్టడీ మరణం కేసులో NHRC కీలక ఆదేశాలు జారీ చేసింది. ప్రముఖ న్యాయవాది రామారావు ఇమ్మనేని ఫిర్యాదు మేరకు విచారణ కొనసాగిస్తున్న కమిషన్, పోలీసుల నుంచి నాలుగు వారాల్లో రెండో నివేదిక సమర్పించాలని ఆదేశించింది. కస్టడీలో చిత్రహింసలు, అక్రమ నిర్బంధం, CCTV, హార్డ్‌డిస్క్‌లు మార్చి ఆధారాలు ధ్వంసం చేసిన ఆరోపణలు తీవ్రంగా ఉన్నాయని పేర్కొంది. SIT దర్యాప్తులో కస్టడీ మరణానికి సంబంధించిన అంశాలు వెలుగులోకి వచ్చినట్లు తెలిపింది.

AP· 17 Jul 2026

అమరావతిని ఎవరూ కదిలించలేరు

AP: అమరావతి రాష్ట్ర ఖ్యాతిని పెంచేలా, యువతకు ఉపాధినిచ్చే కల్పవల్లిగా వర్ధిల్లుతుందని CM చంద్రబాబు అన్నారు. రాజధాని పరిధి వెంకటపాలెంలో నిర్వహించిన జగన్నాథ రథయాత్రలో పూరీ జగన్నాథుడికి ప్రత్యేక పూజలు చేశారు. హిందూ ధర్మానికి సాక్ష్యంగా నిర్మిస్తున్న అమరావతిని ఈ స్థల మహాత్మ్యంతో ఎవరూ కదిలించలేరు అన్నారు. సమాజంలో విలువలు, మానవ సంబంధాలు పడిపోతున్న టైంలో చాలా సమస్యలకు ఆధ్యాత్మికతే పరిష్కారం అని CM చంద్రబాబు అన్నారు.

AP· 16 Jul 2026

విశాఖలో కోవిడ్ పాజిటివ్ కేసు నమోదు !

విశాఖలో కోవిడ్ పాజిటివ్ కేసు నమోదు కలకలం రేపుతోంది. బాధితుడు జ్వరం, ఒళ్లు నొప్పులతో జనరల్ ఫిజీషియన్ దగ్గరకు రాగా అనుమానం వచ్చి ప్రైవేట్ ల్యాబ్ కు టెస్టుకు పంపారు. అయితే ప్రైవేటు ల్యాబ్ లో అతగాడికి కోవిడ్ పాజిటివ్ వచ్చినట్లు నిర్ధారించారు. ఆ తర్వాత వైద్యాధికారి ద్వారా అదే శాంపిల్ ను కోవిడ్ టెస్ట్ నిమిత్తం కేజీహెచ్ కు తరలించారు. కేజీహెచ్ లో కూడా కోవిడ్ పాజిటివ్ అని నిర్ధారించడంతో ఆ వ్యక్తిని ఐసోలేషన్ లోకి పంపారు. ఇన్నాళ్ల తర్వాత మళ్లీ కోవిడ్ కేసు కనిపించడంతో వైద్య వర్గాలు కలవరం చెందుతున్నాయి. అప్రమత్తంగా వ్యవహరిస్తున్నాయి.

AP· 16 Jul 2026

రాష్ట్రంలోనే బెస్ట్.. కురుపాం పంచాయతీకి ISO అవార్డ్

AP: విజయనగరం జిల్లా కురుపాం మేజర్ గ్రామ పంచాయతీలో ప్రజలకు నాణ్యమైన సేవలు, మౌలిక సదుపాయాల కల్పన వంటి అంశాల్లో ఉత్తమ పనితీరు కనబరిచినందుకు గ్రామ పంచాయతీకి ప్రతిష్ఠాత్మక ISO అవార్డ్ లభించింది. తాడేపల్లిలో నిర్వహించిన ప్రత్యేక కార్యక్రమంలో పంచాయతీరాజ్ శాఖ కమిషనర్ కృష్ణతేజ చేతులమీదుగా కురుపాం EO వెంకటనాయుడు ISO ధ్రువీకరణ పత్రాన్ని అందుకున్నారు. రాష్ట్రంలోని ఎంపికైన 23 పంచాయతీలలో కురుపాం చోటు దక్కించుకోగా, పార్వతీపురం జిల్లా నుంచి ఏకైక గ్రామంగా నిలిచింది.

AP· 16 Jul 2026

మాజీ మంత్రిపై కేసు నమోదు

AP: కాకినాడ జిల్లా కిర్లంపూడిలో నిన్న ముద్రగడ పద్మనాభం అంత్యక్రియల్లో పోలీసుల విధులకు ఆటంకం కలిగించారని మాజీ మంత్రి అంబటి రాంబాబుపై కేసు నమోదైంది. ముద్రగడ కుటుంబ సభ్యులు ప్రభుత్వ లాంఛనాలతో అంత్యక్రియలు నిర్వహించడాన్ని తిరస్కరించారు. దీంతో అక్కడ ఉద్రిక్తత నెలకుంది. అంత్యక్రియల సమయంలో గార్డ్ ఆఫ్ హానర్ నిర్వహించే క్రమంలో అంబటి రాంబాబు, YCP నేతలు అభ్యంతరం వ్యక్తం చేస్తూ ఆందోళన చేశారు. తమ విధులకు ఆటకం కలిగించారని, తమను నెట్టివేశారని పోలీసులు ఫిర్యాదు చేయడంతో FIR నమోదైంది.

AP· 16 Jul 2026

అమెరికాలో AP యువతి మృతి

AP: పల్నాడు జిల్లాకు చెందిన మక్కెన ప్రసన్న (27) అమెరికాలోని న్యూజెర్సీలో జరిగిన కారు ప్రమాదంలో మృతి చెందింది. వినుకొండ మండలం ఉమ్మడివరం గ్రామానికి చెందిన మక్కెన వెంకటేశ్వర్లు, గోవిందమ్మల పెద్ద కుమార్తె ప్రసన్న 2022లో ఉన్నత విద్య కోసం అమెరికా వెళ్లింది. ఆమె ఇటీవలే MS పూర్తి చేసి ఉద్యోగ ప్రయత్నాల్లో ఉంది. న్యూజెర్సీలో తన ముగ్గురు స్నేహితులతో కలిసి కారులో వెళ్తుండగా వాహనం అదుపుతప్పి రోడ్డు పక్కన ఉన్న చెట్టును బలంగా ఢీకొట్టింది. ప్రమాదంలో ప్రసన్న స్పాట్‌లోనే ప్రాణాలు కోల్పోగా, ఆమె స్నేహితులకు తీవ్ర గాయాలయ్యాయి.

AP· 16 Jul 2026

అమెరికాలో తెలుగు యువకుడు మృతి

AP: విజయవాడకు చెందిన గడ్డం మణిచంద్ర తేజ (28) అమెరికాలో మృతి చెందాడు. హైదరాబాద్‌లోని ఇక్ఫాయ్ యూనివర్సిటీలో ఇంజినీరింగ్ పూర్తి చేసిన చంద్రతేజ 2022లో ఉన్నత చదువుల కోసం అమెరికా వెళ్లాడు. నార్త్ ఈస్టర్న్ యూనివర్సిటీలో కోర్సు పూర్తయిన అనంతరం బోస్టన్‌లోని ఓ కంపెనీలో జాబ్ చేస్తున్నాడు. మసాచుసెట్స్ రాష్ట్రంలోని ఆరెంజ్ నగరంలో స్కైడైవింగ్ కోసం వెళ్లారు. గాల్లో ఎగిరిన తర్వాత పారాచూట్ కిందకు దిగే సమయంలో గాలి తీవ్రంగా వీయడంతో 30 అడుగుల ఎత్తు నుంచి కింద పడ్డాడు. తీవ్ర గాయాలైన అతడిని హాస్పిటల్‌కు తరలించేలోగా చనిపోయాడు.

AP· 16 Jul 2026

విద్యుత్ ఉద్యోగుల మహా ధర్నా

AP: ప్రభుత్వం ఇచ్చిన హామీలను అమలు చేయాలని విద్యుత్ కాంట్రాక్ట్ కార్మికులు తిరుపతిలోని APSPDCL కార్యాలయం ముందు మహా ధర్నా నిర్వహించారు. రెగ్యులరైజేషన్, పాత పెన్షన్ విధానం అమలు, PRC ప్రకటించాలని డిమాండ్ చేశారు. ఎన్నికల ముందు ఇచ్చిన హామీల మేరకు విద్యుత్ కాంట్రాక్ట్ కార్మికుల సమస్యలను ప్రభుత్వం వెంటనే పరిష్కరించాలన్నారు. కాంట్రాక్ట్ ఉద్యోగులను రెగ్యులరైజ్ చేసి వారికి రూ.48 వేల వేతనాన్ని ఇవ్వాలని కోరారు. విధి నిర్వహణలో మృతి చెందిన కార్మికుల కుటుంబాలకు రూ. 1 కోటి పరిహారం చెల్లించాలని కోరారు.

AP· 16 Jul 2026

ముందుచూపు లేకపోతే నష్టమే

AP: రాష్ట్రంలో వాగులు, వంకలు, నీటి ఊటలు అడుగంటిపోయాయని, శ్రీశైలం, నాగార్జునసాగర్‌లకు కృష్ణా నది నుంచి నీటి ప్రవాహం తగ్గిందని CM చంద్రబాబు అన్నారు. NTR జిల్లా ఇబ్రహీంపట్నంలోని పవిత్ర సంగమం వద్ద ఆయన జల హారతి ఇచ్చారు. ఈ సందర్భంగా ఆయన మాట్లాడుతూ.. ఎల్‌నినో ప్రభావంతో వర్షాలు కురిసే అవకాశం లేకపోవడంతో రైతులు ప్రత్యామ్నాయ పంటలను సాగు చేసుకోవాలని సూచించారు. రిజర్వాయర్లలో నీళ్లు ఉన్నాయని ముందుచూపు లేకుండా పంటలు వేస్తే మొదటికే మోసం వస్తుందన్నారు. రైతులు ఈ ఏడాది ఆరుతడి పంటలు సాగు చేయాలని సూచించారు.

▶

AP· 15 Jul 2026

తండ్రి అంత్యక్రియలను టీవీలో చూస్తూ ముద్రగడ కుమార్తె కన్నీటి పర్యంతం !

దివంగత కాపు నేత ముద్రగడ పద్మనాభం కడసారి చూపుకు ఆయన కుమార్తె క్రాంతిని అనుమతించకపోవడంతో ఆమె ఇంట్లోనే టీవీ చూస్తూ ఎమోషనల్ అవుతున్న దృశ్యాలు సోషల్ మీడియాలో వైరల్ అయ్యాయి. కన్నతండ్రి చివరి చూపుకు అనుమతించక పోవడం దారుణమని కొందరు విమర్శిస్తుంటే ముద్రగడ చివరి కోరిక అదేనని తన కుమార్తెను అనుమతించవద్దని స్పష్టంగా చెప్పారని అందుకే రానివ్వలేదని కుటుంబ సభ్యులు చెప్పారు. మరోవైపు క్రాంతి ఇంట్లోనే టీవీలో తండ్రి అంత్యక్రియలు చూస్తూ గుండెల విసేలా రోదించడం పలువురిని కదిలించింది.

AP· 15 Jul 2026

ఆసుపత్రి నుంచి పవన్ కళ్యాణ్ డిశ్చార్జ్

AP: ఏపీ డిప్యూటీ సీఎం, జనసేన పార్టీ అధినేత పవన్ కళ్యాణ్ ముంబైలోని కోకిలాబెన్ అంబానీ ఆసుపత్రి నుంచి బుధవారం ఉదయం డిశ్చార్జ్ అయ్యారు. ఆయన కొంతకాలంగా భుజాల నొప్పితో ఇబ్బంది పడుతున్నారు. ఈనెల 10న ఆయన భుజానికి ఆపరేషన్ జరిగింది. నాలుగు రోజులు అక్కడే ఉండి ట్రీట్మెంట్ తీసుకున్నారు. అయితే ఇప్పట్లో పవన్ కల్యాణ్ ఇంటి నుంచి బయటికి వచ్చే అవకాశం ఉండదు. ఇంకా కొద్ది రోజుల పాటు ఇంట్లోనే రెస్ట్ తీసుకోవాల్సిందిగా డాక్టర్స్ చెప్పారు.

▶

AP· 15 Jul 2026

ముద్రగడ కుమార్తెను అడ్డుకున్న పోలీసులు.. ఉద్రిక్తత

AP: కాపు ఉద్యమనేత, ప్రముఖ రాజకీయవేత్త ముద్రగడ పద్మనాభరెడ్డి భౌతికకాయం కాకినాడ జిల్లాలోని స్వగ్రామం కిర్లంపూడికి చేరుకోవడంతో ఆయన అభిమానులు, అనుచరులు భారీగా తరలివచ్చారు. చివరిచూపు చూసేందుకు వచ్చిన ఆయన కుమార్తె క్రాంతి శీలను పోలీసులు అడ్డుకున్నారు. ఆమె కిర్లంపూడి రావడానికి వీల్లేదని కుటుంబసభ్యులు సూచించడంతో ప్రత్తిపాడు వద్దే క్రాంతి కార్లను నిలిపివేశారు. దీంతో అక్కడ ఉద్రిక్తత నెలకుంది. ఎట్టకేలకు క్రాంతి కిర్లంపూడికి చేరుకోగా, ఆమెను ముద్రగడ అభిమానులు, అనుచరులు మళ్లీ అడ్డుకున్నారు.

AP· 15 Jul 2026

రీసర్వేలో అవకతవకలు జరిగాయని రైతులు నిరసన

AP: ప్రభుత్వం నిర్వహిస్తున్న రీసర్వేలో అవకతవకలు జరిగాయని ఆరోపిస్తూ పల్నాడు జిల్లా ఈపూరు మండలం కొచ్చెర్ల గ్రామ రైతులు ఆందోళన చేశారు. మంగళవారం రాత్రి ఈపూరు రహదారిపై బైక్‌లను అడ్డంగా నిలిపి బైఠాయించి నిరసన తెలిపారు. గ్రామంలో మొత్తం 885 మంది రైతులకు రావాల్సిన అన్నదాత సుఖీభవ నిధులు నిలిచిపోయాయని, కేవలం 65మందికే నగదు జమ అయిందని ఆవేదన వ్యక్తం చేశారు. రీసర్వే సమయంలో పొలాల కొలతల్లో జరిగిన తప్పుల కారణంగానే తమ పేర్లు నమోదు కాక అన్నదాత సుఖీభవను కోల్పోయామని రైతులు ఆరోపించారు.