Local

Local· 29 Aug 2026

దాచేపల్లి అంజుమన్ కమిటీలో కొత్త సభ్యుడు.. నాగుల్ ఎంపిక

AP: పల్నాడు జిల్లా దాచేపల్లి మండల అంజుమన్ ఇస్లామియా కమిటీలో షేక్ నాగుల్ కొత్త సభ్యుడిగా ఏకగ్రీవంగా ఎంపికయ్యారు. కమిటీలో సుదీర్ఘకాలం సేవలందించిన స్వర్గీయ తొండ మహబూబ్ స్థానంలో ఆయనను నియమించారు. గత 50 ఏళ్లకు పైగా దాచేపల్లి మండలం, పరిసర ప్రాంతాల ప్రజల సమస్యల పరిష్కారానికి అంజుమన్ ఇస్లామియా కమిటీ సేవలందిస్తోందని ప్రతినిధులు తెలిపారు. మహబూబ్ కుటుంబానికి చెందిన నాగుల్ కు కమిటీలో స్థానం కల్పించడంపై వారు హర్షం వ్యక్తం చేశారు.

Local· 29 Aug 2026

తెలుగు వెలుగును చాటిన భాషా దినోత్సవం

నర్సంపేట ప్రభుత్వ ఉన్నత పాఠశాలలో శనివారం తెలుగు భాషా దినోత్సవాన్ని ఘనంగా నిర్వహించారు. ఈ సందర్భంగా తెలుగు ఉపాధ్యాయుడు సురేందర్ మాట్లాడుతూ.. తెలుగు భాష గొప్పతనాన్ని, సాహిత్య వైభవాన్ని ప్రతి ఒక్కరూ తెలుసుకోవాలన్నారు. మాతృభాష పరిరక్షణకు విద్యార్థులు కృషి చేయాలని సూచించారు. తెలుగు భాషను నిత్య జీవితంలో విరివిగా ఉపయోగిస్తూ భావితరాలకు అందించాలని పిలుపునిచ్చారు. కార్యక్రమంలో ఉపాధ్యాయులు, విద్యార్థులు పాల్గొన్నారు.

Local· 29 Aug 2026

మోడల్ మార్కెట్ కు మోక్షం ఎప్పుడు..?

TG: రంగారెడ్డి జిల్లా షాద్‌నగర్‌లో 2020లో ప్రారంభమైన మోడల్ మార్కెట్ నిర్మాణం నేటికీ పూర్తికాకపోవడంతో ప్రజలు, వ్యాపారులు తీవ్ర ఇబ్బందులు ఎదుర్కొంటున్నారు. కూరగాయలు, మాంసం, పండ్ల విక్రయాలను ఒకే చోట నిర్వహించాలనే ఉద్దేశంతో గత ప్రభుత్వం మార్కెట్ నిర్మాణాన్ని ప్రారంభించింది. ప్రభుత్వం మారిన తర్వాత పనులు అర్ధాంతరంగా నిలిచిపోయాయి. దీంతో వ్యాపారులు రోడ్లపైనే కూరగాయలు, మాంసం విక్రయిస్తుండటంతో ట్రాఫిక్ సమస్యలు పెరుగుతున్నాయి. వినియోగదారులకు కూడా ఇబ్బందులు ఎదురవుతున్నాయి.

Local· 29 Aug 2026

నీటి వనరుల అభివృద్ధికి శ్రీకారం

AP: పార్వతీపురం మన్యం జిల్లా భామిని మండలంలో గిరిజన కుటుంబాల అభివృద్ధికి సమగ్ర కార్యక్రమం ప్రారంభమైంది. నాబార్డ్ సహకారంతో విద్యా ఫౌండేషన్స్ ఆధ్వర్యంలో నల్లరాయిగూడ పంచాయతీలో 200 పీవీటీజీ కుటుంబాలకు తోటల పెంపకం, నీటి వనరుల అభివృద్ధి పనులను నాబార్డ్ ఏపీ ప్రాంతీయ కార్యాలయ అధికారి సోమైందర్ సింగ్ ప్రారంభించారు. విద్యా ఫౌండేషన్స్ అధ్యక్షులు ప్రసాద్ ఉదండరావు మాట్లాడుతూ తివ్వకొండపై ఆరు పెర్కొలేషన్ ట్యాంకులు, రెండు ఫార్మ్ పాండ్లు నిర్మించి మొక్కలకు నీటి సదుపాయం కల్పిస్తామని తెలిపారు.

Local· 29 Aug 2026

ప్రజల సమస్యలు తెలుసుకున్న పోలీస్ ఇన్‌స్పెక్టర్

AP: చిత్తూరు జిల్లా పలమనేరు అర్బన్ పోలీస్ స్టేషన్ ఇన్‌స్పెక్టర్ కె. మోహన్‌రెడ్డి పల్లె నిద్ర కార్యక్రమంలో భాగంగా గడ్డూరు కాలనీని సందర్శించి గ్రామస్థుల సమస్యలను నేరుగా తెలుసుకున్నారు. స్థానికులతో మాట్లాడి వారి ఇబ్బందులు, అవసరాలపై ఆరా తీశారు. రాబోయే స్థానిక సంస్థల ఎన్నికల నేపథ్యంలో శాంతిభద్రతలను కాపాడుకోవాలని ప్రజలకు సూచించారు. గొడవలు, వివాదాలు, ప్రలోభాలకు దూరంగా ప్రజాస్వామ్యబద్ధంగా ఎన్నికల్లో పాల్గొనాలని కోరారు.

Local· 29 Aug 2026

ఆర్టీసీ బస్సు కింద పడి వ్యక్తికి తీవ్రగాయాలు

TG: మంచిర్యాల జిల్లా శ్రీరాంపూర్ బస్టాండ్ సమీపంలో ఆర్టీసీ బస్సు కింద పడి గుర్తుతెలియని వ్యక్తి తీవ్రంగా గాయపడ్డాడు. ఈ ఘటనలో అతడి రెండు కాళ్లకు తీవ్ర గాయాలయ్యాయి. ప్రమాదంపై సమాచారం అందుకున్న నస్పూర్ 108 సిబ్బంది ఈఎంటీ లక్ష్మయ్య, పైలెట్ సత్తయ్య వెంటనే ఘటనా స్థలానికి చేరుకున్నారు. క్షతగాత్రుడికి అక్కడే ప్రథమ చికిత్స అందించి, అనంతరం మెరుగైన వైద్యం కోసం మంచిర్యాల ప్రభుత్వ ఆసుపత్రికి తరలించారు.

Local· 29 Aug 2026

ఇంటి తాళం పగలగొట్టి బంగారం చోరీ

TG: మంచిర్యాల జిల్లా కాసిపేట మండలం పాత వరిపేటలో దొంగలు ఇంటి తాళం పగలగొట్టి 7.5 గ్రాముల బంగారం చోరీ చేశారు. గ్రామానికి చెందిన రాజు ఈ నెల 26న కుటుంబ సభ్యులతో కలిసి జైపూర్‌లో జరిగిన శుభకార్యానికి వెళ్లారు. శుక్రవారం ఇంటికి తిరిగి వచ్చేసరికి తలుపు తాళం పగలగొట్టి ఉండటాన్ని గుర్తించారు. ఇంట్లోని బీరువాను పరిశీలించగా అందులో ఉంచిన 7.5 గ్రాముల బంగారం కనిపించలేదు. దీంతో రాజు పోలీసులకు ఫిర్యాదు చేశారు. బాధితుడి ఫిర్యాదు మేరకు కేసు నమోదు చేసి దర్యాప్తు చేపట్టినట్లు ఎస్సై ఆంజనేయులు తెలిపారు.

Local· 29 Aug 2026

విద్యార్థుల సమస్యలు తెలుసుకున్న నేతలు

AP: కోనసీమ జిల్లా రాజోలు ప్రభుత్వ ఎస్సీ బాలుర హాస్టల్‌లో విద్యార్థులు ఎదుర్కొంటున్న సమస్యలను రాజోలు నియోజకవర్గ SC సంక్షేమ సంఘం నాయకులు పరిశీలించారు. తాత్కాలిక హాస్టల్‌లో విద్యార్థుల వసతి పరిస్థితులు, ఇబ్బందులు, అవసరాలను అడిగి తెలుసుకున్నారు. ప్రస్తుతం వివిధ ప్రాంతాలకు చెందిన 54 మంది విద్యార్థులు హాస్టల్‌లో ఉంటున్నట్లు తెలిపారు. ప్రభుత్వం నూతన హాస్టల్ భవనం నిర్మించేలా కృషి చేస్తామని నాయకులు పేర్కొన్నారు. అప్పటివరకు విద్యార్థులకు అవసరమైన కనీస సౌకర్యాలు కల్పించాలని కోరారు.

Local· 29 Aug 2026

ఉర్దూ కోర్సుల పునఃప్రారంభానికి చర్యలు

AP: ఉర్దూ మాధ్యమ విద్యార్థులకు ఉన్నత విద్యలో మరిన్ని అవకాశాలు కల్పించేందుకు దూరవిద్యా కోర్సులను పునఃప్రారంభించనున్నట్లు బిఆర్. అంబేద్కర్ ఓపెన్ యూనివర్సిటీ వీసీ విజయభాస్కర్ రావు హామీ ఇచ్చారు. గుంటూరు జిల్లా RUTA AP ప్రతినిధులు వీసీని కలిసి వినతిపత్రం సమర్పించారు. ఉర్దూ మాధ్యమ దూరవిద్యా కోర్సులను తిరిగి ప్రారంభించాలని కోరారు. దీనిపై సానుకూలంగా స్పందించిన వీసీ, ఈ డిసెంబర్ నుంచే కోర్సులు ప్రారంభించేందుకు చర్యలు తీసుకుంటామని తెలిపారు. వీసీ హామీపై RUTA AP ప్రతినిధులు హర్షం వ్యక్తం చేశారు.

Local· 29 Aug 2026

గ్రీన్‌ఫీల్డ్ హైవేపై ఘోర ప్రమాదం

TG: ఖమ్మం–దేవరపల్లి గ్రీన్‌ఫీల్డ్ హైవేపై ఘోర ప్రమాదం జరిగింది. వేంసూరు మండలం సమీపంలో జరిగిన ప్రమాదంలో కారు ముందు భాగం పూర్తిగా ధ్వంసమై నుజ్జునుజ్జయింది. వాహన భాగాలు రోడ్డుపై చెల్లాచెదురుగా పడిపోయాయి. ప్రమాదాన్ని గమనించిన స్థానికులు వెంటనే స్పందించి క్షతగాత్రులను ఆసుపత్రికి తరలించారు. ఈ హైవేపై వరుస ప్రమాదాలు జరుగుతున్నా అధికారులు తగిన భద్రతా చర్యలు తీసుకోవడం లేదని స్థానికులు ఆగ్రహం వ్యక్తం చేస్తున్నారు.

Local· 29 Aug 2026

తాగునీటికి ఇబ్బందులు రావొద్దు: కలెక్టర్

TG: ప్రజలకు తాగునీటి సరఫరాలో ఎలాంటి ఇబ్బందులు తలెత్తకుండా అధికారులు చర్యలు తీసుకోవాలని మంచిర్యాల కలెక్టర్ కుమార్ దీపక్ ఆదేశించారు. చెన్నూర్ పట్టణంలో అమృత్ పథకం కింద చేపట్టిన నీటి ట్యాంక్ నిర్మాణ పనులను ఆయన పరిశీలించారు. ట్యాంక్ నిర్మాణంతోపాటు పైపులైన్ పనులను వేగవంతం చేసి నిర్ణీత సమయంలోగా పూర్తి చేయాలని సూచించారు. ప్రజలకు నిరంతరాయంగా తాగునీరు అందేలా అవసరమైన చర్యలు చేపట్టాలని అధికారులకు స్పష్టం చేశారు.

Local· 29 Aug 2026

బహుజన్ ముక్తి పార్టీ రాష్ట్ర మహాసభల కరపత్రాలు ఆవిష్కరణ

TG: వికారాబాద్‌లో బహుజన్ ముక్తి పార్టీ 6వ తెలంగాణ రాష్ట్ర మహాసభలకు భారీ ఏర్పాట్లు చేస్తున్నారు. ఈ నెల 30న వికారాబాద్‌లోని KNR ఫంక్షన్ హాల్‌లో ఉదయం 10 గంటల నుంచి సాయంత్రం 5 గంటల వరకు మహాసభలు నిర్వహించనున్నట్లు పార్టీ నాయకులు తెలిపారు. రాష్ట్రవ్యాప్తంగా పార్టీ నాయకులు, కార్యకర్తలు పెద్ద సంఖ్యలో హాజరుకానున్నారు. రాజ్యాంగ పరిరక్షణ, సామాజిక న్యాయం, విద్య, ఉపాధి, ఆర్థిక హక్కులు తదితర కీలక అంశాలపై మహాసభల్లో విస్తృతంగా చర్చించనున్నట్లు పేర్కొన్నారు.

Local· 29 Aug 2026

పోటీ పరీక్షలకు ఉచిత కోచింగ్

TG: పోటీ పరీక్షలకు సిద్ధమవుతున్న తాండూర్ నియోజకవర్గ యువతకు BMR ఫౌండేషన్ ఆధ్వర్యంలో ఉచిత కోచింగ్‌కు శ్రీకారం చుట్టనున్నారు. ఎస్‌ఐ, కానిస్టేబుల్, గ్రూప్స్‌, రైల్వే తదితర పోటీ పరీక్షలకు హైదరాబాద్‌, కరీంనగర్‌, మహబూబ్‌నగర్‌కు చెందిన అనుభవజ్ఞులైన అధ్యాపకులతో 90రోజులపాటు శిక్షణ అందించనున్నట్లు నిర్వాహకులు తెలిపారు. ఆగస్టు 25 నుంచి 31 వరకు రిజిస్ట్రేషన్ ప్రక్రియ కొనసాగనుంది. వికారాబాద్‌ జిల్లా తాండూర్‌లో కాంగ్రెస్ పార్టీ కార్యాలయంలో ఉదయం 10గంటల నుంచి మధ్యాహ్నం 1 గంట వరకు పేర్లు నమోదు చేసుకోవాలన్నారు.

Local· 29 Aug 2026

ప్యాకేజీ ఇచ్చాకే గ్రామాలు ఖాళీ చేయించాలి: MPJ

AP: వెలుగొండ నిర్వాసితులకు ఆర్‌ఆర్ ప్యాకేజీ పూర్తిగా చెల్లించిన తర్వాతే గ్రామాలను ఖాళీ చేయించాలని ఎంపీజే రాష్ట్ర అధ్యక్షుడు షేక్ అబ్దుల్ రజాక్ ప్రభుత్వాన్ని డిమాండ్ చేశారు. మార్కాపురం జిల్లాలోని పూల సుబ్బయ్య వెలుగొండ ప్రాజెక్టు ముంపు గ్రామాలను మూవ్‌మెంట్ ఫర్ పీస్ అండ్ జస్టిస్ (ఎంపీజే) ప్రతినిధులు సందర్శించారు. ఈ సందర్భంగా నిర్వాసితుల సమస్యలను అడిగి తెలుసుకున్నారు. ప్యాకేజీ చెల్లింపుల అనంతరం గ్రామాల నుంచి తరలించేందుకు కనీసం మూడు నెలల సమయం ఇవ్వాలని రజాక్ కోరారు.

Local· 28 Aug 2026

విద్యుత్ అమరవీరులకు ఘన నివాళి

AP: విద్యుత్ అమరవీరుల త్యాగాల స్ఫూర్తితో ప్రజాసమస్యలపై ఐక్యంగా పోరాడాలని సీపీఎం నాయకులు పిలుపునిచ్చారు. విశాఖపట్నం అక్కయ్యపాలెంలోని ఏఎస్‌ఆర్‌ నగర్‌లో విద్యుత్ అమరవీరుల సంస్మరణ దినోత్సవాన్ని పురస్కరించుకుని శుక్రవారం సంస్మరణ సభ నిర్వహించారు. 2000 ఆగస్టు 28న అప్పటి చంద్రబాబు ప్రభుత్వం జరిపిన కాల్పుల్లో మృతిచెందిన రామకృష్ణ, బాలస్వామి, విష్ణువర్ధన్‌రెడ్డిల చిత్రపటాలకు పూలమాలలు వేసి నివాళులర్పించారు. విద్యుత్ రంగ ప్రైవేటీకరణకు వ్యతిరేకంగా జరిగిన ఉద్యమాన్ని ప్రభుత్వం అణచివేసిందని నాయకులు పేర్కొన్నారు.

Local· 28 Aug 2026

ఎమ్మెల్యే ఆధ్వర్యంలో రాఖీ పౌర్ణమి వేడుకలు

షాద్‌నగర్ ఎమ్మెల్యే, రాష్ట్ర ప్రభుత్వ రంగ సంస్థల చైర్మన్ వీర్లపల్లి శంకర్ ఇంట్లో రాఖీ పౌర్ణమి వేడుకలు ఘనంగా నిర్వహించారు. కార్యక్రమంలో పలు మండలాలకు చెందిన మహిళా అధ్యక్షురాళ్లు, పట్టణ మహిళా అధ్యక్షురాలు నాగమణి, పిట్ట రజిత, అనసూయ, బాలమణి తదితరులు పాల్గొని ఎమ్మెల్యే వీర్లపల్లి శంకర్‌కు రాఖీలు కట్టి రాఖీ పౌర్ణమి శుభాకాంక్షలు తెలిపారు. రాఖీ కట్టిన మహిళలకు కానుకగా రూ.50 వేల నగదుతో పాటు పట్టువస్త్రాలను అందించారు.

Local· 28 Aug 2026

ఆర్యవైశ్య మహాసభ భవన నిర్మాణానికి సెప్టెంబర్ 13న శంకుస్థాపన

తెలంగాణ రాష్ట్ర ఆర్యవైశ్య మహాసభ ఆధ్వర్యంలో ఉప్పల్ భగాయత్‌లోని ఐదు ఎకరాల స్థలంలో నిర్మించనున్న భవన నిర్మాణానికి సెప్టెంబర్ 13న శంకుస్థాపన నిర్వహించనున్నారు. శంకుస్థాపనకు రావాలని కోరుతూ సీఎం రేవంత్ రెడ్డిని ఆర్యవైశ్య మహాసభ ప్రతినిధులు కలిశారు. సీఎం అందుకు అంగీకరించారు. రాజేంద్రనగర్ ఎమ్మెల్యే ప్రకాశ్ గౌడ్, రాజ్యసభ సభ్యులు వేమిరెడ్డి నరేందర్ రెడ్డి, తెలంగాణ రాష్ట్ర ఆర్యవైశ్య మహాసభ అధ్యక్షులు, ఉప్పల్ భగాయత్ భవన నిర్మాణ కమిటీ చైర్మన్ అమరవాది లక్ష్మీనారాయణ, ప్రధాన కార్యదర్శి ఆనంద్ బాబు పాల్గొన్నారు.

Local· 28 Aug 2026

పద్మశాలి సంఘంలో ఘనంగా వేడుకలు

షాద్‌నగర్ పద్మశాలి సంఘం అధ్యక్షులు వర్కల శ్రీనివాస్ ఆధ్వర్యంలో సంఘభవనంలో రాఖీ పౌర్ణమి వేడుకలను ఘనంగా నిర్వహించారు. ఉదయం గణపతి పూజతో కార్యక్రమాలు ప్రారంభమయ్యాయి. శివ మారుతి, రవి శర్మ ఆధ్వర్యంలో ప్రత్యేక పూజలు నిర్వహించారు. అనంతరం మార్కండేయస్వామి పూజ, గాయత్రీ మంత్రోచ్చారణల మధ్య గాయత్రీధారణ నిర్వహించారు. అనంతరం 108 మంది దంపతులతో ప్రత్యేక హోమాలను నిర్వహించారు.