Local

Local· 18 Aug 2026

జీవో నెంబర్ 97 తక్షణమే రద్దు చేయాలి

TG: G.O 97ను తక్షణమే రద్దు చేయాలని, ⁠ప్రభుత్వ పాలిటెక్నిక్ కళాశాలలను Young India Skills University పరిధిలోకి తీసుకెళ్లే నిర్ణయాన్ని ఉపసంహరించుకోవాలని ఎస్ఎఫ్ఐ వనపర్తి జిల్లా కన్వీనర్ బి.మల్లేష్ అన్నారు. జిల్లా కమిటీ ఆధ్వర్యంలో వనపర్తి పాలిటెక్నిక్ కళాశాల ఎదురుగా ధర్నా నిర్వహించారు. శక్తి పథకం వెనక్కి తీసుకోవాలని, SBTET బోర్డును అభివృద్ధి చేయాలని డిమాండ్ చేశారు. హాస్టల్ ల్యాబ్స్ భవనాలు నిధులు ఇచ్చి అభివృద్ధి చేయాలన్నారు. పాలిటెక్నిక్ అధ్యాపకులు సిబ్బంది సర్వీస్ నిబంధనకు రక్షణ కల్పించాలన్నారు.

Local· 18 Aug 2026

మెరుగైన వైద్య సేవలందించడమే ప్రభుత్వ లక్ష్యం

మారుమూల, వెనుకబడిన ప్రాంతాల ప్రజలకు మెరుగైన వైద్య సేవలు అందించడమే ప్రభుత్వ లక్ష్యమని కొమరంభీం ఆసిఫాబాద్ జిల్లా కలెక్టర్ కె.హరిత అన్నారు. వాంకిడి మండలం ఇందాని గ్రామంలో గ్రాన్యుల్స్ ఇండియా ఫార్మా కంపెనీ రూ.25 లక్షల సీఎస్‌ఆర్‌ (CSR) నిధులతో నిర్మించనున్న ఆరోగ్య ఉపకేంద్రానికి ఆమె భూమిపూజ చేశారు. గ్రామీణ ప్రాంతాల్లో వైద్య మౌలిక వసతులను బలోపేతం చేయడమే ధ్యేయంగా ఈ నిర్మాణం చేపడుతున్నామని, ఇది అందుబాటులోకి వస్తే ఇందాని గ్రామంతోపాటు చుట్టుపక్కల గ్రామాల ప్రజలకు ప్రాథమిక వైద్యం సులభంగా అందుతుందన్నారు.

Local· 18 Aug 2026

బీజేపీ వైఖరిపై కాంగ్రెస్ నిరసన

TG: బీజేపీ అనుసరిస్తున్న విధానాలు, ప్రజావ్యతిరేక చర్యలను నిరసిస్తూ యాదాద్రి భువనగిరి జిల్లా ఆలేరు పట్టణ కేంద్రంలో ప్రభుత్వ విప్ ఆలేరు శాసనసభ్యులు, DCC అధ్యక్షుడు బీర్ల అయిలయ్య నేతృత్వంలో కాంగ్రెస్ పార్టీ ఆధ్వర్యంలో ఆందోళన కార్యక్రమం నిర్వహించారు. పేదలు, దళితులు, గిరిజనులు, మైనారిటీలు, విద్యార్థులు, యువత సంక్షేమాన్ని దృష్టిలో పెట్టుకుని కాంగ్రెస్ పార్టీ నిరంతరం పోరాడుతుందని బీర్ల అయిలయ్య పేర్కొన్నారు. ప్రజలకు న్యాయం జరిగే వరకు కాంగ్రెస్ ప్రజల పక్షాన నిలబడి పోరాటాలను కొనసాగిస్తుందని తెలిపారు.

Local· 18 Aug 2026

G.O.97 శక్తి పథకం రద్దు చెయ్యాలి

TG: పాలిటెక్నిక్ విద్యార్థులు తమ న్యాయమైన డిమాండ్‌ను ప్రజాస్వామ్య పద్ధతిలో చెప్పడానికి నిరసన చేపడితే, స్పీకర్ పర్యటన ఉందనే కారణంతో అనుమతి నిరాకరించడం ఎందుకు అని వికారాబాద్ మాజీ ఎమ్మెల్యే డాక్టర్ మెతుకు ఆనంద్ ప్రశ్నించారు. ప్రజాస్వామ్యంలో విద్యార్థుల గొంతును వినాల్సిన బాధ్యత ప్రభుత్వానిది అని అన్నారు. కార్యక్రమాలకు అనుమతులు నిరాకరించడం ద్వారా సమస్య పరిష్కారం కాదని తెలిపారు. పాలిటెక్నిక్ విద్యార్థులకు ఐటీఐ వారితో సమానం చేసే G.O. 97ను వెంటనే రద్దు చేయాలని డిమాండ్ చేశారు.

Local· 18 Aug 2026

భూ భారతి దరఖాస్తులను వెంటనే పరిష్కరించాలి

TG: జగిత్యాల జిల్లా కొడిమ్యాల తహసీల్దార్ కార్యాలయాన్ని జిల్లా కలెక్టర్ బి.సత్యప్రసాద్ ఆకస్మికంగా తనిఖీ చేశారు. భూ భారతి పెండింగ్ అంశాలు, సాదా బైనామా, మీసేవ ఫైళ్లను పరిశీలించి దరఖాస్తులను పెండింగ్‌లో ఉంచకుండా వెంటనే పరిష్కరించాలని ఆదేశించారు. రెవెన్యూ సదస్సుల్లో వచ్చిన భూ సమస్యలపై ప్రతి దరఖాస్తును క్షుణ్ణంగా పరిశీలించాలని సూచించారు. మీసేవ సర్టిఫికెట్లను ఎప్పటికప్పుడు పూర్తి చేసి ప్రజలకు అందించాలని అన్నారు.

Local· 18 Aug 2026

కాంగ్రెస్ పార్టీ బలోపేతమే లక్ష్యం

TG: కాంగ్రెస్ పార్టీని సంస్థాగతంగా మరింత బలోపేతం చేసి, నాయకులు, కార్యకర్తల సమన్వయంతో ముందుకు సాగుతామని ప్రభుత్వ విప్, మహబూబ్‌నగర్ ఎమ్మెల్యే యెన్నం శ్రీనివాస్‌రెడ్డి తెలిపారు. AICC కార్యదర్శి సచిన్ సావంత్ ముఖ్య అతిథిగా మహబూబ్‌నగర్ జిల్లా కాంగ్రెస్ పొలిటికల్ అఫైర్స్ కమిటీ సమావేశం జిల్లా కాంగ్రెస్ కార్యాలయంలో నిర్వహించారు. సచిన్ సావంత్ పార్టీ సంస్థాగత వ్యవహారాలు, భవిష్యత్ కార్యాచరణపై నాయకులకు దిశానిర్దేశం చేశారు.

Local· 18 Aug 2026

విఐపీ భద్రతలో అప్రమత్తతే కీలకం

TG: విఐపీ భద్రతా విధుల్లో ఉన్న పీఎస్‌ఓలు అప్రమత్తత, క్రమశిక్షణ, సమన్వయంతో పని చేయాలని పెద్దపల్లి జిల్లా రామగుండం పోలీస్ కమిషనర్ అంబర్ కిశోర్ ఝా సూచించారు. కమిషనరేట్‌లో పీఎస్‌ఓలకు విఐపీ భద్రతపై సంక్షిప్త శిక్షణ నిర్వహించారు. ఆరోగ్యం, శారీరక దారుఢ్యంతో పాటు మంచి అలవాట్లు, నిజాయితీ, విశ్వసనీయత పాటించాలని సూచించారు. భద్రతకు సంబంధించిన సమాచారాన్ని గోప్యంగా ఉంచాలని, అనుమానాస్పద కదలికలను వెంటనే ఉన్నతాధికారులకు చెప్పాలని ఆదేశించారు.

▶

Local· 18 Aug 2026

మున్సిపల్ కార్మికుల నిరసన

AP: ఎన్టీఆర్ జిల్లా కొండపల్లిలో సీఐటీయూ ఆధ్వర్యంలో మున్సిపల్ కార్మికులు నిరసనకు దిగారు.. మున్సిపల్ కార్మికుల ఉద్యోగాలను పర్మినెంట్ చేయాలని, మున్సిపల్, పౌర సేవల ప్రైవేటీకరణ వెంటనే ఆపాలని డిమాండ్ చేశారు. ప్రభుత్వ తీరుకు వ్యతిరేకంగా నినాదాలు చేశారు. సమస్యలు పరిష్కరించకుంటే అసెంబ్లీ సమావేశాలు ముగిసేలోపు చలో అసెంబ్లీ కార్యక్రమం చేపడతామని హెచ్చరించారు .

Local· 18 Aug 2026

300 మంది విద్యార్థినులకు నోట్‌బుక్స్ పంపిణీ

TG: సిరిసిల్ల ప్రభుత్వ బాలికల కళాశాలలో 300 మంది విద్యార్థినులకు నోట్‌బుక్స్ పంపిణీ చేశారు. కళాశాల ప్రిన్సిపాల్ జి. వనజా కుమారి అధ్యక్షతన జరిగిన కార్యక్రమానికి 4వ వార్డ్ కౌన్సిలర్ లైఖ్ సుల్తానా తాజ్ ముఖ్యఅతిథిగా హాజరయ్యారు. ప్రభుత్వం తొలిసారిగా ఇంటర్మీడియట్ విద్యార్థినులకు ఒక్కొక్కరికి 12 ఉచిత నోట్‌బుక్స్ అందించడం అభినందనీయమన్నారు. ప్రభుత్వం అందిస్తున్న సహాయాన్ని సద్వినియోగం చేసుకుని విద్యార్థినులు కష్టపడి చదివి కళాశాలకు, తల్లిదండ్రులకు మంచి పేరు తీసుకురావాలని అన్నారు.

Local· 18 Aug 2026

నర్సంపేటలో పెద్ది విగ్రహం తొలగింపు

TG: వరంగల్ జిల్లా నర్సంపేట మాజీ ఎమ్మెల్యే దివంగత పెద్ది సుదర్శన్ రెడ్డి విగ్రహాన్ని అధికారులు తొలగించారు. గద్దెను పూర్తిగా కూల్చివేశారు. సిమెంట్ ఇటుకలను అక్కడ నుండి దూరంగా తరలించారు. దగ్గరలో విధుల్లో ఉన్న పోలీసు సిబ్బంది సైతం ఫోన్లు వాడేందుకు అధికారులు నిరాకరించినట్లు సమాచారం. విగ్రహం తొలగింపు ప్రక్రియ అత్యంత రహస్యంగా పోలీసుల పహారాలో చేపట్టారు. సమాచారం తెలుసుకుని అక్కడికి వెళ్తున్న వారిని మధ్యలోనే అడ్డుకుంటున్నట్లు తెలుస్తోంది.

Local· 18 Aug 2026

తిరుపతి సబ్‌రిజిస్ట్రార్‌ ఆఫీసులో ఏసీబీ సోదాలు

AP: తిరుపతిలోని సబ్‌రిజిస్ట్రార్‌ కార్యాలయంలో ఏసీబీ అధికారులు తనిఖీలు నిర్వహించారు. నిన్న సాయంత్రం 7 గంటల ప్రాంతంలో ఏసీబీ డీఎస్పీ శ్రీనివాసులు సిబ్బందితో కార్యాలయానికి చేరుకుని సోదాలు చేపట్టారు. లెక్కల్లో చూపని రూ.2.48 లక్షల నగదును గుర్తించి ఏసీబీ అధికారులు స్వాధీనం చేసుకున్నారు. ఆ నగదు వివరాలకు సంబంధించి సబ్‌ రిజిస్ట్రార్‌ లక్ష్మీదేవిని విచారించారు. నగదుతోపాటు కార్యాలయంలోని రిజిస్ట్రేషన్‌ రికార్డులను, సంబంధిత దస్తావేజులను, నగదు లావాదేవీలకు సంబంధించిన వివరాలను పరిశీలించారు.

Local· 18 Aug 2026

బాల కార్మికులు లేని సమాజమే లక్ష్యం

TG: బాల కార్మికులు లేని సమాజ నిర్మాణానికి అందరం పాటుపడాలని బాలల హక్కుల ప్రజా వేదిక రాష్ట్ర అధ్యక్షుడు వలస సుభాష్ చంద్రబోస్ అన్నారు. హనుమకొండ జిల్లా భీమిదేవరపల్లి మండలం కొత్తకొండలో వీరభద్రస్వామి దేవాలయానికి వచ్చిన ఆయన మాట్లాడుతూ బాలల హక్కులను పకడ్బందీగా రాష్ట్ర ప్రభుత్వం అమలు చేయాలని కోరారు. బాలలతో ఎవరైనా పని చేసినట్లయితే టోల్‌ఫ్రీ నెంబర్ 1098కు సమాచారం అందించాలని వారు తెలిపారు.

Local· 18 Aug 2026

ఆదివాసీలకు 100% రిజర్వేషన్‌పై అసెంబ్లీలో బిల్లు పెట్టాలి

AP: ఆదివాసీలకు నూరు శాతం రిజర్వేషన్ కల్పించేందుకు ప్రత్యామ్నాయ జీవో జారీ చేసి, ముఖ్యమంత్రి చంద్రబాబు ఇచ్చిన హామీని నెరవేర్చాలని అల్లూరి సీతారామరాజు జిల్లా ఆదివాసీ గిరిజన సంఘం ప్రధాన కార్యదర్శి పొద్దు బాలదేవ్ డిమాండ్ చేశారు. డంబ్రిగుడ మండల కేంద్రంలో ఆదివాసీ గిరిజన సంఘం జిల్లా ఉపాధ్యక్షులు టి.సూర్యనారాయణ అధ్యక్షతన జరిగిన సమావేశం నిర్వహించారు. బాలదేవ్ మాట్లాడుతూ ఆదివాసీ హక్కులు, చట్టాల అమలులో ప్రభుత్వం నిర్లక్ష్యం చేస్తే మహోద్యమం చేపడతామని కేంద్ర, రాష్ట్ర ప్రభుత్వాలను హెచ్చరించారు.

Local· 18 Aug 2026

జూబ్లీహిల్స్‌, బంజారాహిల్స్‌లో వన్‌వేలు..వాహనదారులకు కష్టాలు

TG: హైదరాబాద్‌ నగరంలోని జూబ్లీహిల్స్‌, బంజారాహిల్స్‌ ప్రాంతాల్లో నేటి నుంచి అమల్లోకి వచ్చిన వన్‌వే నిబంధనలతో వాహనదారులు ఇబ్బందులు ఎదుర్కొంటున్నారు. ప్రధాన రహదారుల్లో ట్రాఫిక్‌ నియంత్రణ కోసం తీసుకున్న నిర్ణయం ప్రస్తుతం వాహనదారులు, బస్సు ప్రయాణికులకు గందరగోళంగా మారింది. కొత్త మార్గాల్లో ప్రయాణించాల్సి రావడంతో ఉద్యోగులకు ఇబ్బందిగా మారింది. సాధారణంగా వెళ్లే దారులు మూసివేయడంతో గల్లీ రోడ్లలోకి వాహనాలు మళ్లుతున్నాయి. చిన్నచిన్న రహదారుల్లోనూ భారీగా ట్రాఫిక్‌ జామ్‌లు ఏర్పడుతున్నాయి.

Local· 18 Aug 2026

ఘనంగా సర్దార్ సర్వాయి పాపన్న జయంతి వేడుకలు

TG: రాజన్న సిరిసిల్ల జిల్లా సమీకృత కార్యాలయాల సముదాయంలో బీసీ సంక్షేమశాఖ ఆధ్వర్యంలో సర్దార్ సర్వాయి పాపన్న జయంతి వేడుకలను ఘనంగా నిర్వహించారు. ముఖ్యఅతిథిగా జిల్లా కలెక్టర్ గరిమ అగ్రవాల్, అదనపు కలెక్టర్ గడ్డం నగేష్ హాజరై పాపన్న చిత్రపటానికి పూలమాలలు వేసి నివాళులు అర్పించారు. కార్యక్రమంలో జిల్లా గ్రంథాలయ సంస్థ చైర్మన్ నాగుల సత్యనారాయణ, బీసీ సంక్షేమ శాఖ జిల్లా అధికారి సౌజన్య, జిల్లా పశు సంవర్ధక శాఖ అధికారి రవీందర్ రెడ్డి, సీపీఓ శ్రీనివాసాచారి తదితరులు పాల్గొన్నారు.

Local· 18 Aug 2026

పాలిటెక్నిక్‌లను అనుసంధానం చేయొద్దని MLAకు వినతి

TG: ప్రభుత్వ పాలిటెక్నిక్ కళాశాలలను యంగ్ ఇండియా స్కిల్ యూనివర్సిటీకి అనుసంధానం చేస్తూ జారీ చేసిన జీవో నంబర్‌ 97ను వెంటనే వెనక్కి తీసుకోవాలని ఎంఎస్‌ఎఫ్‌ తెలంగాణ రాష్ట్ర అధ్యక్షుడు ఆకాశ్ నాయక్ డిమాండ్ చేశారు. రంగారెడ్డి జిల్లా షాద్‌నగర్ ఎమ్మెల్యే వీర్లపల్లి శంకర్‌ను కలిసి వినతిపత్రం అందజేశారు. పేద, బడుగు, బలహీన వర్గాల విద్యార్థులకు తక్కువ ఖర్చుతో సాంకేతిక విద్య అందిస్తున్న ప్రభుత్వ పాలిటెక్నిక్ వ్యవస్థను పటిష్టం చేయాల్సింది పోయి పీపీపీ విధానం తీసుకురావడం ప్రైవేటీకరణకు దారితీసే ప్రమాదం ఉందన్నారు.

Local· 18 Aug 2026

కేంద్ర, రాష్ట్ర ప్రభుత్వాలపై సీపీఎం ఫైర్

TG: ఉద్యోగాల కోసం ఎదురుచూస్తున్న నిరుద్యోగులకు సీపీఎం మద్దతు తెలిపింది. హామీలు ఇచ్చిన కేంద్ర, రాష్ట్ర ప్రభుత్వాలు ఇకనైనా ఖాళీ పోస్టులను భర్తీ చేసి యువతకు ఉపాధి కల్పించాలని డిమాండ్ చేసింది. శంషాబాద్‌లో నిరుద్యోగుల సమస్యల పరిష్కారం కోసం నిర్వహించిన ఆందోళన కార్యక్రమానికి సీపీఎం నాయకులు మద్దతు తెలిపారు. ఈ సందర్భంగా నాయకులు బచ్చలకూర స్వామి మాట్లాడుతూ.. కేంద్ర ప్రభుత్వం ఏటా 2 కోట్ల ఉద్యోగాలు కల్పిస్తామని హామీ ఇచ్చిందని, ఆ హామీ అమలు ఏమైందని ప్రశ్నించారు.

Local· 18 Aug 2026

కళ్యాణలక్ష్మి పథకాన్ని ఎత్తివేసే కుట్రను అడ్డుకోవాలి: సండ్ర

TG: కళ్యాణలక్ష్మి, షాదీ ముబారక్ పథకాలను కొనసాగించాలని బీఆర్ఎస్ రాష్ట్ర నాయకుడు, సత్తుపల్లి మాజీ ఎమ్మెల్యే సండ్ర వెంకట వీరయ్య డిమాండ్ చేశారు. ఖమ్మం జిల్లా కల్లూరులో ఆయన మాట్లాడుతూ.. పేద కుటుంబాలకు అండగా ఉండేందుకు కేసీఆర్ ప్రభుత్వం మానవతా దృక్పథంతో కళ్యాణలక్ష్మి పథకాన్ని ప్రారంభించిందని గుర్తుచేశారు. ఈ పథకం ద్వారా పేదింటి ఆడబిడ్డల వివాహాలకు ఎంతో ప్రయోజనం కలిగిందన్నారు. కాంగ్రెస్ ప్రభుత్వం అధికారంలోకి వచ్చిన తర్వాత పథకాల అమలుపై నిర్లక్ష్యం వహిస్తోందని ఆరోపించారు.