Local

Local· 2 Jul 2026

సీటు కోసం RTC బస్సులో రచ్చ .. చివరికి PSకు!

TG: రాష్ట్రంలో ఫ్రీబస్ స్కీమ్‌తో ప్రయాణికుల సంఖ్య పెరిగింది. పెరిగిన ప్రయాణికులకు అనుగుణంగా బస్సుల సంఖ్య పెంచకపోవడంతో ప్రయాణికులు తీవ్ర ఇబ్బందులు పడుతున్నారు. మెదక్ వైపు నుంచి సికింద్రాబాద్‌కు వెళ్తున్న RTC బస్సులో సీట్ విషయమై ప్రయాణికుల మధ్య వాగ్వాదం జరిగింది. నర్సాపూర్ వద్ద బస్సు ఎక్కిన మానసిక వికలాంగుడు వినోద్ సీటు కోసం మరో మహిళతో గొడవకు దిగాడు. మహిళపై దాడిచేసి, ఆమె బ్యాగ్‌ను చింపివేయడంతో బస్సులో టెన్షన్ వాతావరణం నెలకొంది. డ్రైవర్ బస్సును నేరుగా నర్సాపూర్ PSకు తీసుకెళ్లారు. పోలీసులు ఇరువర్గాల నుంచి వివరాలు సేకరించి విచారణ చేపట్టారు.

▶

Local· 28 Jun 2026

చిరుతపులి వీడియో వైరల్.. గ్రామస్తుల్లో టెన్షన్

TG: వరంగల్ జిల్లా ఖానాపురం మండలం రాగంపేట శివారులోని పామాయిల్ తోటల్లో చిరుత పులి సంచారం తీవ్ర కలకలం రేపింది. దీంతో స్థానికులు భయాందోళనలు గురవుతున్నారు. శివారులో విస్తారంగా పామాయిల్ తోటలు ఉండటంతో నక్కల వర్రే కాల్వ వెంబడి మనుబోతులగడ్డ, పోచారం అటవీ ప్రాంతాల నుంచి పులి వచ్చినట్లు స్థానికులు అనుమానం వ్యక్తం చేస్తున్నారు. చిరుత పులి వీడియో సోషల్ మీడియాలో వైరల్ కావడంతో ఖానాపూర్ మండల ప్రజల్లో ఆందోళన నెలకొంది.

Local· 27 Jun 2026

శంషాబాద్ ఎయిర్‌పోర్ట్‌ సమీపంలో చిరుత కలకలం

TG: రంగారెడ్డి జిల్లా శంషాబాద్‌ ఇంటర్నేషనల్ ఎయిర్‌పోర్ట్ సమీపంలోని చిన్మయ విద్యాలయ పరిసరాల్లో చిరుతపులి సంచారం కలకలం రేపింది. పాఠశాల సమీపంలో చిరుతను గమనించిన స్థానికులు భయాందోళనలకు గురై వెంటనే అటవీశాఖ అధికారులకు సమాచారం అందించారు. ఘటనా స్థలానికి చేరుకున్న ఫారెస్ట్ అధికారులు పరిసరాలను పరిశీలించి చిరుత ఆనవాళ్ల కోసం ముమ్మర గాలింపు చర్యలు చేపట్టారు. ఎక్కడైనా చిరుత కనిపిస్తే వెంటనే అటవీశాఖ లేదా పోలీసులకు సమాచారం ఇవ్వాలని అధికారులు సూచించారు.

Local· 27 Jun 2026

వాట్పాప్ గ్రూప్‌లో పాలిటిక్స్.. పోలీసులకు ఫిర్యాదు

TG: హైదరాబాద్ బంజారాహిల్స్ రోడ్డు నంబర్-12లోని NBTనగర్ బస్తీ సమస్యలపై చర్చించుకునేందుకు స్థానికులు ఒక వాట్సాప్ గ్రూప్‌ను ఏర్పాటు చేశారు. గ్రూప్‌లో కొందరు పొలిటికల్ మెసెజెస్ పోస్టు చేస్తున్నారు. గ్రూప్‌లో రాజకీయ పరమైన పోస్టులు పెట్టకూడదని గ్రూప్ అడ్మిన్ హెచ్చరించారు. ఓ మహిళ నిరంతరం పొలిటికల్ మెసెజెస్ పోస్ట్ చేస్తుంది. అడ్మిన్ ఆమెను గ్రూప్ నుంచి రిమూవ్ చేశారు. దీంతో ఆమె పోలీసులకు ఫిర్యాదు చేసింది. గ్రూప్ నిబంధనలను ఉల్లంఘించినందుకే ఆమెను తొలగించామని, ఆమెను తిరిగి గ్రూప్‌లో చేర్చుకునే ప్రసక్తేలేదని అడ్మిన్ పోలీసుల ముందే తేల్చి చెప్పాడు.

Local· 26 Jun 2026

మత్తులో రచ్చ.. బారికేడ్లతో పట్టుకున్న పోలీసులు

TG: సూర్యాపేట జిల్లా గరిడేపల్లి మండలంలో మద్యంమత్తులో DCM డ్రైవర్ బీభత్సం సృష్టించాడు. గుండాలమిట్ట ప్రాంతంలో వేగంగా వెళ్తున్న DCM బొగ్గులారీని, అనంతరం ఓ హోంగార్డుకు చెందిన కారును ఢీకొట్టింది. డీసీఎం ఒకవైపు భాగం పూర్తిగా ధ్వంసమైంది. అయినప్పటికీ డ్రైవర్ వాహనాన్ని ఆపకుండా వేగంతో వెళ్లాడు. డీసీఎం డోర్ భాగాలు, ఇనుప కడ్డీలు కింద వేలాడుతూ ఉండగా రమణమ్మ అనే మహిళకు తగలడంతో తీవ్రంగా గాయపడింది. స్థానికులు ఆపేందుకు ప్రయత్నించగా, డ్రైవర్ తప్పించుకున్నాడు. నేరేడుచర్ల పోలీసులు బైపాస్ రోడ్డుపై బారికేడ్లు ఏర్పాటచేసి అడ్డుకున్నారు. డ్రైవర్‌ను అరెస్ట్ చేశారు.

Local· 26 Jun 2026

డ్యూటీలో ఉండగానే కుప్పకూలిన ఫైర్ ఆఫీసర్

TG: ​ఆదిలాబాద్ జిల్లా ఇచ్చోడ అగ్నిమాపక కేంద్రంలో ఫైర్ ఆఫీసర్‌గా విధులు నిర్వహిస్తున్న MD షఫీ విధుల్లో ఉండగానే గుండెపోటుతో మృతి చెందారు. నిజామాబాద్ జిల్లాకు చెందిన ఆయన ఇచ్చోడలో డ్యూటీలో ఉండగా ఒక్కసారిగా గుండెపోటు వచ్చి కుప్పకూలాడు. గమనించిన తోటి సిబ్బంది హుటాహుటిన హాస్పిటల్‌కు తరలించారు. అయితే అప్పటికే ఆయన మృతి చెందినట్లు డాక్టర్లు ధృవీకరించారు. నిబద్ధతతో పనిచేసే అధికారి విధుల్లో ఉండగానే ఇలా అకస్మాత్తుగా కన్నుమూయడం పట్ల తోటి అగ్నిమాపక సిబ్బంది దిగ్భ్రాంతి వ్యక్తం చేస్తున్నారు.

Local· 26 Jun 2026

టిఫిన్ తింటుండగా ఊహించని షాక్

TG: వరంగల్‌ జిల్లా కాశీబుగ్గకు చెందిన బేతి రాజు స్థానికంగా ఉన్న ఓ హోటల్‌లో వడ పార్సల్‌ తీసుకుని ఇంటికి వెళ్లాడు. వడ తినబోతుండగ బల్లి కనిపించింది. షాక్‌కు గురైన రాజు వీడియో తీసి సోషల్ మీడియాలో పోస్టుచేశాడు. హోటల్‌కు వచ్చి జరిగిన విషయం చెప్పగా.. హోటల్‌ నిర్వాహకులు సరైన సమాధానం ఇవ్వకుండా దురుసుగా మాట్లాడినట్లు తెలిపాడు. వీడియో సోషల్ మీడియాలో వైరల్ అయింది. స్పందించిన ఫుడ్‌ ఇన్‌స్పెక్టర్‌ మౌనిక సారథ్యంలో కాశీబుగ్గలోని సదరు హోటల్‌ను తనిఖీ చేశారు. హోటల్‌లో నిర్వహణ సరిగా లేకపోవడం, సరైన పత్రాలు లేనట్లు గుర్తించారు. రూ.10వేల జరిమానా విధించి, హోటల్‌ను సీజ్‌ చేశారు.

▶

Local· 26 Jun 2026

మొహరం ఉత్సవంలో అపశృతి

TG: ఆదిలాబాద్ జిల్లా తాంసి మండల కేంద్రంలో నిర్వహించిన మొహరం ఉత్సవంలో అపశృతి చోటు చేసుకుంది. సవారి బంగ్లా ప్రారంభోత్సవం సందర్భంగా టపాసులు కాల్చడంతో ఒక్కసారిగా నిప్పురవ్వలు సవారిపై ఉన్న కాగితపు పూలకు తాకి మంటలు అంటుకున్నాయి. వెంటనే అప్రమత్తమైన స్థానికులు పీర్లను కిందపడేసి మంటలను ఆర్పివేశారు. దీంతో పెను ప్రమాదం తప్పింది. ఘటనలో సవారిపై ఉన్న వస్త్రాలు దగ్ధమయ్యాయి.

Local· 25 Jun 2026

SC షాపింగ్ కాంప్లెక్స్ దుకాణాల కేటాయింపుల్లో అక్రమాలు

TG: నాగర్‌కర్నూల్ జిల్లా కల్వకుర్తి మున్సిపాలిటీలోని SC షాపింగ్ కాంప్లెక్స్ దుకాణాల కేటాయింపుల్లో అక్రమాలు జరిగాయని గురువారం దళిత నిరుద్యోగ యువత రిలే నిరాహార దీక్షకు దిగారు. పారదర్శకత లేకపోవడం, అనర్హులకు రాజకీయ సిఫార్సులతో కేటాయింపులు చేయడం వంటి కారణాల వల్ల స్థానికంగా తీవ్ర వ్యతిరేకత వ్యక్తమైంది. బస్టాండ్ ఎదురుగా ఉన్న SC కాంప్లెక్స్‌లోని 34 దుకాణాలను అర్హులైన పేద దళితులకు ఇవ్వడంలో మొండిచేయి చూపారని, నిరుపేద దళిత నిరుద్యోగులకు ఉపాధి కల్పించాలనే ప్రభుత్వ లక్ష్యం పూర్తిగా పక్కదారి పట్టిందని వారు ఫైరయ్యారు.

Local· 24 Jun 2026

పెద్దపులి సంచారం.. భయం భయం

AP: ఏలూరు జిల్లాలో సంచరిస్తున్న పెద్దపులి బుట్టాయగూడెం మండలంలోకి రావడంతో ప్రజలు భయాందోళనకు గురవుతున్నారు. నిమ్మలగూడెం శివారు పాలకుంట చెరువు వద్ద పులి దాడిలో 2ఆవులు మృతి చెందాయి. అటవీ ప్రాంతాల్లో ఎవరూ ఒంటరిగా తిరగవద్దని అటవీ అధికారుల సూచించారు. పులికి అమర్చిన రేడియో కాలర్‌తో కదలికలను సిబ్బంది పరిశీలిస్తున్నారు. పులిని పట్టుకునేందుకు మత్తుమందు, బోన్లు సిద్ధం చేశారు. సమీప అటవీ ప్రాంత ప్రజలను అధికారులు అప్రమత్తం చేశారు.

Local· 24 Jun 2026

యువరైతు ఆత్మహత్యాయత్నం

AP: చిత్తూరు జిల్లా గంగాధర నెల్లూరు మండలంలో బొమ్మవారిపల్లి విలేజ్‌కు చెందిన యువరైతు లోకేశ్ నాయుడు నాలుగురోజుల క్రితం మామిడి లోడ్‌తో జైన్ మామిడి గుజ్జు పరిశ్రమకు చేరుకున్నాడు. వరుసలో ఉన్నప్పటికీ ఇప్పటివరకు సీరియల్ నంబర్ ఇవ్వలేదు. కానీ అర్ధరాత్రి వేళ సిఫారసులతో వచ్చిన వాహనాలను వరుసగా ఫ్యాక్టరీలోకి వెళ్తుండటంతో ప్రశ్నించగా, అక్కడి సిబ్బంది, దళారులు ఇక్కడి నుంచి వెళ్లిపో అంటూ దురుసుగా ప్రవర్తించారు. కుంగిపోయిన లోకేశ్ ఒంటిపై డీజిల్ పోసుకుని ఆత్మహత్యాయత్నానికి పాల్పడ్డాడు. అక్కడున్న రైతులు అడ్డుకున్నారు.

Local· 21 Jun 2026

మదనపల్లెలో "అవునా?" ఫ్లెక్సీలు కలకలం

AP: అన్నమయ్య జిల్లా మదనపల్లె పట్టణంలోని RTC బస్టాండ్ సమీపంలోని అంబేద్కర్ సర్కిల్‌లో "అవునా?" ఫ్లెక్సీలు కలకలం రేపుతున్నాయి. ఎలాంటి పార్టీ పేరు, నాయకుడి ఫోటో లేదా సంస్థ వివరాలు లేకుండా కేవలం "అవునా?" అనే ప్రశ్నతో ఏర్పాటు చేసిన ఫ్లెక్సీలు ప్రజల్లో ఆసక్తిని రేకెత్తిస్తున్నాయి. ఈ ఫ్లెక్సీల వెనుక ఉద్దేశ్యం ఏమిటి? రాజకీయ సందేశానికా, సామాజిక ప్రచారానికా, లేక మరేదైనా ప్రత్యేక కార్యక్రమానికి సంకేతమా? అనే చర్చలు పట్టణంలో జోరుగా సాగుతున్నాయి. ఒక్క మాటతోనే అందరి దృష్టిని ఆకర్షించిన ఈ ఫ్లెక్సీలు ప్రస్తుతం మదనపల్లెలో హాట్ టాపిక్‌గా మారాయి.

Local· 21 Jun 2026

నేషనల్ హైవేపై భారీగా ట్రాఫిక్ జామ్

TG: హైదరాబాద్ - విజయవాడ నేషనల్ హైవేపై భారీగా ట్రాఫిక్ జామ్ అయింది. యాదాద్రిభువనగిరి జిల్లా చౌటుప్పల్ మండలం బొరొల్లగూడెం స్టేజీ సమీపంలో ఆదివారం తెల్లవారుజామున కంటైనర్ బోల్తా పడింది. హైవేపై అడ్డంగా వాహనం పడడంతో ట్రాఫిక్ జామ్ అయింది. పోలీసులు రెండు క్రేన్లతో కంటైనర్‌ను పక్కకు తరలించేందుకు ప్రయత్నించినా ఫలితం లేకపోయింది. హైదరాబాద్ మార్గంలో కిలోమీటర్ల మేర వాహనాలు ఎక్కడికక్కడ నిలిచిపోయాయి. ప్రస్తుతం విజయవాడ మార్గంలో కైతాపురం నుంచి బొర్రాల్లగూడెం స్టేజ్ వరకు వాహనాలను పంపిస్తున్నారు.

Local· 18 Jun 2026

ఏనుగుల బీభత్సం.. పంటలు, తోటలు ధ్వంసం

AP: చిత్తూరు జిల్లా రామకుప్పం మండలంలో ఏనుగుల గుంపు బీభత్సం సృష్టించింది. ఏనుగులు మామిడితోటలపై దాడి చేశాయి. రాత్రి వేళల్లో పంటలు, మామిడి తోటలలోకి వచ్చి తీవ్ర నష్టం కలిగిస్తున్నాయని రైతులు ఆవేదన వ్యక్తం చేస్తున్నారు. రామకుప్పం మండలంలో, అదేవిధంగా ననియాల, ఎస్ గొల్లపల్లి ప్రాంతాల్లోకి ఏనుగులు చొరబడి ప్రజలను భయాందోళనకు గురి చేస్తున్నాయి. అటవీశాఖ అధికారులకు సమాచారం ఇవ్వగా.. అప్రమత్తంగా ఉండాలని వారు సూచించారు. ఏనుగుల కదలికలపై అధికారులు నిఘా పెంచారు.

Local· 18 Jun 2026

కోతుల కొట్లాటలో మహిళ మృతి

TG: జగిత్యాల జిల్లా ధర్మపురి పట్టణంలోని కమలాపూర్ రోడ్డు ఇందిరమ్మ కాలనీలో కొనపర్తి సత్యనారాయణ, పద్మ(55) దంపతులు నివాసం ఉంటున్నారు. పద్మ బుధవారం సాయంత్రం ఇంటి ముందు కూర్చొని మరో మహిళతో మాట్లాడుతున్నారు. అదే సమయంలో ఆ ఇంటిపై రెండు కోతులు తీవ్రంగా కొట్లాడుకోసాగాయి. రేకులు గాలికి ఎగిరిపోకుండా బరువు కోసం పెట్టిన సిమెంట్ ఇటుక కింద కూర్చున్న పద్మ తలపై పడడంతో ఆమె అక్కడికక్కడే మృతి చెందింది. భర్త సత్యనారాయణ ఫిర్యాదు మేరకు కేసు నమోదు చేసినట్లు ఎస్సై జి.మహేష్ తెలిపారు.

Local· 17 Jun 2026

గ్యాస్ లీక్ ఘటనలో కాలిన గాయాలతో యువతి మృతి

AP: బీఆర్. అంబేడ్కర్ కోనసీమ జిల్లా మామిడికుదురు మండలం ఈదరాడకు చెందిన చుట్టుగుళ్ల చంద్రప్రియ(23) ఈ నెల 14న ఇంట్లో వంట చేస్తుండగా గ్యాస్ లీకైంది. ఒక్కసారిగా మంటలు చెలరేగాయి. ప్రమాదంలో తీవ్రంగా గాయపడిన ఆమెను కుటుంబసభ్యులు రాజోలు ఏరియా ఆసుపత్రికి తరలించారు. ఆ తర్వాత మెరుగైన వైద్యం కోసం అమలాపురంలోని ఓ ప్రైవేట్ హాస్పిటల్‌కు తరలించారు. చికిత్స పొందుతున్న చంద్రప్రియ బుధవారం మృతి చెందింది. యువతి మృతితో కుటుంబసభ్యులు, బంధువులు విషాదంలో మునిగిపోయారు. గ్రామంలో విషాదఛాయలు అలుముకున్నాయి.

Local· 17 Jun 2026

ఎమర్జెన్సీ వార్డులో అగ్ని ప్రమాదం

AP: విజయవాడలోని రెయిన్ బో చిల్డ్రన్స్ హాస్పిటల్‌లో బుధవారం తెల్లవారుజామున ఫైర్ యాక్సిడెంట్ జరిగింది. హాస్పిటల్‌లోని ఎమర్జెన్సీ వార్డులో ఒక్కసారిగా మంటలు చెలరేగడంతో సిబ్బంది అలెర్ట్ అయి వార్డులో ఉన్న పిల్లలను వెంటనే మరో వార్డులోకి తరలించారు. ఫైర్ సిబ్బంది మంటలను అదుపులోకి తెచ్చారు. పోలీసులు ఈ ఘటనపై కేసు నమోదు చేసి, ఆస్పత్రి సిబ్బంది, యాజమాన్యం నుంచి వివరాలు సేకరించారు. షార్ట్ సర్క్యూట్ కారణంగానే మంటలు చెలరేగి ఉంటాయని ప్రాథమికంగా అంచనా వేశారు.

Local· 17 Jun 2026

విధుల్లొ అలసత్వం.. అధికారులపై సస్పెన్షన్ వేటు

AP: పారిశుధ్య నిర్వహణ పనుల్లో నిర్లక్ష్యం వహించిన ఇద్దరు MPDOలను సస్పెండ్ చేస్తూ పంచాయతీరాజ్, గ్రామీణాభివృద్ధి శాఖ కమిషనర్ కృష్ణ తేజ ఉత్తర్వులు జారీ చేశారు.​ ఉమ్మడి నెల్లూరు జిల్లాలోని సూళ్లూరుపేట MPDO ఏవీ మురళీకృష్ణ, తడ MPDO డీ.శేఖర్ నాయక్‌లను సస్పెండ్ చేశారు. ప్రభుత్వ ప్రతిష్టాత్మక పథకమైన 'స్వచ్ఛ రథాల' ఏర్పాటు, వాటి నిర్వహణలో వీరు అలసత్వం ప్రదర్శించినట్లు ప్రాథమిక విచారణలో తేలింది. బాధ్యతాయుతమైన పదవుల్లో ఉండి క్షేత్రస్థాయిలో పర్యవేక్షణ చేయడంలో అధికారులు విఫలమయ్యారని కమిషనర్ తన ఉత్తర్వుల్లో పేర్కొన్నారు.