TG

TG· 12 Aug 2026

యువతే దేశానికి బిగ్ పవర్

TG: అంతర్జాతీయ యువజన దినోత్సవాన్ని పురస్కరించుకుని హైదరాబాద్‌లోని శేరిలింగంపల్లి జూనియర్ కళాశాలలో అవగాహన కార్యక్రమం నిర్వహించారు. ముఖ్యఅతిథిగా హైదరాబాద్ సెంట్రల్ యూనివర్సిటీ ప్రొఫెసర్ చివుకుల ఉష పాల్గొని మాట్లాడారు. యువశక్తితోనే దేశ ప్రగతి సాధ్యమని పేర్కొన్నారు. యువత మద్యపానం, ధూమపానం, మాదకద్రవ్యాలు, సోషల్ మీడియా వ్యసనాలకు దూరంగా ఉండాలని సూచించారు. నూతన సాంకేతికతను అందిపుచ్చుకుని విద్య, ఉపాధి రంగాల్లో ముందుకు సాగాలని పిలుపునిచ్చారు.

TG· 12 Aug 2026

పట్టపగలే గుడి దగ్గర గుప్త నిధుల వేట

TG: పెద్దపల్లి జిల్లా ముత్తారం మండలం ఖమ్మంపల్లి గ్రామ పంచాయతీ పరిధిలో గుప్త నిధుల కోసం తవ్వకాలు జరిగాయన్న ప్రచారం కలకలం రేపుతుంది. గ్రామ సమీపంలోని పురాతన దేవాలయం సందెరెల్లి గుల్ల వద్ద భారీగా మట్టి తవ్వి గుంత ఏర్పాటు చేయడం స్థానికంగా చర్చనీయాంశమైంది. తవ్వకాలకు ఉపయోగించిన పరికరాలు ఎక్కడి నుంచి వచ్చాయనే అంశంపై చర్చ జరుగుతోంది. అర్ధరాత్రి, పట్టపగలే తవ్వకాలు జరుగుతుంటే పోలీసులకు, రెవెన్యూ అధికారుల కళ్లకు కనిపించడం లేదా అని, లేక సమాచారం ఉన్నప్పటికీ పట్టించుకోవట్లేదా అనే అనుమానాలు వ్యక్తమవుతున్నాయి.

TG· 12 Aug 2026

నిద్రలో ఉన్న భార్యపై ఇటుకతో దాడి

TG: మేడ్చల్ జిల్లా ఘట్‌కేసర్‌లోని ద్వారకానగర్‌లో మాధవి (37)ని ఆమె భర్త కాట్రావత్ రాజు సిమెంట్ ఇటుకతో కొట్టి హత్య చేసినట్లు పోలీసులు తెలిపారు. 18ఏళ్ల క్రితం వివాహమైన ఈ దంపతులకు ముగ్గురు పిల్లలు ఉన్నారు. గత కొంతకాలంగా రాజు మద్యానికి బానిసై భార్యను అనుమానిస్తూ వేధిస్తున్నట్లు పోలీసులు పేర్కొన్నారు. గత అర్ధరాత్రి మద్యం మత్తులో ఇంటికి వచ్చిన రాజు.. కుటుంబసభ్యులు నిద్రిస్తున్న సమయంలో మాధవిపై దాడి చేశాడు. తీవ్రంగా గాయపడిన ఆమెను ఆస్పత్రికి తరలించగా అప్పటికే మృతి చెందినట్లు వైద్యులు నిర్ధారించారు.

TG· 12 Aug 2026

లాజిస్టిక్స్ గోదాంలో షాకింగ్ ఫైర్

TG: మేడ్చల్ జిల్లా దేవరయంజాల్‌లోని కోల్డ్ రష్ లాజిస్టిక్స్ గోదాంలో భారీ అగ్ని ప్రమాదం జరిగింది. గోదాంలో ఒక్కసారిగా మంటలు చెలరేగడంతో భారీగా మంటలు ఎగసిపడ్డాయి. దట్టమైన పొగలు పరిసర ప్రాంతాలను కమ్మేయడంతో స్థానికులు తీవ్ర భయాందోళనకు గురయ్యారు. సుమారు రెండు గంటలుగా మంటలు ఎగిసిపడ్డాయి. అగ్నిమాపక సిబ్బంది రెండు ఫైర్ ఇంజన్లతో ఘటనా స్థలానికి చేరుకుని మంటలను అదుపు తెచ్చారు. అగ్ని ప్రమాదానికి గల కారణాలు తెలియల్సి ఉంది.

TG· 12 Aug 2026

తల్లి కాబోతున్న వేళ విషాదం.. ఆస్పత్రి వద్ద ఉద్రిక్తత

TG: ప్రసవం కోసం సంగారెడ్డి ప్రభుత్వాసుపత్రిలో చేరిన 9నెలల గర్భిణీ అనిత (33) మృతి చెందడం తీవ్ర విషాదం నింపింది. చౌటకూర్ మండలం బద్రిగూడెంకు చెందిన అనితను కుటుంబసభ్యులు ఈ నెల 10న ఆసుపత్రిలో చేర్పించారు. చికిత్స పొందుతున్న ఆమెకు ఇవాళ తెల్లవారుజామున ఫిట్స్ రావడంతో మృతి చెందినట్లు వైద్యులు కుటుంబసభ్యులకు తెలిపారు. అయితే సరైన సమయంలో వైద్యం అందకపోవడం, వైద్యులు, సిబ్బంది నిర్లక్ష్యంగా వ్యవహరించడం వల్లే తమ కూతురు మృతి చెందిందని బంధువులు ఆసుపత్రి వద్ద ఆందోళనకు దిగారు. దీంతో అక్కడ ఉద్రిక్తత నెలకొంది.

TG· 12 Aug 2026

మళ్లీ హాస్టల్‌కు పంపుతారనే భయంతో బాలిక ఆత్మహత్య

TG: ఆదిలాబాద్ జిల్లా గుడిహత్నూర్ మండలం సీతాగొంది గ్రామానికి చెందిన 11ఏళ్ల బాలిక మైనారిటీ హాస్టల్‌లో 5వ తరగతి చదువుతుంది. ఇంట్లో ఎవరూలేని సమయంలో ఉరివేసుకుని ఆత్మహత్యకు పాల్పడింది. రేషన్‌కార్డు eKYC కోసం పదిరోజుల క్రితం తల్లి ఆమెను ఇంటికి తీసుకొచ్చింది. అయితే తిరిగి హాస్టల్‌కు వెళ్లేందుకు బాలిక ఇష్టపడకపోవడంతో, ఆమెను హాస్టల్ నుంచి మాన్పించి TC తీసుకురావడానికి తల్లి అక్కడికి వెళ్లింది. ఈ సమయంలో బాలిక ఇంట్లోనే ప్రాణాలు తీసుకుంది. తిరిగి హాస్టల్‌కు పంపిస్తారనే భయంతోనే ఘటన జరిగినట్లు పోలీసులు తెలిపారు.

TG· 12 Aug 2026

ఆస్పత్రిలోనే బాలింత సూసైడ్

TG: నల్గొండ జిల్లా మునుగోడు మండలం చీకటిమామిడి గ్రామానికి చెందిన మమత (27) ప్రసవం కోసం నల్గొండ ప్రభుత్వ ఆస్పత్రిలో చేరింది. ప్రసవం అనంతరం ఆస్పత్రిలోనే చికిత్స పొందుతున్న ఆమె బుధవారం తెల్లవారుజామున వార్డు నుంచి బయటకు వచ్చి హాస్పిటల్ ఆవరణలో చెట్టుకు చీరతో ఉరివేసుకుని ఆత్మహత్యకు పాల్పడింది. గమనించిన సిబ్బంది పోలీసులకు సమాచారం అందించారు. వరుసగా నలుగురు ఆడపిల్లలే పుట్టడంతో కుటుంబంలో గొడవలు జరుగుతున్నాయని, అత్తింటి వేధింపులే మమత ఆత్మహత్యకు కారణం అని ఆమె బంధువులు ఆరోపించారు.

TG· 12 Aug 2026

డంపింగ్ యార్డు ప్రతిపాదనను రద్దు చేయాలని మహా ధర్నా

TG: రంగారెడ్డి జిల్లా కొత్తూరు మండలంలోని సిద్ధాపూర్ డంపింగ్ యార్డు ప్రతిపాదనను రద్దు చేయాలని డిమాండ్ చేస్తూ సిద్దాపూర్ డంపింగ్ యార్డ్ వ్యతిరేక పోరాట జాయింట్ యాక్షన్ కమిటీ (SDVP JAC) ఆధ్వర్యంలో తహసీల్దార్ కార్యాలయం ఎదుట మహాధర్నా నిర్వహించారు. వివిధ రాజకీయ పార్టీలు, ప్రజాసంఘాల నాయకులు, స్థానికులు పాల్గొని ప్రభుత్వానికి వ్యతిరేకంగా నినాదాలు చేశారు. డంపింగ్ యార్డు హటావో.. సిద్ధాపూర్ బచావో అంటూ ధర్నా ప్రాంగణం మార్మోగింది. డంపింగ్ యార్డుతో దుర్వాసన, కాలుష్యం, భూగర్భ జలాల కలుషితమయ్యే ప్రమాదం ఉందన్నారు.

TG· 12 Aug 2026

ACP ఆఫీస్‌లో సడన్ షాక్.. కానిస్టేబుల్ మృతి

TG: హైదరాబాద్ LBనగర్ ACP కార్యాలయంలో విధులు నిర్వహిస్తున్న కానిస్టేబుల్ సాయికుమార్ మృతి కలకలం రేపింది. రెస్ట్‌రూమ్‌లో ఆయన ఉరివేసుకుని ఆత్మహత్యకు పాల్పడినట్లు పోలీసులు తెలిపారు. గత నెల నుంచి LBనగర్ పోలీస్‌స్టేషన్ నుంచి ACP కార్యాలయానికి అటాచ్‌మెంట్‌పై సాయికుమార్ విధులు నిర్వహిస్తున్నారు. ఘటనపై పోలీసులు దర్యాప్తు చేస్తున్నారు. ఆత్మహత్యకు గల కారణాలు తెలియాల్సి ఉంది. విషయం తెలుసుకున్న బంధువులు పోలీస్‌స్టేషన్ ఎదుట ఆందోళన చేపట్టారు.

TG· 12 Aug 2026

ఖేలో ఇండియాపై CM స్పెషల్ ఫోకస్

TG: ఖేలో ఇండియా యూత్ గేమ్స్-2026 పోటీలను ప్రతిష్టాత్మకంగా నిర్వహించాలని CM రేవంత్‌రెడ్డి అధికారులను ఆదేశించారు. హైదరాబాద్‌లోని బోధి పెవిలియన్‌లో ఖేలో ఇండియా యూత్ గేమ్స్ ఏర్పాట్లు, నిర్వహణపై సమీక్ష నిర్వహించారు. డిసెంబరులో నిర్వహించే జాతీయస్థాయి పోటీలకు వివిధ రాష్ట్రాల క్రీడాకారులు రానున్న నేపథ్యంలో క్రీడా మైదానాలు, మౌలిక వసతులను మెరుగుపరచాలని సూచించారు. హైదరాబాద్‌లోని స్పోర్ట్స్ గ్రౌండ్స్ పరిస్థితిని పరిశీలించి శాశ్వత అభివృద్ధికి చర్యలు తీసుకోవాలని చెప్పారు.

TG· 12 Aug 2026

హైవేపై సడన్ షాక్.. రెండు ప్రమాదాల్లో 8మంది మృతి

హైదరాబాద్-ముంబయి నేషనల్ హైవేపై జరిగిన రెండు వేర్వేరు ప్రమాదాలతో తీవ్ర విషాదం నెలకుంది. సంగారెడ్డి జిల్లా జహీరాబాద్ మండలం సత్వార్ వద్ద యూటర్న్ తీసుకుంటున్న ఆటోను వేగంగా వచ్చిన ట్యాంకర్ ఢీకొట్టడంతో ఆరుగురు మృతిచెందారు. మృతుల్లో ఐదుగురు కూలీలు, ఆటో డ్రైవర్ ఉన్నారు. మరో ఆరుగురు తీవ్రంగా గాయపడ్డారు. కోహీర్ మండలం వెంకటాపూర్ కూడలి సమీపంలో మరో ప్రమాదం జరిగింది. డివైడర్‌ను ఢీకొన్న కారు అదుపుతప్పి ఎదురుగా వస్తున్న వాహనాలను ఢీకొట్టడంతో ఇద్దరు చనిపోయారు. పోలీసులు కేసులు నమోదు చేసి దర్యాప్తు చేస్తున్నారు.

TG· 11 Aug 2026

శేరిలింగంపల్లిలో ‘హర్ ఘర్ తిరంగా’ వేడుకలు

TG: వందేమాతరం గీతం 150 ఏళ్లు, 80వ స్వాతంత్ర్య దినోత్సవం సందర్భంగా ప్రధాని నరేంద్ర మోదీ పిలుపు మేరకు శేరిలింగంపల్లి మసీద్ బండ క్యాంపు కార్యాలయంలో బీజేపీ ఇంచార్జి రవికుమార్ యాదవ్ జాతీయ జెండాను ఆవిష్కరించారు. ప్రతి ఒక్కరూ ఇళ్లపై త్రివర్ణ పతాకాన్ని ఎగురవేసి, ఆ సెల్ఫీని harghartiranga.comలో అప్‌లోడ్ చేసి ఈ కార్యక్రమాన్ని విజయవంతం చేయాలని ఆయన కోరారు.

TG· 11 Aug 2026

నల్లగండ్ల రేణుకా ఎల్లమ్మ ఆలయంలో బోనాల వేడుకలు

TG: శేరిలింగంపల్లిలోని నల్లగండ్ల నేతాజీనగర్ రేణుకా ఎల్లమ్మ దేవాలయంలో బోనాల పండుగ ఘనంగా జరిగింది. టిపిసిసి రాష్ట్ర ప్రధాన కార్యదర్శి వి.జగదీశ్వర్ గౌడ్ ముఖ్యఅతిథిగా హాజరై అమ్మవారికి ప్రత్యేక పూజలు నిర్వహించారు. అనంతరం అన్నదాన కార్యక్రమాన్ని ప్రారంభించారు. నియోజకవర్గ ప్రజలకు పండుగ శుభాకాంక్షలు తెలిపారు. కార్యక్రమంలో నాయకులు రఘునందన్‌రెడ్డి, మల్లికార్జున్ యాదవ్ పాల్గొన్నారు.

TG· 11 Aug 2026

మసీదుబండ 100 ఫీట్ల రోడ్డు విస్తరణకు మోక్షం

TG: హైదరాబాద్ నగరం శేరిలింగంపల్లి పరిధిలోని మసీదుబండ 100 ఫీట్ల రోడ్డు విస్తరణకు స్థలాలు ఇచ్చేందుకు సమ్మతించిన బాధితులకు PAC చైర్మన్ అరెకపూడి గాంధీ అంగీకార పత్రాలు అందించారు. సైబరాబాద్ మున్సిపల్ కార్పొరేషన్ కార్యాలయంలో సీసీపీ వెంకన్న, నాయకుడు రాజు యాదవ్‌లతో కలిసి కార్యక్రమం నిర్వహించారు. బాధితులకు TDR ఇచ్చి న్యాయం చేయాలని అధికారులను కోరారు. దశాబ్దాల ట్రాఫిక్ కష్టాలకు శాశ్వత పరిష్కారం లభిస్తుందని, పనులు త్వరగా పూర్తి చేయాలని సూచించారు.

TG· 11 Aug 2026

కేసీఆర్ హయాంలోనే అభివృద్ధి జరిగింది: పోచారం

TG: కేసీఆర్ హయాంలోనే అభివృద్ధి జరిగిందంటూ కాంగ్రెస్ ఎమ్మెల్యే, మాజీ మంత్రి పోచారం శ్రీనివాసరెడ్డి సెన్సేషనల్ కామెంట్స్ చేశారు. అన్నం పెట్టినవాళ్లను మర్చిపోలేనన్నారు. పదవి, డబ్బు కోసం తను పార్టీ మారలేదని, కొందరి వల్లే తను పార్టీ మారాల్సి వచ్చిందని అన్నారు. నియోజకవర్గ అభివృద్ధి కోసమే పార్టీ మారాల్సి వచ్చిందన్నారు. ప్రస్తుతం నిధుల కోసం ఫోన్ చేస్తే ఎవరూ స్పందించడం లేదన్నారు. తను కాంగ్రెస్ కండువా కప్పుకోలేదని, జాతీయ జెండా మాత్రమే కప్పుకున్నానని తెలిపారు.

TG· 11 Aug 2026

అటెండర్ సెలవు.. ప్రభుత్వ ఆఫీస్‌కు తాళం

TG: ఖమ్మం జిల్లా తూనికలు కొలతల శాఖ కార్యాలయంలో అటెండర్ సెలవులో ఉండటంతో కార్యాలయాన్ని మూసివేశారు. దీంతో తమ సమస్యలు, ఫిర్యాదులతో వచ్చిన ప్రజలు నిరాశగా వెనుదిరిగారు. ఇప్పటికే సిబ్బంది కొరతతో శాఖ ఇబ్బందులు ఎదుర్కొంటుండగా, తాజాగా కార్యాలయానికి తాళం వేయడం చర్చనీయాంశంగా మారింది. శాఖ పనితీరుపై గతంలోనూ విమర్శలు వచ్చిన నేపథ్యంలో ఈ ఘటన వాటికి మరింత బలం చేకూర్చింది. ఒక ఉద్యోగి సెలవులో ఉన్నంత మాత్రాన కార్యాలయ కార్యకలాపాలు నిలిచిపోవడంపై ప్రజలు ప్రశ్నిస్తున్నారు.

TG· 11 Aug 2026

CMC ఆఫీస్‌ ముట్టడి.. హైటెన్షన్

TG: హైదరాబాద్‌లోని సైబరాబాద్ మున్సిపల్ కార్పొరేషన్(CMC) కార్యాలయం వద్ద చెత్తసేకరణ కార్మికుల ఆందోళన ఉద్రిక్తతకు దారితీసింది. తెలంగాణ స్వచ్ఛ ఆటో, రిక్షా కార్మికుల యూనియన్ ఆధ్వర్యంలో సుమారు వెయ్యిమంది కార్మికులు CMC ఆఫీస్‌ను ముట్టడించారు. వారిని పోలీసులు ప్రధాన గేటు వద్ద అడ్డుకోవడంతో తోపులాట జరిగింది. పాత విధానంలోనే పారిశుద్ధ్య పనులు కొనసాగించాలని, ఆస్తిపన్నుతో కలిపి చెత్త పన్ను వసూలుచేసే విధానాన్ని రద్దు చేయాలని డిమాండ్ చేశారు. ఈ-ఆటోల పేరుతో కొత్త వాహనాలను తీసుకొచ్చి ఉపాధిని దెబ్బతీయవద్దని కోరారు.

TG· 11 Aug 2026

‘Go Back Marwadi’ ఉద్యమంపై రేపు రౌండ్ టేబుల్

TG: తెలంగాణలో స్థానిక వ్యాపారులకు మద్దతు అందించాలని, మర్వాడీ వ్యాపారులను నియంత్రించాలనే ఉద్దేశంతో మొదలైన ‘Go Back Marwadi’ ఉద్యమానికి ఏడాది పూర్తయింది. 2025 ఆగస్టులో ప్రారంభమైన ఈ ఉద్యమాన్ని కొన్ని సంఘాలు ముందుకు తీసుకెళ్లాయి. ఈ ఉద్యమ భవిష్యత్ కార్యాచరణపై చర్చించేందుకు తెలంగాణ క్రాంతి దళ్ ఆధ్వర్యంలో రేపు మధ్యాహ్నం 1 గంటకు సోమాజిగూడ ప్రెస్‌క్లబ్‌లో రౌండ్ టేబుల్ సమావేశం నిర్వహిస్తున్నారు.