Latest
సింగరేణి అధికారులకు దసరా కానుక
TG: తెలంగాణలోని సింగరేణి కాలరీస్ కంపెనీ(SCCL) అధికారులకు రాష్ట్ర ప్రభుత్వం దసరా, దీపావళి పండుగ కానుకగా శుభవార్త అందించింది. పెండింగ్‌లో ఉన్న అధికారుల వేతన సవరణ డిమాండ్‌ను నెరవేర్చింది. సింగరేణి ఎగ్జిక్యూటివ్ అధికారుల వేతనాల సవరణకు సంబంధించి జీవో జారీ అయ్యింది. ఈ నిర్ణయం ద్వారా సింగరేణివ్యాప్తంగా 1,800 మంది ఎగ్జిక్యూటివ్ అధికారులు (ఈ-1 నుండి ఈ-7 గ్రేడ్లు) లబ్ధి పొందనున్నారు. ఈ అధికారుల వేతన సవరణను కోల్ ఇండియా లిమిటెడ్ (CIL) వేతనాల స్థాయికి సమానం చేశారు.
దుర్గమ్మ వేడుకల్లో పాల్గొన్న ఎమ్మెల్యే, ఎమ్మెల్సీ
మేడ్చల్-మల్కాజ్‌గిరి జిల్లా నిజాంపేట్ సర్కిల్ పరిధిలో జరిగిన దుర్గమ్మ నవరాత్రి వేడుకల్లో ఎమ్మెల్యే KP వివేకానంద్, ఎమ్మెల్సీ శంభీపూర్ రాజు పాల్గొన్నారు. అమ్మవారికి ప్రత్యేక పూజలు చేసి, ప్రజలంతా ఆరోగ్యంగా, సంతోషంగా ఉండాలని కోరుకున్నారు. తర్వాత కేటీఆర్ వెల్ఫేర్ అసోసియేషన్ ఏర్పాటు చేసిన అన్నదాన కార్యక్రమాన్ని ప్రారంభించారు. ఈ కార్యక్రమంలో బీఆర్ఎస్ నాయకులు, కార్యకర్తలు, అసోసియేషన్ సభ్యులు, భక్తులు పాల్గొన్నారు.
విద్యుత్ సరఫరాకు అంతరాయం
శ్రీకాకుళం జిల్లా టెక్కలి మండలంలో ఈ నెల 21న విద్యుత్ మరమ్మతు పనుల కారణంగా పవర్ కట్ ఉంటుందని ఏఈ నరసింగరావు సోమవారం తెలిపారు. ఉదయం 9 నుంచి మధ్యాహ్నం 2 గంటల వరకు విద్యుత్ సరఫరాలో అంతరాయం ఏర్పడుతుందన్నారు. సబ్స్టేషన్-1 పరిధిలో లైన్ మెయింటెనెన్స్ పనులు జరుగుతాయని, బర్మాకాలనీ, గోపినాథపురం, కచేరీవీధి తదితర ప్రాంతాల్లో సరఫరా నిలిచిపోతుందన్నారు.
జువెలరీ షాపులో ఒక్కసారిగా మంటలు
కరీంనగర్ జిల్లా జమ్మికుంటలోని విజయలక్ష్మి జువెలరీ షాపులో ఒక్కసారిగా మంటలు చెలరేగాయి. దీంతో షాపు చుట్టూ దట్టమైన పొగ వ్యాపించింది. సమాచారం అందగానే ఫైర్ సిబ్బంది అక్కడికి వచ్చి మంటలను ఆర్పేశారు. షార్ట్ సర్క్యూట్ వల్లే ప్రమాదం జరిగి ఉంటుందని స్థానికులు చెబుతున్నారు. మంటలు రావడంతో చుట్టుపక్కల ఉన్నవారు ఆందోళనకు గురయ్యారు. అయితే, ఈ ప్రమాదంలో ఎంత నష్టం జరిగిందనే వివరాలు ఇంకా తెలియలేదు.
'ఎన్నికల కోడ్ ఉల్లంఘిస్తే చర్యలు'
సత్యసాయి జిల్లాలో ZPTC,MPTC ఎన్నికల నేపథ్యంలో ఎన్నికల ప్రవర్తనా నియమావళిని పకడ్బందీగా అమలు చేయాలని ఎన్నికల పరిశీలకులు పి. అరుణ్ బాబు సూచించారు. నిబంధనలు ఉల్లంఘించిన వారిపై చట్టప్రకారం చర్యలు తీసుకోవాలని అధికారులను ఆదేశించారు. ఎన్నికల ప్రక్రియను ప్రభావితం చేసే అంశాలపై నిరంతరం పర్యవేక్షణ చేపట్టాలని స్పష్టం చేశారు.
ఫ్రాన్స్‌లో ఉద్రిక్తత.. 350 మందికిపైగా నిరసనకారుల అరెస్ట్
ఫ్రాన్స్‌ రాజధాని పారిస్‌తోపాటు పలు ప్రాంతాల్లో ఈ వీకెండ్‌లో హింసాత్మక నిరసనలు జరిగాయి. ఒక్క పారిస్‌లోనే సుమారు 350 మందికి పైగా ఆందోళనకారులను పోలీసులు అదుపులోకి తీసుకున్నారు. పెరుగుతున్న జీవన వ్యయం, విద్యా ప్రమాణాలు మెరుగుపరచాలని డిమాండ్‌ చేస్తూ చేపట్టిన ఈ ఆందోళనలు హింసకు దారితీశాయి. సుమారు 5 లక్షల మందికి పైగా నిరసనకారులు వీధుల్లోకి రావడంతో పరిస్థితి అదుపుతప్పింది. కొన్ని ప్రాంతాల్లో నిరసనకారులు వ్యాపార కేంద్రాలను లూటీ చేశారు.
ఉపాధి పనులకు వెళ్లి ప్రాణాలు కోల్పోయిన కూలీ
నిజామాబాద్ జిల్లా వేల్పూర్ మండలం రామన్నపేటలో ఉపాధి హామీ పనులు చేస్తుండగా భగవాన్ దాస్ (52)కు ఒక్కసారిగా గుండెపోటు వచ్చింది. దీంతో ఆయన అక్కడే కుప్పకూలిపోయాడు. ఇది చూసిన తోటి కూలీలు వెంటనే ఆయనను హాస్పిటల్‌కు తీసుకెళ్లారు. అయితే అప్పటికే ఆయన చనిపోయినట్లు డాక్టర్లు చెప్పారు. రోజువారీ పనులకు వెళ్లిన భగవాన్ దాస్ ఇలా చనిపోవడంతో స్థానికంగా విషాదం నెలకొంది.
కార్మికుల కుటుంబాలకు చెక్కులు పంపిణీ
కాకినాడ జిల్లాలో వివిధ కారణాలతో మరణించిన ఆరుగురు హెచ్ఎంఎస్ కార్మికుల కుటుంబాలకు ₹ 29,91,885 విలువైన జీవిత బీమా, సంక్షేమ చెక్కులను కాకినాడ సిటీ ఎమ్మెల్యే వనమాడి కొండబాబు పంపిణీ చేశారు. హెచ్ఎంఎస్ ఆధ్వర్యంలో నిర్వహించిన కార్యక్రమంలో బాధిత కుటుంబాలకు చెక్కులు అందజేసి, ఆర్థిక భరోసా కల్పించారు. ఈ కార్యక్రమంలో హెచ్ఎంఎస్ అధ్యక్షుడు పెన్నపోతు రాము, తదితరులు పాల్గొన్నారు.
బయోలాజికల్ ఏజ్ టెస్ట్‌తో ఆరోగ్యం తెలుస్తుందా?
మన పుట్టిన వయసు, శరీరం వయసు ఒకేలా ఉండకపోవచ్చు. దీన్ని తెలుసుకునేందుకు బయోలాజికల్ ఏజ్ టెస్ట్ అనేది ఉపయోగపడుతుంది. ఈటెస్ట్ బ్లడ్‌లోని DNA మార్పులను పరిశీలించి శరీరం ఎంత తొందరగా వృద్ధాప్యానికి చేరుకుంటుందో అంచనా వేస్తారు. అయితే, ఈ రిజల్ట్ పూర్తిగా ఖచ్చితమైనవి కావు. స్లీప్,ఫుడ్, టెస్ట్ చేసే టైమ్ కూడా ప్రభావం చూపవచ్చు. ఆరోగ్య సమస్యలను గుర్తించేందుకు కొలెస్ట్రాల్, రక్తంలో షుగర్ టెస్టులు ఇప్పటికీ కీలకమేనని నిపుణులు చెబుతున్నారు.
15 అడుగుల గుంతలో పడి వ్యక్తి మృతి
పుణెలోని యెరవాడ ఫిష్ మార్కెట్ ప్రాంతంలో విషాదం చోటుచేసుకుంది. ప్రదీప్ పర్దేశీ అనే వ్యక్తి ఆటోరిక్షాకు సైడ్ ఇచ్చే క్రమంలో అదుపుతప్పి, మున్సిపల్ డ్రైనేజీ పనుల కోసం తవ్విన 15 అడుగుల గుంతలో పడి మృతి చెందాడు. అక్కడ జరుగుతున్న పనుల దగ్గర కనీస భద్రతా ఏర్పాట్లు కూడా లేవని స్థానికులు ఆరోపించారు. ఈ ఘటనపై మృతుడి కుటుంబ సభ్యులు పోలీసులను ఆశ్రయించారు.
జిల్లాలో భారీగా గంజాయి పట్టివేత..!
అనకాపల్లి జిల్లా నర్సీపట్నంలో రూరల్ సీఐ రేవతమ్మ ఆధ్వర్యంలో 230 కేజీల గంజాయిని పోలీసులు స్వాధీనం చేసుకున్నారు. DSP పోతిరెడ్డి శ్రీనివాసరావు తెలిపిన వివరాల ప్రకారం.. తమిళనాడుకు చెందిన ప్రధాన నిందితుడు శశికుమార్తో పాటు మరో నలుగురిని అరెస్ట్ చేశారు. వారి వద్ద నుంచి ఒక కారు, రెండు బైకులు, ₹1.20 లక్షల నగదును స్వాధీనం చేసుకున్నట్లు వెల్లడించారు.
మున్సిపల్ ఎన్నికలపై సుప్రీంకోర్టుకు YSRCP
AP: మున్సిపల్ ఎన్నికల నామినేషన్ల ప్రక్రియలో హింస జరిగిందని, తమ క్యాండిడేట్లను నామినేషన్లు వేయకుండా అడ్డుకున్నారని ఆరోపిస్తూ వైఎస్సార్ కాంగ్రెస్ పార్టీ(YSRCP) సుప్రీంకోర్టును ఆశ్రయించింది. అక్టోబర్ 18తో ముగిసిన నామినేషన్ల గడువును పొడిగించాలని, బెదిరింపులు, హింస కారణంగా నామినేషన్ వేయలేకపోయిన వాళ్లకు మళ్లీ ఛాన్స్ ఇవ్వాలని YSRCP కోరింది. నామినేషన్లు వేసే అభ్యర్థులకు తగిన పోలీస్ రక్షణ కల్పించేలా ఆదేశాలు ఇవ్వాలని విజ్ఞప్తి చేసింది.
పోలీసు అమరవీరుల సంస్మరణ కార్యక్రమానికి పటిష్ట భద్రత
గుంటూరు జిల్లా మంగళగిరిలో అక్టోబర్ 21న ఆరో ఏపీఎస్పీ బెటాలియన్‌లో పోలీసు అమరవీరుల సంస్మరణ దినోత్సవం జరగనుంది. ఈ కార్యక్రమానికి పటిష్ట భద్రత ఏర్పాటు చేయాలని SP వకుల్ జిందాల్ ఆదేశించారు. సీఎం పర్యటన నేపథ్యంలో వేదిక, పార్కింగ్, ట్రాఫిక్ ఏర్పాట్లను పరిశీలించారు. ప్రముఖులు, అమరవీరుల కుటుంబాలకు ఇబ్బందులు కలగకుండా అన్ని శాఖల అధికారులు సమన్వయంతో పనిచేయాలని చెప్పారు. అన్ని శాఖలకు సూచనలు ఇచ్చారు
నేహా బోరా పేరు అంతర్జాతీయ వార్తల్లో
ఢిల్లీలో యువత నిరసనల్లో చురుగ్గా పాల్గొంటున్న విద్యార్థి నేత నేహా బోరా గురించి ప్రముఖ అంతర్జాతీయ పత్రిక New York Times ప్రత్యేక కథనం ప్రచురించింది. పోలీసుల ఆంక్షలు ఎదురైనా నిరసనల్లో పాల్గొంటూ, యువతను ఒక్కచోట చేర్చడంలో ఆమె పోషిస్తున్న పాత్రను కథనం వివరించింది. AISA నేతగా, PHD విద్యార్థినిగా ఉన్న నేహా.. నిరుద్యోగం, విద్య, మహిళల భద్రత వంటి అంశాలపై నాటకాలు, పాటలు, సెటైర్ ద్వారా తన నిరసన గళాన్ని వినిపిస్తున్నారని ఈ కథనం వివరించింది.
మ్యూజిక్ వరల్డ్‌‌‌‌లో అదరగొడుతున్న లాటిన్ సింగర్!
కొలంబియాలో పుట్టిన కరోలినా గిరాల్డో నవారో వరల్డ్ మ్యూజిక్ ఇండస్ట్రిలో అగ్రస్థానానికి చేరింది. ‘బీబీ వావ్’తో బిల్‌బోర్డ్ హాట్ 100లో అత్యుత్తమ స్థానం సాధించింది. 2026లో కోచెల్లాకు హెడ్‌లైనర్‌గా నిలిచి చరిత్ర సృష్టించింది. ‘వియాజాండో పోర్ ఎల్ ముండో ట్రోపిటూర్’తో అభిమానులను అలరిస్తోంది. 2025 ఆల్బమ్ ‘ట్రోపికోకెటా’కు ఏడు లాటిన్ గ్రామీ నామినేషన్లు రాగా, టూర్ మధ్యలోనే విడుదలైన ‘నో మీ అర్రెపియెంటో డి సెంటిర్ టాంటో’ బ్రేకప్ నొప్పులను హిట్‌గా మార్చింది.
భారీగా దెబ్బతిన్న స్టాక్ మార్కెట్స్
భారతీయ స్టాక్ మార్కెట్లు భారీగా దెబ్బతిన్నాయి. అంతర్జాతీయ పరిణామాలు, ముడి చమురు ధరల భయాల కారణంగా దలాల్ స్ట్రీట్‌లో ఈ పరిస్థితి నెలకొంది. బాంబే స్టాక్ ఎక్స్ఛేంజ్(BSE) సూచీ సెన్సెక్స్ ఏకంగా 1,100కి పైగా పాయింట్లు నష్టపోగా, నేషనల్ స్టాక్ ఎక్స్ఛేంజ్ (NSE) నిఫ్టీ 50 కీలక స్థాయిలను కోల్పోయింది. ఈ ఒక్క భారీ అమ్మకాల సునామీకి దాదాపు రూ. 7.41 లక్షల కోట్ల సంపద ఆవిరైపోయింది. రిటైల్ ఇన్వెస్టర్లు తొందరపాటు నిర్ణయాలు తీసుకోవద్దని ఆర్థిక నిపుణులు చెప్తున్నారు.
AI టూల్స్‌పై జాగ్రత్త
పరిశోధనలు, పరీక్షల కోసం వాడిన కొన్ని ఏఐ టూల్స్ తమకు ఇచ్చిన పెర్మిషన్స్ దాటి భారత కంపెనీల కంప్యూటర్ సిస్టమ్‌లలోకి వెళ్లి, వ్యక్తిగత వివరాలు, వ్యాపార సమాచారం, రహస్య డేటాను చూశాయని సైబర్ భద్రతా సంస్థ CERT-In తెలిపింది. బయటపడిన పాస్‌వర్డ్‌లు, API Keysలు, క్లౌడ్ అనుమతుల ద్వారా ఈ సమాచారం అందుబాటులోకి వచ్చినట్లు తెలిపింది. AI టూల్స్‌తో సైబర్ దాడులు కూడా వేగంగా జరుగుతున్నాయని హెచ్చరించింది.
బొంబాయి పొట్టేలు – కథల పుస్తకం
కథకుడు, చిత్రకారుడు చరణ్ పరిమి రాసిన రెండో కథల పుస్తకం ‘బొంబాయి పొట్టేలు’. రేగి అచ్చులు ప్రచురణ సంస్థ దీన్ని ప్రచురించింది. అబ్‌స్ట్రాక్ట్, సర్రియల్ టచ్‌తో సాగే ఈ కథలు సమాజంలోని అనేక కోణాలను కొత్తగా చూపిస్తాయి. అసమానతలు, వివక్ష, మనుగడ పోరాటాలను ఎదుర్కొనే పాత్రలు ఈ కథల్లో కనిపిస్తాయి. ఈ పుస్తకానికి రచయిత డా.వేంపల్లె షరీఫ్ ముందుమాట రాశారు. రచయిత చరిత్రను, ఆధిపత్య సంస్కృతి రాజకీయాలను అర్థం చేసుకుని రచయిత ఈ కథలు రాశారని ఆయన వివరించారు. దీని ధర రూ.170. పుస్తకం కొనే <a href="https://books.ataka.in/products/bombay-pottelu?_pos=1&_psq=bombay&_psid=3417bd527&_ss=e">లింక్</a>.
క్రియేటివిటీ తగ్గిపోతోందా?: రచయిత డాన్ కో
వేగవంతమైన, డిజిటల్ ప్రపంచంలో కొత్త సృజనాత్మక ఆలోచనలు పెంచుకోవడం సవాలుగా మారిందని ప్రముఖ అమెరికన్ రచయిత, డిజిటల్ క్రియేటర్ డాన్ కో(Dan Koe) అన్నారు. ఈ జీవనశైలి మనుషులలోని క్రియేటివ్ ఆలోచనలకు స్థానం లేకుండా చేస్తోందని ఆందోళన వ్యక్తం చేశారు. రచనలో పురోగతి సాధించాలంటే రోజూ ఉదయాన్నే ఒక గంట సమయాన్ని ఎటువంటి డిస్టర్బెన్స్ లేకుండా కేటాయించాలని X పోస్ట్ ద్వారా సూచించారు. క్రియేటివ్ ఆలోచనలు రావాలంటే ప్రశాంతమైన స్థలం, టైం అవసరం అన్నారు.
అమెరికాలో ప్రతి చిన్నారికి స్పేస్‌ఎక్స్ షేర్
అమెరికాలోని ప్రతి చిన్నారికి వచ్చే ఇయర్ స్పేస్‌ఎక్స్ కంపెనీలో ఒక్కో షేర్ ఇస్తానని ఎలాన్ మస్క్ ప్రకటించారు. ఈ ప్లాన్ అమలైతే దాదాపు 7.2 కోట్ల మంది పిల్లలకు ప్రయోజనం చేకూరనుంది. ప్రజంట్ షేర్ విలువ ప్రకారం ఈ బహుమతి దాదాపు రూ.88 వేల కోట్లు ఉండొచ్చని అంచనా. అయితే, షేర్లను ఎలా పంపిణీ చేస్తారనే వివరాలను మస్క్ వెల్లడించలేదు.
నకిలీ ప్లేట్లతో 88 బైక్‌లు, 12 కార్లు సీజ్
TG: హైదరాబాద్‌లో నకిలీ నంబర్ ప్లేట్లు వాడుతున్న వారిపై ట్రాఫిక్ పోలీసులు చర్యలు తీసుకున్నారు. గత 8 నెలల్లో ఇలాంటి ప్లేట్లు వాడిన 100 మందిపై క్రిమినల్ కేసులు నమోదు చేసి, 88 బైక్‌లు, 12 కార్లను సీజ్ చేశారు. నంబర్ ప్లేట్లను మార్చడం లేదా నకిలీ ప్లేట్లు వాడటం చట్టవిరుద్ధమని పోలీసులు తెలిపారు. వాహనదారులు HSRP నిబంధనలు పాటించాలని, నంబర్ ప్లేట్లలో మార్పులు చేయవద్దని సూచించారు. నిబంధనలు ఉల్లంఘిస్తే కేసులు పైల్ చేసి వాహనాలను సీజ్ చేస్తామని హెచ్చరించారు.