Latest
ఘనంగా నల్లమల్ల మహా బతుకమ్మ వేడుకలు
నాగర్ కర్నూల్ జిల్లా అచ్చంపేటలో శ్రీశైలం – హైదరాబాద్ ప్రధాన రహదారిపై ఉన్న ఐ లవ్ అచ్చంపేట పార్క్ వద్ద ఆదివారం రాత్రి నల్లమల్ల మహా బతుకమ్మ వేడుకలను ఘనంగా నిర్వహించారు.ఈ వేడుకలకు ముఖ్య అతిథిగా అచ్చంపేట ఎమ్మెల్యే డాక్టర్ వంశీకృష్ణ దంపతులు హాజరై బతుకమ్మకు పూజలు చేసి ,నల్లమల్ల మహా బతుకమ్మ ఉత్సవాలను ప్రారంభించారు. ఈ బతుకమ్మ వేడుకల్లో మహిళలంతా పాల్గొని సంబరాలు ఘనంగా నిర్వహించారని ఎమ్మెల్యే తెలిపారు.
ఎన్నికల వేళ.. వాహనాలపై పోలీసుల నిఘా
విజయనగరం జిల్లా రాజాం మండలంలో స్థానిక సంస్థల ఎన్నికల నేపథ్యంలో పోలీసులు ముమ్మర వాహన తనిఖీలు చేపట్టారు. అక్రమ మద్యం, నగదు రవాణాను అడ్డుకునేందుకు తనిఖీలు నిర్వహిస్తున్నట్లు పట్టణ ఇన్‌స్పెక్టర్ డి. నవీన్ కుమార్ తెలిపారు. ఎన్నికలు ముగిసే వరకు తనిఖీలు కొనసాగుతాయని, అక్రమ వస్తువులు పట్టుబడితే చట్టపరమైన చర్యలు తీసుకుంటామని హెచ్చరించారు. అవసరాల కోసం అధిక మొత్తంలో నగదు తీసుకెళ్లేవారు సంబంధిత ఆధారాలను వెంట ఉంచుకోవాలని సూచించారు.
మైనర్ అబ్బాయిలపై క్యాథలిక ఫాదర్ లైంగికదాడి
కర్ణాటక రాష్ట్రం మంగళూరులో దారుణం జరిగింది. వాలెన్సియా సెయింట్ విన్సెంట్ ఫెర్రర్ చర్చికి చెందిన ఫాదర్ సిప్రియన్ పింటో చర్చికి ప్రేయర్ కోసం వచ్చిన 14 ఏళ్ల బాలుడిపై లైంగికదాడి పాల్పడ్డాడు. బాలుడిని ఒక గదికి తీసుకెళ్లి అసభ్యకరంగా ప్రవర్తించాడని పోలీసులు తెలిపారు. బాలుడు ఈ విషయాన్ని తన స్నేహితులతో పంచుకోగా, మరో ఐదుగురు పిల్లలు కూడా ఇలాంటి వేధింపులనే ఎదుర్కొన్నట్లు బయటపడింది. ఫాదర్ పరారవ్వగా, పోలీసులు అతణ్ని అదుపులోకి తీసుకుని పోక్సో కేసు పెట్టారు.
THUMBNAIL మాఫియాపై అనుపమ ఫైర్!
తెలుగు మీడియా థంబ్‌నెయిల్స్‌పై యాక్టర్ అనుపమ పరమేశ్వరన్ ఆగ్రహం వ్యక్తం చేశారు. వ్యూస్, క్లిక్స్ కోసం కొందరు మీడియా ఛానల్స్ ఆకర్షణీయమైన శీర్షికలు, తప్పుదారి పట్టించే థంబ్‌నెయిల్స్ పెడుతున్నాయని ఆమె సోషల్ మీడియా వీడియో ద్వారా తెలిపారు. ఇలాంటి పద్ధతులు వ్యక్తుల గౌరవానికి భంగం కలిగిస్తున్నాయని అన్నారు. ఈవీడియో సోషల్ మీడియాలో వైరల్‌గా మారింది.
పోలవరంలో నీలిరంగులోకి గోదావరి
ఏలూరు జిల్లా పోలవరం ప్రాజెక్టు వద్ద గోదావరి నది నీటి రంగు రాగి వర్ణం నుంచి ప్రశాంతమైన నీలిరంగులోకి మారింది. ఎగువ ప్రాంతాల్లో వరద ప్రవాహం క్రమంగా తగ్గడం, వరద మట్టి, బురద మేటలు నిలిచిపోవడంతో పాటు సీలేరు ఉపనది నుంచి స్వచ్ఛమైన జలాలు వచ్చి కలవడంతో నీరు నీలిరంగులోకి మారినట్లు అధికారులు తెలిపారు. ఈ సహజ దృగ్విషయాన్ని వీక్షించేందుకు పర్యాటకులు ఆసక్తి చూపుతున్నారు.
ఆత్మకూరు మున్సిపల్ ఆఫీస్ వద్ద ధర్నా
నంద్యాల జిల్లా ఆత్మకూరు మున్సిపల్ కార్యాలయం వద్ద సోమవారం తీవ్ర ఉద్రిక్తత నెలకొంది. వైసీపీ ఛైర్మన్ అభ్యర్థి కుల ధ్రువీకరణ పత్రాన్ని కొందరు చించివేశారని ఆరోపిస్తూ మాజీ ఎమ్మెల్యే శిల్పా చక్రపాణి రెడ్డి ధర్నాకు దిగారు. మున్సిపల్ అధికారుల తీరుపై నిరసన తెలుపుతూ రోడ్డుపై బైఠాయించారు. పోలీసులు అక్కడికి చేరుకుని బందోబస్తు పెంచి పరిస్థితిని అదుపులోకి తెచ్చారు.
ప్రత్యామ్నాయ పంటలతో సాగు మేలు: DAO
నాగర్‌కర్నూల్ జిల్లాలో యాసంగి సాగు సమయంలో రైతులు నీటి పొదుపునకు ప్రాధాన్యమివ్వాలని జిల్లా వ్యవసాయ అధికారి ఎన్. యశ్వంతరావు సూచించారు. ఎల్‌నినో ప్రభావం, వాతావరణ పరిస్థితులను దృష్టిలో ఉంచుకొని తక్కువ నీటితో పండే పప్పుధాన్యాలు, ఆముదం పంటలను సాగు చేయాలని కోరారు. అధిక నీరు అవసరమయ్యే వరి, మొక్కజొన్న పంటలకు దూరంగా ఉండాలని తెలిపారు. నాణ్యమైన విత్తనాలను ఎంపిక చేసుకొని, వ్యవసాయ అధికారుల సూచనలు పాటించాలని రైతులకు సూచించారు.
'రజక యువతతోనే సమాజ అభివృద్ధి సాధ్యం'
రజక సమాజాన్ని ఐక్యంగా ముందుకు నడిపిస్తూ, హక్కుల సాధనకు కృషి చేయడమే తెలంగాణ రజక రిజర్వేషన్ సమితి లక్ష్యమని రాష్ట్ర వర్కింగ్ ప్రెసిడెంట్ విజయ్ గణేష్ చిన్నరంగారి తెలిపారు. సిద్దిపేట జిల్లా మద్దూరు మండల యూత్ అధ్యక్షుడిగా పిడిచెట్టి గౌరీషను నియమించారు. జిల్లా అధ్యక్షుడు జంగపల్లి ఐలయ్య, వర్కింగ్ ప్రెసిడెంట్ దీటి రాజు కమిటీ వివరాలు వెల్లడించారు. యువత ఐక్యంగా రజకుల సమస్యల పరిష్కారానికి కృషి చేయాలని పిలుపునిచ్చారు.
నెల్లూరు 72వ డివిజన్‌లో ప్రచారం
శ్రీ పొట్టి శ్రీరాములు జిల్లా నెల్లూరు కార్పొరేషన్ ఎన్నికల్లో 72వ డివిజన్ సీపీఎం అభ్యర్థి గజ్జె పరమేశ్వరి సోమవారం ఇంటింటి ప్రచారాన్ని ముమ్మరం చేశారు. డివిజన్ పరిధిలోని కాలనీలలో పర్యటిస్తూ స్థానిక సమస్యల పరిష్కారమే ధ్యేయంగా పనిచేస్తానని ఓటర్లకు హామీ ఇచ్చారు. స్థానిక ప్రజలు, మహిళలను కలిసి సమస్యలు తెలుసుకుంటూ మద్దతు కోరడంతో వార్డులో ప్రచారం జోరందుకుంది. ఎన్నికల్లో ఆదరించాలని ప్రజలను కోరారు.
టాలెంట్ ఉంది..ఛాన్స్ ఉందా? : అనిరుధ్ కృష్ణ
కెన్యాలో ఛాంపియన్లు, ఎస్టోనియాలో యూనికార్న్ కంపెనీలు ఎందుకు ఎక్కువగా వస్తున్నాయి అని అనిరుధ్ కృష్ణ రాసిన పుస్తకం'Why Kenyans Win Marathons and Estonians Build Unicorns'లో వివరించారు. టాలెంట్ ఒక్కటే కాదు. అవకాశాలు, శిక్షణ క్యాంపులు, కోచ్‌లు, రోల్ మోడల్స్, స్పోర్ట్స్/టెక్ సంస్కృతి ఉంటేనే టాలెంట్ పైకి ఎదుగుతుందని తెలిపారు. టాప్‌కు రాలేని వాళ్లకు ఉపాధి ఇచ్చే ‘సాఫ్ట్ ల్యాండింగ్’ ఉండాలని చెప్పారు. భారత్‌లోనూ ఇలాంటివి ఎక్కువగా ఉండాలని సూచిస్తున్నారు.
మందు తాగి పాటలు పాడుతున్నావా?.. దలేర్ మెహందీపై ఆగ్రహం
ప్రముఖ భంగ్రా పాప్ గాయకుడు దలేర్ మెహందీని ఓ ఎమ్మెల్యే తిట్టడం కాంట్రవర్సీగా మారింది. ఉత్తరాఖండ్‌లోని తెహ్రీ గఢ్‌వాల్ ప్రాంతంలో ప్రసిద్ధ కుంజపురి మేళా సందర్భంగా ఓ సాంస్కృతిక కార్యక్రమం ఏర్పాటు చేశారు. ఈ వేడుకలో దలేర్ మెహందీ తన బృందంతో కలిసి పాల్గొన్నారు. మంత్రి, స్థానిక నాయకుడు సుబోధ్ ఉనియాల్ నేరుగా స్టేజ్‌పైకి వచ్చి, దలేర్ మెహందీ ప్రవర్తనపై అసంతృప్తి వ్యక్తం చేశారు. ‘ఆల్కహాల్ తాగి పాటలు పాడుతున్నావా?’ అంటూ నిలదీశారు.
దుర్గా మాత ఆలయంలో చండీయాగ హోమం
నిజామాబాద్ పోలీస్ పరేడ్ గ్రౌండ్‌లోని దుర్గా పరమేశ్వరి మాత ఆలయంలో దేవి నవరాత్రి ఉత్సవాల్లో భాగంగా చండీయాగ హోమాన్ని వైభవంగా నిర్వహించారు. పోలీస్ కమిషనర్ పి. సాయి చైతన్య ముఖ్య అతిథిగా హాజరై ప్రత్యేక పూజలు చేశారు. అనంతరం భక్తులకు అన్నదానం నిర్వహించారు. ఈ కార్యక్రమంలో అదనపు డీసీపీ ఎన్. శుభం ప్రకాష్, అదనపు కలెక్టర్లు భుజంగరావు, పి. సురేష్, డీఎంహెచ్‌వో రాజశ్రీతో పాటు పలువురు పోలీస్ అధికారులు, సిబ్బంది పాల్గొన్నారు.
పాత కక్షలతో యువకుడి హత్య
జగిత్యాల జిల్లా ఎండపల్లి మండలం రాజారాంపల్లిలో బొంత సంతోష్ 19 ఏళ్ల యువకుడు హత్యకు గురయ్యాడు. ఆదివారం రాత్రి పాత కక్షలతో శివరాత్రి అనిల్ అనే యువకుడు సంతోష్‌పై కత్తితో దాడి చేసినట్లు సమాచారం. తీవ్రంగా గాయపడిన సంతోష్‌ను ఆసుపత్రికి తీసుకెళ్తుండగా మార్గమధ్యంలో చనిపోయాడు. ఘటనపై పోలీసులు కేసు నమోదు చేసి విచారణ చేస్తున్నారు. అయితే హత్యకు దారితీసిన కారణాలు, ఘటనకు సంబంధించిన పూర్తి వివరాలు ఇంకా తెలియాల్సి ఉంది.
హత్య కేసు.. BJP టికెట్: అభిజీత్ దీప్కే సెటైర్!
హత్య కేసులో దోషి నందలాల్ రాయ్‌కి జీవిత ఖైదు శిక్షను రద్దు చేసి, జామీను ఇచ్చింది అలహాబాద్ హైకోర్టు. అతను 2027 UP అసెంబ్లీ ఎన్నికల్లో BJP టికెట్‌పై పోటీ చేసే ప్లాన్‌లో ఉన్నాడు. 2017లో రామజన్మభూమి కార్యకర్త ప్రమోద్ కుమార్‌ని రాయ్ హత్య చేశాడంటూ, వారణాసి కోర్టు 2025లో జీవిత ఖైదు విధించింది. అలహాబాద్ హైకోర్టు ఈ తీర్పును కొట్టేయడంతో, అభిజీత్ దీప్కే సెటైర్ వేశారు. చప్పట్లతో షేర్ చేశారు. విద్యార్థులపై కఠినంగా ఉండి, దోషులకు సాఫ్ట్‌గా ఉండే వ్యవస్థ అన్నారు.
అనంతపురంలో ఉద్యోగుల ఓట్లే కీలకం!
అనంతపురం జిల్లా నగర పాలక సంస్థ ఎన్నికల్లో ఉద్యోగులు, ఉపాధ్యా యులు, పెన్షనర్ల ఓట్లు కీలకంగా మారనున్నాయి. నగరంలోని 2,37,007 మంది ఓటర్లలో 50 వేలకుపైగా ఉద్యోగులు, టీచర్లు ఉన్నారు. ప్రభుత్వ, కాంట్రాక్టు, అవుట్సోర్సింగ్ ఉద్యోగుల మద్దతు కోసం పార్టీలు ప్రయత్నిస్తున్నాయి. తమ పాలనపై వారిలో ఉన్న సానుకూలత, వ్యతిరేకతను అంచనా వేస్తూ గెలుపు లెక్కలు వేస్తున్నాయి
ఎల్‌నినో ఎఫెక్ట్.. పల్లెల్లో తాగునీటి కష్టాలు
సూర్యాపేట జిల్లాలో ఎల్‌నినో ప్రభావంతో వర్షాభావ పరిస్థితులు నెలకొనడంతో చెరువులు, కుంటలు ఎండిపోయి భూగర్భ జలాలు అడుగంటుతున్నాయి. నకిరేకల్, కేతేపల్లి మండలాల్లోని పలు గ్రామాల్లో తాగునీటి కష్టాలు తీవ్రమయ్యాయి. బోర్లలో నీరు తగ్గడంతో గ్రామాల్లో ట్యాంకర్ల ద్వారా నీటిని సరఫరా చేస్తున్నారు. నకిరేకల్ సబ్డివిజన్లోని 126 పంచాయతీల పరిధిలో నీటి సరఫరాకు ఇబ్బందులు ఎదురవుతున్నాయి.
చిత్తూరులో టెన్షన్
AP: చిత్తూరు YCP కార్యాలయంపై దాడికి TDP నాయకులు యత్నించారు. కర్రలతో భారీ సంఖ్యలో తరలివచ్చారు. దాంతో అలర్టైన పోలీసులు.. TDP శ్రేణులను చెదరగొట్టారు. మార్నింగ్ నుంచి చిత్తూరులో ఉద్రిక్త పరిస్థితులు ఉన్నాయి. ఉదయం YCP అభ్యర్థిపై TDP వర్గీయులు దాడి చేశారు. ఇలా రాయలసీమలో టెన్షన్ వాతావరణం కంటిన్యూ అవుతోంది. నిన్న YCP అధ్యక్షుడు YS జగన్.. గవర్నర్‌నీ, SECని కలిసి కంప్లైంట్ చేసినా పరిస్థితిలో మార్పు రాలేదు.
మణిపూర్‌లో మళ్ళీ కాల్పులు.. ఇద్దరు మృతి
మణిపూర్‌లోని ఇంఫాల్ ఈస్ట్ జిల్లాలో ఈరోజు ఉదయం కాల్పులు జరిగాయి. నోంగ్‌షుమ్ దగ్గరలోని కొండ ప్రాంతానికి కట్టెల కోసం వెళ్లిన వారిపై అనుమానిత సాయుధ దుండగులు కాల్పులు జరిపారు. ఈ ఘటనలో ఇద్దరు ప్రాణాలు కోల్పోగా, మరో ఇద్దరు గాయపడ్డారు. కొంతమంది ఆచూకీ ఇంకా తెలియలేదు. సమాచారం అందుకున్న భద్రతా బలగాలు అక్కడికి చేరుకుని గాలింపు చర్యలు చేపట్టాయి
నిరసనల్లో హింసకు చోటుండకూడదు: CJP
అల్బేనియాలో నిరసనల సమయంలో సుప్రీంకోర్టు భవనం తగలబడుతున్న దృశ్యాలపై CJP స్పందించింది. ఈ దృశ్యాలు ఎంతో బాధ కలిగిస్తున్నాయని తెలిపింది. నిరసనల పేరుతో హింసకు పాల్పడటం సరైంది కాదని, ఆందోళనలు శాంతియుతంగానే జరగాలని స్పష్టం చేసింది. మహాత్మా గాంధీ ప్రపంచానికి నేర్పిన అహింసా మార్గాన్ని అనుసరించాలని నిరసనలు శాంతియుతంగా జరగాలని గుర్తుచేస్తూ, ప్రజలు తమ నిరసనను తెలియజేసే హక్కును గౌరవిస్తూనే, హింసకు దూరంగా ఉండాలని CJP తన ఎక్స్ పోస్ట్‌లో చెప్పింది.
9 రోజుల పాటు నిలబడే నవరాత్రి ఉపవాస దీక్షలు
మహారాష్ట్రలోని సతారా జిల్లా వాయ్ తాలూకా పరిధిలోని పాండే గ్రామంలో నవరాత్రి ఉత్సవాలు విచిత్రంగా జరుగుతాయి. ఇక్కడి కాళభైరవనాథ స్వామి దేవాలయంలో గ్రామస్తులు 350 సంవత్సరాల నాటి "ఉభ్యాచీ నవరాత్ర" అనే సాంప్రదాయాన్ని పాటిస్తున్నారు. ఘటస్థాపన నుండి దసరా వరకు 9 రోజుల పాటు భక్తులు కూర్చోవడం కానీ, నేలపై పడుకోవడం కానీ చేయకపోవడమే ఈ దీక్షలోని ప్రత్యేకత. ఈ దీక్షను స్వీకరించిన భక్తులను 'నవరత్కారీలు' అని పిలుస్తారు. వీరు 9 రోజుల పాటు నిరంతరం నిలబడే ఉంటారు.
పోలేపల్లికి కొత్త పంచాయతీ భవనం
నాగర్ కర్నూలు జిల్లా బిజినపల్లి మండలం పోలేపల్లి గ్రామంలో ₹20 లక్షల వ్యయంతో నిర్మించనున్న నూతన గ్రామ పంచాయతీ భవనానికి ఎమ్మెల్యే కూచుకుల్ల రాజేష్ రెడ్డి సోమవారం శంకుస్థాపన చేశారు. కాంగ్రెస్ ప్రజా పాలనలో పేదలకు ఇందిరమ్మ ఇళ్లు, 200 యూనిట్ల వరకు ఉచిత విద్యుత్, రేషన్ కార్డులు సహా పలు సంక్షేమ పథకాలు అందిస్తూ ప్రభుత్వం అండగా నిలుస్తోందని ఆయన అన్నారు.