Latest
పోలీస్ కళాబృందంతో ప్రయాణికులకు అవగాహన
కామారెడ్డి జిల్లా ఎస్పీ రాజేష్ చంద్ర ఆదేశాల మేరకు సోమవారం జిల్లా బస్టాండ్‌లో పోలీస్ కళాబృందం అవగాహన కార్యక్రమం నిర్వహించింది. మాటలు, పాటల రూపంలో ప్రయాణికులకు పలు అంశాలపై చైతన్యం కల్పించారు. మాదకద్రవ్యాల వినియోగంతో కలిగే నష్టాలు, సైబర్ నేరాల పట్ల అప్రమత్తత, రోడ్డు ప్రమాదాల నివారణ, మహిళల భద్రతపై వివరించి ప్రజలు జాగ్రత్తలు పాటించాలని సూచించారు.
ప్రశాంత వాతావరణంలో పరీక్షలు: కలెక్టర్
మెదక్ జిల్లాలో ఈ నెల 24న నిర్వహించనున్న టీజీపీఎస్సీ పరీక్షలను ఎలాంటి అవకతవకలకు తావులేకుండా పారదర్శకంగా నిర్వహిస్తామని కలెక్టర్ ప్రతిమా సింగ్ తెలిపారు. నర్సాపూర్‌లోని బీవీఆర్‌ఐటీ పరీక్షా కేంద్రాన్ని ఆమె పరిశీలించారు. పరీక్ష ప్రారంభానికి గంట ముందే కేంద్రాల గేట్లు మూసివేస్తామని స్పష్టం చేశారు. అభ్యర్థులు నిబంధనలు తప్పనిసరిగా పాటించాలని, పరీక్ష హాల్లోకి ఎలక్ట్రానిక్ పరికరాలను అనుమతించబోమని వెల్లడించారు.
సూర్యాపేటలో రాంరెడ్డి దామోదర్ రెడ్డి విగ్రహావిష్కరణ
సూర్యాపేట జిల్లా కేంద్రంలోని పబ్లిక్ క్లబ్ ఫంక్షన్ హాల్‌లో మాజీ మంత్రి, మాజీ ఎమ్మెల్యే రాంరెడ్డి దామోదర్ రెడ్డి విగ్రహావిష్కరణ కార్యక్రమం ఘనంగా జరిగింది. ఈ కార్యక్రమానికి కాంగ్రెస్ నాయకులు, కార్యకర్తలు, ఆయన అభిమానులు పెద్ద సంఖ్యలో హాజరయ్యారు. ఆత్మీయ నేత విగ్రహం ముందు వ్యవసాయ మార్కెట్ కమిటీ చైర్మన్ కొప్పుల వేణారెడ్డి భావోద్వేగానికి గురయ్యారు. జిల్లా గ్రంథాలయ చైర్మన్ వంగవీటి రామారావు కూడా విగ్రహావిష్కరణలో పాల్గొన్నారు.
లిఫ్ట్ ఇరిగేషన్‌పై ఆరోపణలు.. కాంగ్రెస్ కౌంటర్
ఖమ్మం జిల్లా వేంసూరు మండలం మర్లపాడులో లిఫ్ట్-1, లిఫ్ట్-2 నిర్వహణపై BRS నాయకులు చేస్తున్న ఆరోపణలను కాంగ్రెస్ నాయకులు ఖండించారు. సోమవారం గ్రామంలో నిర్వహించిన మీడియా సమావేశంలో మండల కాంగ్రెస్ అధ్యక్షుడు కాసర చంద్రశేఖర్ రెడ్డి మాట్లాడుతూ.. గత 30 ఏళ్లుగా ఆనవాయితీ ప్రకారం రైతుల నుంచి నామమాత్రపు నిర్వహణ రుసుము వసూలు చేస్తున్నట్లు తెలిపారు.
మంచి బాస్‌కి, చెడ్డ బాస్‌కి తేడా ఇదే!
మంచి బాస్ ఉద్యోగుల నుంచి మంచి ఫలితాలు ఆశిస్తూ, వాళ్లు మెరుగుపడేలా ప్రోత్సహిస్తారు. కానీ చెడ్డ బాస్ చిన్న తప్పులకే కోప్పడటం, పదేపదే విమర్శించడం, ఉద్యోగులపై ఒత్తిడి పెంచడం చేస్తుంటారు. విజయానికి టీమ్ క్రెడిట్‌ను తీసుకుని, తప్పులకు ఉద్యోగులనే బాధ్యుల్ని చేస్తుంటారు. దీంతో ఉద్యోగులు పని కంటే బాస్ ఎలా స్పందిస్తారోనని ఎక్కువగా ఆలోచిస్తారు. ఉద్యోగులను భయపెట్టడం కాదు.. వాళ్ల సామర్థ్యాన్ని పెంచడమే నిజమైన లీడర్ లక్షణం.
గాజాలో 5 లక్షల మందికి ఆహార సాయం నిలిపివేస్తున్న WFP
ఆర్థిక లోటు, నిధుల కొరత కారణంగా గాజా ప్రాంతంలో పాలస్తీనియన్లకు ప్రతినెలా అందిస్తున్న అత్యవసర ఆహార సాయంలో సుమారు 5 లక్షల మందికి ఇకపై నిలిపివేస్తున్నట్లు ఐక్యరాజ్యసమితికి చెందిన ప్రపంచ ఆహార సంస్థ (World Food Programme) ప్రకటించింది. యుద్ధం, అంతర్గత అశాంతితో ఇప్పటికే ఆహార సంక్షోభాన్ని ఎదుర్కొంటున్న గాజా ప్రజలకు ఈ నిర్ణయం భయంకరంగా మారనుంది. గతంలో WFP నెలకు 16 లక్షల మందికి ఆహారం అందిస్తుండగా, ప్రస్తుతం ఆ సాయం పొందేవారి సంఖ్య 11 లక్షలకు పడిపోయింది.
ప్రజలకు ఎలాంటి ఇబ్బందులు కలగకుండా పటిష్ట బందోబస్తు
పెద్దపల్లి జిల్లా గోదావరిఖని సింగరేణి జవహర్‌లాల్ నెహ్రూ స్టేడియంలో జరగనున్న దసరా వేడుకలకు పోలీస్ సెక్యూరిటీ పెంచుతున్నారు. రామగుండం పోలీస్ కమిషనర్ అంబర్ కిషోర్ ఝా ఏర్పాట్లను పరిశీలించి అధికారులకు సూచనలు చేశారు. రావణ దహనం, క్రాకర్ షో, సినీ కళాకారుల ప్రోగ్రామ్స్ ఉండటంతో పెద్ద సంఖ్యలో జనం వచ్చే అవకాశం ఉంది.ట్రాఫిక్, పార్కింగ్ ఇబ్బందులు రాకుండా చూడాలని చెప్పారు. వేడుకలు పూర్తయ్యే వరకు పోలీసులు అలర్ట్‌గా ఉండాలని ఆదేశించారు.
MBBS సీట్ సాధించిన విద్యార్థినికి సన్మానం
రాజన్న సిరిసిల్ల జిల్లా కోనరావుపేట మండలం నాగారం గ్రామానికి చెందిన ఫీల్డ్ అసిస్టెంట్ బుర్ర వేణి కూతురు శ్రీజ ఉస్మానియా మెడికల్ కాలేజీలో బీడీఎస్ సీటు సాధించింది. ఈ సందర్భంగా మాజీ సింగిల్ విండో చైర్మన్, మాజీ సర్పంచ్ గోపాడి సురేందర్ రావు ఆమెను ఘనంగా సన్మానించారు. శ్రీజ సాధించిన విజయం గ్రామానికి గర్వకారణమని, భవిష్యత్తులో మరిన్ని ఉన్నత శిఖరాలు అధిరోహించాలని ఆకాంక్షించారు.
ఇందిరమ్మ ఇళ్ల లబ్ధిదారులకు అలర్ట్
రంగారెడ్డి జిల్లాలో ఇందిరమ్మ ఇళ్ల నిర్మాణానికి సంబంధించి అధికారులు కొత్త మార్గదర్శకాలు జారీ చేశారు. 400 చదరపు అడుగుల ప్లింత్కు 500 చదరపు అడుగులు, 500–600 చదరపు అడుగుల ప్లింత్కు గరిష్ఠంగా 750 చదరపు అడుగుల వరకు స్లాబ్ వేయాలని సూచించారు. ఇంటి ముందు 3 అడుగులు, మిగిలిన మూడు వైపులా ఒక్కో అడుగు మాత్రమే స్లాబ్ను పొడిగించాలి అని పేర్కొన్నారు.
అదానీ ప్రాజెక్టుపై గిరిజనుల ఫేక్‌ వేలిముద్రలు ?
ఒడిశాలో అదానీ గ్రూప్‌ మైనింగ్ ప్రాజెక్టు కోసం తమ భూములకు సంబంధించిన పర్మిషన్ పత్రాల్లో సంతకాలు, వేలిముద్రలను ఫేక్‌గా ఉపయోగించారని గిరిజనులు ఆరోపించారు. చనిపోయిన వారి పేర్లు కూడా పత్రాల్లో ఉన్నాయని తెలిపారు. గ్రామసభలు సక్రమంగా నిర్వహించకుండా తమ భూములను తీసుకునేందుకు ప్రయత్నిస్తున్నారని ఆందోళన వ్యక్తం చేశారు. గనుల ప్రాజెక్టుతో అటవీ హక్కులు, పర్యావరణం, జీవనోపాధి దెబ్బతింటాయని పేర్కొన్నారు. ఈ ఆరోపణలపై సంబంధిత సంస్థ అధికారికంగా స్పందించలేదు.
దసరా కోసం ముస్తాబైన వేల్పూర్‌లోని జంబి హనుమాన్ ఆలయం
నిజామాబాద్ జిల్లా వేల్పూర్‌ మండల కేంద్రంలో దసరా పండగ కోసం జంబి హనుమాన్ ఆలయాన్ని అందంగా అలంకరించారు. ఉద్యోగాలు, పనుల కోసం ఇతర ప్రాంతాల్లో సెటిల్ అయిన గ్రామస్తులు కూడా దసరా వచ్చిందంటే సొంతూరికి వస్తారు. ఆలయం దగ్గర పూజలు చేసి, ఒకరికొకరు శుభాకాంక్షలు చెప్పుకుంటారు. గ్రామస్తులంతా కలిసి పండగను ఘనంగా జరుపుకుంటారు. ఈ సందర్భంగా సాంస్కృతిక కార్యక్రమాలు కూడా నిర్వహిస్తారు. దీంతో గ్రామంలో పండగ సందడి కనిపిస్తుంది.
సౌరవ్, అశుతోష్ కస్టడీ గడువు రెండు రోజులు పొడిగింపు
ఢిల్లీలోని జంతర్ మంతర్ దగ్గర జరిగిన నిరసనలకు సంబంధించి అరెస్టైన CJP నాయకులు అశుతోష్ రాంకా, సౌరవ్ దాస్ల జైలు కస్టడీని ప్రత్యేక ఎగ్జిక్యూటివ్ మేజిస్ట్రేట్ కోర్టు మరో రెండు రోజులు పొడిగించింది. జంతర్ మంతర్‌ను నిరసన ప్రాంతంగా రద్దు చేస్తూ ప్రభుత్వం జీవో ఇచ్చినా, దాన్ని ధిక్కరిస్తూ వాళ్లిద్దరూ అక్కడికి రావడంతో ఢిల్లీ పోలీసులు వారిని <a href="https://www.theclearcutnews.com/n/wHjpruz">అదుపులోకి తీసుకున్నారు</a>. ఈ కేసులో జ్యుడీషియల్ కస్టడీ ముగియడంతో, కోర్టు వాళ్లు కస్టడీని పొడిగించింది.
ఆర్టీసీ బస్సులో చోరీ.. తల్లీకూతుళ్ల బంగారం మాయం!
వికారాబాద్ జిల్లా తాండూరులో RTC బస్సులో తల్లీకూతుళ్ల పర్సు కత్తిరించి 2.5 తులాల బంగారు ఆభరణాలను గుర్తుతెలియని వ్యక్తులు చోరీ చేశారు. పాత తాండూరుకు చెందిన ఆండాలమ్మ, కుమార్తె శిరీష సోమవారం హైదరాబాద్ వెళ్లేందుకు బస్సు ఎక్కారు. టికెట్ కోసం ఆధార్ కార్డు తీసే క్రమంలో పర్సు కత్తిరించి ఉండటాన్ని గుర్తించారు. అందులోని బంగారం కనిపించకపోవడంతో పోలీసులకు ఫిర్యాదు చేశారు. ఘటనపై పోలీసులు ఎంక్వైరీ చేపట్టారు.
ఐదేళ్లలో అంతరిక్షంలో యుద్ధం!
మరో ఐదేళ్లలో అంతరిక్షంలో యుద్ధం జరిగే ప్రమాదం ఉందని నిపుణులు హెచ్చరిస్తున్నట్లు సారా నాప్టన్ రాసిన AOL TODAY కథనం తెలిపింది అమెరికా, రష్యా, చైనా అంతరిక్షంలో తమ సామర్థ్యాలను పెంచుకుంటున్నాయి. అంతరిక్షంలో శాటిలైట్లపై దాడులు జరిగితే ఇంటర్నెట్, GPS, కమ్యూనికేషన్లు, విమానాల రాకపోకలు, ఆర్థిక వ్యవస్థలకు అంతరాయం కలగవచ్చు. అందుకే అంతరిక్ష భద్రతపై దేశాలు మరింత దృష్టి పెట్టాలని నిపుణులు సూచిస్తున్నారు.
2035 నాటికి చంద్రుడిపైకి పాకిస్థాన్ ప్రయాణం
చంద్రుడిపై భారత్ ల్యాండ్ అయిన మూడేళ్ల తర్వాత పొరుగు దేశం పాకిస్థాన్ తనూ చంద్రుణ్ని చేరుకోవాలని ప్రయత్నాలు మొదలుపెట్టింది. ఇందులో భాగంగా 2035 నాటికి చంద్రుడిపై ల్యాండింగ్ చేయాలనే లక్ష్యాన్ని నిర్దేశించుకున్నట్లు ఆ దేశ ప్లానింగ్ మంత్రి అహ్సన్ ఇక్బాల్ ప్రకటించారు. చైనా సహకారంతో ఈ పని చేయాలని పాక్ భావిస్తోంది. నారోవాల్‌లో జరిగిన 'వరల్డ్ స్పేస్ వీక్ 2026' ముగింపు వేడుకల్లో మంత్రి ఈ కీలక ప్రకటన చేశారు.
స్టార్‌బక్స్‌లో వాలెట్ చోరీ.. వైరల్‌గా CCTV వీడియో
బెంగళూరులోని కమర్షియల్ స్ట్రీట్‌లో ఉన్న స్టార్‌బక్స్‌లో ఓ మహిళ.. కస్టమర్ బ్యాగ్‌లో నుంచి వాలెట్ దొంగిలించినట్లు CCTV కెమెరాలో రికార్డైంది. బాధితుడి వైఫ్ దిశా భాటియా ఈ వీడియోను సోషల్ మీడియాలో షేర్ చేసి బెంగళూరు పోలీసులను కంప్లయింట్ చేస్తూ, HDFC బ్యాంకును సాయం కోరారు. బహిరంగ ప్రదేశాల్లో తమ వస్తువుల విషయంలో జాగ్రత్తగా ఉండాలని ఆమె హెచ్చరించారు.
బస్సులోనే పండంటి బిడ్డకు జన్మనిచ్చిన మహిళ
వికారాబాద్ జిల్లా తాండూరు నుంచి చించోలికి బస్సులో వెళ్తున్న కర్ణాటకలోని జట్టూర్ గ్రామానికి చెందిన పుష్పలతకు దారిలోనే పురిటి నొప్పులు వచ్చాయి. దీంతో డ్రైవర్ వెంటనే బస్సును దగ్గర్లోని ప్రభుత్వ మాతా శిశు ఆసుపత్రికి తీసుకెళ్లారు. అయితే, ఆసుపత్రికి చేరుకునేలోపే పుష్పలత బస్సులోనే ఆడబిడ్డకు జన్మనిచ్చారు. తర్వాత తల్లీబిడ్డలను ఆసుపత్రిలో చేర్చగా ఇద్దరూ క్షేమంగా ఉన్నారు. సరైన సమయంలో స్పందించి సాయం చేసిన డ్రైవర్‌కు కుటుంబ సభ్యులు కృతజ్ఞతలు చెప్పారు.
గ్రామంలో కాలువల పూడిక తొలగింపు
తిరుపతి జిల్లా ఏర్పేడు మండలం మేర్లపాక గ్రామంలో పారిశుద్ధ్య పనులు వేగవంతం చేశారు. గ్రామంలోని ప్రధాన, మురుగు కాలువల్లో పేరుకుపోయిన పూడికను తొలగించి నీటి ప్రవాహానికి ఆటంకాలు లేకుండా చర్యలు చేపట్టారు. రహదారుల పక్కన చెత్తాచెదారం, పిచ్చిమొక్కలను తొలగించారు. జేసీబీలు, ఎక్స్కవేటర్ల సాయంతో ప్రధాన, అంతర్గత రహదారులను శుభ్రం చేసి గ్రామాన్ని పరిశుభ్రంగా తీర్చిదిద్దే పనులు చేపట్టారు.
హైకోర్టు సమీపంలో భారీ అగ్నిప్రమాదం
హైదరాబాద్ ఓల్డ్ సిటీలో భారీ అగ్నిప్రమాదం చోటుచేసుకుంది. హైకోర్టు సమీపంలోని మదీనా క్రాస్‌ రోడ్‌ వద్ద ఉన్న ‘బాంబే హోజరీ’ వస్త్ర దుకాణం, గోదాములో తెల్లవారుజామున మంటలు చెలరేగాయి. సమాచారం అందుకున్న అగ్నిమాపక సిబ్బంది, చార్మినార్ పోలీసులు వెంటనే ఘటనా స్థలానికి చేరుకుని సహాయక చర్యలు చేపట్టారు. అగ్నిప్రమాదానికి గల కారణాలు, నష్టం వివరాలు తెలియాల్సి ఉంది.
డ్రగ్స్‌పై వ్యతిరేకంగా 21న అమిత్ షా బైక్ ర్యాలీ
కేంద్ర హోంమంత్రి అమిత్ షా అక్టోబర్ 21న ఢిల్లీలోని నేషనల్ పోలీస్ మెమోరియల్‌లో పోలీసు అమరవీరులకు నివాళులర్పించనున్నారు. అనంతరం 90 మంది పోలీస్ రైడర్లతో కూడిన బైక్ ర్యాలీని ఫ్లాగ్ ఆఫ్ చేయనున్నారు. జమ్మూ కశ్మీర్, లడఖ్ సహా పలు రాష్ట్రాలు, కేంద్ర పాలిత ప్రాంతాలు, కేంద్ర బలగాలకు చెందిన పోలీసులు ఇందులో పాల్గొంటారు. ‘ఫైట్ అగైనెస్ట్ డ్రగ్స్’ థీమ్‌తో సాగే ఈ ర్యాలీలో పాల్గొనేవారు అక్టోబర్ 31న గుజరాత్‌లోని ఏక్తా నగర్‌కు చేరుకుని ఏక్తా పరేడ్‌లో పాల్గొంటారు.
Parle-G ఫ్యాక్టరీలో భారీ అగ్నిప్రమాదం
మధ్యప్రదేశ్‌‌‌‌లోని జబల్‌పూర్ రిచాయ్ ఇండస్ట్రియల్ ఏరియాలో ఉన్న 'Parle-G' బిస్కెట్ ఫ్యాక్టరీలో ఈరోజు మధ్యాహ్నం భారీ అగ్నిప్రమాదం జరిగింది. సమాచారం తెలుసుకున్న ఫైర్ సిబ్బంది వెంటనే అక్కడికి చేరుకొని, మంటలను అదుపు చేసేందుకు ప్రయత్నిస్తున్నారు. సహాయక చర్యలు కూడా కొనసాగుతున్నాయి. పోలీసులు సమాచారం ప్రకారం షార్ట్ సర్క్యూట్ వల్ల మంటలు చెలరేగి ఉండవచ్చని భావిస్తున్నారు. అయితే, ప్రమాదానికి అసలు కారణం ఫోరెన్సిక్ రిపోర్ట్ తర్వాతే తెలుస్తుందని అన్నారు.