Local

Local· 10 Apr 2026

అవినీతి జడ్జి యశ్వంత్ వర్మ రాజీనామా

అలహాబాద్ హైకోర్టు న్యాయమూర్తి జస్టిస్ యశ్వంత్ వర్మ తన పదవికి రాజీనామా చేశారు. అవినీతి ఆరోపణలపై ఆయనపై పార్లమెంటులో అభిశంసన ప్రక్రియ (Impeachment) జరుగుతున్న తరుణంలో ఈ నిర్ణయం తీసుకున్నారు. 2025లో ఢిల్లీలోని ఆయన నివాసంలో భారీగా నగదు పట్టుబడటంతో సుప్రీంకోర్టు విచారణకు ఆదేశించింది. విచారణ పూర్తయ్యేలోపే ఆయన రాష్ట్రపతి ద్రౌపది ముర్ముకు రాజీనామా లేఖ పంపారు. దీనివల్ల ఆయనపై ఉన్న అభిశంసన ప్రక్రియ ఆగిపోవడమే కాకుండా, పెన్షన్ వంటి ఇతర ప్రయోజనాలు పొందే అవకాశం కలుగుతుంది.

Local· 10 Apr 2026

రచయిత ఉదయభాను ఇక లేరు

ప్రముఖ రచయిత ఎం. ఉదయభాను (73) కన్నుమూశారు. గత కొన్నాళ్లుగా అనారోగ్యంతో బాధపడుతున్న ఆయన హైదరాబాద్ లో స్వగృహంలో కన్నుమూశారు. కొన్ని వందల కథలు, నవలలు రాశారు. ఆయన రాసిన ది గైడ్ నవల ఆంధ్రభూమి వార పత్రిక పోటీలో ఉత్తమ నవలగా ఎంపికైంది. అనువాద రచనలకు ఉదయభాను పెట్టింది పేరు. ఆంధ్రజ్యోతి ఆదివారం అనుబంధంలో అపరాధి శీర్షికతో ఉదయభాను రాసిన క్రైమ్ స్టోరీస్ పాఠకాదరణ పొందాయి. మహాకవి దాశరథికి ఆయన స్వయానా మేనల్లుడు.

Local· 10 Apr 2026

Gen Z ఎదుర్కొంటున్న సమస్య ఏంటో తెలుసా ?

క్రింజ్ (Cringe) — ఇదే ఇప్పుడు జెన్-జీ యువతను వెంటాడుతోంది. తాము చేసే పనులు నలుగురిలో ఎక్కడ ఇబ్బందుల్లో పడేస్తుందోనని ఆందోళన ఎక్కువైపోతోంది. Yahoo/YouGov సర్వే ప్రకారం, 44% మంది యువత తాము చేసే పనులు ఇతరుల దృష్టిలో అల్లరిపాలైపోతామని భయపడిపోతున్నట్టు వెల్లడైంది. ఈ భయం వల్ల 40% మంది తమ భావాలను మనసులోనే దాచేసుకుంటే 30% మంది కెరీర్ అవకాశాలను సైతం వదులుకుంటున్నారు. సోషల్ మీడియాలో 'పర్ఫెక్ట్'గా కనిపించాలనే ఒత్తిడి వీరిలో సహజత్వాన్ని చంపేస్తోంది. నలుగురిలో నవ్వులపాలవుతామనే ఈ డిజిటల్ ఆందోళన యూత్ కెరీర్ పైన ఎఫెక్ట్ చూపిస్తోంది.

Local· 9 Apr 2026

మహానడు వేదిక విజయనగరం !!

టీడీపీ ప్రతిష్టాత్మకంగా నిర్వహించే మహానాడు 2026 ఈసారి విజయ నగరం జిల్లాలో జరుగుతోంది. అందుకు తగ్గ స్థల పరిశీలన ఏర్పాట్లు చేయాలని టీడీపీ అధిష్టానం పార్టీ వర్గాలను ఆదేశించింది.మే 28న ఎన్టీఆర్ జన్మదిన వేడుకలను ఘనంగా నిర్వహించాలని నిర్ణయించారు. నెల్లిమర్లలో ఈ సారి ఈ వేడుకలు జరుగుతాయి.మే 27,28,9తేదీల్లో జరిగే ఈ వేడుకలకు నెల్లిమర్ల ముస్తాబవుతోంది.నెల్లిమర్ల విజయనగరానికి ఆనుకుని ఉండటం, జాతీయ రహదారికి దగ్గరలో ఉండటం వల్ల ఎక్కువమంది హాజరవడానికి ఆస్కారం ఉంది. సభాప్రాంగణం, పార్కింగ్,విడిది వసతులు చూస్తున్నారు. గత ఎన్నికల్లో ఈ జిల్లాలో టీడీపీ క్లీస్ స్వీప్ చేసింది.

▶

Local· 9 Apr 2026

చనిపోయిన వృద్ధురాలికి కోతి భావోద్వేగ వీడ్కోలు..

బెంగళూరులో మానవత్వానికి, జంతువుల విశ్వాసానికి నిదర్శనంగా ఒక అరుదైన ఘటన చోటుచేసుకుంది. రోజూ కోతులకు ఆహారం పెట్టే ఒక వృద్ధురాలు గుండెపోటుతో మరణించగా, ఆమె కడసారి చూపు కోసం ఒక కోతి అక్కడికి చేరుకుంది. మృతదేహం పక్కనే కూర్చుని, ఆమెను హత్తుకుని భావోద్వేగంతో వీడ్కోలు పలికిన తీరు చూసి స్థానికులు కన్నీటి పర్యంతమయ్యారు. మూగజీవాల పట్ల ఆమె చూపిన ప్రేమే ఆ కోతిని అక్కడికి రప్పించిందని అందరూ చర్చించుకుంటున్నారు.

Local· 9 Apr 2026

జలపాతంతో సెల్ఫీ... ముగ్గురి బలి

అల్లూరి జిల్లా అనంతగిరి పాత మూలగుమ్మిలో సెల్ఫీ తీసుకుంటుండగా నలుగురు బాలికలు జలపాతంలో పడిపోయారు. ఈ ప్రమాదంలో ముగ్గురు బాలికలు మరణించారు. మరో బాలిక పరిస్థితి విషమంగా ఉండగా స్థానికులు ఆస్పత్రికి తరలించారు. మరణించిన వారు హుకుంపేట మండలంజుంబు వలసకు చెందిన వారని పోలీసులు తెలిపారు.

Local· 9 Apr 2026

భర్త మోసం చేశాడని.. టీచర్‌ను చెట్టుకు కట్టేసిన బాధితులు..

సంగారెడ్డి జిల్లా కల్గి మండలంలో అమానుష ఘటన చోటుచేసుకుంది. రాసోల్ గ్రామంలో అంగన్వాడీ టీచర్‌గా పనిచేస్తున్న వసంతకుమారి భర్త, ఫైనాన్స్ పేరుతో గ్రామానికి చెందిన అవుటి సాయవ్వ, చాకలి బాలమణి, భూతాలే వైద్యనాథ్, అవుటి బండ్యప్ప, కోటగిరి రాములు వద్ద డబ్బులు తీసుకొని మోసంచేసి పారిపోయాడు. దీంతో ఆగ్రహించిన బాధితులు, మంగళవారం విధులకు వచ్చిన ఆమెను తాళ్లతో చెట్టుకు కట్టేసి అవమానించారు. అనంతరం గ్రామపెద్దల జోక్యంతో ఆమెను విడిచిపెట్టారు. ఈ విషయంపై బుధవారం వసంతకుమారి పోలీస్ స్టేషన్లో ఫిర్యాదు చేశారు.

Local· 9 Apr 2026

రోడ్ల నిర్మాణం మరింత భారం

యుద్ధం ఆగింది. కానీ దాని ఎఫెక్ట్ మన మీద బాగా పడింది. రోడ్ల నిర్మాణం తడిసి మోపెడైంది. రోడ్లు వేయడానికి వినియోగించే బిటుమెన్, ఫర్నేస్ ఆయిల్, లైట్ డీజిల్ ఆయిల్ ధరలు బాగా పెరిగిపోయాయి. నిన్నటి వరకు టన్ను రూ50 వేలకు వచ్చే బిటుమెన్ ఒక్కసారిగా రూ.82 వేలకు పెరిగిపోయింది. ఇక లైట్ డీజిల్ ఆయిల్ లీటర్ రూ50 ఉండేది రూ172కి పెరిగింది. ఫర్నేస్ ఆయిల్ లీటర్ 40 నుంచి 102 రూపాయలకు పెరిగింది. దీంతో ప్రభుత్వ ఖజానాపై వేల కోట్ల రూపాయల భారం పెరిగే ఛాన్స్ ఉంది

Local· 8 Apr 2026

కారం పొడి కొనేలోపు రెండు లక్షలు మాయం!

కామారెడ్డి జిల్లా ఎల్లారెడ్డిలో రెండు లక్షల డబ్బు దొంగతనం కలకలం రేపింది. రషీద్ పటేల్ అనే వ్యక్తి బ్యాంకు నుండి డబ్బు విత్ డ్రా చేసి, తన బైక్ సీటు కవర్‌లో ఉంచారు. దారిలో కారం పొడి కొనేందుకు ఆయన షాపులోకి వెళ్లగా, అతన్ని బ్యాంక్ నుండే కనిపెడుతున్న దొంగ టైమ్ చూసి ఆ డబ్బును ఎత్తుకెళ్లాడు. బాధితుడి ఫిర్యాదుతో పోలీసులు సీసీటీవీ దృశ్యాలను పరిశీలిస్తున్నారు. పెద్ద మొత్తంలో నగదు తీసుకెళ్లేటప్పుడు అప్రమత్తంగా ఉండాలని ఈ ఘటన హెచ్చరిస్తోంది.

Local· 8 Apr 2026

మణిపూర్ లో మళ్లీ హింస నలుగురు మృతి

మణిపూర్ మళ్లీ హింస చెలరేగింది. బిష్ణుపూర్ జిల్లా మొయిరాంగ్ ట్రోంగ్లోబీ ఏరియాలో మిలిటెంట్లు జరిపిన బాంబు దాడిలో ఇద్దరు చిన్నారులు ప్రాణాలు కోల్పోయారు. ఆ పిల్లల తల్లి గాయపడ్డారు. దీంతో ఆందోళనకు దిగిన స్థానికులు CRPF క్యాంపుపై దాడి చేశారు. భద్రతా దళాలు జరిపిన ఎదురు కాల్పుల్లో ఇద్దరు మరణించారు. దీంతో ఒక్కసారిగా ఉద్రిక్తతలు పెరిగిపోయాయి. పరిస్థితుల్ని అదుపులోకి అయిదు జిల్లాల్లో ఇంటర్నెట్ సేవల్ని నిలిపివేశారు

Local· 7 Apr 2026

రుషికొండ ప్యాలెస్ మాకివ్వండి !!

విశాఖ రుషి కొండ ప్యాలెస్ ను మెయిన్ టెయిన్ చేయడంపై ప్రముఖ స్టార్ హోటల్స్ తాజ్, ది లీలా అట్మాస్ఫియర్ కోర్, ఫెమా లాంటి గ్రూపులు ఆసక్తి చూపుతున్నాయి. రుషికొండ ప్యాలెస్ ను ఎలా వినియోగించాలన్న అంశంపై ఇప్పటికే అయిదుసార్లు భేటీ అయిన ఏపీ కేబినెట్ సబ్ కమిటీ నిర్ణయాలపై నివేదికలు రెడీ చేసింది. వాటిని సీఎం చంద్రబాబుకు చూపించి ఆ తర్వాత తుదినిర్ణయం తీసుకుంటారు. మొత్తం మీద జగన్ హయాంలో నిర్మించిన ఈ అందాల ప్యాలెస్ వినియోగం లోకి రాబోతోంది.

Local· 7 Apr 2026

మళ్ళీ తండ్రి గూటికి కవిత ?

కేసీఆర్ కుటుంబంలో కలతలు ఒక కొలిక్కి వచ్చాయా? కుమార్తె కవితతో ఆయన సయోధ్య కోరుకుంటున్నారా? ఏదేమైనా కుటుంబ తగాదాలపై కేసీఆర్ భార్య శోభ మాత్రం వర్రీ అవుతున్నారు. వచ్చే గ్రేటర్ ఎన్నికల్లో కవిత తన టీమ్ ను రంగంలోకి దించితే పార్టీకి మరింత నష్టమని కేసీఆర్ టెన్షన్ పడుతున్నట్లుగా తెలుస్తోంది.అలాగని కుమార్తెతో సయోధ్యకు ఆయన పూర్తి సిద్ధంగా లేరు. అందుకే మధ్యే మార్గంగా శోభ రంగ ప్రవేశం చేశారా? కవిత దగ్గరకు ఆమె తల్లి శోభ తరచుగా వెళ్లి యోగక్షేమాలు తెలుసుకుంటున్నారు.కవితను కంట్రోల్ చేయకపోతే పార్టీకి మరింత నష్టమని కేసీఆర్, కేటీఆర్, హరీష్ కూడా భావిస్తున్నారు.

Local· 7 Apr 2026

అర్చకులు విదేశాలకు వెళ్లొస్తే ఏమవుతుందో తెలుసా ?

విదేశీ ప్రయాణం చేసిన అర్చకులు ఇక గర్భాలయంలోకి అడుగు పెట్టడానికి వీల్లేదు. ఏపీ హైకోర్టు దీనికి సంబంధించి కీలక ఉత్తర్వులు జారీ చేసింది. విదేశాలకు వెళ్లి వచ్చిన అర్చకులు గర్భాలయంలోకి వెళ్లి పూజలు చేయడానికి వీల్లేదని 2010లోనే దేవాదాయ శాఖ ఒక సర్క్యులర్ జారీ చేసింది. శృంగేరి శారదా పీఠం జగద్గురువు శ్రీభారతి తీర్థ మహాస్వామి కూడా దీనినే సమర్థించారు. విదేశీ ప్రయాణాలు చేసివచ్చినా గర్భాలయంలోకి ప్రవేశిస్తున్న పూజారులను అడ్డుకోవాలంటూ దేవాదాయ శాఖ దాఖలు చేసిన పిటిషన్న్ ను న్యాయమూర్తి జస్టిస్ నిమ్మగడ్డ వెంకటేశ్వరులు విచారించారు. విదేశాలకు వెళ్లొస్తే అర్చకులు గర్భాలయంలోకి ప్రవేశించకూడదని స్పష్టం చేశారు.

Local· 7 Apr 2026

మాజీ మిస్ ఇండియా ఎర్త్ అదృశ్యం

2019లో మిస్ ఇండియా ఎర్త్ విజేతైన సయాలీ సుర్వే అదృశ్యమయ్యారు. ఆమెతో పాటు నలుగురు పిల్లలు కూడా కనిపించడం లేదని తల్లిదండ్రులు పుణె పోలీసులకు ఫిర్యాదు చేశారు. అత్తింటివారే కిడ్నాప్ చేసి ఉంటారని వారు అనుమానిస్తున్నారు. ముస్లిం వ్యక్తిని వివాహం చేసుకున్న సయాలీ ఇటీవల తన నలుగురు పిల్లలతో కలిసి తిరిగి హిందూమతంలోకి మారారు. తన భర్త వేధింపులు భరించలేకే తిరిగి హిందూమతంలోకి వచ్చానని చెప్పారు. తన పేరుని ఆద్య అని మార్చుకున్నారు. ఇలా ఘర్ వాపసి జరిగిన కొద్ది రోజులకే ఆమె కనిపించకపోవడం కలకలం రేపుతోంది

▶

Local· 6 Apr 2026

షార్ట్ ఫిల్మ్ సరదా ముగ్గురు యువకుల ప్రాణాలు తీసింది!

కడప జిల్లా వల్లూరు మండలం పుష్పగిరి వద్ద పెన్నా నదిలో షార్ట్ ఫిల్మ్ తీయడానికి వెళ్లిన ఎనిమిది మంది యువకుల్లో ముగ్గురు ప్రమాదవశాత్తు నీటిలో మునిగి చనిపోయారు. కనీస భద్రత లేకుండా నదిలోకి దిగడంతో ఈ విషాదం చోటుచేసుకుంది. షార్ట్ ఫిల్మ్ కోసం చేసిన ప్రయత్నం ప్రాణాల మీదకు రావడంతో ఆయా కుటుంబాల్లో తీవ్ర విషాదం నిండింది. నదులు, జలాశయాల వద్ద యువత అప్రమత్తంగా ఉండాలని పోలీసులు హెచ్చరిస్తున్నారు.

Local· 6 Apr 2026

జపాన్ మహిళా టూరిస్టుకి వేధింపులు

రాజస్థాన్ లోని జైపూర్ పోర్టు సందర్శన కోసం జపాన్ నుంచి వచ్చిన ఒక మహిళా టూరిస్టు వేధింపులకు గురయ్యారు. అయిదుగురు దుండగులు ఆమె చెయ్యి పట్టుకొని అసభ్యకరంగా ప్రవర్తించారు. భయాందోళనకు గురైన ఆమె గట్టిగా కేకలు వేశారు. ఆ టైమ్ లో అక్కడ ఎవరూ లేకపోవడంతో ఆ అయిదుగురు ఆమె పట్ల మరింత నీచంగా ప్రవర్తించారు. దీంతో ఆమె అక్కడి నుంచి పరుగులు తీశారు. ఆ తర్వాత పోలీసులకు ఫిర్యాదు చేశారు. నిందితులు అయిదుగురి ఫుటేజ్ సీసీటీవీలో రికార్డయింది. ప్రస్తుతం వారి కోసం పోలీసులు గాలిస్తున్నారు.

▶

Local· 6 Apr 2026

శ్రీకాకుళం జిల్లాలో ఘోర రోడ్డు ప్రమాదం

శ్రీకాకుళం జిల్లాలో నెమలి‌ నారాయణపురం హైవేపై ఘోర రోడ్డు ప్ర‌మాదం జరిగింది. హఠాత్తుగా వాతావరణం మారిపోయి ఈదురు గాలులతో కూడిన వర్షం‌‌ కురవడంతో ఇన్నోవా కారు డివైడర్ ని ఢీకొట్టి మరో పక్కకు పల్టీకొట్టింది.‌అదే సమయంలో అటు నుంచి వస్తున్న లారీని ఢీ కొట్టడంతో బోల్తా పడింది. కారులో ప్రయాణిస్తున్న వారిలో ముగ్గురికి గాయాలైతే ఇద్దరి పరిస్థితి విషమంగా ఉంది. పూరీ దర్శనానికి వెళ్లి తిరిగొస్తుండగా ఈ ప్రమాదం జరిగింది.

▶

Local· 6 Apr 2026

పిల్లలకి సమ్మర్ హాలిడేస్: పేరెంట్స్ అలర్ట్ అవ్వండి ఇలా!

ఒకప్పుడు సమ్మర్ హాలిడేస్ అంటే అమ్మమ్మ ఊరు, ఆటపాటలు. కానీ ఇప్పుడు సమ్మర్ హాలిడేస్ అంటే పిల్లలు స్మార్ట్‌ఫోన్లకే పరిమితమై, సోషల్ మీడియా మరియు రీల్స్ వంటి వ్యసనాలకు బానిసలవుతున్నారు. దీనివల్ల ఆరోగ్యం దెబ్బతినడమే కాకుండా, చిన్నపాటి మందలింపులకే మనస్తాపం చెంది ఇల్లు వదిలి వెళ్తున్నరు. అందుకే, పేరెంట్స్ మీ టైమ్ని పిల్లలకి కేటాయించండి. వారు ఇంటర్నెట్‌లో ఏం చూస్తున్నారో గమనిస్తూ, ఎక్షామ్ రిసల్ట్ విషయంలో వారికి భరోసానివ్వండి. మీ అప్రమత్తతే వారి భవిష్యత్తుకు రక్షణ అని. V.C.sajjanar పేరెంట్స్ కి సూచనలు చేసారు.