Local

Local· 22 Aug 2026

గురుకులాల్లో ఖాళీ సీట్ల భర్తీకి స్పాట్ అడ్మిషన్

TG: గురుకులాల్లో మిగిలిన ఖాళీ సీట్లను భర్తీ చేసేందుకు కామారెడ్డి జిల్లాలో స్పాట్ అడ్మిషన్లకు అధికారులు సిద్ధమయ్యారు. జిల్లాలోని 11 గురుకుల పాఠశాలలు, కళాశాలల్లో 5వ తరగతి నుంచి 9వ తరగతి వరకు, ఇంటర్ మొదటి సంవత్సరం MPC, BiPC కోర్సుల్లో ఖాళీగా ఉన్న సీట్లను భర్తీ చేయనున్నట్లు కలెక్టర్ ఆశిష్ సంగ్వాన్ తెలిపారు. ఈనెల 25న ఉదయం 9గంటలకు స్పాట్ అడ్మిషన్ కౌన్సెలింగ్ నిర్వహించనున్నట్లు పేర్కొన్నారు. బాలురకు భిక్కనూరులోని గురుకుల కళాశాలలో, బాలికలకు తాడ్వాయిలోని గురుకుల కళాశాలలో కౌన్సెలింగ్ జరుగుతుందని తెలిపారు.

Local· 22 Aug 2026

హోంమంత్రి నియోజకవర్గంలో కనీస వసతులు కరువు

AP: మౌలిక వసతుల కోసం రాజయ్యపేట గ్రామస్తులు రోడ్డెక్కారు. అనకాపల్లి జిల్లా పాయకరావుపేట నియోజకవర్గంలోని రాజయ్యపేటలో సుమారు 200 కుటుంబాలు కనీస సదుపాయాలు లేక ఇబ్బందులు పడుతున్నాయని గ్రామస్తులు ఆవేదన వ్యక్తం చేశారు. నడిచేందుకు సరైన రోడ్లు, తాగునీరు, వీధిలైట్లు, సైడ్‌ కాలువలు, డ్రైనేజీ సౌకర్యాలు లేక అవస్థలు ఎదురవుతున్నాయని తెలిపారు. సమస్యలను పరిష్కరించాలని హోంమంత్రి, స్థానిక ఎమ్మెల్యే వంగలపూడి అనితను కోరారు. అనంతరం గ్రామంలో రోడ్లు, తాగునీటి సమస్యలను పరిష్కరించాలని డిమాండ్ చేస్తూ ప్రదర్శన నిర్వహించారు.

Local· 22 Aug 2026

బైక్‌ను ఢీకొన్న లారీ.. ఇద్దరు మృతి

AP: కర్నూలు జిల్లా జొన్నగిరి సమీపంలో జరిగిన ఘోర రోడ్డు ప్రమాదంలో ఇద్దరు ప్రాణాలు కోల్పోయారు. బైక్‌, లారీ ఎదురెదురుగా ఢీకొన్న ఘటనలో మదనంతపురానికి చెందిన బాలమధు, మహేంద్ర అక్కడికక్కడే మృతి చెందారు. ప్రమాదం సమాచారం అందుకున్న పోలీసులు వెంటనే ఘటనాస్థలానికి చేరుకుని పరిస్థితిని పరిశీలించారు. ప్రమాదానికి దారితీసిన కారణాలపై వివరాలు సేకరించారు. మృతదేహాలను పోస్టుమార్టం నిమిత్తం ప్రభుత్వ ఆసుపత్రికి తరలించారు. ఘటనపై కేసు నమోదు చేసి దర్యాప్తు చేపట్టారు.

Local· 22 Aug 2026

వ్యాధులపై అలర్ట్.. కలెక్టర్ కీలక ఆదేశాలు

TG: సీజనల్ వ్యాధులు ప్రబలకుండా ముందస్తు చర్యలు చేపట్టాలని మంచిర్యాల జిల్లా కలెక్టర్ కుమార్ దీపక్ వైద్య సిబ్బందిని ఆదేశించారు. జన్నారం ప్రభుత్వ ఆసుపత్రిని ఆయన ఆకస్మికంగా తనిఖీ చేశారు. ఆసుపత్రిలో అందుతున్న వైద్య సేవలు, రోగుల పరిస్థితిపై ప్రభుత్వ వైద్యురాలు డాక్టర్ ఉమాశ్రీని వివరాలు అడిగి తెలుసుకున్నారు. వర్షాకాలంలో సీజనల్ వ్యాధుల వ్యాప్తికి అవకాశం ఉన్నందున ప్రజలకు అవసరమైన వైద్య సేవలు అందుబాటులో ఉండేలా చూడాలని సూచించారు.

▶

Local· 22 Aug 2026

ధాన్యం మాయం.. రైస్ మిల్లు సీజ్

TG: మంచిర్యాల జిల్లాలో రైస్ మిల్లులపై విజిలెన్స్, సివిల్ సప్లై అధికారుల ఆకస్మిక తనిఖీలు కలకలం రేపాయి. చెన్నూరు మండలం కత్తరశాల, ఆస్నాద్ గ్రామాల్లోని రెండు రైస్ మిల్లుల్లో అధికారులు తనిఖీలు చేపట్టారు. కత్తరశాలలోని శ్రీ రాజరాజేశ్వర రైస్ మిల్లులో భారీ అవకతవకలు గుర్తించినట్లు సమాచారం. సుమారు రూ.2 కోట్ల విలువైన ధాన్యం పక్కదారి పట్టించినట్లు అధికారులు ప్రాథమికంగా గుర్తించినట్లు తెలుస్తోంది. దీంతో మిల్లును సీజ్ చేసి, నిర్వాహకుడిని అదుపులోకి తీసుకున్నారు.

Local· 22 Aug 2026

రైళ్లలో బోగీలు పెంచండి.. రైల్వే అధికారులకు కీలక విజ్ఞప్తి

TG: రాఖీ పండుగ సందర్భంగా రైళ్లలో ప్రయాణికుల రద్దీ పెరిగే అవకాశం ఉన్నందున అదనపు బోగీలు ఏర్పాటు చేయాలని డివిజనల్ రైల్వే యూజర్స్ కన్సల్టేటివ్ సభ్యుడు అనుమాస శ్రీనివాస్ కోరారు. మంచిర్యాల నుంచి సింగరేణి, ఇంటర్‌సిటీ, రామగిరి, బల్లార్షా–కాజీపేట మధ్య నడిచే రైళ్లలో బోగీల సంఖ్య పెంచాలని డిమాండ్ చేశారు. ఈ మేరకు డివిజనల్ చీఫ్ మెకానికల్ ఇంజనీర్ బిజయ్ కుమార్ రాత్‌కు వినతిపత్రం అందజేశారు. రాఖీ పండుగ నేపథ్యంలో సొంతూళ్లకు వెళ్లే వారి సంఖ్య అధికంగా ఉండటంతో రైళ్లలో రద్దీ పెరుగుతుందని తెలిపారు.

Local· 22 Aug 2026

అంతర్ జిల్లాల బైక్ దొంగలు అరెస్ట్

AP: అంతర్‌జిల్లాల్లో వరుసగా బై‌క్‌లను టార్గెట్ చేస్తున్న ఇద్దరు దొంగలను పోలీసులు అరెస్ట్ చేసి, ఏడు బైక్‌లను స్వాధీనం చేసుకున్నారు. గుంటూరు జిల్లా మంగళగిరి రూరల్ పరిధిలోని ఆత్మకూరు, చినకాకాని గ్రామాలతో పాటు తిరుపతి, బాపట్ల, గుంటూరు జిల్లాల్లో వాహనాలను చోరీ చేసిన తెనాలికి చెందిన పార్థసారథి, రవికుమార్‌లను పోలీసులు అదుపులోకి తీసుకున్నారు. వారి నుంచి ఏడు ద్విచక్రవాహనాలను రికవరీ చేసి సీజ్ చేశారు. విచారణలో తెనాలి రూరల్ పరిధిలోని జగ్గడగుంటపాలెంలో ఇంటి దొంగతనాలకు కూడా పాల్పడినట్లు గుర్తించారు.

Local· 22 Aug 2026

పోచమ్మ తల్లికి బోనాలు.. భక్తులతో కిక్కిరిసిన కొందుర్గు

TG: కొందుర్గులో పోచమ్మ తల్లి బోనాల వేడుకలు భక్తిశ్రద్ధలతో ఘనంగా జరిగాయి. రంగారెడ్డి జిల్లా కొందుర్గులో శ్రావణమాసం రెండో శుక్రవారం, వరలక్ష్మి వ్రతాన్ని పురస్కరించుకుని గ్రామ ప్రజలు పోచమ్మ తల్లికి బోనాలు సమర్పించారు. పెద్ద సంఖ్యలో భక్తులు అమ్మవారిని దర్శించుకుని ప్రత్యేక పూజలు నిర్వహించి మొక్కులు చెల్లించుకున్నారు. గ్రామాన్ని సుభిక్షంగా ఉంచాలని, సకాలంలో వర్షాలు కురిసి పాడి పంటలు సమృద్ధిగా పండాలని అమ్మవారిని వేడుకున్నారు. మాజీ ఎమ్మెల్యే అంజయ్య యాదవ్ పాల్గొని అమ్మవారిని దర్శించుకున్నారు.

Local· 22 Aug 2026

ఆస్పత్రి ముందు కుటుంబసభ్యుల ఆందోళన

TG: మూడు నెలల పసికందు మృతి చెందడంతో కుటుంబసభ్యులు ఆస్పత్రి ముందు ఆందోళనకు దిగారు. జోగులాంబ గద్వాల జిల్లా గద్వాల మండలం చేనుగొనిపల్లి గ్రామానికి చెందిన హరీష్, శ్రావణి దంపతుల మూడు నెలల పాపను అనారోగ్యంతో గద్వాలలోని సౌమ్య చిల్డ్రన్స్ హాస్పిటల్‌కు తీసుకెళ్లినట్లు కుటుంబసభ్యులు తెలిపారు. చికిత్స పొందుతున్న సమయంలో పాప మృతి చెందిందని, వైద్యుల నిర్లక్ష్యం కారణంగానే ఈ ఘటన జరిగిందని వారు ఆరోపించారు. పాప మృతిపై తీవ్ర ఆవేదన వ్యక్తం చేస్తూ ఆస్పత్రి ఎదుట ఆందోళన చేపట్టారు.

Local· 22 Aug 2026

రోడ్లపై మురుగునీరు.. గుంతల్లో ప్రయాణం

AP: కాకినాడ జిల్లా రౌతులపూడి గ్రామ పంచాయతీలో పారిశుధ్యం, రోడ్ల నిర్వహణపై స్థానికులు తీవ్ర అసంతృప్తి వ్యక్తం చేస్తున్నారు. గ్రామంలోని పలు ప్రాంతాల్లో చెత్త కుప్పలు పేరుకుపోవడం, డ్రైనేజీలు మూసుకుపోవడంతో మురుగునీరు రోడ్లపై ప్రవహించడం, రోడ్లు గుంతలమయంగా మారడంతో ప్రజలు ఇబ్బందులు పడుతున్నారు. ముఖ్యంగా పాఠశాలల పరిసరాల్లో చెత్త, మురుగు పేరుకుపోవడంపై తల్లిదండ్రులు ఆందోళన వ్యక్తం చేస్తున్నారు. డ్రైనేజీలను ఎప్పటికప్పుడు శుభ్రం చేయాలని, చెత్తను తొలగించాలని, రోడ్లను మెరుగుపరచాలని అధికారులను కోరారు.

Local· 22 Aug 2026

పోలీసు ఇంట్లోనే భారీ చోరీ

AP: పోలీసు ఉద్యోగి ఇంట్లోనే భారీ చోరీ జరగడం కొత్తపేటలో కలకలం రేపింది. కోనసీమ జిల్లా కొత్తపేట మండలంలోని ఆర్‌ఎస్‌ నగర్‌లో ఈ ఘటన చోటుచేసుకుంది. కొత్తపేట డీఎస్పీ కార్యాలయంలో హెడ్ కానిస్టేబుల్‌గా పనిచేస్తున్న వ్యక్తి భార్యతో కలిసి వైద్య చికిత్స కోసం హైదరాబాద్ వెళ్లారు. ఇంటికి తాళం వేసి ఉండటాన్ని గమనించిన గుర్తుతెలియని దుండగులు తాళాలు పగలగొట్టి లోపలికి ప్రవేశించారు. బీరువాను ధ్వంసం చేసి సుమారు 28 తులాల బంగారం, 750 గ్రాముల వెండి ఆభరణాలను అపహరించినట్లు పోలీసులు తెలిపారు.

Local· 22 Aug 2026

మెట్రో డ్రగ్స్ పరిశ్రమ సహకారంతో పిల్లలకు చేయూత

TG: విద్యార్థుల చదువుకు అండగా నిలిచేందుకు మెట్రో డ్రగ్స్ పరిశ్రమ ముందుకు వచ్చింది. సంగారెడ్డి జిల్లా గుమ్మడిదల మున్సిపాలిటీ పరిధిలోని బొంతపల్లి పాఠశాలలో పరిశ్రమ సహకారంతో విద్యార్థులకు యూనిఫాంలు, టై, బెల్టు, షూలు, స్టడీ మెటీరియల్, ఆట పరికరాలను అందించారు. ఈ సందర్భంగా పరిశ్రమ ప్రతినిధి ఉమామహేశ్వర్‌రెడ్డి మాట్లాడుతూ.. విద్యార్థుల విద్యాభివృద్ధికి తమ వంతు సహకారం అందిస్తామని తెలిపారు. పిల్లల చదువుకు అవసరమైన మౌలిక సదుపాయాలు కల్పించడంలో పరిశ్రమలు సామాజిక బాధ్యతతో ముందుకు రావాలని సూచించారు.

Local· 22 Aug 2026

రూపారెడ్డి హత్యపై తీవ్ర ఆగ్రహం.. విద్యార్థి సంఘాల నివాళి

TG: నల్గొండ జిల్లా కొండమల్లేపల్లిలో ప్రైవేట్ స్కూల్ ప్రిన్సిపాల్ కల్లు రూపారెడ్డి హత్యను విద్యార్థి సంఘాల నాయకులు తీవ్రంగా ఖండించారు. గద్వాల పట్టణంలోని చింతలపేట ఎస్సీ, బీసీ, ఆనందనిలయం హాస్టల్ విద్యార్థులతో కలిసి ఆమెకు ఘన నివాళులు అర్పించారు. ఈ సందర్భంగా విద్యార్థి సంఘాల నాయకులు మాట్లాడుతూ.. విద్యార్థులు సెల్‌ఫోన్లు, డ్రగ్స్, మద్యం, డబ్బులకు బానిసలై భవిష్యత్తును నాశనం చేసుకోవద్దని సూచించారు. తల్లిదండ్రులు, గురువులను గౌరవించడం నేర్చుకోవాలని పిలుపునిచ్చారు.

Local· 22 Aug 2026

కాగ్నా బ్రిడ్జి వద్ద దెబ్బతిన్న రహదారిని పరిశీలించిన బుయ్యని

TG: కాగ్నా బ్రిడ్జి వద్ద దెబ్బతిన్న రహదారితో ప్రయాణికులు, వాహనదారులకు ప్రమాదం పొంచి ఉండటంతో సమస్యను త్వరగా పరిష్కరించాలని కాంగ్రెస్ సీనియర్ నాయకులు బుయ్యని శ్రీనివాస్‌రెడ్డి అధికారులను కోరారు. తాండూర్ పట్టణ సమీపంలోని కాగ్నా బ్రిడ్జి వద్ద దెబ్బతిన్న రహదారిని ఆయన పరిశీలించారు. బ్రిడ్జిపై రహదారి పరిస్థితిని పరిశీలించి ప్రమాదాల నివారణకు ఏర్పాటు చేసిన బారికేడ్లు, హెచ్చరిక సూచికలను కూడా తనిఖీ చేశారు. వాహనదారులకు ఎలాంటి ఇబ్బందులు కలగకుండా తక్షణ చర్యలు చేపట్టాలని అధికారులకు సూచించారు.

Local· 22 Aug 2026

పత్తి పంటకు ముప్పు రాకుండా.. రైతులకు కీలక దిశానిర్దేశం

TG: పత్తి పంటలో చీడపీడలను తొలిదశలోనే గుర్తిస్తే నష్టాన్ని నివారించవచ్చని ఏఈఓ శ్రీనివాస్ రైతులకు సూచించారు. మంచిర్యాల జిల్లా భీమిని మండలం చిన్నతిమ్మాపూర్ గ్రామంలో పత్తిపంటను ఆయన పరిశీలించారు. పంట ఎదుగుదల, మొక్కల ఆరోగ్య పరిస్థితిని పరిశీలించి రైతులకు సూచనలు చేశారు. పంటలో చీడపీడల ఉనికిని ఎప్పటికప్పుడు గమనించాలని, తెగుళ్లు లేదా పురుగుల ప్రభావం కనిపించిన వెంటనే వ్యవసాయ అధికారులను సంప్రదించాలని సూచించారు. సమస్యను గుర్తించకుండా సొంతంగా మందులు వినియోగించడం వల్ల పంటకు నష్టం జరిగే అవకాశం ఉందన్నారు.

Local· 22 Aug 2026

కామారెడ్డిలో యువజన కాంగ్రెస్ సమీక్ష సమావేశం

TG: యువజన కాంగ్రెస్‌ను గ్రామస్థాయి నుంచి మరింత బలోపేతం చేయాలని రాష్ట్ర యువజన కాంగ్రెస్ ఇన్‌చార్జ్ ఖలీద్ అహ్మద్ పిలుపునిచ్చారు. కామారెడ్డిలో జిల్లా యువజన కాంగ్రెస్ ఆధ్వర్యంలో నిర్వహించిన సమీక్ష సమావేశంలో ఆయన ముఖ్య అతిథిగా పాల్గొన్నారు. జిల్లా అధ్యక్షుడు మధుసూదన్‌రెడ్డి అధ్యక్షతన జరిగిన సమావేశంలో పార్టీ సంస్థాగత బలోపేతం, సభ్యత్వ నమోదు, ఐవైసీ యాప్‌లో గ్రామ కమిటీల ఏర్పాటు, పార్టీ కార్యక్రమాలను క్షేత్రస్థాయికి తీసుకెళ్లడంపై చర్చించారు.

Local· 22 Aug 2026

పీహెచ్‌సీలో కలెక్టర్ చెక్.. సిబ్బందికి షాక్ ట్రీట్‌మెంట్

TG: మంచిర్యాల జిల్లా దండేపల్లి ప్రభుత్వ ప్రాథమిక ఆరోగ్య కేంద్రంలో వైద్య సేవలపై కలెక్టర్ కుమార్ దీపక్ ఆకస్మికంగా తనిఖీ చేపట్టారు. శుక్రవారం పీహెచ్‌సీని సందర్శించిన ఆయన ఓపీ రిజిస్టర్, వార్డు, ల్యాబ్, మందుల నిల్వలను పరిశీలించారు. ప్రభుత్వ, ప్రైవేట్ ఆసుపత్రుల్లో జరుగుతున్న గర్భిణుల ప్రసవాల వివరాలను వైద్య సిబ్బందిని అడిగి తెలుసుకున్నారు. పీహెచ్‌సీలో వైద్యులు, స్టాఫ్ నర్సులు, ల్యాబ్ టెక్నీషియన్లు సమయపాలన పాటిస్తూ విధులకు తప్పనిసరిగా అందుబాటులో ఉండాలని కలెక్టర్ సూచించారు.

Local· 22 Aug 2026

ఉయ్యూరులో డయేరియా కలకలం... పారాహుషార్

ఉయ్యూరు మున్సిపాలిటీ 5,7 వార్డులో డయేరియా ప్రబలింది. ప్రజలు ఆస్పత్రుల పాలయ్యారు. విషయం తెలుసుకున్న మంత్రి పి.నారాయణ, ఎమ్మెల్యే బోడె ప్రసాద్, మాజీ ఎమ్మెల్సీ రాజేంద్రప్రసాద్ శుక్ర వారం ఆయా ప్రాంతాల్లో పర్యటించారు.బాధితులకు అండగా ఉంటామని భరోసా ఇచ్చారు.అనంతరం ప్రభుత్వ ఆసుపత్రిలో చికిత్స పొందుతున్న రోగులను పరామర్శించారు. డయేరియా వ్యాప్తికి కారణాలు తెలు సుకునేందుకు నీటి నమూనాలను పరీక్షలకు పంపిన ట్లు తెలిపారు. ప్రజలు ఆందోళన చెందవద్దని, అవసరమైన సహాయాన్ని అందిస్తామని చెప్పారు.