TG

TG· 29 Jul 2026

నాలా వరదలో కొట్టుకుపోయిన వృద్ధుడు

TG: హైదరాబాద్ మియాపూర్ వైశాలినగర్ రైల్వే అండర్‌పాస్ సమీపంలో వరద నీటిలో పడి వృద్ధుడు బాలయ్య గల్లంతయ్యారు. హఫీజ్‌పేట్ ప్రేమ్‌నగర్‌కు చెందిన ఆయన ప్రమాదవశాత్తు నాలా వరద ప్రవాహంలో కొట్టుకుపోయినట్లు పోలీసులు గుర్తించారు. భారీ వర్షాల నేపథ్యంలో అండర్‌పాస్ వద్ద నాలా మరమ్మత్తు పనులు జరుగుతుండటంతో ఆ ప్రాంతాన్ని తాత్కాలికంగా మూసివేశారు. సమాచారం అందుకున్న మియాపూర్ పోలీసులు, హైడ్రా, NDRF బృందాలు వెంటనే ఘటనాస్థలానికి చేరుకుని గల్లంతైన వృద్ధుడి కోసం గాలింపు చర్యలు ముమ్మరం చేశాయి.

TG· 29 Jul 2026

ప్రాణాలతో బయటపడ్డ కుటుంబం

TG: మంచిర్యాల జిల్లా కోటపల్లి మండలం ఆలుగామ గ్రామంలో భారీ వర్షానికి ఇంటి పైకప్పు కూలి ఒకే కుటుంబానికి చెందిన నలుగురు గాయపడ్డారు. ఆత్రం మాంతయ్య, భార్య లక్ష్మి, ఇద్దరు పిల్లలు ఇంట్లో నిద్రిస్తున్న సమయంలో తెల్లవారుజామున రేకుల పైకప్పు ఒక్కసారిగా కూలిపోయింది. ఘటనలో లక్ష్మికి తీవ్ర గాయాలు కాగా, మిగిలిన ముగ్గురికి స్వల్ప గాయాలయ్యాయి. సమాచారం అందుకున్న 108 అంబులెన్స్ సిబ్బంది క్షతగాత్రులను ప్రభుత్వ ఆస్పత్రికి తరలించి చికిత్స అందించారు. భారీ వర్షాల నేపథ్యంలో ప్రజలు అప్రమత్తంగా ఉండాలని అధికారులు సూచించారు.

TG· 29 Jul 2026

పూజలు చేస్తామని నమ్మించి వెండి కడియాలతో పరార్

పూజల పేరుతో ఇంట్లోకి ప్రవేశించిన ఇద్దరు మహిళలు వెండి కడియాలు చోరీచేసిన ఘటన నిర్మల్ జిల్లా భైంసా మండలంలో జరిగింది. కోతుల్గావ్ గ్రామానికి చెందిన రైతు దత్తాత్రి ఇంట్లో ఆయన లేని సమయంలో అతని భార్య కవిత వద్దకు శాంతాబాయి, సాయవ్వ అనే మహిళలు ఆరోగ్య సమస్యలు తొలగించే పూజ చేస్తామని నమ్మించి లోపలికి వెళ్లారు. పూజ చేస్తున్న సమయంలో రైతు ఇంటికి రావడంతో వారిని బయటకు పంపించాడు. దేవుడి గదిలో పరిశీలించగా 5 తులాల రెండు వెండి కడియాలు కనిపించపోవడంతో పోలీసులకు ఫిర్యాదు చేశాడు. ఇద్దరు మహిళలను అరెస్ట్ చేశారు.

TG· 29 Jul 2026

ఉప్పొంగిన వాగు.. విద్యార్థుల ప్రాణాలు అరచేతిలో

TG: ఆదిలాబాద్ జిల్లా ఉట్నూర్ మండలంలోని నర్సాపూర్ (జే) గిరిజన గ్రామంలో భారీ వర్షాల కారణంగా వాగు ఉప్పొంగడంతో విద్యార్థులు, గ్రామస్తులు తీవ్ర ఇబ్బందులు ఎదుర్కొన్నారు. పాఠశాల ముగించుకుని ఇంటికి వెళ్తున్న చిన్నారులు వాగు దాటలేక ఒడ్డునే చిక్కుకుపోయారు. కొంతసేపటి తర్వాత నీటి ప్రవాహం తగ్గడంతో గ్రామస్తులు ఒక్కొక్కరిని సురక్షితంగా వాగు దాటించారు. ప్రతి వర్షాకాలంలో ఇదే పరిస్థితి నెలకొంటున్నా అధికారులు, ప్రజాప్రతినిధులు శాశ్వత పరిష్కారం చూపడం లేదని వారు ఆవేదన వ్యక్తం చేశారు.

TG· 29 Jul 2026

రీ సర్వేతో భూవివాదాలకు చెక్

తెలంగాణలో భూవివాదాలకు శాశ్వత పరిష్కారం చూపడమే రీ సర్వే ప్రధాన లక్ష్యమని రాష్ట్ర రెవెన్యూ మంత్రి పొంగులేటి శ్రీనివాసరెడ్డి తెలిపారు. తొలి దశలో 2,240 గ్రామాల్లో రీ సర్వే కొనసాగుతోందని, ప్రజల్లో అవగాహన పెంచేందుకు గ్రామసభలు నిర్వహించాలని అధికారులకు ఆదేశించారు. ప్రతి గ్రామంలో అధికారులు అందుబాటులో ఉండి సందేహాలు నివృత్తి చేయాలని, కలెక్టర్లు వారానికోసారి పురోగతిని సమీక్షించాలని సూచించారు. అత్యాధునిక సాంకేతికతతో ప్రతి భూమికి కచ్చితమైన హద్దులు గుర్తించి ప్రత్యేక భూదార్ నంబర్ కేటాయిస్తామని చెప్పారు.

TG· 29 Jul 2026

హైడ్రా ఆగదు.. కబ్జాదారుల ఆటలు ఇక సాగవు

TG: హైడ్రా కమిషనర్ AV.రంగనాథ్‌ను పదవి నుంచి తొలగించాలని తెలంగాణ హైకోర్టు ఆదేశించిన నేపథ్యంలో CM రేవంత్ రెడ్డి స్పందించారు. హైడ్రా పనులు ఎట్టి పరిస్థితుల్లోనూ ఆగవని, ఆక్రమణదారులు ఎంత పెద్దవారైనా ఉపేక్షించబోమని స్పష్టం చేశారు. గండిపేట బతుకమ్మ కుంట, N కన్వెన్షన్ వంటి ఆక్రమణలను ప్రస్తావిస్తూ విపక్షాలపై విమర్శలు గుప్పించారు. HYDRAA తమ ప్రభుత్వం తీసుకొచ్చిన అతిపెద్ద సంస్కరణ అని పేర్కొన్నారు. కోర్టు తీర్పును అధ్యయనం చేసి తదుపరి చర్యలు తీసుకుంటామని తెలిపారు.

TG· 28 Jul 2026

కోట్ల విలువైన భూమి..ప్రైవేటు సంస్థకు ధారాదత్తం

TG: కోట్ల విలువ చేసే భూమిని తక్కువ ఫీజుతో ఎన్‌ఎస్ ఇన్‌ఫ్రా కన్‌స్ట్రక్షన్స్ సంస్థకు లీజుకు కేటాయిస్తూ ప్రభుత్వం జీవో ఇవ్వడం కలకలంగా మారింది. రంగారెడ్డి జిల్లా శేరిలింగంపల్లి మండలం దర్గా హుస్సేన్ షా వలి గ్రామంలో 1.04 ఎకరాల ఉర్దూ అకాడమీ భూమిని ఆ సంస్థకు 30 ఏళ్ల పాటు లీజుకు ఇస్తూ జీవో జారీ చేశారు. ఏడాదికి రూ.5,220 ఫీజుకే, ఎలాంటి పబ్లిక్ నోటీసులు లేకుండా ఇలా లీజు ఇవ్వడమేంటని స్థానికులు ఆగ్రహం వ్యక్తం చేస్తున్నారు.

TG· 26 Jul 2026

జల దోపిడీ ఆపకపోతే పోరాటమే

తెలంగాణకు రావాల్సిన కృష్ణా, తుంగభద్ర నది జలాలను కర్ణాటక, ఆంధ్రప్రదేశ్ ప్రభుత్వాలు అడ్డుకుంటున్నాయని మాజీ మంత్రులు వీ.శ్రీనివాస్ గౌడ్, సీ.లక్ష్మారెడ్డి తీవ్ర ఆరోపణలు చేశారు. MLC నవీన్ రెడ్డి, మాజీ MLAలతో కలిసి కర్ణాటకలోని భీమా ప్రాజెక్టు, గూడూరు బ్యారేజీని పరిశీలించిన అనంతరం మాట్లాడారు. ఎక్కడికక్కడ బ్యారేజీలు, రిజర్వాయర్లు నిర్మించి తెలంగాణ వాటా నీటిని నిలిపేస్తున్నారని విమర్శించారు. దీనివల్ల ఉమ్మడి మహబూబ్‌నగర్ జిల్లా ఎడారిగా మారే ప్రమాదం ఉందని ఆందోళన వ్యక్తం చేశారు.

TG· 26 Jul 2026

మా బాధ ఇంకెవరికీ రాకూడదు

TG: నీట్ పేపర్ లీక్ ఘటనలో ఆత్మహత్య చేసుకున్న హైదరాబాద్‌కు చెందిన విద్యార్థిని షేక్ సనా తల్లిదండ్రులు భావోద్వేగానికి గురయ్యారు. కేంద్ర విద్యాశాఖ మంత్రి ధర్మేంద్ర ప్రధాన్ రాజీనామా స్వాగతించదగ్గదే అయినా, తమ కుమార్తెను తిరిగి తీసుకురాలేదని ఆవేదన వ్యక్తం చేశారు. ఇలాంటి ఘటనలు మళ్లీ జరగకుండా ప్రభుత్వాలు కఠిన సంస్కరణలు తీసుకురావాలని డిమాండ్ చేశారు. తమ కష్టం మరే కుటుంబానికీ రాకూడదనే ఉద్దేశంతోనే విద్యార్థుల ఉద్యమానికి మద్దతుగా ఢిల్లీలో నిరసనల్లో పాల్గొన్నామని చెప్పారు.

▶

TG· 26 Jul 2026

క్రాకర్స్ షోకు ఊహించని స్పందన

TG: హైదరాబాద్ నెక్లెస్‌ రోడ్‌లో క్రాకర్స్ డీలర్స్ అసోసియేషన్ శతాబ్ది ఉత్సవాల సందర్భంగా నిర్వహించిన భారీ క్రాకర్స్ షో విజయవంతంగా జరిగింది. దేశంలోనే అతిపెద్ద బాణాసంచా ప్రదర్శనను తిలకించేందుకు సుమారు 2లక్షల మంది తరలివచ్చినట్లు నిర్వాహకులు తెలిపారు. రంగురంగుల బాణాసంచా ఆకాశాన్ని అలంకరించి ప్రేక్షకులను ఆకట్టుకుంది. ఇదే సమయంలో సెక్రటేరియట్ సమీపంలో విద్యార్థులకు మద్దతుగా క్యాండిల్ ర్యాలీ కూడా జరగడంతో నెక్లెస్ రోడ్, ట్యాంక్‌బండ్, ఖైరతాబాద్, సికింద్రాబాద్ తదితర ప్రాంతాల్లో భారీగా ట్రాఫిక్ జామ్‌ అయింది.

TG· 26 Jul 2026

చితి మంటలు ఆరకముందే బూడిదను తవ్విన దుండగులు

TG: జగిత్యాల జిల్లా మల్యాల మండలంలో అమానుష ఘటన వెలుగుచూసింది. ఓ మహిళ అంత్యక్రియలు ముగిసి కుటుంబసభ్యులు వెళ్లిన వెంటనే ఇద్దరు దుండగులు చితిపై నీళ్లు చల్లి మంటలను ఆర్పి బూడిదను సంచుల్లో నింపి తీసుకెళ్లారు. స్థానికులు గమనించి వెంటపడటంతో వారు బూడిదను వదిలేసి పరారయ్యారు. మహిళలు చనిపోతే ఆనవాయితీగా వారి మెడలో ధరించే నల్లపూసల ఆభరణం నుంచి ఓ బంగారు గుండు తీసి మృతురాలి నోట్లో పెట్టి చితికి నిప్పంటిస్తారు. సుమారు రూ.10వేల విలువైన బంగారు గుండు కోసం చితి బూడిదను తవ్వడం స్థానికులను కలచివేసింది.

TG· 26 Jul 2026

క్షణాల్లో అగ్నికి ఆహుతైన దుకాణాలు

TG: నల్గొండ జిల్లా నార్కట్‌పల్లి మండలంలోని పుణ్యక్షేత్రం చెర్వుగట్టు గుట్టకింద అర్ధరాత్రి భారీ అగ్నిప్రమాదం జరిగింది. బొమ్మల దుకాణంలో మంటలు చెలరేగడంతో 17 దుకాణాలు, 15 తోపుడు బండ్లు పూర్తిగా దగ్ధమయ్యాయి. రెండు గ్యాస్ సిలిండర్లు పేలడంతో మంటలు మరింత ఉద్ధృతమయ్యాయి. గ్రామపంచాయతీ కార్యాలయానికీ మంటలు వ్యాపించి కీలక దస్త్రాలు కాలిపోయాయి. అగ్నిమాపక సిబ్బంది మంటలను అదుపులోకి తెచ్చారు. సుమారు రూ.2.5 కోట్ల ఆస్తినష్టం జరిగినట్లు అధికారులు తెలిపారు. దుకాణాల్లో ఎవరూ లేకపోవడంతో ప్రాణనష్టం తప్పింది.

TG· 26 Jul 2026

21ఏళ్లు నిండితే ఎన్నికల్లో పోటీ.. CM సంచలన ప్రకటన

TG: 21 ఏళ్లు నిండిన యువతకు MLA, MPగా పోటీ చేసే అవకాశం కల్పించేందుకు రాజ్యాంగ సవరణ కోరుతూ తెలంగాణ అసెంబ్లీలో తీర్మానం చేస్తామని CM రేవంత్ రెడ్డి ప్రకటించారు. ఢిల్లీలో విద్యార్థులపై జరిగిన దాడికి నిరసనగా శనివారం రాత్రి HYDలో నిర్వహించిన సంఘీభావ కొవ్వొత్తుల ర్యాలీలో ఆయన పాల్గొన్నారు. ఆగస్టు తొలి వారంలో అసెంబ్లీలో చర్చించి తీర్మానాన్ని కేంద్రానికి పంపనున్నట్లు తెలిపారు. 30 శాతం యువ జనాభాకు అవకాశం దక్కితే దేశ భవిష్యత్ మరింత బలోపేతమవుతుందని, కీలక శాఖల్లో యువత మంత్రులైతే ప్రపంచంతో పోటీ పడగలమన్నారు.

TG· 25 Jul 2026

సికింద్రాబాద్ గార్డెన్ రెస్టారెంట్‌లో పరిశుభ్రత లోపాలు

TG: తెలంగాణ ఫుడ్ సేఫ్టీ ఫ్లయింగ్ స్క్వాడ్ సికింద్రాబాద్‌లోని గార్డెన్ రెస్టారెంట్‌ను చెక్ చేశారు. ఆ రెస్టారెంట్‌లో ఆహార భద్రత, పరిశుభ్రత లోపాలను గుర్తించింది. అపరిశుభ్రమైన వంటశాల, ఈగల బెడద, నిబంధనలకు విరుద్ధంగా ఆహార నిల్వ, పెస్ట్ కంట్రోల్ రికార్డులు లేవని అధికారులు గుర్తించారు. ఫుడ్ సేఫ్టీ అండ్ స్టాండర్డ్స్ చట్టం–2006 ప్రకారం చర్యలు చేపట్టినట్లు ఫుడ్ సేఫ్టీ శాఖ తెలిపింది.

▶

TG· 25 Jul 2026

విద్యార్థులు సాధించిన గొప్ప విజయం: మహేష్ కుమార్ గౌడ్

TG: సెంట్రల్ మినిస్టర్ ధర్మేంద్ర ప్రధాన్ రాజీనామా చేయడం విద్యార్థులు సాధించిన గొప్ప విజయమని టీపీసీసీ అధ్యక్షుడు మహేష్ కుమార్ గౌడ్ అన్నారు. రాహుల్ గాంధీ నేతృత్వంలో కాంగ్రెస్ పార్టీతోపాటు ఇతర విపక్షాలు చేసిన పోరాటం ఫలితంగానే ఆయన రాజీనామా చేశారని గౌడ్ అన్నారు.

TG· 25 Jul 2026

తహసీల్దార్ కార్యాలయం ముట్టడి

TG: రంగారెడ్డి జిల్లా యాచారం మండలంలోని మొండి గౌరెల్లి గ్రామంలో అసైన్డ్ భూముల సేకరణపై రైతులు ఆందోళన చేపట్టారు. తహసీల్దార్ కార్యాలయం ఎదుట గ్రామ సర్పంచ్ కొలన్ రమాదేవి నేతృత్వంలో ధర్నా నిర్వహించారు. 677 ఎకరాలకు సర్వే చేసిన అధికారులు భూపరిహారంపై స్పష్టత ఇవ్వడం లేదని ఫైరయ్యారు. రైతులకు ఇచ్చిన హామీలను నెరవేర్చకుండా నకిలీలను ఏరి వేయకుండా అధికారులు ముందుకు వెళుతున్నారని ఆరోపించారు. నకిలీ లబ్ధిదారులను తొలగించి, భూ నష్టపరిహారంపై స్పష్టత ఇవ్వాలని డిమాండ్ చేశారు.

TG· 25 Jul 2026

రేపు ‘బాలా’ సాహిత్య సమావేశం

TG: తిరుపతికి చెందిన ప్రచురణ సంస్థ ‘బాలా బుక్స్’ ఆధ్వర్యంలో రేపు మధ్యాహ్నం 2 గంటల నుంచి రాత్రి 9 గంటల వరకూ సాహిత్య సమావేశం నిర్వహించనున్నారు. హైదరాబాద్ నగరం బషీర్‌బాఘ్ ప్రెస్‌క్లబ్‌లో జరగబోయే ఈ సమావేశంలో పాల్గొంటున్న రచయితలు, అనువాదకులు, ప్రచురణకర్తలు పాల్గొంటున్నారు. వివిధ సెషన్లలో వారంతా మాట్లాడతారు.

TG· 25 Jul 2026

గూడ్స్ వాహనం బోల్తా.. చెల్లాచెదురైన సరుకు

TG: నల్గొండ జిల్లా చిట్యాల పట్టణంలోని హైదరాబాద్–విజయవాడ నేషనల్ హైవేపై ఘోర రోడ్డు ప్రమాదం తృటిలో తప్పింది. హైదరాబాద్ నుంచి పెయింట్ డబ్బాలు, లప్పం బ్యాగులతో విజయవాడ వైపు వెళ్తున్న మినీ గూడ్స్ వాహనం రోడ్డు పక్కన ఆగి ఉన్న కంటైనర్‌ను వెనుక నుంచి బలంగా ఢీకొట్టింది. దీంతో వాహనం బోల్తాపడి సరుకు మొత్తం రోడ్డుపై చెల్లాచెదురైంది. కొంతసేపు హైవేపై ట్రాఫిక్‌కు అంతరాయం ఏర్పడింది. ఈ ప్రమాదంలో డ్రైవర్‌కు స్వల్ప గాయాలే కావడంతో పెను ప్రమాదం తప్పింది. ఘటనపై పోలీసులు కేసు నమోదు చేసి దర్యాప్తు చేస్తున్నారు.