Crime

Crime· 17 Aug 2026

పోలీసుల కారులో గంజాయి?

AP: అద్దంకి సమీపంలో బల్లికురవ ఎస్సై నాగరాజు, సంతమాగులూరు ఎస్సై నాగమల్లేశ్వరరావు ప్రయాణిస్తున్న పోలీసుల కారు ఆటోను ఢీకొట్టింది. పోలీసుల కారులోని డిక్కీలో గంజాయి ఉన్నట్లు స్థానికులు గుర్తించినట్లు సమాచారం. విషయం తెలుసుకున్న అద్దంకి సీఐ ఘటనాస్థలికి చేరుకున్నారు. స్థానికులు, పోలీసుల మధ్య వాగ్వాదం జరగడంతో కొద్దిసేపు ఉద్రిక్త నెలకొంది.

Crime· 17 Aug 2026

ఈ నెలలో రిటైర్మెంట్.. అంతలోనే ఇంట్లో దారుణం

TG: సిద్దిపేట జిల్లా హుస్నాబాద్‌లోని హనుమాన్‌నగర్‌లో భార్య రాజమణి, భర్త వెంకటేశంను రోకలిబండతో కొట్టి హత్య చేసినట్లు పోలీసులు తెలిపారు. వెంకటేశం ఆసిఫాబాద్‌లో కమర్షియల్ ట్యాక్స్ అధికారిగా విధులు నిర్వహిస్తున్నారు. ఆయన భార్య రాజమణి సీనియర్ ANMగా పనిచేస్తున్నారు. ఈ నెలలో వెంకటేశం పదవీ విరమణ చేయాల్సి ఉంది. రిటైర్మెంట్ అనంతరం వచ్చే డబ్బులు, ఆస్తి విషయంపై ఇద్దరి మధ్య గత కొంతకాలంగా గొడవలు జరుగుతున్నాయి.. పోలీసులు రాజమణిని అదుపులోకి తీసుకున్నారు. కేసు నమోదు చేసి దర్యాప్తు చేపట్టారు.

Crime· 16 Aug 2026

అప్పులు తీర్చలేక దొంగతనాల బాట

TG: కామారెడ్డిలో భారీ చోరీ కేసును పోలీసులు ఛేదించారు. విద్యుత్‌నగర్‌ కాలనీలో నివాసముంటున్న మామిండ్ల లావణ్య ఇంట్లో ఈ నెల 7న దొంగతనం జరిగింది. దుండగుడు 16 తులాల బంగారం, 30 తులాల వెండి ఆభరణాలతో పాటు రూ.90వేల నగదును అపహరించాడు. కేసు దర్యాప్తు చేపట్టిన పోలీసుల తనిఖీల్లో అనుమానాస్పదంగా పారిపోతున్న వ్యక్తిని పట్టుకున్నారు. విచారణలో అతడు దేవునిపల్లికి చెందిన వడ్ల శ్రీనివాస్‌గా గుర్తించారు. అప్పులు తీర్చేందుకు దొంగతనాలకు పాల్పడినట్లు నిందితుడు అంగీకరించినట్లు తెలిపారు. నిందితుడిని రిమాండ్‌కు తరలించారు.

Crime· 16 Aug 2026

నిద్రిస్తున్న అన్నపై తమ్ముడి దాడి

AP: కడప జిల్లా బ్రహ్మంగారిమఠం మండలం కొత్తూరుకు చెందిన వజ్రాల సుబ్బరాయుడుకు ఇద్దరు కుమారులు. పెద్ద కుమారుడు వెంకటసుబ్బయ్య, చిన్న కుమారుడు సురేష్. ఇద్దరూ మద్యానికి బానిస కావడంతో ఇద్దరు భార్యలు వదిలివేశారు. వెంకటసుబ్బయ్య ఇంట్లో నిద్రిస్తుండగా, మద్యం మత్తులో ఉన్న సురేష్‌ గొడ్డలితో అతడి తలపై దాడిచేశాడు. అనంతరం బయటకు వెళ్లి కొద్దిసేపటి తర్వాత తిరిగి వచ్చి మరోసారి దాడి చేయడంతో తీవ్ర గాయాలతో వెంకటసుబ్బయ్య మృతి చెందాడు. SI శివప్రసాద్‌ ఘటన స్థలానికి చేరుకుని కేసు నమోదు చేసి దర్యాప్తు చేస్తున్నారు.

Crime· 16 Aug 2026

రోడ్డు ప్రమాదం కాదు.. పక్కా హత్యే

AP: కడప జిల్లా టి.సుండుపల్లి మండలం చిన్నగొల్లపల్లి వద్ద జూలై 22న జరిగిన జయరాం(44), రవీంద్ర (45) మృతిపై పోలీసులు లోతుగా దర్యాప్తు చేపట్టారు. తొలుత గుర్తుతెలియని వాహనం ఢీకొట్టడంతో మృతి చెందినట్లు కేసు నమోదు చేశారు. సాంకేతిక ఆధారాలతో దర్యాప్తు చేయగా ఇంటి స్థల వివాదమే హత్యలకు కారణమని తేలింది. ప్లాన్ ప్రకారం ఇద్దరినీ ట్రాలీ ఆటోతో ఢీకొట్టి హత్య చేసినట్లు పోలీసులు గుర్తించారు. ఇద్దరు నిందితులు శివప్రసాద్, శరణ్ రాజ్‌లను అరెస్ట్ చేయగా, మరో ఇద్దరు పరారీలో ఉన్నట్లు తెలిపారు.

Crime· 16 Aug 2026

APK ఫైల్‌తో సైబర్‌ మోసం

TG: వాట్సాప్‌లో వచ్చిన ఓ అపరిచిత APK ఫైల్‌ను క్లిక్ చేయడంతో జగిత్యాలలో ఓ వ్యక్తి ఖాతా నుంచి రూ.4.15 లక్షలు మాయం అయ్యాయి. జగిత్యాల పట్టణంలోని వాణీనగర్‌కు చెందిన ఎలిగేటి అశోక్‌కు ఇటీవల గుర్తుతెలియని APK ఫైల్ వాట్సాప్‌లో వచ్చింది. దానిని ఓపెన్ చేసిన కొద్దిసేపటికే ఆయన బ్యాంకు ఖాతా నుంచి విడతల వారీగా నగదు డ్రా అయినట్లు మెసేజ్‌లు వచ్చాయి. దీంతో సైబర్ మోసానికి గురైనట్లు గుర్తించి పోలీసులకు ఫిర్యాదు చేశారు. కేసు నమోదు చేసిన సైబర్ క్రైమ్ పోలీసులు దర్యాప్తు చేస్తున్నారు.

Crime· 15 Aug 2026

Terror Groupతో సంబంధం..బెంగాల్ యువకుడి అరెస్ట్

అఫ్గానిస్థాన్ కేంద్రంగా నడుస్తున్న‌ Terror Groupతో సంబంధం ఉన్న అసఫూల్ మాలిక్‌ అనే యువకుణ్ని బెంగళూరు పోలీసులు అరెస్ట్‌ చేశారు. అతనిది పశ్చిమబెంగాల్‌. అతను ఏడాదిగా బెంగళూరులోని జిగాని ప్రాంతంలోని ఓ టెక్‌ కంపెనీలో సెక్యూరిటీగార్డుగా పని చేస్తున్నాడు. తెహ్రీక్-ఎ-తాలిబన్ పాకిస్థాన్(TTP) సభ్యుడితో కలిసి ఆ సంస్థలో చేరడానికి అతను ట్రై చేస్తున్నట్లు గుర్తించారు. అనుమానాస్పద ఆన్‌లైన్ కార్యకలాపాలపై వివరాలు అందడంతో అతడిని అరెస్ట్‌ చేసినట్లు తెలిపారు.

Crime· 15 Aug 2026

స్నాప్‌చాట్‌లో పరిచయం.. ఖరీదైన కార్లతో గాలం

TG: ఖరీదైన కార్లు, లగ్జరీ దుస్తులతో సోషల్ మీడియాలో ఫొటోలు పెట్టి మహిళలను ఆకర్షించి మోసాలకు పాల్పడుతున్న ఇద్దరిని హైదరాబాద్‌లో పోలీసులు అరెస్ట్ చేశారు. సంగారెడ్డికి చెందిన సాగర్ చౌదరి అలియాస్ సాయిసునీల్, శివాంగుల భరత్‌కుమార్ స్నాప్‌చాట్ ద్వారా మహిళలకు పరిచయమై వారిని నమ్మించి బంగారు ఆభరణాలను చోరీ చేసినట్లు పోలీసులు తెలిపారు. ఇప్పటివరకు 20మంది మహిళలను మోసం చేసి 40తులాల బంగారం అపహరించినట్లు దర్యాప్తులో వెల్లడైంది. ఆభరణాలను నగల దుకాణాల్లో విక్రయించి సొమ్ము చేసుకున్నట్లు గుర్తించారు.

Crime· 15 Aug 2026

పూజారి బాగోతం బట్టబయలు

TG: సంగారెడ్డి జిల్లా రామచంద్రాపురంలోని ఓ ఆలయంలో మైనర్‌ బాలికపై లైంగిక దాడి ఘటన తీవ్ర కలకలం రేపింది. ఆలయ ప్రాంగణంలో బాలికతో ఓ వృద్ధుడు అసభ్యకరంగా ప్రవర్తిస్తున్న విషయాన్ని స్థానికులు గుర్తించారు. ఆలయానికి బయట నుంచి తాళం వేసి ఉండగా, లోపల బాలికతో అనుచితంగా ప్రవర్తిస్తున్న వ్యక్తిని స్థానికులు పట్టుకున్నారు. అతడు ఆలయంలో అర్చకుడిగా పనిచేస్తున్న సాయన్నగా గుర్తించారు. వెంటనే పోలీసులకు సమాచారం అందించడంతో పోలీసులు అక్కడికి చేరుకుని కేసు నమోదు చేసి దర్యాప్తు ప్రారంభించారు.

Crime· 15 Aug 2026

దొంగిలించిన చీరే దొంగలను పట్టించింది

TG: రంగారెడ్డి జిల్లా బండ్లగూడ జాగీర్‌లోని వినాయకనగర్‌లో యాదయ్య ఇంట్లో 2023లో రూ.2.50 లక్షల నగదు, 9తులాల బంగారం, చీరలు చోరీ అయ్యాయి. కేసు నమోదైనా నిందితు ఆచూకీ లభించలేదు. ఇటీవల యాదయ్య భార్య ఓ ఫంక్షన్‌కు వెళ్లగా, ఇంటి వెనుక నివసించే స్వప్న అనే మహిళ కట్టుకున్న చీరను గుర్తించారు. అది తన ఇంట్లో చోరీకి గురైన చీరగా పోలీసులకు సమాచారం ఇచ్చారు. పోలీసులు స్వప్న, ఆమె భర్త రాములును అదుపులోకి తీసుకుని విచారిస్తే, మూడేళ్ల క్రితం మేమే దొంగతనం చేశాం అని ఒప్పుకున్నారు. ఆ దంపతుల్ని అరెస్ట్ చేశారు.

Crime· 15 Aug 2026

గుప్తనిధుల కోసం క్షుద్రపూజలు.. అడ్డొచ్చాడని దాడి

AP: కడప జిల్లా వల్లూరులో క్షుద్రపూజలకు అడ్డుపడుతున్నాడనే కారణంతో బీటెక్ విద్యార్థిని కిడ్నాప్ చేసి హత్య చేసేందుకు ప్రయత్నించిన ఘటన కలకలం రేపింది. ఈ కేసులో ముగ్గురు నిందితులను వల్లూరు పోలీసులు అరెస్ట్ చేశారు. పులిచెర్లకు చెందిన విజయ్‌కుమార్, చిత్తూరుకు చెందిన హేమంత్, సుబ్రహ్మణ్యం గుప్తనిధుల కోసం క్షుద్రపూజలు చేసేందుకు ఓ బాలికను డబ్బు ఆశచూపి నగ్న పూజలకు ఉపయోగించినట్లు పోలీసులు తెలిపారు. అనంతరం పూజలకు అడ్డుగా ఉన్న నాగసాయి ప్రణవ్‌ను కిడ్నాప్ చేసేందుకు ప్రయత్నించి, విఫలమై వేటకత్తితో దాడిచేశారన్నారు.

Crime· 14 Aug 2026

'వర్క్ ఫ్రమ్ హోమ్' సైబర్ దందా గుట్టురట్టు

చైనాతో లింకులున్న 'వర్క్ ఫ్రమ్ హోమ్' సైబర్ దందాను డిల్లీ పోలీసులు క్రాక్ చేశారు. జాబ్స్ పేరుతో రూ. 12 లక్షలు కాజేసిన నలుగురు నిందితులను అరెస్ట్ చేశారు. టెలిగ్రామ్ ద్వారా చైనాకు చెందిన నేరస్థులతో సంబంధాలు పెంచుకున్న యువకులు మ్యూల్ బ్యాంక్ అకౌంట్స్ ద్వారా డబ్బును 'USDT' క్రిప్టోకరెన్సీ రూపంలోకి మారుస్తున్నట్టు గుర్తించారు. ఈ డబ్బును చైనాకు ట్రాన్స్‌ఫర్ చేస్తున్నట్టు తెలుసుకున్నారు. గురుగ్రామ్, గాజియాబాద్, నోయిడా, ఇటావాలో దాడులు చేసి వాళ్లను అరెస్ట్ చేశారు.

Crime· 14 Aug 2026

ఆన్‌లైన్ గేమింగ్ మోజు..తండ్రినే మోసం చేసిన కొడుకు

ఒకే కొడుకు కావడంతో గారాబంగా పెరిగాడు. ఆన్‌లైన్ గేమింగ్‌కు అలవాటు పడ్డాడు. అందుకోసం చేసిన అప్పులు తీర్చేందుకు యూపీకి చెందిన 11వ తరగతి విద్యార్థి కిడ్నాపింగ్ డ్రామా ఆడాడు. ఢిల్లీలో ఉన్న తన లవర్ సాయంతో తను గాయపడినట్టు AIతో ఫోటో తయారు చేసి తండ్రికి పంపాడు. ఫ్రెండ్స్ సాయంతో కిడ్నాపర్లు రూ.లక్ష కావాలని డిమాండ్ చేస్తున్నారని చెప్పాడు. ఆయన పోలీసులకు చెప్పడంతో వాళ్ల విచారణలో అసలు నిజం వెలుగులోకి వచ్చింది.

Crime· 14 Aug 2026

రిపోర్టర్లుగా పరిచయం.. టార్గెట్ చేసి డబ్బులు డిమాండ్‌

TG: కామారెడ్డి శిరీష ఆత్మహత్య కేసులో ఇద్దరు నకిలీ రిపోర్టర్లను పోలీసులు అరెస్ట్ చేసి రిమాండ్‌కు తరలించారు. ఇందూరి సిద్ధాగౌడ్‌, లాండే భాస్కర్‌ ప్రభుత్వ ఉద్యోగుల వ్యక్తిగత, ఉద్యోగ వివరాలను RTI ద్వారా సేకరించి, వాటిని ఆధారంగా చేసుకుని బెదిరింపులకు పాల్పడుతూ డబ్బులు డిమాండ్ చేసినట్లు పోలీసులు తెలిపారు. శిరీషను కూడా ఉద్యోగం పోయేలా చేస్తామని బెదిరించి మానసికంగా వేధించినట్లు దర్యాప్తులో ఆధారాలు లభించాయని కామారెడ్డి DSP మధుసూదన్ వెల్లడించారు.

Crime· 14 Aug 2026

భార్యాభర్తల హత్య వెనుక ఇద్దరు కానిస్టేబుళ్లు

TG: సూర్యాపేట జిల్లా మోతె మండలంలో భార్యాభర్తలు బూబా, నాగులు హత్య కేసులో సంచలన విషయాలు వెలుగులోకి వచ్చాయి. ఘటనలో మోతె PSకు చెందిన ఇద్దరు కానిస్టేబుళ్లు షరీఫ్‌, సుందరయ్యల ప్రమేయం ఉన్నట్లు పోలీసుల దర్యాప్తులో తేలింది. బూబాతో షరీఫ్‌కు వివాహేతర సంబంధం ఉండడంతో ఆమె కుమార్తె వివాహానికి షరీఫ్ రూ.3లక్షలు అప్పుగా ఇచ్చినట్లు పోలీసులు తెలిపారు. ఆమె డబ్బులు తిరిగి ఇవ్వకపోవడం, తమ సంబంధాన్ని బయటపెడతానని బూబా బెదిరించింది. దీంతో షరీఫ్, సుందరయ్య భార్యాభర్తలపై రాడ్‌‌తో దాడిచేసి హత్య చేసినట్లు పేర్కొన్నారు.

Crime· 14 Aug 2026

పింఛన్‌ కోసం బతికున్న భర్తను చంపేసింది

AP: వితంతు పింఛన్‌ పొందాలన్న ఆశతో బతికున్న భర్తను చనిపోయినట్లు చూపించి మరణ ధ్రువపత్రం పొందిన ఘటన కృష్ణా జిల్లా పెనమలూరులో వెలుగుచూసింది. కానూరు శివాలయం రోడ్డుకు చెందిన యర్రంశెట్టి రమాదేవి తన భర్త మురళీకృష్ణ మృతిచెందినట్లు తాడిగడప మున్సిపల్ అధికారులకు తప్పుడు సమాచారం ఇచ్చి మరణ ధ్రువపత్రం పొందినట్లు అధికారులు గుర్తించారు. ఈ విషయం ఇటీవల భర్తకు తెలియడంతో విచారణ చేపట్టారు. రమాదేవి తన తప్పును అంగీకరించినట్లు కమిషనర్‌ నజీర్ పేర్కొన్నారు. ఆమెపై కేసు నమోదు చేయాలని కమిషనర్ పోలీసులకు ఫిర్యాదు చేశారు.

Crime· 14 Aug 2026

CAను బురిడీ కొట్టించిన సైబర్‌ కేటుగాళ్లు

TG: ట్రేడింగ్‌లో భారీ లాభాల ఆశచూపి రంగారెడ్డి జిల్లాలోని గండిపేటకు చెందిన చార్టర్డ్‌ అకౌంటెంట్‌ నరసింహారెడ్డిని సైబర్‌ నేరగాళ్లు భారీగా మోసం చేశారు. ఈమెయిల్‌, టెలిగ్రామ్‌ ద్వారా పరిచయమైన మోసగాళ్లు ప్రత్యేక ట్రేడింగ్‌ యాప్‌ను డౌన్‌లోడ్‌ చేయించి మొదట రూ.2లక్షలు పెట్టుబడి పెట్టించారు. 12రోజుల్లో 52విడతల్లో బాధితుడి నుంచి ఏకంగా రూ.2.45 కోట్లు పెట్టుబడిగా తీసుకున్నారు. డబ్బులు విత్‌డ్రా చేసేందుకు ప్రయత్నించగా సాధ్యపడలేదు. నిందితులు స్పందించక పోవడంతో బాధితుడు పోలీసులను ఆశ్రయించాడు.

Crime· 14 Aug 2026

డెలివరీ బాయ్స్‌ మధ్య వివాదం.. ఒకరు మృతి

TG: హైదరాబాద్‌ శివారు నార్సింగిలో డెలివరీ బాయ్స్‌ మధ్య జరిగిన ఘర్షణ విషాదంగా మారింది. డెలివరీ విషయంలో ఇద్దరి మధ్య కొంతకాలంగా విభేదాలు ఉన్నాయి. గురువారం రాత్రి పనిచేసే ప్రాంతంలో మరోసారి వాగ్వాదం జరగడంతో వివాదం తీవ్రమైంది. ఒకరిపై ఒకరు దాడి చేసుకోగా, కోకాపేటకు చెందిన బ్లింకెట్‌ డెలివరీ బాయ్‌ అబ్దుల్‌ సమీద్‌(31) తలకు తీవ్ర గాయమైంది. దీంతో స్పాట్‌లోనే కుప్పకూలిపోయాడు. ఆసుపత్రికి తరలించగా అప్పటికే మృతి చెందినట్లు వైద్యులు నిర్ధారించారు. నార్సింగి పోలీసులు ఘటనాస్థలికి చేరుకుని దర్యాప్తు ప్రారంభించారు.