Crime

Crime· 11 Aug 2026

ఖననం చేసిన శిశువు మృతదేహం మాయం

TG: హైదరాబాద్ బంజారాహిల్స్‌లో కవల శిశువుల విషాద ఘటనలో షాకింగ్ ట్విస్ట్ వెలుగులోకి వచ్చింది. ఆరునెలలకే జన్మించిన కవలలకు ఓ ప్రైవేట్ ఆస్పత్రిలో చికిత్స అందిస్తుండగా, ఒకరోజు వ్యవధిలో ఇద్దరూ మృతి చెందారు. మొదటి శిశువు మృతదేహాన్ని కుటుంబసభ్యులు పంజాగుట్ట స్మశానవాటికలో ఖననం చేశారు. రెండో శిశువు మృతదేహాన్ని కూడా అక్కడే ఖననం చేసేందుకు తీసుకురాగా, మొదటి శిశువు సమాధి కనిపించకపోవడంతో కుటుంబసభ్యులు షాక్‌కు గురయ్యారు. సమాధిని తవ్వి చూడగా మృతదేహం కనిపించలేదు. పోలీసులకు ఫిర్యాదు చేశారు.

Crime· 11 Aug 2026

రాజమండ్రిలో ప్రేమజంట విషాదం

AP: తూర్పుగోదావరి జిల్లా రాజమండ్రిలోని కాతేరు గామన్ బ్రిడ్జి సమీపంలో ప్రేమజంట ఆత్మహత్యాయత్నం కలకలం రేపింది. స్థానికులు ఓ యువతి మృతదేహంతోపాటు తీవ్ర గాయాలతో ఉన్న యువకుడిని గుర్తించి పోలీసులకు సమాచారం అందించారు. పోలీసులు యువకుడిని వెంటనే ప్రైవేట్ ఆసుపత్రికి తరలించగా పరిస్థితి విషమంగా ఉన్నట్లు వైద్యులు తెలిపారు. యువతి మృతదేహాన్ని పోస్టుమార్టం కోసం రాజమండ్రి ప్రభుత్వ ఆసుపత్రికి తరలించారు. యువకుడు కోటిలింగాలపేటకు చెందిన అభిలాష్‌గా, యువతి శాంతినగర్‌కు చెందిన వ్యక్తిగా పోలీసులు గుర్తించారు.

Crime· 11 Aug 2026

గుప్త నిధుల పేరుతో ఘరానా మోసం.. రూ.కోటి స్వాహా

TG: హైదరాబాద్‌లో గుప్త నిధుల పేరుతో మోసాలు చేస్తున్న నలుగురిని పోలీసులు అరెస్ట్ చేశారు. ఇళ్ల కింద నిధులున్నాయని నమ్మించి, గుంతల్లో బొగ్గు, ఫేక్ గోల్డ్ కాయిన్స్ పాతిపెట్టేవారు. తాము చెప్పిన పూజలు చేస్తే బొగ్గు బంగారంగా మారుతుందని నమ్మించి బాధితుల నుంచి డబ్బులు వసూలు చేసేవారు. ఇలా 11 మందిని మోసం చేసి రూ.కోటి వరకు దోచేసినట్లు పోలీసులు గుర్తించారు. నిందితుల నుంచి రెండు కార్లు, ఆటో, రెండు బైక్‌లు, నాలుగు ఫోన్లు, 25 ఫేక్ గోల్డ్ కాయిన్స్, పూజా ప్రొడక్ట్స్‌ను స్వాధీనం చేసుకున్నారు.

Crime· 10 Aug 2026

మిస్సింగ్ కేస్‌లో షాకింగ్ ట్విస్ట్?

AP: కృష్ణా జిల్లా పెడనలో ఇద్దరు మైనర్ గర్ల్స్ మిస్సింగ్ కేస్ సంచలనంగా మారింది. ఈ కేసులో శ్యామ్ కిరణ్, సిద్ధు అనే ఇద్దరు యువకులను పోలీసులు అరెస్ట్ చేశారు. ఆగస్టు 6న కనిపించకుండాపోయిన బాలికలు మరుసటి రోజు ఇంటికి రాగా, వాళ్లపై రేప్ జరిగిందని తల్లి పోలీసులకు కంప్లైంట్ చేసింది. దీంతో పోక్సో యాక్ట్ కింద కేసు బుక్ చేసి నిందితులను అదుపులోకి తీసుకున్నట్లు SP విద్యాసాగర్ నాయుడు చెప్పారు. కేసును ఫాస్ట్‌ట్రాక్ కోర్టులో విచారించి నిందితులకు కఠిన శిక్ష పడేలా చూస్తామన్నారు.

Crime· 10 Aug 2026

ఐదేళ్లు ప్రేమించి.. మర్డర్ చేసిన ప్రియుడు!

AP: పల్నాడు జిల్లా కారెంపూడు దగ్గర ఒక దారుణం జరిగింది. హసీనా అనే అమ్మాయిని ఐదేళ్లుగా ప్రేమిస్తున్న బాలసైదు అనే యువకుడు చాకుతో దారుణంగా పొడిచి చంపేశాడు. ఆ తర్వాత బాడీ మీద పెట్రోల్ పోసి తగలేశాడు. హసీనాకి కొత్తగా జాబ్ రావడంతో తనను కేర్ చేయడం లేదని, ఈ మర్డర్ చేసినట్లు తెలిసింది. హసీనా మిస్సింగ్ అని ఫ్యామిలీ మెంబర్స్ పోలీస్ స్టేషన్‌లో కంప్లైంట్ ఇవ్వడంతో సెర్చ్ చేసిన పోలీసులు.. కాలువ గట్టు దగ్గర సగం కాలిన బాడీని కనుగొన్నారు. విచారణలో బాలసైదు తనే చంపేసినట్లు ఒప్పుకున్నాడు.

Crime· 10 Aug 2026

దొంగతనానికి వచ్చాడనుకొని..యువకుడి హత్య

ఉత్తరప్రదేశ్ రాష్ట్రం సాహిబాబాద్‌లోని నిర్మాణంలో ఉన్న భవనం వద్ద ఓ యువకుడు(17) హత్యకు గురయ్యాడు. అతను ఇనుప రాడ్లు దొంగిలించడానికి వచ్చాడని అనుమానించి సెక్యూరిటీ గార్డు అతణ్ని తుపాకీతో కాల్చాడు. అయితే అతను తన కొత్త మొబైల్‌తో రీల్ తీయడానికి వెళ్లాడని కుటుంబసభ్యులు అంటున్నారు. గార్డు వివేక్ యాదవ్‌ను పోలీసులు అరెస్ట్ చేసి, అతని తుపాకీని స్వాధీనం చేసుకున్నారు. దీనిపై పోలీసులు కేసు నమోదు చేశారు.

Crime· 9 Aug 2026

నేషనల్ హైవేపై యాక్సిడెంట్

TG: నాగర్‌కర్నూల్ జిల్లా చారకొండ మండలం తుర్కలపల్లి సమీపంలో కోదాడ-జడ్చర్ల నేషనల్ హైవేపై కారు, ట్రాలీ ఆటో ఎదురెదురుగా ఢీకొన్నాయి. ప్రమాదంలో ఇద్దరికి తలకు తీవ్ర గాయాలు కాగా, మరో ఆరుగురికి స్వల్ప గాయాలయ్యాయి. కల్వకుర్తి వైపు నుంచి తెనాలికి వెళ్తున్న కారు, నిడమనూరు నుంచి పెబ్బేరు వైపు పెళ్లిచూపులకు వెళ్తున్న ట్రాలీ ఆటోను ఢీకొట్టింది. గమనించిన స్థానికులు వెంటనే పోలీసులకు సమాచారం అందించారు. పోలీసులు క్షతగాత్రులను అంబులెన్స్‌లో కల్వకుర్తి ప్రభుత్వ ఆసుపత్రికి తరలించారు.

Crime· 9 Aug 2026

టోల్‌గేట్ వద్ద తనిఖీలు.. షాకింగ్ ట్విస్ట్

AP: విశాఖపట్నం జిల్లా భీమునిపట్నం మండలంలోని దాకమర్రి జొన్నాడ టోల్‌గేట్ వద్ద గంజాయి పట్టుబడింది. ఒడిశా నుంచి వస్తున్న ఓ కారులో లిక్విడ్ గంజాయి తరలిస్తున్నట్లు సమాచారం అందడంతో ఈగల్ టీమ్, భీమిలి పోలీసులు సంయుక్తంగా తనిఖీలు చేపట్టారు. ఈ తనిఖీల్లో కారులో లిక్విడ్ గంజాయిని గుర్తించి స్వాధీనం చేసుకున్నారు. గుంటూరు, విజయవాడ ప్రాంతాలకు చెందిన ముగ్గురు యువకులు, ఓ యువతిని పోలీసులు అదుపులోకి తీసుకున్నారు. వారి కారును సీజ్ చేసి గంజాయిని స్వాధీనం చేసుకున్నారు.

Crime· 9 Aug 2026

కొడుకు టార్చర్ భరించలేక.. తండ్రి షాకింగ్ డెసిషన్

TG: రాజన్నసిరిసిల్ల జిల్లా కోనరావుపేట PS పరిధిలో కొడుకుపై గొడ్డలితో దాడిచేసిన తండ్రిని పోలీసులు అరెస్ట్ చేశారు. మల్కపేటకు చెందిన రాఘవరెడ్డి, కుమారుడు రాజేందర్‌ మధ్య తరచూ గొడవలు జరుగుతున్నట్లు పోలీసులు తెలిపారు. కుమారుడు ఎలాంటి పని చేయకుండా తండ్రిని వేధింపులకు గురిచేసేవాడని వెల్లడించారు. ఆగస్టు 8న తండ్రి, కొడుకుల మధ్య గొడవ జరగగా రాజేందర్‌, తండ్రిపై దాడి చేయడంతో తీవ్రంగా విసిగిపోయిన రాఘవరెడ్డి, నిద్రిస్తున్న కుమారుడిపై గొడ్డలితో దాడిచేశాడు. గాయపడిన రాజేందర్‌ను వరంగల్‌ MGM ఆస్పత్రికి తరలించారు.

Crime· 9 Aug 2026

భార్యను హతమార్చి.. భర్త షాకింగ్ డెసిషన్

AP: తూర్పుగోదావరి జిల్లా రాజానగరం మండలం పాతతుంగపాడుకి చెందిన లక్ష్మణ్‌రావు(32)కు, శ్యామల(30)తో ఏడాది క్రితం వివాహమైంది. వీరిద్దరూ దివ్యాంగులు. ఇంట్లో శ్యామల మృతి చెందగా, లక్ష్మణ్‌రావు ఉరివేసుకున్న స్థితిలో కనిపించాడు. పోలీసులు దర్యాప్తు చేపట్టారు. ఆయన ఫోన్‌లోని సెల్ఫీ వీడియోను గుర్తించారు. తల్లి ఇటీవల మృతి చెందడంతో ఆమెను తరచూ గుర్తు చేసుకుంటున్నానని, ఆమె వద్దకు వెళ్లాలనుకుంటున్నానని వీడియోలో చెప్పినట్లు పోలీసులు తెలిపారు. తాను మరణిస్తే భార్య అనాథ అవుతుందనే హత్య చేసినట్లు వీడియోలో పేర్కొన్నాడు.

▶

Crime· 9 Aug 2026

చెడ్డీ గ్యాంగ్‌ సంచారం.. ప్రజల్లో హైటెన్షన్

AP: కుప్పం సరిహద్దు ప్రాంతాల్లో చెడ్డీ గ్యాంగ్ సంచరిస్తోందన్న ప్రచారం స్థానికుల్లో కలకలం రేపుతోంది. తమిళనాడు సరిహద్దులోని హోసూరు ప్రాంతంలో ఇటీవల వరుస చోరీలకు పాల్పడిన ఐదుగురిని పోలీసులు CCTV ఫుటెజ్ ఆధారంగా గుర్తించారు. ఇదే సమయంలో చిత్తూరు జిల్లా కుప్పం పరిసర ప్రాంతాల్లోనూ దొంగతనాలు చోటుచేసుకోవడంతో ఆ ముఠా ఇటువైపు వచ్చిందా అనే అనుమానాలు వ్యక్తమవుతున్నాయి. రాత్రివేళల్లో దొంగలు తిరుగుతున్నారన్న ప్రచారంతో పోలీసులు అప్రమత్తమయ్యారు. సరిహద్దుల్లో నిఘాను పెంచి ప్రత్యేక పెట్రోలింగ్‌ నిర్వహిస్తున్నారు.

Crime· 9 Aug 2026

యువకుడి గొంతుపై టెస్టర్‌తో దాడి

AP: నెల్లూరు జిల్లా గూడూరు పట్టణంలోని చిన్న వివాదం హత్యాయత్నానికి దారితీసింది. గూడూరులోని పూలతోట ప్రాంతంలో ఆటోకు వైర్లు తగులుతున్నాయని, కొంచెం పక్కకు వెళ్లాలని ఖాసీం అనే యువకుడు చెప్పడంతో గత విభేదాల నేపథ్యంలో రాయుడు టెస్టర్‌తో ఖాసీం గొంతులో పొడిచేందుకు ప్రయత్నించగా, అతను పక్కకు తప్పుకోవడంతో తీవ్ర ప్రమాదం తప్పింది. గొంతు పైభాగంలో గాయమైన ఖాసీం గూడూరు ప్రభుత్వ ఆసుపత్రిలో చికిత్స పొందుతున్నాడు. రాయుడు, మరికొందరు తన ఇంటివద్దకు వచ్చి ఇల్లు ఖాళీ చేయాలని, చంపేస్తామని బెదిరించినట్లు బాధితుడు ఆరోపించాడు.

Crime· 8 Aug 2026

అవమానంతో సూసైడ్ చేసుకున్న శ్రీ చైతన్య కాలేజ్ స్టూడెంట్

AP: కాకినాడలోని శ్రీ చైతన్య జూనియర్ కాలేజ్‌లో ఫీజ్ కట్టలేదని అవమానించడంతో ఇంటర్ ఫస్టియర్ (15 ఇయర్స్) స్టూడెంట్ సూసైడ్ చేసుకున్నాడు. ఫీజ్ కట్టలేదని క్లాస్‌రూమ్‌లో అందరి ముందు స్టాఫ్ నిలదీసి ఇంటికి పంపారు. ఇది చూసిన తోటి స్టూడెంట్స్ నవ్వడంతో అవమానంగా భావించి ఆ స్టూడెంట్ నిన్న రాత్రి ఇంట్లో ఉరేసుకుని ఆత్మహత్య చేసుకున్నాడు. స్టాఫ్ వేధింపుల వల్లే తమ కొడుకు చనిపోయాడని ఆరోపిస్తూ పేరెంట్స్, బంధువులు ఆందోళనకు దిగారు. కాలేజ్‌పై దాడి చేయడానికి ప్రయత్నించారు.

Crime· 8 Aug 2026

25 మంది Bangladeshisను పంపించానంటూ పోలీసులకు సవాల్!

బెంగళూరుకు 25 మంది బంగ్లాదేశీయులను పంపించానని, వారిని పోలీసులు పట్టుకోలేరంటూ సోషల్ మీడియాలో ఓ వ్యక్తి చేసిన వీడియో కలకలం రేపింది. వారు పోలీసులు, రాజకీయ నాయకుల ఇంటికి వచ్చి వారి ఫ్యామిలీకి హాని చేస్తారని బెదిరించాడు. దీంతో సైబర్ క్రైమ్ పోలీసులు కేస్ బుక్ చేసి దర్యాప్తు చేసారు. ఆ వ్యక్తి మండ్య జిల్లా కృష్ణరాజపేట చెందిన సంతోష్ కుమార్‌గా గుర్తించారు. దుబాయ్‌లో హోటల్ వర్కర్‌గా పనిచేస్తున్నాడు. తరువాత వీడియోను డిలీట్ చేసి, పోలీసులకు సారీ చెబుతూ మరో వీడియోను పోస్ట్ చేశాడు.

Crime· 8 Aug 2026

డూప్లెక్స్‌ ఇంట్లో మహిళ అస్థిపంజరం

బెంగళూరులోని బగలగుంటె హవనూర్‌ లేఅవుట్‌లో ఓ డూప్లెక్స్‌ ఇంట్లో మహిళ (దాక్షాయిణి) అస్థిపంజరం లభ్యమైంది. ఆమె సంవత్సరం క్రితమే చనిపోయుండొచ్చని పోలీసులు అనుమానిస్తున్నారు. భర్త ఉమేశ్‌ 10 ఏళ్ల క్రితం మృతి చెందగా, కుమారుడు కూడా క్యాన్సర్‌తో చనిపోయినట్లు తెలుస్తోంది. దీంతో ఆమె ఒంటరిగా ఉంటూ డిప్రెషన్‌తో బాధపడుతున్నట్లు పోలీసులు తెలిపారు. సంవత్సరం నుంచి ఆమె కూతురు, అల్లుడు కూడా ఇంటికి రాలేదని తెలుస్తోంది. బగలగుంటె పోలీసులు ఘటనా స్థలానికి చేరుకుని పరిశీలించారు. మృతికి గల కారణాలుపై దర్యాప్తు చేస్తున్నారు.

Crime· 7 Aug 2026

హత్య చేసి..శవంతో సెల్ఫీలు దిగారు

మందు తాగొద్దని, పనికి వెళ్లమని హెచ్చరించినందుకు కోయంబత్తూరు జిల్లా సిక్కలంపాళయంలో ఎస్.అశ్విన్‌(22) అనే కూలీని ఇద్దరు యువకులు హత్య చేశారు. 21 ఏళ్ల మథేష్, మరొక 16 ఏళ్ల యువకుడు కత్తి, కొడవలి, సుత్తితో దాడి చేసి చంపారు. హత్యను వీడియో తీసి, శవంతో సెల్ఫీలు దిగి సోషల్ మీడియాలో పోస్ట్ చేశారు. ఈ వీడియో వైరల్ కావడంతో పోలీసులు కేసు నమోదు చేశారు. నిందితులను పట్టుకోవడానికి పోలీసులు ప్రత్యేక బృందాలతో గాలిస్తున్నాయి.

▶

Crime· 7 Aug 2026

స్కూటర్‌ టైర్లలో గోల్డ్‌.. ఎయిర్‌ పోర్టులో పట్టివేత!

దిల్లీ IGI ఎయిర్ పోర్టులో కస్టమ్స్‌ ఆఫీసర్స్ భారీగా బంగారాన్ని పట్టుకున్నారు. సౌదీ అరేబియాలోని జెడ్డా నుంచి ముంబయి మీదుగా దిల్లీకి వచ్చిన ఓ ప్యాసెంజర్‌ను డౌట్‌తో చెక్ చేశారు. అతడి చెక్‌డ్‌ బ్యాగేజ్‌లో ఉన్న ఎలక్ట్రిక్‌ స్కూటర్‌ను పరిశీలించగా టైర్లలోని సాలిడ్‌ కోర్‌లో దాచిన 24 క్యారెట్ల బంగారం బయటపడింది. మొత్తం 19 ముక్కలుగా ఉన్న 869.5 గ్రా. గోల్డ్‌ను అధికారులు స్వాధీనం చేసుకున్నారు. ఇల్లీగల్‌గా బంగారం తీసుకొచ్చినట్లు కేసు బుక్ చేసి దర్యాప్తు చేస్తున్నారు.

Crime· 7 Aug 2026

హెల్త్ సెంటర్‌లో రోగులు వెయిటింగ్.. సిబ్బంది స్లీపింగ్

TG: మహబూబాబాద్ జిల్లా గూడూరు మండలంలోని ప్రభుత్వ CHCలో సిబ్బంది విధుల్లో నిర్లక్ష్యం వహిస్తున్నారు. కొందరు ఉద్యోగులు విధులు నిర్వహించకుండా మొబైల్ ఫోన్లతో కాలక్షేపం చేస్తుండగా, మరికొందరు కార్యాలయంలోనే నిద్రపోతున్నట్లు స్థానికులు ఆరోపిస్తున్నారు. వైద్యసేవల కోసం ఆసుపత్రికి వచ్చిన రోగులు గంటల తరబడి వేచి చూడాల్సి వస్తోందని ఆవేదన వ్యక్తం చేస్తున్నారు. ఆశాకార్యకర్తలు కూడా గ్రామాల్లో సమయపాలన పాటించడం లేదని వాపోతున్నారు. విధుల్లో నిర్లక్ష్యం వహించే సిబ్బందిపై చర్యలు తీసుకోవాలని డిమాండ్ చేస్తున్నారు.