Local

Local· 10h ago

ఎన్నికల వేళ.. వాహనాలపై పోలీసుల నిఘా

విజయనగరం జిల్లా రాజాం మండలంలో స్థానిక సంస్థల ఎన్నికల నేపథ్యంలో పోలీసులు ముమ్మర వాహన తనిఖీలు చేపట్టారు. అక్రమ మద్యం, నగదు రవాణాను అడ్డుకునేందుకు తనిఖీలు నిర్వహిస్తున్నట్లు పట్టణ ఇన్‌స్పెక్టర్ డి. నవీన్ కుమార్ తెలిపారు. ఎన్నికలు ముగిసే వరకు తనిఖీలు కొనసాగుతాయని, అక్రమ వస్తువులు పట్టుబడితే చట్టపరమైన చర్యలు తీసుకుంటామని హెచ్చరించారు. అవసరాల కోసం అధిక మొత్తంలో నగదు తీసుకెళ్లేవారు సంబంధిత ఆధారాలను వెంట ఉంచుకోవాలని సూచించారు.

Local· 10h ago

పోలవరంలో నీలిరంగులోకి గోదావరి

ఏలూరు జిల్లా పోలవరం ప్రాజెక్టు వద్ద గోదావరి నది నీటి రంగు రాగి వర్ణం నుంచి ప్రశాంతమైన నీలిరంగులోకి మారింది. ఎగువ ప్రాంతాల్లో వరద ప్రవాహం క్రమంగా తగ్గడం, వరద మట్టి, బురద మేటలు నిలిచిపోవడంతో పాటు సీలేరు ఉపనది నుంచి స్వచ్ఛమైన జలాలు వచ్చి కలవడంతో నీరు నీలిరంగులోకి మారినట్లు అధికారులు తెలిపారు. ఈ సహజ దృగ్విషయాన్ని వీక్షించేందుకు పర్యాటకులు ఆసక్తి చూపుతున్నారు.

Local· 10h ago

ఆత్మకూరు మున్సిపల్ ఆఫీస్ వద్ద ధర్నా

నంద్యాల జిల్లా ఆత్మకూరు మున్సిపల్ కార్యాలయం వద్ద సోమవారం తీవ్ర ఉద్రిక్తత నెలకొంది. వైసీపీ ఛైర్మన్ అభ్యర్థి కుల ధ్రువీకరణ పత్రాన్ని కొందరు చించివేశారని ఆరోపిస్తూ మాజీ ఎమ్మెల్యే శిల్పా చక్రపాణి రెడ్డి ధర్నాకు దిగారు. మున్సిపల్ అధికారుల తీరుపై నిరసన తెలుపుతూ రోడ్డుపై బైఠాయించారు. పోలీసులు అక్కడికి చేరుకుని బందోబస్తు పెంచి పరిస్థితిని అదుపులోకి తెచ్చారు.

Local· 11h ago

ప్రత్యామ్నాయ పంటలతో సాగు మేలు: DAO

నాగర్‌కర్నూల్ జిల్లాలో యాసంగి సాగు సమయంలో రైతులు నీటి పొదుపునకు ప్రాధాన్యమివ్వాలని జిల్లా వ్యవసాయ అధికారి ఎన్. యశ్వంతరావు సూచించారు. ఎల్‌నినో ప్రభావం, వాతావరణ పరిస్థితులను దృష్టిలో ఉంచుకొని తక్కువ నీటితో పండే పప్పుధాన్యాలు, ఆముదం పంటలను సాగు చేయాలని కోరారు. అధిక నీరు అవసరమయ్యే వరి, మొక్కజొన్న పంటలకు దూరంగా ఉండాలని తెలిపారు. నాణ్యమైన విత్తనాలను ఎంపిక చేసుకొని, వ్యవసాయ అధికారుల సూచనలు పాటించాలని రైతులకు సూచించారు.

Local· 11h ago

'రజక యువతతోనే సమాజ అభివృద్ధి సాధ్యం'

రజక సమాజాన్ని ఐక్యంగా ముందుకు నడిపిస్తూ, హక్కుల సాధనకు కృషి చేయడమే తెలంగాణ రజక రిజర్వేషన్ సమితి లక్ష్యమని రాష్ట్ర వర్కింగ్ ప్రెసిడెంట్ విజయ్ గణేష్ చిన్నరంగారి తెలిపారు. సిద్దిపేట జిల్లా మద్దూరు మండల యూత్ అధ్యక్షుడిగా పిడిచెట్టి గౌరీషను నియమించారు. జిల్లా అధ్యక్షుడు జంగపల్లి ఐలయ్య, వర్కింగ్ ప్రెసిడెంట్ దీటి రాజు కమిటీ వివరాలు వెల్లడించారు. యువత ఐక్యంగా రజకుల సమస్యల పరిష్కారానికి కృషి చేయాలని పిలుపునిచ్చారు.

Local· 11h ago

నెల్లూరు 72వ డివిజన్‌లో ప్రచారం

శ్రీ పొట్టి శ్రీరాములు జిల్లా నెల్లూరు కార్పొరేషన్ ఎన్నికల్లో 72వ డివిజన్ సీపీఎం అభ్యర్థి గజ్జె పరమేశ్వరి సోమవారం ఇంటింటి ప్రచారాన్ని ముమ్మరం చేశారు. డివిజన్ పరిధిలోని కాలనీలలో పర్యటిస్తూ స్థానిక సమస్యల పరిష్కారమే ధ్యేయంగా పనిచేస్తానని ఓటర్లకు హామీ ఇచ్చారు. స్థానిక ప్రజలు, మహిళలను కలిసి సమస్యలు తెలుసుకుంటూ మద్దతు కోరడంతో వార్డులో ప్రచారం జోరందుకుంది. ఎన్నికల్లో ఆదరించాలని ప్రజలను కోరారు.

Local· 11h ago

దుర్గా మాత ఆలయంలో చండీయాగ హోమం

నిజామాబాద్ పోలీస్ పరేడ్ గ్రౌండ్‌లోని దుర్గా పరమేశ్వరి మాత ఆలయంలో దేవి నవరాత్రి ఉత్సవాల్లో భాగంగా చండీయాగ హోమాన్ని వైభవంగా నిర్వహించారు. పోలీస్ కమిషనర్ పి. సాయి చైతన్య ముఖ్య అతిథిగా హాజరై ప్రత్యేక పూజలు చేశారు. అనంతరం భక్తులకు అన్నదానం నిర్వహించారు. ఈ కార్యక్రమంలో అదనపు డీసీపీ ఎన్. శుభం ప్రకాష్, అదనపు కలెక్టర్లు భుజంగరావు, పి. సురేష్, డీఎంహెచ్‌వో రాజశ్రీతో పాటు పలువురు పోలీస్ అధికారులు, సిబ్బంది పాల్గొన్నారు.

Local· 11h ago

పాత కక్షలతో యువకుడి హత్య

జగిత్యాల జిల్లా ఎండపల్లి మండలం రాజారాంపల్లిలో బొంత సంతోష్ 19 ఏళ్ల యువకుడు హత్యకు గురయ్యాడు. ఆదివారం రాత్రి పాత కక్షలతో శివరాత్రి అనిల్ అనే యువకుడు సంతోష్‌పై కత్తితో దాడి చేసినట్లు సమాచారం. తీవ్రంగా గాయపడిన సంతోష్‌ను ఆసుపత్రికి తీసుకెళ్తుండగా మార్గమధ్యంలో చనిపోయాడు. ఘటనపై పోలీసులు కేసు నమోదు చేసి విచారణ చేస్తున్నారు. అయితే హత్యకు దారితీసిన కారణాలు, ఘటనకు సంబంధించిన పూర్తి వివరాలు ఇంకా తెలియాల్సి ఉంది.

Local· 11h ago

అనంతపురంలో ఉద్యోగుల ఓట్లే కీలకం!

అనంతపురం జిల్లా నగర పాలక సంస్థ ఎన్నికల్లో ఉద్యోగులు, ఉపాధ్యా యులు, పెన్షనర్ల ఓట్లు కీలకంగా మారనున్నాయి. నగరంలోని 2,37,007 మంది ఓటర్లలో 50 వేలకుపైగా ఉద్యోగులు, టీచర్లు ఉన్నారు. ప్రభుత్వ, కాంట్రాక్టు, అవుట్సోర్సింగ్ ఉద్యోగుల మద్దతు కోసం పార్టీలు ప్రయత్నిస్తున్నాయి. తమ పాలనపై వారిలో ఉన్న సానుకూలత, వ్యతిరేకతను అంచనా వేస్తూ గెలుపు లెక్కలు వేస్తున్నాయి

Local· 12h ago

ఎల్‌నినో ఎఫెక్ట్.. పల్లెల్లో తాగునీటి కష్టాలు

సూర్యాపేట జిల్లాలో‌ ఎల్‌నినో ప్రభావంతో వర్షాభావ పరిస్థితులు నెలకొనడంతో చెరువులు, కుంటలు ఎండిపోయి భూగర్భ జలాలు అడుగంటుతున్నాయి. నకిరేకల్, కేతేపల్లి మండలాల్లోని పలు గ్రామాల్లో తాగునీటి కష్టాలు తీవ్రమయ్యాయి. బోర్లలో నీరు తగ్గడంతో గ్రామాల్లో ట్యాంకర్ల ద్వారా నీటిని సరఫరా చేస్తున్నారు. నకిరేకల్ సబ్డివిజన్లోని 126 పంచాయతీల పరిధిలో నీటి సరఫరాకు ఇబ్బందులు ఎదురవుతున్నాయి.

Local· 12h ago

పోలేపల్లికి కొత్త పంచాయతీ భవనం

నాగర్ కర్నూలు జిల్లా బిజినపల్లి మండలం పోలేపల్లి గ్రామంలో ₹20 లక్షల వ్యయంతో నిర్మించనున్న నూతన గ్రామ పంచాయతీ భవనానికి ఎమ్మెల్యే కూచుకుల్ల రాజేష్ రెడ్డి సోమవారం శంకుస్థాపన చేశారు. కాంగ్రెస్ ప్రజా పాలనలో పేదలకు ఇందిరమ్మ ఇళ్లు, 200 యూనిట్ల వరకు ఉచిత విద్యుత్, రేషన్ కార్డులు సహా పలు సంక్షేమ పథకాలు అందిస్తూ ప్రభుత్వం అండగా నిలుస్తోందని ఆయన అన్నారు.

Local· 12h ago

రోడ్లు లేక అవస్థలు.. పట్టించుకోని ప్రభుత్వం?

అల్లూరి సీతారామరాజు జిల్లా అరకు వేలి, డుంబ్రిగూడ మండలాల్లో మంజూరైన బీటీ రోడ్లను రద్దు చేయడం సరికాదని మాజీ MPTC బురిడి దశరథ్ అన్నారు. అసంపూర్తిగా ఉన్న రోడ్లను వెంటనే పూర్తి చేయాలని డిమాండ్ చేశారు. రహదారులు సరిగా లేక ఆదివాసీలు తీవ్ర ఇబ్బందులు పడుతున్నారని, రోగులు, గర్భిణులను ఆసుపత్రులకు తరలించడం కష్టంగా మారిందని ఆవేదన వ్యక్తం చేశారు. ప్రభుత్వం తక్షణమే స్పందించి రోడ్డు పనులు పూర్తి చేయాలని కోరారు.

Local· 12h ago

కాలువలో వ్యక్తి గల్లంతు

మహబూబ్ నగర్ జిల్లా మిడ్జిల్ మండలం అయ్యవారిపల్లికి చెందిన చెన్నకేశులు KLI కాలువలో గల్లంతయ్యారు. సోమవారం స్నానానికి వెళ్లిన ఆయన నీటి ప్రవాహంలో కొట్టుకుపోయినట్లు తెలుస్తోంది. కాలువ అంచున దుస్తులు, చెప్పులు కనిపించడంతో గ్రామస్తులు గాలింపు చేపట్టారు. సమాచారం అందుకున్న తహసీల్దార్ రాఘవేందర్రెడ్డి, ఫైర్ సిబ్బందితో కలిసి కాలువలో గాలింపు చర్యలు కొనసాగిస్తున్నారు.

Local· 12h ago

15 మండలాల్లో బ్యాంకింగ్ సేవలపై ప్రచారం

వనపర్తి జిల్లాలో ప్రజలకు బ్యాంకింగ్ సేవలు, కేంద్ర ప్రభుత్వ సామాజిక భద్రతా పథకాలను చేరువ చేసేందుకు అక్టోబర్ 21 నుంచి డిసెంబర్ 31 వరకు ప్రత్యేక శిబిరాలు నిర్వహించనున్నట్లు కలెక్టర్ ఆదర్శ్ సురభి తెలిపారు. జిల్లాలోని 15 మండలాలు, 268 గ్రామ పంచాయతీలు, 5 మున్సిపాలిటీల పరిధిలో ఈ శిబిరాలు ఏర్పాటు చేయనున్నారు. ప్రతి గ్రామంలో శిబిరం నిర్వహించి, పథకాలపై అవగాహన కల్పించనున్నారు.

Local· 12h ago

జనసేన స్థానిక ఎన్నికల కమిటీ సభ్యుడిగా మహిపాల గణేష్

తూర్పు గోదావరి జిల్లా గోకవరం మండలానికి చెందిన జనసేన కార్యకర్త మహిపాల వీర వెంకట సత్యనారాయణ (గణేష్)కు జగ్గంపేట నియోజకవర్గ స్థానిక ఎన్నికల కోఆర్డినేషన్ కమిటీ నిర్వాహక దళ సభ్యుడిగా బాధ్యతలు అప్పగించారు. పార్టీ అధినేత పవన్ కళ్యాణ్ ఈ నియామక ఉత్తర్వులు జారీ చేశారు. తనపై నమ్మకంతో బాధ్యత ఇచ్చిన పవన్ కళ్యాణ్, నియోజకవర్గ ఇన్‌చార్జి తుమ్మలపల్లి రమేష్‌కు గణేష్ కృతజ్ఞతలు తెలిపారు. పార్టీ బలోపేతానికి కృషి చేస్తానన్నారు.

Local· 12h ago

పండగ సాయన్న సమాధి వద్ద నాటక బృందం నివాళులు

తెలంగాణ ప్రజానాయకుడు పండగ సాయన్న పోరాట స్ఫూర్తిని భావితరాలకు పరిచయం చేసేలా రూపొందించిన ‘పండగ సాయన్న’ నాటక పోస్టర్‌ను మంగళవారం మహబూబ్‌నగర్‌లోని ఆయన సమాధి వద్ద ఆవిష్కరించారు. నాటక బృందం నివాళులర్పించింది. ఈ నెల 22న హైదరాబాద్‌ రవీంద్ర భారతిలో జరిగే సాయన్న జయంతి వేడుకల్లో నాటకాన్ని తొలిసారిగా ప్రదర్శించనున్నారు. ప్రముఖ నటుడు తనికెళ్ల భరణి నేపథ్య వ్యాఖ్యానం అందించనున్నారు. కార్యక్రమంలో పలువురు ప్రముఖులు పాల్గొన్నారు.

Local· 12h ago

రాఘవాపూర్‌కు కొత్త రోడ్డు.. పనులు ప్రారంభం

పెద్దపల్లి జిల్లా పెద్దపల్లి మండలం రాఘవాపూర్ గొల్లపల్లి గ్రామంలో ₹10 లక్షలతో నిర్మించనున్న నూతన సీసీ రోడ్డుకు ప్రభుత్వ విప్, ఎమ్మెల్యే చింతకుంట విజయరమణారావు శంకుస్థాపన చేశారు. స్థానిక నాయకులతో కలిసి అభివృద్ధి పనులకు శ్రీకారం చుట్టారు. గ్రామీణ ప్రాంతాల్లో రహదారులు, మౌలిక సదుపాయాల అభివృద్ధికి ప్రాధాన్యత ఇస్తున్నట్లు తెలిపారు. ఈ కార్యక్రమంలో ప్రజాప్రతినిధులు, కాంగ్రెస్ నాయకులు, కార్యకర్తలు, గ్రామస్తులు పాల్గొన్నారు.

Local· 13h ago

చదువులో సత్తా.. విద్యార్థులకు స్కాలర్‌షిప్‌లు

సిద్దిపేట జిల్లా బెజ్జంకి మండలం చీలాపూర్‌లో ఈవ్స్ స్వచ్ఛంద సంస్థ ఆధ్వర్యంలో 2025–26 విద్యా సంవత్సరానికి ప్రతిభావంతులైన విద్యార్థులకు మెరిట్ స్కాలర్‌షిప్‌లు అందజేశారు. మొదటి స్థానం సాధించిన వారికి ₹1,500, రెండో స్థానం పొందిన వారికి ₹1,000 చొప్పున నగదు బహుమతులు ఇచ్చారు. ఇంటర్, ఎస్‌ఎస్‌సీ, ఏడో తరగతిలో ప్రతిభ చూపిన విద్యార్థులను అభినందించారు. విద్యార్థులు ఉన్నత లక్ష్యాలను చేరుకోవాలని సంస్థ ప్రతినిధులు ఆకాంక్షించారు.