Local

Local· 1d ago

అల్లీపూర్‌లో ఉచిత నేత్ర వైద్య శిబిరం

TG: జగిత్యాల జిల్లా రాయికల్ మండలం అల్లీపూర్ గ్రామంలోని మున్నూరు కాపు సంఘ భవనంలో లయన్స్ క్లబ్ ఆధ్వర్యంలో గురువారం ఉచిత నేత్ర వైద్య శిబిరం నిర్వహించారు. శిబిరంలో ప్రజలకు ఉచిత కంటి పరీక్షలు నిర్వహించి, కంటి వ్యాధులపై అవగాహన కల్పించారు. అవసరమైన వారికి కరీంనగర్‌లోని రేకుర్తి కంటి ఆసుపత్రిలో ఉచితంగా కంటి ఆపరేషన్లు చేయిస్తామని నిర్వాహకులు తెలిపారు. కార్యక్రమంలో ప్రోగ్రామ్ కన్వీనర్ తంగెళ్ల రమేష్, అధ్యక్షులు వాసం ప్రసాద్, సెక్రటరీ కనపర్తి శ్రీనివాస్, ట్రెజరర్ సుధావేణి మురళి గౌడ్ తదితరులు పాల్గొన్నారు.

Local· 1d ago

విద్యార్థులకు నోటు పుస్తకాలు పంపిణీ

AP: గుంటూరు జిల్లా మంగళగిరి బ్యాంక్‌ కాలనీలోని ANTMC యూపీ స్కూల్‌లో విద్యార్థులకు నోటు పుస్తకాలు, పెన్సిల్స్ పంపిణీ చేశారు. నియోజకవర్గ తెలుగు యువత అధ్యక్షులు బొగి వినోద్‌ జన్మదినం సందర్భంగా ఈ కార్యక్రమం నిర్వహించారు. నియోజకవర్గ తెలుగు యువత ఉపాధ్యక్షులు ఎండీ ఆరిఫ్‌, పట్టణ యువత ప్రధాన కార్యదర్శి బుల్లా కోటి ఆధ్వర్యంలో జరిగిన కార్యక్రమానికి రాష్ట్ర మైనారిటీస్‌ ఫైనాన్స్‌ కార్పొరేషన్‌ డైరెక్టర్‌ ఎండీ ఇబ్రహీం, రాష్ట్ర కాపు కార్పొరేషన్‌ డైరెక్టర్‌ విన్నకోట శ్రీనివాసరావు ముఖ్య అతిథులుగా హాజరయ్యారు.

Local· 1d ago

అనపర్తి ఆసుపత్రికి కొత్త సూపరింటెండెంట్‌

AP: తూర్పుగోదావరి జిల్లా అనపర్తి ప్రభుత్వ ఏరియా ఆసుపత్రి సూపరింటెండెంట్‌గా డా. పద్మశ్రీ గురువారం బాధ్యతలు స్వీకరించారు. ఇప్పటివరకు సూపరింటెండెంట్‌గా పనిచేసిన డాక్టర్‌ రామగురెడ్డి పదోన్నతిపై రాజమహేంద్రవరం బదిలీ కావడంతో, ఆసుపత్రిలో ఆర్‌ఎంవోగా విధులు నిర్వహిస్తున్న డా. పద్మశ్రీకి సూపరింటెండెంట్‌గా బాధ్యతలు అప్పగించారు. బాధ్యతలు స్వీకరించిన అనంతరం ఆమె రామవరంలో ఎమ్మెల్యే రామకృష్ణారెడ్డిని మర్యాదపూర్వకంగా కలిశారు. ఆసుపత్రిలో వైద్య సేవలను మరింత మెరుగుపరిచేందుకు కృషి చేస్తానని ఆమె తెలిపారు.

Local· 1d ago

విద్యాభవన్‌ ముట్టడి.. పలువురు UTF నాయకుల అరెస్ట్

AP: గుంటూరు జిల్లా మంగళగిరి మండలం ఆత్మకూరులోని విద్యాభవన్‌ ముట్టడికి యూటీఎఫ్‌ నాయకులు భారీగా తరలివచ్చారు. ఇన్‌సర్వీస్‌ ఉపాధ్యాయులకు టెట్‌ నుంచి మినహాయింపు ఇవ్వాలని, విద్యాశాఖ మంత్రి జోక్యం చేసుకుని సమస్యను పరిష్కరించాలని డిమాండ్‌ చేశారు. నిరసనకారులను పోలీసులు అడ్డుకుని పలువురు UTF నాయకులను అరెస్టు చేసి పోలీస్‌స్టేషన్‌కు తరలించారు. మాజీ ఎమ్మెల్సీ లక్ష్మణరావు మాట్లాడుతూ.. ఉపాధ్యాయుల సమస్యలను ప్రభుత్వం తక్షణమే పరిష్కరించాలని కోరారు.

Local· 1d ago

వెల్గటూర్‌లో SGF క్రీడా పోటీలు

TG: జగిత్యాల జిల్లా వెల్గటూర్ మండల స్థాయి స్కూల్ గేమ్స్ ఫెడరేషన్ (SGF) ఆధ్వర్యంలో క్రీడా పోటీలకు అధికారులు ఏర్పాట్లు చేస్తున్నారు. సెప్టెంబర్‌ 10, 11, 15 తేదీల్లో పోటీలు నిర్వహించనున్నట్లు మండల విద్యాధికారి బి. ప్రభాకర్, మండల కన్వీనర్‌ పి. రాజ్‌కుమార్‌ తెలిపారు. 10న అండర్‌-14, అండర్‌-17 బాలికలకు కబడ్డీ, ఖో-ఖో, వాలీబాల్‌ పోటీలు, 11న బాలురకు ఇదే క్రీడల్లో పోటీలు నిర్వహిస్తారు. 15న బాల, బాలికలకు అథ్లెటిక్స్‌ పోటీలు జరగనున్నాయి. కార్యక్రమంలో మండల పీడీలు, పీఈటీలు పాల్గొన్నారు.

▶

Local· 1d ago

హైస్కూల్‌లో ఘనంగా కృష్ణాష్టమి వేడుకలు

AP: గుంటూరు జిల్లా మంగళగిరిలోని అరవింద హైస్కూల్‌లో శ్రీకృష్ణ జన్మాష్టమి వేడుకలను ఘనంగా నిర్వహించారు. విద్యార్థులు, విద్యార్థినీలు శ్రీకృష్ణుడు, గోపికల వేషధారణలో అలరించారు. కృష్ణుడు–గోపికల నృత్యాలు, ముత్యాల కోలాటం తదితర సాంస్కృతిక కార్యక్రమాలు ప్రత్యేక ఆకర్షణగా నిలిచాయి. విద్యార్థుల ప్రదర్శనలు చూపరులను ఆకట్టుకున్నాయి. పాఠశాల ప్రాంగణంలో పండుగ వాతావరణం నెలకొంది. భారతీయ సంస్కృతి, సంప్రదాయాలపై విద్యార్థుల్లో అవగాహన కల్పించేలా కృష్ణాష్టమి వేడుకలను నిర్వహించినట్లు పాఠశాల నిర్వాహకులు తెలిపారు.

Local· 1d ago

ప్రకృతి వ్యవసాయంపై రైతులకు అవగాహన

TG: హనుమకొండ జిల్లా భీమదేవరపల్లి మండలం కొత్తపల్లి రైతు వేదికలో ప్రకృతి వ్యవసాయంపై అవగాహన కార్యక్రమం నిర్వహించారు. ఈ సందర్భంగా కొత్తపల్లి ఏఈఓ క్రిసోలైట్‌ మాట్లాడుతూ.. ప్రకృతి వ్యవసాయం ద్వారా నేల ఆరోగ్యాన్ని కాపాడుకోవచ్చని తెలిపారు. రైతులు రసాయన ఎరువుల వినియోగాన్ని తగ్గించి ప్రకృతి వ్యవసాయం వైపు దృష్టి సారించాలని సూచించారు. ప్రకృతి వ్యవసాయంలో ఉపయోగించే కషాయాలు, బీజామృతం, జీవామృతం, ఘనజీవామృతం, బ్రహ్మాస్త్రం, అగ్నాస్త్రం, దశపర్ణి తయారీ విధానాలపై రైతులకు వీడియోల ద్వారా అవగాహన కల్పించారు.

Local· 1d ago

మండపాల ఏర్పాట్లలో భద్రతా ప్రమాణాలు పాటించాలి

TG: వరంగల్ జిల్లా ఖానాపూర్‌లో గణేష్‌ మండపాల నిర్వాహకులు విద్యుత్‌ ప్రమాదాల నివారణకు భద్రతా ప్రమాణాలు తప్పనిసరిగా పాటించాలని విద్యుత్‌ శాఖ అదనపు సహాయ ఇంజినీర్‌ ఎ. మంగమ్మ సూచించారు. లైసెన్స్‌ పొందిన ఎలక్ట్రీషియన్‌తోనే వైరింగ్‌ పనులు చేయించాలని, మండపాల్లో ఈఎల్‌సీబీ, నాణ్యమైన ఎంసీబీలు ఏర్పాటు చేయాలని తెలిపారు. వైర్లకు ఎలాంటి జాయింట్లు లేకుండా జాగ్రత్తలు తీసుకోవాలన్నారు. తడి చేతులతో విద్యుత్‌ పరికరాలను తాకరాదని సూచించారు. విద్యుత్‌ స్తంభాలకు ఫ్లెక్సీలు కట్టకూడదని స్పష్టం చేశారు.

Local· 1d ago

నాగులేరుకు నీళ్లు విడుదల చేయాలి: జక్కా అశోక్‌

AP: పల్నాడు జిల్లా దాచేపల్లి మండలంలో తీవ్ర నీటి ఎద్దడి నెలకొన్న నేపథ్యంలో నాగులేరుకు వెంటనే నీటిని విడుదల చేయాలని వైసీపీ యువజన విభాగం మండల అధ్యక్షుడు జక్కా అశోక్‌ డిమాండ్‌ చేశారు. గురువారం ఆయన మాట్లాడుతూ... దాచేపల్లి పరిసర ప్రాంతాల్లో భూగర్భ జలాలు అడుగంటిపోవడంతో ప్రజలు తాగునీటికి ఇబ్బందులు పడుతున్నారని ఆవేదన వ్యక్తం చేశారు. వర్షాలు లేక గ్రామాల్లో బోర్లు ఎండిపోతున్నాయని తెలిపారు. మరో 10–15 రోజులు ఇదే పరిస్థితి కొనసాగితే తాగునీటి సమస్య మరింత తీవ్రతరం అవుతుందని అన్నారు.

Local· 1d ago

కల్వకుర్తిలో విద్యార్థులకు వ్యాసరచన పోటీలు

TG: నాగర్‌కర్నూల్‌ జిల్లా కల్వకుర్తి పట్టణంలోని ఎల్‌ఐసీ బ్రాంచ్‌ కార్యాలయంలో సంస్థ 70 వసంతాలు పూర్తి చేసుకున్న సందర్భంగా గురువారం విద్యార్థులకు వ్యాసరచన పోటీలు నిర్వహించారు. పట్టణంలోని 13 పాఠశాలలకు చెందిన విద్యార్థులు పోటీల్లో పాల్గొని వివిధ అంశాలపై వ్యాసాలు రాశారు. విద్యార్థుల్లో సృజనాత్మకత, రచనా నైపుణ్యాలను ప్రోత్సహించేలా కార్యక్రమాన్ని నిర్వహించినట్లు ఎల్‌ఐసీ అధికారులు తెలిపారు. కార్యక్రమంలో బ్రాంచ్‌ మేనేజర్‌ శ్రీనివాస్‌ కుమార్‌, లక్ష్మణాచారి, వినయ్‌ కుమార్‌, ఎల్‌ఐసీ ఉద్యోగులు పాల్గొన్నారు.

Local· 1d ago

విధులకు డుమ్మా కొట్టని టీచర్‌.. అభినందించిన హెచ్‌ఎం

TG: వరంగల్‌ జిల్లా నర్సంపేట ప్రభుత్వ ఉన్నత పాఠశాలలో ఆగస్టు నెలలో ఒక్కరోజూ సెలవు పెట్టకుండా 100 శాతం హాజరుతో విధులు నిర్వహించిన బయలాజికల్‌ సైన్స్‌ ఉపాధ్యాయుడు రామకృష్ణను ప్రధానోపాధ్యాయుడు ఐ. రామకృష్ణ అభినందించారు. ఈ సందర్భంగా ఆయనకు ప్రోత్సాహం అందించారు. ఉపాధ్యాయులు క్రమశిక్షణతో విధులకు హాజరవుతూ విద్యార్థుల విద్యాభివృద్ధికి కృషి చేయాలని ప్రధానోపాధ్యాయుడు సూచించారు. 100 శాతం హాజరు సాధించిన ఉపాధ్యాయుడు రామకృష్ణను ఇతర ఉపాధ్యాయులు ఆదర్శంగా తీసుకోవాలని కోరారు.

Local· 1d ago

లింగారెడ్డిగూడెంలో స్మార్ట్‌ కార్డుల పంపిణీ

TG: రంగారెడ్డి జిల్లా ఫరూక్‌నగర్‌ మండలం లింగారెడ్డిగూడెంలో స్మార్ట్‌ కార్డుల పంపిణీ కార్యక్రమాన్ని ఎమ్మెల్యే వీర్లపల్లి శంకర్‌ నిర్వహించారు. పేదల ఆకలి తీర్చేందుకు గతంలో కాంగ్రెస్‌ ప్రభుత్వం రేషన్‌ వ్యవస్థను అందుబాటులోకి తీసుకువచ్చిందని, ఇప్పుడు స్మార్ట్‌ కార్డుల ద్వారా మరో అడుగు ముందుకు వేసిందని అన్నారు. అర్హులైన ప్రతి ఒక్కరూ స్మార్ట్‌ కార్డుల ప్రయోజనాన్ని సద్వినియోగం చేసుకోవాలని కోరారు. కార్యక్రమంలో మాజీ ఎమ్మెల్యే బక్కని నర్సింలు, గ్రామ సర్పంచ్‌ ప్రవీణ్‌, తదితరులు పాల్గొన్నారు.

Local· 1d ago

సీసీ రోడ్లు, మురుగు కాలువలు నిర్మించాలి

TG: వికారాబాద్‌ జిల్లా బషీరాబాద్‌ మండలం మైల్వార్‌ గ్రామంలోని ఎస్సీ వార్డులో మౌలిక వసతుల కొరతపై కేవీపీఎస్‌ మండల అధ్యక్షుడు కర్నె వెంకట్‌ ఆగ్రహం వ్యక్తం చేశారు. వార్డులో సరైన రోడ్లు, మురుగు కాలువలు లేక ప్రజలు తీవ్ర ఇబ్బందులు పడుతున్నారని తెలిపారు. మురుగునీరు నిలిచిపోవడంతో దోమల బెడద పెరిగి చిన్నారులు, వృద్ధులు ఇబ్బందులు ఎదుర్కొంటున్నారని ఆవేదన వ్యక్తం చేశారు. అధికారులు వెంటనే స్పందించి సీసీ రోడ్లు నిర్మించడంతో పాటు మురుగు కాలువలు ఏర్పాటు చేయాలని డిమాండ్‌ చేశారు.

Local· 1d ago

గురుకుల విద్యార్థిని మృతిపై ఆందోళన

TG: రంగారెడ్డి జిల్లా షాద్‌నగర్‌ మండలం కమ్మదనం గురుకుల పాఠశాలలో గిరిజన విద్యార్థిని ముడావత్‌ అశ్విని అనుమానాస్పద మృతిపై గురువారం ఆందోళన చేపట్టారు. LHPS, SFI నాయకులు గురుకుల పాఠశాల వద్ద బైఠాయించి ధర్నా నిర్వహించారు. అశ్విని మృతిపై సమగ్ర విచారణ జరిపి వాస్తవాలను వెలికితీయాలని, ఘటనకు బాధ్యులైన వారిపై కఠిన చర్యలు తీసుకోవాలని డిమాండ్‌ చేశారు. గురుకుల పాఠశాల ప్రిన్సిపల్‌ను వెంటనే సస్పెండ్‌ చేయాలని ఎల్‌హెచ్‌పీఎస్‌ రాష్ట్ర అధ్యక్షుడు రాంబాల్‌ నాయక్‌ కోరారు.

Local· 1d ago

హైదరాబాద్‌ ఓటర్లకు బిగ్ అలర్ట్..

హైదరాబాద్‌లోని 15 అసెంబ్లీ స్థానాల్లో 2023 మెజారిటీల కంటే తొలగించిన ఓట్లే ఎక్కువ ఉన్నాయని సబీర్ ఇన్స్టిట్యూట్ రిపోర్ట్ తెలిపింది. 42.15 లక్షల మందిలో 19.41 లక్షల ఓట్లు డిలీట్ చేయడానికి ప్రాసెస్ మొదలైంది. యాకుత్‌పురా, మలక్‌పేట్‌లో ఈ ఎఫెక్ట్ మరీ ఎక్కువగా ఉంది. జుక్కల్ MLA తండ్రి వయసు 27గా తప్పుగా పడటం, మినిస్టర్ పొన్నం ప్రభాకర్ ఆఫీస్‌కు రాంగ్ నోటీస్ వెళ్లడం వంటి టెక్నికల్ లోపాలు బయటపడ్డాయి. టైట్ పోటీ ఉండే చోట ఇది రిజల్ట్స్‌ను డిసైడ్ చేసే ఛాన్స్ ఉండటంతో గడువు పెంచాలని లీడర్స్ డిమాండ్ చేస్తున్నారు.

Local· 1d ago

సత్తెనపల్లిలో పేకాట క్లబ్‌పై దాడి

AP: పల్నాడు జిల్లా సత్తెనపల్లి పట్టణంలో అనధికారంగా నిర్వహిస్తున్న పేకాట క్లబ్‌పై గుర్తుతెలియని వ్యక్తులు దాడికి పాల్పడ్డారు. క్లబ్‌లోని అద్దాలు, ఫర్నీచర్‌, బీరువా, సీసీ కెమెరాలను ధ్వంసం చేశారు. అడ్డుకునేందుకు ప్రయత్నించిన సెక్యూరిటీ సిబ్బందిపై కూడా దాడి చేశారు. ఘటనలో ఎలాంటి ప్రాణనష్టం జరగలేదు. ఇటీవల పేకాట ఆడేందుకు వచ్చిన వారిని వీడియో తీస్తున్నారనే కారణంతో క్లబ్‌ నిర్వాహకులు కొందరిపై దాడిచేసినట్లు ఆరోపణలు ఉన్నాయి. నిర్వాహకుల ఫిర్యాదుతో పోలీసులు ఘటనాస్థలిని పరిశీలించి దర్యాప్తు చేపట్టారు.

Local· 1d ago

దాచేపల్లిలో మ్యాజిక్ డ్రైన్‌ నిర్మాణానికి శ్రీకారం

AP: పల్నాడు జిల్లా దాచేపల్లి పంచాయతీ పరిధిలో జనసేన సీనియర్‌ నాయకుడు నల్లబోతుల శ్రీనివాసరావు ఆధ్వర్యంలో మ్యాజిక్ డ్రైన్‌ నిర్మాణం చేపట్టారు. వర్షపాతం తగ్గిపోవడం, భూగర్భజలాలు పడిపోతున్న పరిస్థితుల్లో పవన్‌ కళ్యాణ్‌ సూచించిన విధానంలో మ్యాజిక్ డ్రైన్‌ నిర్మాణం చేపట్టినట్లు పేర్కొన్నారు. దాచేపల్లిలో తొలిసారిగా ఈ విధానాన్ని అమలు చేస్తున్నామని తెలిపారు. వర్షపునీటిని భూమిలోకి ఇంకింపజేయడం ద్వారా భూగర్భ జలాలను పెంచేందుకు ఇది ఉపయోగపడుతుందని వివరించారు. ప్రతిఇంటి వద్ద ఇలాంటి డ్రైన్‌ ఏర్పాటు చేసుకోవాలన్నారు.

▶

Local· 1d ago

డ్రైనేజీ లీకేజీతో రోడ్డుపై మురుగునీరు

AP: గుంటూరు పట్టణంలోని డొంక రోడ్డు మూడు వంతెనల కింద గత నాలుగైదు రోజులుగా డ్రైనేజీ లీకేజీతో మురుగునీరు రోడ్డుపై ప్రవహిస్తోంది. దీంతో వాహనదారులు తీవ్ర ఇబ్బందులు ఎదుర్కొంటున్నారు. స్వల్ప వర్షం కురిసినా వంతెనల కింద నీరు నిలిచిపోవడంతో రాకపోకలకు ఆటంకం ఏర్పడుతోంది. దుర్వాసనతో పాటు పారిశుద్ధ్య సమస్యలు కూడా తలెత్తుతున్నాయని స్థానికులు, వాహనదారులు ఆవేదన వ్యక్తం చేస్తున్నారు. గుంటూరు నగరపాలక సంస్థ అధికారులు స్పందించి డ్రైనేజీ లీకేజీని అరికట్టి, నీరు నిలిచిపోకుండా శాశ్వత పరిష్కారం చూపాలని కోరుతున్నారు.