Crime

Crime· 25 Jul 2026

మహిమ చెంబుల మాయాజాలం బట్టబయలు

AP: శ్రీ సత్యసాయి జిల్లా నల్లచెరువు మండలంలో మహిమ గల రాగి చెంబుల పేరుతో అమాయకులను మోసం చేసి లక్షలు దోచుకునేందుకు కుట్ర పన్నిన 8 మందిని పోలీసులు అరెస్ట్ చేశారు. ప్రత్యేక రసాయనాలు పూసిన రాగి చెంబుకు టార్చ్ వెలిగించగానే బల్బు ఫిలమెంట్ కాలిపోవడాన్ని "మహిమ"గా చూపించి, వాటికి అతీంద్రియ శక్తులు ఉన్నాయని నమ్మించి భారీ మొత్తాలకు విక్రయించాలని యత్నించినట్లు విచారణలో తేలింది. నిందితుల వద్ద నుంచి 4 రాగి చెంబులు, 2 టార్చ్ లైట్లు, 8 మొబైల్ ఫోన్లు, బలెనో కారు, హోండా మాస్ట్రో స్కూటీ, నగదు స్వాధీనం చేసుకున్నారు.

Crime· 25 Jul 2026

ఆదివాసీ మహిళకు షాకింగ్ ట్విస్ట్

TG: ఆదిలాబాద్ జిల్లా గుడిహత్నూర్ మండలం జవహర్‌నగర్‌కు చెందిన హీరకుమ్ర లక్ష్మికి ఇందిరమ్మ ఇల్లు పథకం దరఖాస్తులో ఊహించని షాక్ ఎదురైంది. ఆన్‌లైన్ రికార్డుల్లో ఆమె పేరుపై ఇప్పటికే ఇల్లు మంజూరై, రూ.51,200 విడుదలైనట్లు నమోదైంది. అయితే వాస్తవానికి ఆమెకు ఎలాంటి ఇల్లు లేదు. దీంతో కొత్తగా దరఖాస్తు చేసినా L3 జాబితాలో నిలిచిపోయింది. గతంలో హౌసింగ్ అధికారులు రేషన్‌కార్డ్ వివరాలను దుర్వినియోగం చేసి అక్రమంగా నిధులు మళ్లించారనే అనుమానాలు వ్యక్తమవుతున్నాయి. కలెక్టర్ జోక్యం చేసుకుని ఇల్లు ఇప్పించాలని ఆమె కోరింది.

Crime· 25 Jul 2026

బాలికపై మేనమామ, సోదరుల లైంగిక దాడి

TG: మేడ్చల్ జిల్లా కీసర పోలీస్ స్టేషన్ పరిధిలో గంజాయి మత్తులో ఉన్న మేనమామ, వరసకు సోదరులయ్యే ఇద్దరు వ్యక్తులు మహారాష్ట్రకు చెందిన బాలిక(13)పై అత్యాచారం చేశారు. బాలిక తల్లిదండ్రులు మరణించడంతో అమ్మమ్మ వద్ద ఉంటూ హాస్టల్‌లో చదువుకుంటుంది. సెలవుల్లో ఇంటికి వచ్చిన ఆమె ఒంటరిగా ఉండటం చూసి లైంగిక దాడి చేశారు. పోలీసులు ఒక నిందితుడిని అదుపులోకి తీసుకున్నారు. పరారీలో ఉన్న ఇద్దరి కోసం గాలిస్తున్నారు.

Crime· 25 Jul 2026

గన్‌తో బెదిరించి.. ATMను ఎత్తుకెళ్లిన ముఠా

AP: అన్నమయ్య జిల్లా మదనపల్లెలో అర్ధరాత్రి దొంగలు SBI ATMను ఎత్తుకెళ్లిన ఘటన కలకలం రేపింది. ఇండస్ట్రియల్ ఎస్టేట్‌లోని ఏటీఎంను బొలెరో వాహనంలో తీసుకెళ్లిన దుండగులు, అడ్డుకునేందుకు ప్రయత్నించిన స్థానికులను తుపాకీతో బెదిరించి పరారయ్యారు. దాంట్లో రూ.10 నుంచి రూ.13 లక్షల వరకు నగదు ఉన్నట్లు సమాచారం. అనంతరం మిషన్‌ను మరో కంటైనర్‌లోకి మార్చినట్లు పోలీసులు గుర్తించారు. స్థానికులు సెల్‌ఫోన్లలో చిత్రీకరించిన వీడియోలు, CC ఫుటేజీల ఆధారంగా నిందితుల కోసం ప్రత్యేక బృందాలు గాలింపు చేపట్టాయి.

Crime· 25 Jul 2026

పేపర్ లీక్ కేసులో సంచలనం.. గుప్తా అరెస్ట్

మహారాష్ట్ర టెట్ పేపర్ లీక్ కేసులో ప్రధాన నిందితుడిగా ఉన్న బిరేంద్ర కుమార్ గుప్తాను బీహార్ పోలీసులు అరెస్ట్ చేశారు. అనంతరం ఆయనను పుణె విమానాశ్రయానికి తీసుకువచ్చి భివాండి పోలీసులకు అప్పగించేందుకు చర్యలు చేపట్టారు. టెట్ పరీక్షల నిర్వహణలో జరిగిన అక్రమాలపై ఈ కేసు నమోదు కాగా, గుప్తా పాత్రపై పోలీసులు లోతుగా విచారణ చేపట్టనున్నారు. ఈ కేసులో మరికొందరి ప్రమేయం కూడా ఉన్నట్లు అనుమానాలు వ్యక్తమవుతున్నాయి. బాధ్యులపై కఠిన చర్యలు తీసుకుంటామని అధికారులు తెలిపారు.

Crime· 25 Jul 2026

దేశాన్ని కుదిపేస్తున్న విద్యార్థుల ఆత్మహత్యలు

NCRB నివేదిక ప్రకారం 2014 నుంచి 2024 వరకు దేశవ్యాప్తంగా 1,23,918 మంది విద్యార్థులు ఆత్మహత్య చేసుకున్నారు. ఈ కాలంలో విద్యార్థుల ఆత్మహత్యలు 80 శాతం పెరిగి, 2014లో 8,068 నుంచి 2024లో 14,488కు చేరాయి. కుటుంబ సమస్యలు ప్రధాన కారణంగా నిలవగా, పరీక్షల్లో వైఫల్యం కారణంగా 25 వేలకుపైగా మంది ప్రాణాలు తీసుకున్నట్లు నివేదిక వెల్లడించింది. విద్యా సంస్థల్లో పెరుగుతున్న అకాడమిక్ ఒత్తిడి కూడా కీలక కారణంగా పేర్కొంది. మహారాష్ట్రలో అత్యధిక కేసులు నమోదవగా, ఉత్తరప్రదేశ్, తమిళనాడు, తదుపరి స్థానాల్లో ఉన్నాయి.

▶

Crime· 24 Jul 2026

భార్య హత్య.. భర్తపై ఆరోపణలు

AP: అన్నమయ్య జిల్లా పెద్దతిప్పసముద్రం మండలం కొత్తపల్లిలో పద్మావతి అనే మహిళ హత్యకు గురైంది. ఈ ఘటనలో ఆమె భర్త సురేష్‌పై కుటుంబ సభ్యులు ఆరోపణలు చేశారు. 'తల్లికి వందనం' పథకం కింద వచ్చిన డబ్బు విషయంలో జరిగిన వివాదమే హత్యకు కారణమని మృతురాలి తల్లి కళావతి ఆరోపించారు. ఘటనపై పోలీసులు కేసు నమోదు చేసి దర్యాప్తు చేపట్టారు.

Crime· 24 Jul 2026

జనగాం జిల్లాలో ఘోర ప్రమాదం

TG: జనగాం జిల్లా పాలకుర్తి మండలం బమ్మెర శివారులో జరిగిన రోడ్డు ప్రమాదంలో ఇద్దరు యువకులు మృతి చెందారు. రోడ్డుపై నిలిపి ఉన్న లారీని వేగంగా వచ్చిన బైక్ ఢీకొనడంతో ఈ విషాదం చోటుచేసుకుంది. ప్రమాదంలో నర్సింగపురం తండాకు చెందిన కేతావత్ నరేందర్, బాదావత్ తిరుపతి స్పాట్‌లోనే చనిపోయారు. సమాచారం అందుకున్న పోలీసులు ఘటనాస్థలానికి చేరుకుని మృతదేహాలను పోస్టుమార్టం నిమిత్తం ఆస్పత్రికి తరలించారు. కేసు నమోదు చేసి దర్యాప్తు చేపట్టారు.

Crime· 24 Jul 2026

సూసైడ్ నోట్‌ రాసి ఏఎన్‌ఎం ఆత్మహత్య

AP: నెల్లూరు జిల్లా చిల్లకూరు మండలం తోనుకుమల గ్రామ సచివాలయంలో ఏఎన్‌ఎంగా పనిచేస్తున్న సాయి చందన ప్రియ(27) సచివాలయంలో ఎవరూ లేని సమయంలో ఉరేసుకుని ఆత్మహత్యకు పాల్పడ్డారు. పోలీసులు అక్కడికి చేరుకుని మృతదేహాన్ని పోస్టుమార్టం కోసం హాస్పిటల్‌కు తరలించారు. సచివాలయంలో లభించిన సూసైడ్ నోట్‌లో తండ్రి వైద్యం కోసం తన ఇన్సూరెన్స్ అమౌంట్‌ను కుటుంబ సభ్యులు క్లెయిమ్ చేసుకోవాలని కోరినట్లు పోలీసులు తెలిపారు.

Crime· 24 Jul 2026

సస్పెండ్ అయిన తహసీల్దార్ ఆత్మహత్య

AP: అన్నమయ్య జిల్లా కలెక్టరేట్‌లో PGRS విభాగంలో పనిచేస్తున్న తహసీల్దార్ శ్రీనివాసులు గురువారం చిత్తూరు సమీపంలోని సిద్ధంపల్లె వద్ద రైలు కింద పడి ఆత్మహత్య చేసుకున్నట్లు పోలీసులు తెలిపారు. గతంలో లక్కిరెడ్డిపల్లి మండలంలో తహసీల్దార్‌గా పనిచేసిన ఆయనపై వచ్చిన అభియోగాలపై ఇటీవల ఉన్నతాధికారులు విచారణ చేసి సస్పెండ్ చేశారు. ఘటనపై రైల్వే పోలీసులు కేసు నమోదు చేసి మృతదేహాన్ని పోస్టుమార్టం కోసం ఆస్పత్రికి తరలించారు. కేసు నమోదు చేసి దర్యాప్తు చేపట్టారు.

Crime· 23 Jul 2026

ఆత్మహత్యకు ముందు షాకింగ్ సూసైడ్ నోట్

TG: రాజన్న సిరిసిల్ల జిల్లా ఎల్లారెడ్డిపేట మండలం రాచర్ల గొల్లపల్లి గ్రామంలో పిట్ల వంశీ అనే యువకుడు ఆత్మహత్య చేసుకున్న ఘటన తీవ్ర కలకలం రేపింది. బుధవారం రాత్రి ఇంట్లో ఉరివేసుకుని మృతి చెందిన యువకుడు, ఆత్మహత్యకు ముందు SIR ఫాం మీద రాసిన సూసైడ్ నోట్‌లో తన చావుకు ప్రధాని మోడీ కారణమని పేర్కొన్నాడు. అలాగే తన కుటుంబసభ్యులను ఎవరూ ఇబ్బంది పెట్టవద్దని, అంత్యక్రియలను ఆనవాయితీ ప్రకారం నిర్వహించాలని కోరాడు. పోలీసులు ఘటనాస్థలానికి చేరుకుని కేసు నమోదు చేసి దర్యాప్తు చేపట్టారు. మృతదేహాన్ని పోస్టుమార్టం నిమిత్తం సిరిసిల్ల ప్రభుత్వ ఆసుపత్రికి తరలించారు.

Crime· 23 Jul 2026

డీజీపీ కార్యాలయంలో కానిస్టేబుల్ ఆత్మహత్య

TG: ఉదయం లక్డీ-కా-పుల్‌లోని డీజీపీ కార్యాలయంలోని వాష్‌రూమ్‌లో స్వామి అనే కానిస్టేబుల్ తన సర్వీస్ రివాల్వర్‌తో కాల్చుకుని ఆత్మహత్య చేసుకున్నాడు. అతని దగ్గర లభించిన లేఖలో 'తన భార్యాపిల్లల గురించి ఎవరూ ఏమీ అనకూడదని, తాను చనిపోయి దెయ్యంగా మారినా వారిని చూసుకుంటూనే ఉంటానని, వారు మంచివారని' రాశాడు. పోలీసులు మృతదేహాన్ని పోస్ట్‌మార్టం కోసం ఉస్మానియా జనరల్ హాస్పిటల్‌కు తరలించారు. దీనిపై విచారణ కొనసాగుతోంది.

Crime· 23 Jul 2026

అవినీతి ముత్యం అక్రమాస్తుల చిట్టా బట్టబయలు

తెలంగాణ రెడ్కో DE ముత్యం వెంకటరమణ అవినీతి కేసులో ACB అధికారులు భారీగా అక్రమ ఆస్తులను గుర్తించారు. ఆదాయానికి మించి రూ.100 కోట్లకు పైగా ఆస్తులు ఉన్నట్లు ప్రాథమికంగా తేలడంతో ఆయనను అరెస్టు చేశారు. హైదరాబాద్, ఖమ్మం జిల్లాల్లో పది ప్రాంతాల్లో ఏకకాలంలో సోదాలు నిర్వహించిన అధికారులు నాలుగు ఫ్లాట్లు, రెండు వాణిజ్య భవనాలు, రూ.52 లక్షల బ్యాంకు డిపాజిట్లు, రెండు కిలోల బంగారం, విలువైన వాహనాలను సీజ్ చేశారు. సోదాల్లో భారీగా నగదు, ఆస్తి పత్రాలు స్వాధీనం చేసుకున్నారు. ACB లెక్కల ప్రకారం ఆస్తుల విలువ రూ.27.65 కోట్లు కాగా, మార్కెట్ విలువ రూ.400 కోట్ల వరకు ఉంటుందని అంచనా వేశారు.

Crime· 23 Jul 2026

కోట్లు కాజేసిన ఘరానా మోసగాడు అరెస్ట్

AP: స్టాక్ మార్కెట్ ట్రేడింగ్, క్రిప్టో కరెన్సీలో పెట్టుబడులు పెడితే నెలకు 10 నుంచి 20 శాతం లాభాలు వస్తాయని ఆశ చూపి రూ.15 కోట్లు మోసం చేసిన అంతర్రాష్ట్ర ఘరానా మోసగాడిని కడప రిమ్స్ పోలీసులు అరెస్టు చేశారు. తెలంగాణలోని భద్రాచలం పట్టణానికి చెందిన కిచ్చా వీరభద్రరావు అలియాస్ కేవీ రావు హైదరాబాద్ కేంద్రంగా నకిలీ ట్రేడింగ్ సంస్థలు నడుపుతూ AP, తెలంగాణ, హర్యానా రాష్ట్రాల్లో పలువురిని మోసం చేసినట్లు తెలిపారు. కడపకు చెందిన ఇద్దరు మహిళలను రూ.55 లక్షల నమ్మించి మోసం చేసిన కేసులో అతడిని పట్టుకున్నారు. నిందితుడిపై మూడు రాష్ట్రాల్లో కేసులు నమోదైనట్లు వెల్లడించారు.

Crime· 22 Jul 2026

సెల్‌ఫోన్ పేలి బాలుడు మృతి

TG: ఆసిఫాబాద్ జిల్లా చింతామానేపల్లి మండలం గూడెం గ్రామంలో ఓ బాలుడు సెల్‌ఫోన్‌తో ఆడుకుంటుండగా అది పేలింది. దీంతో లోకేష్(14) తీవ్రంగా గాయపడ్డాడు. పేలుడు ధాటికి ముఖం ఛిద్రం కావడంతో ఆసుపత్రికి తరలించగా చికిత్స పొందుతూ మృతిచెందాడు.

▶

Crime· 22 Jul 2026

మద్యం మత్తులో కత్తితో హల్‌చల్

కర్ణాటకలోని మూడబిద్రి బస్టాండ్ దగ్గర మద్యం మత్తులో ఓ యువకుడు కత్తితో హల్‌చల్ చేశాడు. మొబైల్ షాప్‌లోకి వెళ్లి షాప్ యజమానిని బెదిరిస్తూ మొబైల్ ఇవ్వాలని డిమాండ్ చేశాడు. కత్తితో షాప్ ముందున్న స్తంభాలను కూడా కొట్టాడు. ఈ ఘటన అక్కడి CCTVలో రికార్డ్ అయింది. స్థానికులు యువకుడిని చుట్టుముట్టి కత్తిని లాక్కొని పట్టుకున్నారు. పోలీసులు అతడిని అరెస్ట్ చేసి కేసు నమోదు చేశారు.

Crime· 22 Jul 2026

ఇండిగో ఉద్యోగినిపై క్యాబ్ డ్రైవర్ అత్యాచారయత్నం

TG : శంషాబాద్‌లోని రాజీవ్ గాంధీ ఎయిర్ పోర్ట్ లో నైట్ డ్యూటీకి క్యాబ్ లో వెళ్తున్న ఇండిగో ఎయిర్‌లైన్స్ ఉద్యోగినిని ఎవరూ లేని చోటికి తీసుకెళ్లి క్యాబ్ డ్రైవర్, ఆమెపై అత్యాచారయత్నం చేశాడు. ఆమె ధైర్యంతో అతడిపై ఎదురుతిరిగింది , ఎక్కడ దొరుకుతాననే భయంతో డ్రైవర్ తన కారుతో పారిపోయాడు. బాధితురాలు శంషాబాద్ ఎయిర్ పోర్టు ఔట్ పోస్టు పోలీసులకు పిర్యాదు చేసింది. పోలీసులు నిందితుడి కోసం గాలిస్తున్నారు.

Crime· 22 Jul 2026

కుటుంబాన్ని బంధించి 66 తులాల బంగారం చోరీ

TG: కరీంనగర్‌లో మంగళవారం అర్ధరాత్రి భారీ దోపిడీ ఘటన కలకలం రేపింది. భగత్ నగర్‌కు చెందిన వృద్ధుడు అజ్మత్ అలీ ఇంట్లోకి చొరబడిన దుండగులు కుటుంబ సభ్యులను బంధించి, తుపాకులు, కత్తులతో బెదిరించి 66 తులాల బంగారం, రూ.21 లక్షల నగదు, 10 తులాల వెండిని దోచుకెళ్లారు. అరుపులు వినపడకుండా TV సౌండ్ పెట్టి బాధితులను తీవ్రంగా కొట్టి గదిలో బంధించారు. మొబైల్ ఫోన్లు తీసుకెళ్లిన దుండగులు కింద పార్కింగ్‌లో ఉన్న రెండు బైకులను కూడా దొంగిలించి వేములవాడ బైపాస్ వైపు పారిపోయినట్లు పోలీసులు తెలిపారు. కేసు నమోదు చేసి దర్యాప్తు ముమ్మరం చేశారు.