Crime

Crime· 30 Jul 2026

గంజాయి తాగిన యువకులకు పోలీసులు షాక్

TG: LBనగర్‌లో గంజాయి సేవిస్తున్న ఇద్దరు యువకులను ఈగల్ ఫోర్స్ నార్కోటిక్స్ పోలీసులు అరెస్టు చేశారు. వనస్థలిపురం PS పరిధిలోని సాహెబ్‌నగర్ బాల్‌రెడ్డి గ్రౌండ్ సమీపంలో దాడిచేసి పట్టుకున్నారు. చింతల్‌కుంట సరస్వతీనగర్‌కు చెందిన గుర్రపు హర్ష్ రోహిత్, వనస్థలిపురం పోలీస్ కాలనీకి చెందిన కోట కృపాకర్ గంజాయి సేవిస్తున్నట్లు గుర్తించి అదుపులోకి తీసుకున్నారు. వారిపై కేసు నమోదు చేసి దర్యాప్తు చేపట్టారు. స్నేహితుల ప్రభావంతోనే గంజాయికి అలవాటు పడ్డామని విచారణలో వారు వెల్లడించినట్లు పోలీసులు తెలిపారు.

Crime· 30 Jul 2026

చెరువులో మునిగిన ఇద్దరు చిన్నారులు

AP: పల్నాడు జిల్లా అమరావతి మండలం ఎండ్రాయి గ్రామంలోని వేదపాఠశాలకు చెందిన ఇద్దరు విద్యార్థులు ఈతకు వెళ్లి చెరువులో మునిగి ప్రాణాలు కోల్పోయారు. తోటి విద్యార్థులతో కలిసి చెరువు వద్దకు వెళ్లిన బమ్మిడి శివ, కొడవటికంటి కిరణ్ ఈత కొడుతుండగా లోతైన నీటిలో చిక్కుకుని మునిగిపోయారు. సమాచారం అందుకున్న పోలీసులు, స్థానికులు గాలింపు చర్యలు చేపట్టగా అప్పటికే ఇద్దరూ మృతి చెందినట్లు గుర్తించారు. మృతదేహాలను వెలికితీసి పోస్టుమార్టం నిమిత్తం ఆస్పత్రికి తరలించారు.

Crime· 30 Jul 2026

షేర్ మార్కెట్ పెట్టుబడుల పేరుతో భారీ మోసం

హైదరాబాద్ చైతన్యపురిలోని న్యూమారుతీనగర్‌కు చెందిన రిటైర్డ్ ప్రభుత్వ ఉద్యోగి భట్టు స్వరాజ్‌కుమార్ షేర్ మార్కెట్‌లో భారీ లాభాల పేరుతో సైబర్ మోసగాళ్ల వలలో చిక్కుకుని రూ.74 లక్షలు కోల్పోయారు. ఆల్ఫా ఇన్వెస్టర్స్ పేరుతో వాట్సాప్ గ్రూప్ సృష్టించిన నిందితులు నకిలీ లాభాల వివరాలు చూపించి బాధితుడిని నమ్మించారు. దశలవారీగా పెట్టుబడులు పెట్టించిన తర్వాత డబ్బు విత్‌డ్రా చేసేందుకు మరిన్ని చెల్లింపులు కోరడంతో మోసం వెలుగులోకి వచ్చింది. బాధితుడి ఫిర్యాదుతో సైబర్ క్రైమ్ పోలీసులు కేసు నమోదు చేసి దర్యాప్తు చేపట్టారు.

Crime· 29 Jul 2026

ఉదయ్ కృష్ణా రెడ్డిది దారుణమైన ప్రవర్తన - సీపీ

మహిళా ట్రైనీ ఐపీఎస్ పై లైంగిక వేధింపులకు పాల్పడిన ట్రైనీ ఉదయ్ కృష్ణారెడ్డిపై షాకింగ్ వివరాలు బయటకొచ్చాయి. బాధితురాలిని ఆరు వారాల పాటు వేధించడమేకాక ఆమె ఫోన్ లాక్కుని పాస్ వర్డ్ అడగడం, గదిలో బంధించడం, జుట్టు పట్టుకు లాగడం, గొంతు నులిమి చంపేందుకు ప్రయత్నించడం,కత్తితో బెదిరించడం లాంటి దారుణాలకు పాల్పడ్డాడని సీపీ సజ్జనార్ తెలిపారు. ఆమె ప్రైవేట్ వీడియో రికార్డు చేసి భర్తకు పంపి బ్లాక్ మెయిల్ చేశాడని అన్నారు. పోలీస్ అకాడమీలో ఇలాంటివి జరగడం కలకలం రేపుతోంది.

Crime· 29 Jul 2026

సర్కస్‌లో స్టంట్ చేస్తూ యువకుడు మృతి

హర్యానాలోని నుహ్ జిల్లాలో సర్కస్ చూపిస్తూ దీపక్(27) అనే యువకుడు ప్రాణాలు కోల్పోయాడు. సర్కస్ చివరి రోజున 'సజీవ సమాధి' అనే స్టంట్ కోసం దీపక్‌ను ఒక సంచిలో పెట్టి గొయ్యిలో పూడ్చారు. 24 గంటల తర్వాత అతన్ని బయటకు తీయాలి. కానీ ప్రేక్షకుల నుంచి రూ. 7,100 కలెక్షన్ వస్తేనే తీస్తామని నిర్వాహకులు చెప్పారట. దీంతో 36 గంటల పాటు దీపక్ లోపలే ఊపిరాడక చనిపోయాడు. చివరికి గొయ్యి తీసి చూస్తే శవమై కనిపించాడు. పోలీసులు కేసు నమోదు చేసి విచారణ చేస్తున్నారు.

Crime· 29 Jul 2026

మహిళని చంపి ఆ డెడ్‌బాడీతో 350 కి.మీ. ప్రయాణం

మహారాష్ట్రలో దారుణ ఘటన జరిగింది. మరొకరితో సంబంధముందన్న అనుమానంతో లివ్-ఇన్ రిలేషన్‌షిప్‌లో ఉన్న మహిళను గొంతు నులిమి చంపాడు. హత్య చేసిన వ్యక్తిని పోలీసులు అరెస్టు చేశారు. కొల్హాపూర్ జిల్లాలోని షిర్గావ్ గ్రామానికి చెందిన ప్రకాష్ ఆనంద్ పాటిల్ (40) ఆదివారం తన పొలంలో సురేఖ శివాజీనే ఆరే (40)ను హత్య చేసినట్లు పోలీసులు తెలిపారు. తరువాత మృతదేహాన్ని కారులో 350 కి.మీ. దూరంలోని థానే జిల్లా భివండీలోని కషెలికి తరలించినట్లు వెల్లడించారు. కేసు నమోదు చేసి దర్యాప్తు కొనసాగిస్తున్నారు.

Crime· 29 Jul 2026

నీట్ పరీక్షలో ర్యాంకు రాలేదని విద్యార్థిని ఆత్మహత్య

TG: నీట్ పరీక్షలో ర్యాంకు రాలేదని భూపాలపల్లి(D) పలిమెల(M)పంకెనకు చెందిన వైష్ణవి ఆత్మహత్యకు పాల్పడింది. నీట్ పరీక్షలో తక్కువ మార్కులు రావడంతో తనకు ర్యాంక్ రాలేదు. దీంతో మనస్తాపానికి గురై గడ్డి మందు తాగింది. వెంటనే నిమ్స్ ఆసుపత్రికి తరలించగా అక్కడ చికిత్స పొందుతూ మృతి చెందినట్టు తండ్రి రాజయ్య తెలిపారు.

Crime· 29 Jul 2026

బ్యాంక్‌లోనే మోసం

TG: కామారెడ్డి జిల్లాలోని SBI బ్యాంక్‌లో మహిళను లక్ష్యంగా చేసుకున్న దుండగులు చాకచక్యంగా రూ.15వేల నగదును కాజేశారు. పాల్వంచ మండలం వాడి గ్రామానికి చెందిన పూజ బ్యాంకులో నగదు లెక్కపెడుతుండగా ఇద్దరు వ్యక్తులు డబ్బులు సరిగ్గా లెక్కపెడతామని నమ్మించారు. వారి మాటలు నమ్మిన ఆమె నగదు ఇవ్వగా, నోట్ల కట్టలో నుంచి రూ.15వేలు చాకచక్యంగా తీసేసి అక్కడి నుంచి పరారయ్యారు. కొద్దిసేపటి తర్వాత డబ్బు తక్కువగా ఉండటాన్ని గుర్తించిన బాధితురాలు పోలీసులకు ఫిర్యాదు చేసింది. CC ఫుటేజ్ ఆధారంగా నిందితుల కోసం గాలిస్తున్నారు.

Crime· 29 Jul 2026

కోర్టుకు వెళ్లకుండానే కేసు డిస్పోజ్

TG: "డ్రంక్ అండ్ డ్రైవ్ కేసు పడిందా? డబ్బులిస్తే అంతా మేం చూసుకుంటాం" కొందరు కరీంనగర్ ట్రాఫిక్ పోలీసుల స్కెచ్ ఇది. రూ.15 వేల లంచం తీసుకుని, ముద్దాయి కోర్టు ముఖం కూడా చూడకుండానే కేసు డిస్పోజ్ చేసేశారు. 2025 జనవరి నుంచి 2026 జూన్ వరకు 14 కేసుల్ని లంచాలతో క్లోజ్ చేసినట్లు తేలింది. ఇందు కోసం రూ.34,700 పైన లంచాలు తీసుకున్నారని బయటపడింది. RSI శ్రీకాంత్, కానిస్టేబుల్స్ సాయికృష్ణ, కిరణ్‌లను CP గౌస్ ఆలం సస్పెండ్ చేసినట్లు చెప్పారు. ఈ కేసు విచారణ ఇంకా కొనసాగుతోందన్నారు.

Crime· 29 Jul 2026

తల్లికి వందనం నిధులు కాజేసిన సైబర్ కేటుగాళ్లు అరెస్ట్

AP ప్రభుత్వం ఇటీవల 'తల్లికి వందనం' పథకం కింద లబ్ధిదారుల ఖాతాల్లో జమ చేసిన నిధులను లక్ష్యంగా చేసుకుని కర్నూలులో సైబర్ మోసం వెలుగుచూసింది. ఎయిర్‌టెల్ సిమ్ సేల్స్‌పర్సన్‌గా పనిచేస్తున్న ఉపేంద్ర, సిమ్ విక్రయాల సమయంలో బాధితుల ఆధార్, వేలిముద్రలు, బ్యాంకు వివరాలను సేకరించి వాటిని దుర్వినియోగం చేసినట్లు పోలీసులు గుర్తించారు. మొత్తం 28మంది ఖాతాల నుంచి డబ్బులు అక్రమంగా డ్రా చేసినట్లు విచారణలో తేలింది. బాధితుల ఫిర్యాదుతో నిందితులు ఉపేంద్ర, వీరారెడ్డిని పోలీసులు అదుపులోకి తీసుకుని విచారిస్తున్నారు.

▶

Crime· 29 Jul 2026

వేగంగా దూసుకొచ్చిన కారు

TG: మేడ్చల్ జిల్లా మూడుచింతలపల్లి మున్సిపాలిటీలోని అనంతారం గ్రామంలో ఘోర రోడ్డు ప్రమాదం జరిగింది. అనంతారానికి చెందిన జమాలుద్దీన్‌ బైక్‌పై వెళ్తుండగా, లక్ష్మాపూర్‌కు చెందిన వ్యక్తి నడుపుతున్న కారు మంగళవారం రాత్రి అతివేగంగా వచ్చి బైక్‌ను ఢీకొట్టింది. జమాలుద్దీన్ అక్కడికక్కడే ప్రాణాలు కోల్పోయారు. ఈ ప్రమాదం సమీపంలోని CCTV కెమెరాల్లో రికార్డవడంతో ఘటన తీవ్రత వెలుగులోకి వచ్చింది. సమాచారం అందుకున్న పోలీసులు మృతదేహాన్ని పోస్ట్‌మార్టం నిమిత్తం ఆస్పత్రికి తరలించారు. కేసు నమోదు చేసి దర్యాప్తు చేపట్టారు.

Crime· 29 Jul 2026

మహిళ ఫిర్యాదుతో CIపై వేటు

HYD జూబ్లీహిల్స్ PS ఇన్‌స్పెక్టర్ U.శ్రీనివాసులురెడ్డిని విధి నిర్వహణలో నిర్లక్ష్యం, తీవ్ర ఆరోపణల నేపథ్యంలో నగర పోలీస్ కమిషనర్ సస్పెండ్ చేశారు. ఫిర్యాదు చేసేందుకు వచ్చిన ఓ మహిళను మాయమాటలతో నమ్మించి సన్నిహితంగా మెలిగారని, ఫొటోలు, వీడియోలు తీసి డబ్బుల కోసం బెదిరించారని బాధితురాలు ఆరోపించింది. తనపై పలుమార్లు లైంగికదాడి చేసి అబార్షన్ చేయించారని ఫిర్యాదులో పేర్కొంది. మహిళే తనను బెదిరించి డబ్బులు వసూలు చేసిందని ఇన్‌స్పెక్టర్ వాదించినప్పటికీ, ఉన్నతాధికారులు అంతర్గత విచారణకు ఆదేశించి, సస్పెన్షన్ చేశారు.

Crime· 29 Jul 2026

నకిలీ DSP డ్రామా బట్టబయలు

AP: పల్నాడు జిల్లా యడవల్లి గ్రామానికి చెందిన కొత్తపల్లి ప్రదీప్ నకిలీ పోలీస్ అధికారిగా చలామణి అవుతూ భారీ మోసాలకు పాల్పడ్డాడు. తాను సైబర్ వింగ్ DSP అని బాధితులను నమ్మించి, సైబర్ మోసాల్లో పోయిన డబ్బు తిరిగి ఇప్పిస్తానని చెప్పి లక్షలు వసూలు చేశాడు. విద్యాసంస్థల్లో సైబర్ అవగాహన కార్యక్రమాలు నిర్వహిస్తూ విద్యార్థులతో పరిచయాలు పెంచుకుని ఉద్యోగాలు ఇప్పిస్తానని నమ్మించి డబ్బులు తీసుకున్నాడు. ఓ బాధితుడి ఫిర్యాదుతో అసలు నిజం బయటపడగా, అతడిపై ఒంగోలు PSలో కేసు నమోదు చేసి దర్యాప్తు చేపట్టారు.

▶

Crime· 28 Jul 2026

దావణగెరెలో దారుణం..టిప్పర్ ట్రక్‌ ప్రమాదంతో మృతి

కర్ణాటక రాష్ట్రం దావణగెరెలో దారుణం జరిగటింది. సరస్వతి నగర్‌కు చెందిన మంజునాథ్‌(50) తన ముందు వెళ్తున్న ట్రాక్టర్‌ను ఓవర్‌టేక్‌ చేయబోతుండగా, వెనుక నుంచి వచ్చిన టిప్పర్ ట్రక్‌ ఆయన్ని ఢీకొట్టింది. దీంతో ఆయన అక్కడికక్కడే మరణించాడు. పోలీసులు టిప్పర్ డ్రైవర్‌ను అదుపులోకి తీసుకున్నారు. ఘటనకు సంబంధించిన సీసీటీవీ ఫుటేజ్‌ను పరిశీలిస్తున్నారు.

Crime· 28 Jul 2026

భార్య హత్య.. లైవ్‌లో చూపించిన భర్త!

కర్ణాటకలోని బాగల్‌కోట్‌లో దారుణం జరిగింది. వివాహేతర సంబంధం ఉందనే అనుమానంతో ప్రవీణ్ అనే వ్యక్తి తన భార్య భాగ్యశ్రీని కర్రతో బాది, దుపట్టాతో ఉరేసి దారుణంగా హత్య చేశాడు. అంతేకాకుండా, ఉరికి వేలాడుతూ ప్రాణాల కోసం పోరాడుతున్న భార్యను ఆమె తల్లిదండ్రులకు వీడియో కాల్ చేసి లైవ్‌లో చూపించాడు. వారు వెంటనే పోలీసులకు సమాచారం అందించినప్పటికీ, పోలీసులు వచ్చేసరికి భాగ్యశ్రీ చనిపోయింది. ఈ ఘటనపై కేసు నమోదు చేసిన పోలీసులు నిందితుడు ప్రవీణ్‌ను అదుపులోకి తీసుకుని విచారిస్తున్నారు.

Crime· 28 Jul 2026

భార్యను ఉరితీసి వీడియో తీసిన భర్త

భార్యను హత్య చేస్తూ ఆ దృశ్యాలను ఆమె తల్లిదండ్రులకు వీడియో కాల్ చేసి చూపించిన కిరాతక ఘటన కర్ణాటకలో జరిగింది. బాగల్‌కోట్‌కు చెందిన ప్రవీణ్ భార్య భాగ్యశ్రీ(23)పై అనుమానంతో ఆమెను ఉరివేసి చంపాడు. ఆ వీడియోను స్నేహితులకు కూడా పంపాడు. భర్త వేధింపులు భరించలేక ఆమె పుట్టింటికి వెళ్లిపోయింది. బాగా చూసుకుంటానని నమ్మించి తీసుకొచ్చిన ప్రవీణ్ అదే రోజే ఈ దారుణానికి పాల్పడ్డాడు. పోలీసులు అతడిని అరెస్ట్ చేసి విచారణ చేస్తున్నారు.

Crime· 28 Jul 2026

నాలుగేళ్ల చిన్నారిపై హెడ్‌మాస్టర్ లైంగిక దాడి!

వరంగల్ జిల్లా వర్ధన్నపేట మండలంలో దారుణం జరిగింది. నాలుగేళ్ల చిన్నారిపై తాటికాయల భాస్కర్(50) అనే గవర్నమెంట్ స్కూల్ హెడ్‌మాస్టర్ లైంగిక దాడికి పాల్పడ్డాడు. ఇంటి ముందు ఆడుకుంటున్న పాపకి మాయమాటలు చెప్పి ఈ ఘోరానికి ఒడిగట్టాడు. చిన్నారి ఇచ్చిన సమాచారంతో ఆమె పేరెంట్స్ వర్ధన్నపేట పోలీసులకు కంప్లైంట్ చేశారు. హెడ్‌మాస్టర్‌పై పోక్సో కేసు ఫైల్ చేసిన పోలీసులు అతడి కోసం సెర్చ్ స్టార్ట్ చేశారు. అయితే ఊరిలోని కొందరు ఈ కేసును సైలెంట్‌గా కాంప్రమైజ్ చేయడానికి ట్రై చేస్తున్నట్లు టాక్ వినిపిస్తోంది.

▶

Crime· 27 Jul 2026

బాలుడు యూరిన్ చేశాడని టీచర్ కత్తితో దాడి

ఉత్తరప్రదేశ్‌ రాష్ట్రం వారణాసిలో ఓ ప్రైవేట్ స్కూల్లో దారుణ ఘటన జరిగింది. వాష్‌రూమ్‌కు వెళ్లేందుకు టీచర్ పర్మిషన్ ఇవ్వకపోవడంతో ఆ విద్యార్ధి ప్యాంట్‌లోనే యురీన్ పోసుకున్నాడు. ఐదేళ్ల బాలుడిని టీచర్ మరో గదికి తీసుకెళ్లి వేడి కత్తితో అతని ప్రైవేట్ భాగాన్ని కాల్చి, ఎవరికీ చెప్పొదంటూ బెదిరించింది. ఇంటికి వెళ్లిన బాలుడు జరిగిన విషయం తల్లిదండ్రులకు చెప్పడంతో వారు స్కూల్ ప్రిన్సిపాల్‌ను కలిశారు. ఎలాంటి స్పందన లేకపోవడంతో బాలుడి తల్లిదండ్రులు పోలీసులకు కంప్లైంట్ చేశారు.