Local

Local· 26 Aug 2026

ప్రవక్త బోధనలు ప్రతిఒక్కరికీ ఆదర్శం: ఎమ్మెల్సీ నవీన్ రెడ్డి

TG: మహమ్మద్ ప్రవక్త బోధించిన శాంతి, దయ, కరుణ, సోదరభావం ప్రతి ఒక్కరిలో ఉండాలని ఎమ్మెల్సీ నవీన్ రెడ్డి అన్నారు. రంగారెడ్డి జిల్లా కొత్తూరు మండలం జహంగీర్‌పీర్ దర్గాలో ఈద్ మిలాద్ ఉన్ నబీ పర్వదినాన్ని పురస్కరించుకుని నిర్వహించిన ప్రత్యేక ప్రార్థనల్లో ఆయన పాల్గొన్నారు. ఈ సందర్భంగా ప్రవక్త మహమ్మద్ అందించిన మానవతా సందేశాలను ఎమ్మెల్సీ కొనియాడారు. సమాజంలో శాంతి, సౌభ్రాతృత్వం పెంపొందించేందుకు ప్రవక్త చూపిన మార్గాన్ని ప్రతి ఒక్కరూ ఆదర్శంగా తీసుకోవాలని పిలుపునిచ్చారు.

Local· 26 Aug 2026

వెలిజర్లలో అంగడి బజార్ ప్రారంభం

TG: రంగారెడ్డి జిల్లా ఫరూక్‌నగర్ మండలం వెలిజర్ల గ్రామంలో వారాంతపు అంగడి బజార్ ప్రారంభమైంది. గ్రామ సర్పంచ్ బాబు నాయక్ బుధవారం అంగడి బజార్‌ను ప్రారంభించారు. ఇకపై ప్రతి బుధవారం గ్రామంలో అంగడి బజార్ కొనసాగుతుందని తెలిపారు. రైతులు తమ పంటలు, కూరగాయలు, ఇతర వ్యవసాయ ఉత్పత్తులను నేరుగా వినియోగదారులకు విక్రయించుకునే అవకాశం కల్పిస్తున్నట్లు చెప్పారు. మధ్యవర్తుల ప్రమేయం లేకుండా రైతులే నేరుగా విక్రయాలు నిర్వహించడం వల్ల ప్రజలకు తక్కువ ధరలకు నిత్యావసరాలు అందుబాటులోకి వస్తాయని పేర్కొన్నారు.

Local· 26 Aug 2026

చినుకు పడితే చిత్తడి.. ఆదివాసీలకు ఎంత కష్టమో!

అల్లూరి సీతారామరాజు జిల్లా పాడేరు ఏజెన్సీలో 244 పంచాయతీలు, 3600 గ్రామాలు. కానీ నేటికీ 2 వేలకు పైగా గ్రామాల్లో సీసీ రోడ్లు లేవు, డ్రైనేజీ అంటూ ఏదీ లేదు. 🏚️<br>వర్షం మొదలైతే చాలు – గ్రామాలు బురద మయం. ఆదివాసులు తీవ్ర ఇబ్బందులు. ఇక ఆరోగ్య పరిస్థితి అంటే.. డయేరియా, మలేరియా, టైఫాయిడ్ – వర్షాకాలం వస్తే ఈ వ్యాధులు బహుమతిగా వస్తాయి. ప్రాణాలు కూడా కోల్పోతున్నారు. ⚠️ ఐటిడిఏ "అభివృద్ధి పనులు చేస్తున్నాం" అంటోంది. కానీ ఆచరణలో అభివృద్ధి కనిపించడం లేదు. ఇప్పటికైనా మౌలిక సదుపాయాలు కల్పించాలి.

▶

Local· 26 Aug 2026

ఖాళీ బిందెలతో రోడ్డెక్కిన మహిళలు

AP: అనకాపల్లి జిల్లా రోలుగుంట మండల కేంద్రంలో గిరిజన మహిళలు తాగునీటి కోసం ఖాళీ బిందెలతో రోడ్డెక్కి ఆందోళనకు దిగారు. ఫ్లోరైడ్ ప్రభావిత గ్రామంగా ఉన్న రోలుగుంటలో తాగునీటి సరఫరా నిలిచిపోవడంతో ప్రజలు తీవ్ర ఇబ్బందులు ఎదుర్కొంటున్నారు. వరాహ నదిలో భూగర్భ జలాలు అడుగంటిపోవడంతో నీటి సరఫరాకు అంతరాయం ఏర్పడింది. దీంతో తక్షణమే ట్యాంకర్ల ద్వారా మంచినీటిని సరఫరా చేయాలని సీపీఎం నేతలు డిమాండ్ చేశారు. గ్రామంలో శాశ్వత తాగునీటి సమస్య పరిష్కారానికి సీఎస్ఆర్ నిధులు కేటాయించాలని కోరారు.

Local· 26 Aug 2026

ఇన్‌సర్వీస్‌ టీచర్లకు టెట్‌ మినహాయింపు ఇవ్వాలి

AP: ఇన్‌సర్వీస్‌ ఉపాధ్యాయులకు టెట్‌ నుంచి మినహాయింపు ఇవ్వాలని డిమాండ్ చేస్తూ యూటీఎఫ్‌ విశాఖపట్నం జిల్లా శాఖ ఆధ్వర్యంలో జిల్లా కేంద్రంలో నిరసన చేపట్టారు. ఈ సందర్భంగా నాయకులు మాట్లాడుతూ.. దీర్ఘకాలంగా విధులు నిర్వహిస్తున్న ఉపాధ్యాయుల సేవా అనుభవాన్ని ప్రభుత్వం పరిగణనలోకి తీసుకోవాలని కోరారు. టెట్‌ నిర్వహణ తప్పనిసరి చేస్తే అన్ని కేటగిరీలకు 40 శాతం మార్కులను ఉత్తీర్ణత ప్రమాణంగా నిర్ణయించాలని డిమాండ్ చేశారు. అలాగే పరీక్షను ఆన్‌లైన్‌ విధానంలో కాకుండా ఆఫ్‌లైన్‌ (ఓఎంఆర్‌) పద్ధతిలో నిర్వహించాలని కోరారు.

Local· 26 Aug 2026

కోదాడ వద్ద ఘోర రోడ్డు ప్రమాదం

TG : హైదరాబాద్-విజయవాడ నేషనల్ హైవేపై దొరకుంట (కోదాడ మండలం) దగ్గర యాక్సిడెంట్ జరిగింది. ఈ ప్రమాదంలో ఆరుగురు అక్కడికక్కడే చనిపోయారు. మృతుల్లో ముగ్గురు ఉమ్మడి కృష్ణా జిల్లాకు చెందినవారు. విజయవాడ పడమటి లంకకు చెందిన చెన్నకేశవులు నాగేంద్రబాబు, బేలిపోగు మేరీ కృష్ణతో పాటు తేలప్రోలు గ్రామానికి చెందిన యాసారపు చిన్ని ప్రాణాలు కోల్పోయారు. మిగతా ముగ్గురి వివరాలు తెలియాల్సి ఉంది.

Local· 26 Aug 2026

జడ్చర్లలో ఘనంగా ఈద్ మిలాద్ వేడుకలు

TG: ముహమ్మద్ ప్రవక్త జన్మదినాన్ని పురస్కరించుకుని మహబూబ్‌నగర్ జిల్లా జడ్చర్ల పట్టణంలో ముస్లిం సోదరులు ఈద్ మిలాద్ వేడుకలను ఘనంగా నిర్వహించారు. ఈ సందర్భంగా ప్రత్యేక ప్రార్థనలు చేపట్టి, ప్రవక్త మహమ్మద్ బోధించిన శాంతి, సోదరభావం, మానవత్వం, పరస్పర ప్రేమ వంటి సందేశాలను వివరించారు. సమాజంలో ప్రతి ఒక్కరూ శాంతియుతంగా, ఐకమత్యంతో జీవించాలని మత పెద్దలు పిలుపునిచ్చారు. అనంతరం ముస్లిం సోదరులు ఒకరికొకరు ఈద్ మిలాద్ శుభాకాంక్షలు తెలియజేసుకున్నారు.

Local· 26 Aug 2026

టెట్‌కు వ్యతిరేకంగా యూటీఎఫ్ పోరుబాట

AP TETను రద్దు చేయాలని డిమాండ్ చేస్తూ ఆంధ్రప్రదేశ్ ఐక్య ఉపాధ్యాయ ఫెడరేషన్ (యూటీఎఫ్) ఆధ్వర్యంలో నిరసన చేపట్టారు. సూళ్లూరుపేట, తడ, దొరవారిసత్రం మండల శాఖల ఆధ్వర్యంలో తిరుపతి జిల్లా సూళ్లూరుపేట తహసీల్దార్ కార్యాలయం ఎదుట ఆందోళన నిర్వహించారు. ఈ సందర్భంగా యూటీఎఫ్ నాయకులు మాట్లాడుతూ.. ఉపాధ్యాయులపై అదనపు పరీక్షల భారం మోపడం సరికాదని పేర్కొన్నారు. ఏపీ టెట్‌ విషయంలో ప్రభుత్వం పునరాలోచించి ఉపాధ్యాయులకు ఇబ్బందులు కలగకుండా నిర్ణయం తీసుకోవాలని డిమాండ్ చేశారు.

Local· 26 Aug 2026

తిరువూరులో ఘనంగా మిలాద్ ఉన్ నబీ వేడుకలు

AP: ఎన్టీఆర్ జిల్లా తిరువూరు పట్టణంలో మిలాద్ ఉన్ నబీ పర్వదిన వేడుకలను ముస్లిం సోదరులు భక్తిశ్రద్ధలతో నిర్వహించారు. పట్టణంలోని పలు మస్జిద్‌లలో ప్రత్యేక నమాజ్, ప్రార్థనలు చేపట్టారు. జామియా మస్జిద్ మతగురువు రిజ్వీ మహమ్మద్ ప్రవక్త బోధించిన శాంతి, సౌభ్రాతృత్వం, మానవత్వ విలువలను వివరించారు. ప్రవక్త మహమ్మద్ చూపిన మార్గాన్ని ఆదర్శంగా తీసుకుని ప్రతి ఒక్కరూ నిత్య జీవితంలో ప్రేమ, సహనం, సోదరభావాన్ని పాటించాలని పిలుపునిచ్చారు. మిలాద్ ఉన్ నబీ ప్రాముఖ్యతను వివరిస్తూ ప్రత్యేక ప్రార్థనలు నిర్వహించారు.

Local· 26 Aug 2026

వరుస బంగారు చోరీ కేసులు ఛేదింపు.. నిందితుడి అరెస్ట్

AP: శ్రీకాకుళం జిల్లాలోని ఇచ్చాపురం రూరల్ పోలీసులు బంగారు ఆభరణాల చోరీ కేసులను ఛేదించారు. సోంపేట మండలం ఇసుకలపాలెంకు చెందిన వాసుపల్లి తాతారావును అరెస్ట్ చేసి అతడి వద్ద నుంచి 16 తులాల బంగారు ఆభరణాలు, రూ.39 వేల నగదును స్వాధీనం చేసుకున్నారు. స్వాధీనం చేసుకున్న బంగారం విలువ రూ.28.43 లక్షలు కాగా, నగదుతో కలిపి మొత్తం రికవరీ విలువ రూ.28.82 లక్షలుగా ఉందని కాశీబుగ్గ డీఎస్పీ టి. భవాని తెలిపారు. ఇచ్చాపురం రూరల్, కవిటి, బారువ పోలీస్ స్టేషన్ల పరిధిలో నమోదైన ఏడు చోరీ కేసులను పోలీసులు ఛేదించారు.

Local· 26 Aug 2026

కార్మికుల సమస్యలను పరిష్కరించాలి

AP: కార్మికుల సంక్షేమ పథకాలను వెంటనే అమలు చేయడంతో పాటు ఏళ్లుగా పెండింగ్‌లో ఉన్న క్లెయిమ్‌లను తక్షణమే విడుదల చేయాలని ఏపీ ఎలక్ట్రికల్ వర్కర్స్ ట్రేడ్ యూనియన్ రాష్ట్ర అధ్యక్షుడు లింగమలు శ్రీనివాసరావు, ప్రధాన కార్యదర్శి బొజ్జ రామకృష్ణ డిమాండ్ చేశారు. తూర్పుగోదావరి జిల్లా రాజమండ్రి ప్రెస్‌క్లబ్‌లో నిర్వహించిన విలేకరుల సమావేశంలో వారు మాట్లాడారు. ఏపీ పోర్టల్ సక్రమంగా పనిచేయకపోవడంతో కార్మికులు తీవ్ర ఇబ్బందులు పడుతున్నారని, లేబర్ కార్డుల జారీ, రెన్యువల్స్ నిలిచిపోయాయని తెలిపారు.

Local· 26 Aug 2026

కారులో 129 కిలోల గంజాయి.. ఇద్దరి అరెస్ట్

TG: వరంగల్‌లో నార్కోటిక్స్‌ పోలీసులకు భారీగా గంజాయి పట్టుబడింది. వర్ధన్నపేట వద్ద వాహన తనిఖీలు నిర్వహిస్తున్న సమయంలో రూ.64.66 లక్షల విలువైన 129 కిలోల గంజాయిని పోలీసులు స్వాధీనం చేసుకున్నారు. ఈ ఘటనలో ఇద్దరిని అరెస్టు చేశారు. నిన్న సాయంత్రం 5.50 గంటల సమయంలో ఖమ్మం నుంచి వరంగల్‌ వైపు వెళ్తున్న కారును తనిఖీ చేయగా, వెనుక భాగంలో అక్రమంగా దాచిన 61 ప్యాకెట్ల గంజాయి గుర్తించారు. అరెస్టయిన వారిని కేరళకు చెందిన సయూజ్‌ సి.ఎస్‌ (33), బెసలేల్‌ సి. మాథ్యూ (38)గా గుర్తించారు.

Local· 26 Aug 2026

వీల్‌చైర్ లేక రోగిని భుజాలపై మోసుకెళ్లాల్సిన దుస్థితి

TG: వరంగల్ ఎంజీఎం ఆస్పత్రిలో కనీస వసతులు లేక రోగులు, వారి బంధువులు తీవ్ర ఇబ్బందులు ఎదుర్కొంటున్నారని ఆరోపణలు వెల్లువెత్తుతున్నాయి. ఆర్థోపెడిక్ సమస్యతో చికిత్స కోసం వచ్చిన ఓ రోగిని ఎక్స్‌రేకు తీసుకెళ్లేందుకు వీల్‌చైర్ అందుబాటులో లేకపోవడంతో బంధువులు అతడిని భుజాలపై మోసుకెళ్లాల్సి వచ్చింది. ఈ ఘటనతో ఆస్పత్రిలో వసతుల పరిస్థితిపై విమర్శలు వ్యక్తమవుతున్నాయి. అవసరమైన సంఖ్యలో వీల్‌చైర్లు, ఇతర మౌలిక సదుపాయాలు అందుబాటులో లేకపోవడంతో ప్రతిరోజూ రోగులు ఇబ్బందులు పడుతున్నారని బంధువులు ఆవేదన వ్యక్తం చేశారు.

Local· 26 Aug 2026

ఓటరు జాబితాలపై 27న గ్రామ సభలు, వార్డు సభలు

TG: ఓటరు జాబితాల ప్రత్యేక సమగ్ర సవరణలో భాగంగా ఈ నెల 27న జిల్లాలోని అన్ని పోలింగ్ కేంద్రాల పరిధిలో గ్రామసభలు, వార్డుసభలు నిర్వహించనున్నట్లు జిల్లా ఎన్నికల అధికారి, జగిత్యాల జిల్లా కలెక్టర్ బి. సత్యప్రసాద్ తెలిపారు. ఓటరు జాబితాల్లో పేర్లు, వివరాలను పరిశీలించుకుని అవసరమైన సవరణలు చేసుకోవాలని సూచించారు. అక్టోబర్ 1 నాటికి 18 ఏళ్లు నిండే యువత తప్పనిసరిగా ఫారం-6 ద్వారా ఓటరుగా నమోదు చేసుకోవాలని కోరారు. ఇప్పటికే నమోదైన ఓటర్ల వివరాల్లో మార్పులు, సవరణలు అవసరమైతే ఫారం-8ను వినియోగించుకోవచ్చన్నారు.

Local· 26 Aug 2026

పాకాలలో అరుదైన చేపల డేగ దర్శనం

వరంగల్ జిల్లా ఖానాపూర్ మండలం పాకాల బయోడైవర్సిటీ పార్కులో అరుదైన గ్రే హెడ్డెడ్ ఫిష్ ఈగిల్ (చేపల డేగ) సందడి చేసింది. బూడిదరంగు తల, మెడ, ముదురు గోధుమరంగు రెక్కలు, తెల్లటి దిగువ భాగంతో కనిపించిన ఈ అరుదైన పక్షి సందర్శకులను విశేషంగా ఆకట్టుకుంది. సాధారణంగా నీటి వనరుల పరిసర ప్రాంతాల్లో సంచరించే ఈగిల్ పాకాల అటవీ ప్రాంతంలో దర్శనమివ్వడం ఇక్కడి జీవ వైవిధ్యానికి నిదర్శనమని ఎఫ్‌ఎస్‌ఓ ధర్మ తెలిపారు. ఎకో టూరిజం వాచర్ జయప్రకాష్ ఈ పక్షిని తన కెమెరాలో అందంగా బంధించారు.

Local· 26 Aug 2026

ద్వారకుంట ప్రమాదంపై సీఎం తీవ్ర దిగ్భ్రాంతి

TG: సూర్యాపేట: కోదాడ మండలం ద్వారకుంట సమీపంలో జరిగిన ఘోర రోడ్డు ప్రమాదంపై ముఖ్యమంత్రి రేవంత్‌రెడ్డి దిగ్భ్రాంతి వ్యక్తం చేశారు. కంటైనర్‌ను ప్రైవేట్ ట్రావెల్స్ బస్సు ఢీకొన్న ఈ ప్రమాదంలో ఆరుగురు మృతి చెందడంపై విచారం వ్యక్తం చేస్తూ మృతుల కుటుంబాలకు ప్రగాఢ సానుభూతి తెలిపారు. ప్రమాదంలో గాయపడిన వారికి మెరుగైన వైద్యం అందేలా తక్షణ చర్యలు చేపట్టాలని అధికారులను ఆదేశించారు. క్షతగాత్రులకు అవసరమైన అన్ని వైద్య సేవలు అందేలా చూడాలని సూచించారు. ప్రమాద ఘటనకు సంబంధించిన వివరాలను అధికారులను అడిగి తెలుసుకున్నారు.

Local· 26 Aug 2026

బాలకృష్ణ చొరవతో తాగునీటి సమస్య పరిష్కారం

AP: సత్యసాయి జిల్లా హిందూపురం ఎమ్మెల్యే నందమూరి బాలకృష్ణ చొరవతో చిలమత్తూరు బీసీ కాలనీలో తాగునీటి సమస్య పరిష్కారానికి చర్యలు చేపట్టారు. రూ.7.5 లక్షలతో నూతన పైప్‌లైన్ నిర్మాణ పనులను ప్రారంభించారు. కాలనీవాసులు ఎదుర్కొంటున్న తాగునీటి ఇబ్బందులకు శాశ్వత పరిష్కారం కల్పించడమే లక్ష్యంగా పనులు చేపట్టినట్లు స్థానిక నాయకులు తెలిపారు. పైప్‌లైన్ పనులు పూర్తయితే కాలనీవాసులకు తాగునీటి సరఫరా మరింత మెరుగుపడుతుందని పేర్కొన్నారు. ఎమ్మెల్యే చొరవతో సమస్య పరిష్కారానికి నిధులు మంజూరుపై కాలనీవాసులు హర్షం వ్యక్తం చేశారు.

Local· 26 Aug 2026

ఫరూఖ్‌నగర్‌లో నేడు బ్లడ్ డొనేషన్ క్యాంప్

TG: ఈద్ మిలాద్ ఉన్ నబీ పర్వదినాన్ని పురస్కరించుకుని నేషనల్ హ్యూమన్ రైట్స్ యాంటీ క్రైమ్ &amp; యాంటీ కరప్షన్ బ్యూరో ఆధ్వర్యంలో రక్తదాన శిబిరం నిర్వహించనున్నారు. ఆగస్టు 26న మధ్యాహ్నం 1 గంట నుంచి సాయంత్రం 6 గంటల వరకు రంగారెడ్డి జిల్లా ఫరూఖ్‌నగర్ వాటర్ ట్యాంక్ వద్ద శిబిరం జరగనుంది. ‘బీ ఎ హీరో.. డొనేట్ బ్లడ్, సేవ్ లైవ్స్’ అనే సందేశంతో నిర్వహిస్తున్న కార్యక్రమంలో యువత, ప్రజలు పెద్ద సంఖ్యలో పాల్గొని రక్తదానం చేయాలని నిర్వాహకులు పిలుపునిచ్చారు.