Latest
ఓటర్లకు బిగ్ పవర్
ఎన్నికల అఫిడవిట్‌లో అభ్యర్థులు తప్పుడు సమాచారం ఇస్తే, ఓటర్లు నేరుగా క్రిమినల్ కేసులు పెట్టవచ్చని సుప్రీంకోర్టు సంచలన జడ్జిమెంట్ ఇచ్చింది. ప్రజా ప్రాతినిధ్య చట్టం సెక్షన్ 125A కింద ప్రైవేట్ వ్యక్తులు కంప్లైంట్ చేయకుండా CRPC సెక్షన్ 195(1) అడ్డుకోలేదని, పబ్లిక్ సర్వెంట్స్ మాత్రమే కాకుండా సాధారణ సిటిజన్స్ కూడా ఎలక్షన్ కమీషన్ గైడ్‌లైన్స్‌తో సంబంధం లేకుండా కోర్టును ఆశ్రయించవచ్చని స్పష్టం చేసింది. అయితే కర్ణాటక MLA శైలేంద్ర బెల్దాలేపై వేసిన కేసు ఆధారాలు లేకపోవడంతో కొట్టేసింది.
పాతబస్తీలో భారీ అగ్నిప్రమాదం!
TG: హైదరాబాద్ నగరంలోని పాతబస్తీలో మదీనా ప్రాంతంలో బాంబే హౌసరీలో భారీ అగ్నిప్రమాదం చోటుచేసుకుంది. మంటల నుంచి ఎక్కువగా పొగ వెలువడుతుండటంతో స్థానికులు ఉక్కిరిబిక్కిరి అవుతున్నారు. మంటలు ఇతర షాపులకు వ్యాపించకుండా ఫైర్ సిబ్బంది చర్యలు తీసుకుంటున్నారు. హోల్‌సేల్ క్లాత్ మార్కెట్ కావడంతో భారీగా ఆస్తి నష్టం జరిగే అవకాశం ఉందని అధికారులు భావిస్తున్నారు.
బతుకమ్మ వేడుకల్లో TPCC జనరల్ సెక్రటరీ
భద్రాద్రి కొత్తగూడెం జిల్లాలో కొత్తగూడెం నియోజకవర్గం పరిధిలో నిర్వహించిన బతుకమ్మ వేడుకల్లో TPCC జనరల్ సెక్రటరీ నాగసీతారాములు యాదవ్ పాల్గొన్నారు. మహిళలతో కలిసి బతుకమ్మ ఆడి, ఆడపడుచులకు బతుకమ్మ, దసరా పండుగ శుభాకాంక్షలు తెలిపారు. ఈ సందర్భంగా బతుకమ్మ పండుగ తెలంగాణ మహిళల ఆత్మగౌరవానికి ప్రతీక అని అన్నారు. మహిళల సంక్షేమం కోసం కాంగ్రెస్ ప్రభుత్వం అనేక పథకాలు అమలు చేస్తోందని తెలిపారు.
మండల స్థాయి కబడ్డీ పోటీలు ప్రారంభం
ములుగు జిల్లా గోవిందరావుపేట మండలంలో SFI, DYFI ఆధ్వర్యంలో నిర్వహిస్తున్న మండల స్థాయి కబడ్డీ పోటీలను SFI రాష్ట్ర ఉపాధ్యక్షుడు దామెర కిరణ్ ప్రారంభించారు. విద్యార్థులు చదువుతో పాటు క్రీడల్లోనూ రాణించాలని, క్రీడలు శారీరక దృఢత్వంతో పాటు క్రమశిక్షణ, ఐక్యత, పోరాట స్ఫూర్తిని పెంచుతాయని తెలిపారు. యువత చెడు అలవాట్లకు దూరంగా ఉండి క్రీడలపై ఆసక్తి పెంచుకోవాలని పిలుపునిచ్చారు. గ్రామీణ క్రీడాకారుల ప్రతిభను వెలికితీసేందుకు ఇలాంటి పోటీలు ఉపయోగపడతాయని పేర్కొన్నారు.
మహాధర్నాను విజయవంతం చేయాలి: CITU
నారాయణపేటలో CITU జిల్లా కమిటీ సభ్యుడు నరహరి ఆధ్వర్యంలో కార్మికుల హక్కుల సాధన కోసం అక్టోబర్ 25, 26 తేదీల్లో హైదరాబాద్‌లోని ఇందిరాపార్క్ వద్ద నిర్వహించనున్న మహాధర్నా పోస్టర్‌ను ఆవిష్కరించారు. ఈ సందర్భంగా నాలుగు లేబర్ కోడ్‌లను రద్దు చేయాలని, నెలకు కనీస వేతనం ₹.30,000 అమలు చేయాలని నరహరి డిమాండ్ చేశారు. స్కీమ్ వర్కర్లకు ఉద్యోగ భద్రత కల్పించాలని, కాంట్రాక్టు, ఔట్‌సోర్సింగ్ కార్మికులను క్రమబద్ధీకరించాలని కోరారు.
ట్రైనింగ్‌కు హాజరుకాని 23 మంది సస్పెండ్
గుంటూరులో ఈ నెల 17న నిర్వహించిన పీవో, ఏపీవో ట్రైనింగ్‌కు హాజరుకాని 23 మంది ఎంప్లాయీస్‌పై కలెక్టర్ సాయికాంత్ వర్మ సీరియస్ అయ్యారు. ఎలక్షన్ డ్యూటీస్ ట్రైనింగ్‌కి అటెండ్ అవ్వని వీరందరినీ సస్పెండ్ చేస్తూ ఆర్డర్స్ జారీ చేశారు. ఎన్నికల విషయంలో నిర్లక్ష్యం చేస్తే చర్యలు తప్పవనే మెసేజ్‌ను అడ్మినిస్ట్రేషన్ ఈ యాక్షన్‌తో ఇచ్చింది.
కార్మిక వ్యతిరేక లేబర్ కోడ్‌లను రద్దు చేయాలి
పల్నాడు జిల్లా నరసరావుపేట ధర్నా చౌక్ వద్ద సోమవారం కార్మిక సంఘాల ఆధ్వర్యంలో కరపత్రాలను ఆవిష్కరించారు. 8 గంటల పని విధానాన్ని కొనసాగించాలని, నాలుగు లేబర్ కోడ్‌లను రద్దు చేసి 44 కార్మిక చట్టాలను అమలు చేయాలని డిమాండ్ చేశారు. మహిళలకు రాత్రి షిఫ్టులను ఎత్తివేయాలని కోరారు. విశాఖ స్టీల్ ప్లాంట్, మెడికల్ కాలేజీల ప్రైవేటీకరణను వ్యతిరేకించారు. కార్మికులు, రైతులకు వ్యతిరేకంగా ఉన్న విధానాలను ప్రజలంతా ఖండించాలని కార్మిక సంఘాల నాయకులు పిలుపునిచ్చారు.
కోనేరులోకి దూసుకెళ్లిన కారు
TG: రంగారెడ్డి జిల్లా మహేశ్వరంలోని శివగంగ రాజరాజేశ్వర ఆలయ కోనేరులోకి ఇన్నోవా క్రిస్టా కారు దూసుకెళ్లి నీటిలో మునిగిపోయింది. వెంటనే అప్రమత్తమైన డ్రైవర్ డోర్ తెరిచి బయటకు రావడంతో ప్రమాదం తప్పింది. కారులో డ్రైవర్ ఒక్కరే ఉండటంతో ప్రాణనష్టం జరగలేదు. కారు అదుపుతప్పి కోనేరులోకి దూసుకెళ్లడానికి అతివేగమే కారణమని స్థానికులు చెబుతున్నారు.
ఎక్సర్‌సైజ్ చేసినా ఈ జాగ్రత్తలు తప్పనిసరి
ఎక్కువసేపు కూర్చోవడం వలన గుండె ఆరోగ్యంపై ప్రభావం చూపుతుందని వైద్యులు హెచ్చరిస్తున్నారు. రోజూ వ్యాయామం చేసినా 8–10 గంటలు కదలకుండా కూర్చోవడం మంచిది కాదంటున్నారు. BP, షుగర్, కొలెస్ట్రాల్, స్మోకింగ్, స్ట్రెస్, అధిక బరువు గుండె జబ్బుల ముప్పును పెంచుతాయి. చక్కెర తగ్గించి, ఆరోగ్యకరమైన ఆహారం తీసుకోవడంతో పాటు తగిన నిద్ర, రోజువారీ వ్యాయామం అలవాటు చేసుకోవాలి. BP, షుగర్, కొలెస్ట్రాల్ టెస్టులు రెగ్యులర్‌గా చేయించుకోవాలని డాక్టర్స్ సూచిస్తున్నారు.
బంజారా భవన్ నిర్మించాలని మంత్రికి వినతి
సిద్దిపేట జిల్లా అక్కన్నపేట మండలంలో బంజారా భవన్ నిర్మాణానికి అనుమతులు, నిధులు మంజూరు చేయాలని బంజారా నాయకులు మంత్రి పొన్నం ప్రభాకర్‌ను కోరారు. అక్కన్నపేట సర్పంచ్‌ల ఫోరం అధ్యక్షుడు బాణోతు వెంకట్ ఆధ్వర్యంలో పలువురు సర్పంచ్‌లు, నాయకులు కరీంనగర్‌లోని మంత్రి క్యాంపు కార్యాలయంలో ఆయనను కలిశారు. బంజారా సంప్రదాయాలు, సంస్కృతిని పరిరక్షించడంతో పాటు సామాజిక సమావేశాలు, వివిధ కార్యక్రమాల నిర్వహణకు ప్రత్యేక భవనం అవసరమని వివరించారు.
బతుకమ్మ వేడుకల్లో మహిళల తిప్పలు
మహబూబాబాద్‌లో సద్దుల బతుకమ్మ రోజు సెంట్రల్ లైటింగ్ లేకపోవడంతో మహిళలు తీవ్ర ఇబ్బందులు పడ్డారు. ఎన్టీఆర్ స్టేడియంలో వేడుకల తర్వాత నిజాం చెరువులో నిమజ్జనం చేయడానికి బస్టాండ్ రూట్‌లో వెళ్తున్న క్రమంలో కనీస వెలుతురు లేకపోవడంతో అసహనం వ్యక్తం చేశారు. చీకటి వల్ల యాక్సిడెంట్స్ జరుగుతాయని, బంగారు నగలు దొంగిలించే ఛాన్స్ ఉందని మహిళలు ఆందోళన చెందుతున్నారు.
భామినిలో ఏనుగుల భీభత్సం
పార్వతీపురం మన్యం జిల్లా భామిని మండలంలోని సోలికిరి పంచాయతీ పరిధిలో ఏనుగుల సంచారం స్థానికులను ఆందోళనకు గురిచేస్తోంది. నల్లరాయిగూడ, వై.రేగిడి, ఇసుకగూడ, సన్నాయిగూడ, డోకులెగూడ గ్రామాల్లో ఏనుగులు పంటపొలాలు, పండ్ల తోటలను ధ్వంసం చేస్తున్నాయని గ్రామస్థులు తెలిపారు. ప్రతి ఏటా భారీగా ఆర్థిక నష్టం జరుగుతోందని ఆవేదన వ్యక్తం చేశారు. ఏనుగుల వల్ల పంటలతో పాటు తమ ప్రాణాలకూ ముప్పు ఉందని ఆందోళన చెందుతున్నారు. అటవీ అధికారులు వెంటనే స్పందించి ఏనుగుల సంచారాన్ని నియంత్రించేందుకు తగిన చర్యలు తీసుకోవాలని కోరుతున్నారు.
నన్ను క్షమించండి- అభీజీత్ దీప్కే
ఢిల్లీ జంతర్ మంతర్ ప్రొటెస్ట్ నేపధ్యంలో అరెస్ట్ అయి తిహార్ జైల్లో ఉన్న CJP లీడర్స్ సౌరవ్ దాస్, అశుతోష్ రాంకాలా కస్టడీ 6వ రోజుకు చేరింది. ఈ సందర్భంగా CJP ఫౌండర్ అభీజీత్ దీప్కే సోషల్ మీడియాలో ఎమోషనల్ నోట్ షేర్ చేశారు. CJP మూవ్‌మెంట్ బిల్డ్ చేయడంలో వాళ్లిద్దరి హార్డ్‌వర్క్, శాక్రిఫైస్ చాలా ఉందంటూ ప్రశంసించారు. లీగల్ డిలేస్ వల్ల బెయిల్ ఆలస్యమవుతోందని ఆరోపిస్తూ.. వారి ఫ్యామిలీస్‌కి క్షమాపణలు చెప్పారు. త్వరలోనే వాళ్లు బయటపడాలని ఆకాంక్షించారు.
దుర్గామాత రూపంలో వినూత్న బతుకమ్మ
వరంగల్ జిల్లా నర్సంపేటకు చెందిన ఆర్మీ ఉద్యోగి విజేందర్ వినూత్నంగా బతుకమ్మను అలంకరించి అందరి దృష్టిని ఆకర్షించారు. దుర్గామాతకు చీర కట్టినట్లుగా రూపకల్పన చేసి, చుట్టూ రంగురంగుల పూలతో బతుకమ్మను పేర్చారు. అమ్మవారి రూపం ఉట్టిపడేలా తీర్చిదిద్దిన ఈ బతుకమ్మ ప్రత్యేక ఆకర్షణగా నిలిచింది. సంప్రదాయానికి సృజనాత్మకతను జోడించిన విజేందర్‌ను పట్టణవాసులు అభినందించారు. ఈ వినూత్న బతుకమ్మను చూసేందుకు పలువురు ఆసక్తి చూపారు.
Calls, SMSల కోసం కొత్త ప్లాన్స్
డేటా అవసరం లేకుండా ఓన్లీ కాల్స్, SMSలు కావాలనుకునే వారి కోసం Airtel 3 కొత్త ప్రీపెయిడ్ ప్లాన్లను ప్రకటించింది. ₹185, ₹203, ₹206లతో వీటిని అందిస్తోంది. ఈ ప్లాన్లలో ఆన్‌లిమిటెడ్ వాయిస్ కాల్స్, STDతో పాటు 300 SMSలు లభిస్తాయి. ₹185 ప్లాన్ 28 రోజుల పాటు, ₹203, ₹206 ప్లాన్లు 30 రోజుల పాటు చెల్లుబాటవుతాయి. ₹203 ప్లాన్ గడువును ₹18 రీఛార్జ్‌తో మరో రెండు రోజులు పొడిగించుకోవచ్చు. ₹206 ప్లాన్ 30 రోజుల గడువు ముగిసిన వెంటనే రెన్యూవల్ చేసుకోవాలి.
బతుకమ్మ వేదికగా 'ఎల్ నినో'పై అవేర్‌నెస్
సిద్దిపేట జిల్లా దుబ్బాక 20వ వార్డులో పండుగ సందడితో పాటు పర్యావరణంపై అవగాహన పెంచే వినూత్న ప్రయత్నం జరిగింది. యువకిరణం స్పోర్ట్స్ అసోసియేషన్ ఆధ్వర్యంలో జరుగుతున్న దుర్గామాత నవరాత్రి ఉత్సవాల్లో.. ప్రస్తుత ప్రపంచాన్ని భయపెడుతున్న 'ఎల్ నినో' ఎఫెక్ట్, వాతావరణ మార్పులపై మెసేజ్ ఇస్తూ డిజిటల్ ఫ్లెక్సీని ఏర్పాటు చేశారు. పండుగలు కేవలం ఎంజాయ్‌మెంట్ మాత్రమే కాకుండా, సమాజానికి ఉపయోగపడేలా ఉండాలనే ఆలోచనతో యూత్ చేసిన ఈ ప్రయత్నం అందరిని ఆకట్టుకుంటోంది.
కనజిగూడలో బతుకమ్మ వేడుకలు
హైదరాబాద్ అల్వాల్ పరిధిలోని కనజిగూడ టెలికాం కాలనీ పార్కులో నిర్వహించిన సద్దుల బతుకమ్మ వేడుకలు ఘనంగా జరిగాయి. కాలనీ వాసులు పెద్ద సంఖ్యలో పాల్గొని వేడుకలను విజయవంతం చేసినట్లు టెలికాం కాలనీ వెల్ఫేర్ అసోసియేషన్ కమిటీ సభ్యులు తెలిపారు. మహిళలు, యువతులు, చిన్నారులు రంగురంగుల పూలతో బతుకమ్మలను పేర్చి, సంప్రదాయ పాటలు, కోలాటాలతో సందడి చేశారు. ఇలాంటి వేడుకలు కాలనీ వాసుల మధ్య ఐక్యత, ఆనందాన్ని పెంచుతాయని కమిటీ సభ్యులు తెలిపారు.
పండుగ వేళ ఆర్మీ జవాన్ సూసైడ్
వికారాబాద్ జిల్లా యాలాల్ మండలం లక్ష్మినారాయణపూర్‌ గ్రామానికి చెందిన ఆర్మీ జవాన్ బోయిని మల్లేశం సోమవారం ఉదయం మృతి చెందారు. దసరా పండుగకు స్వగ్రామానికి వచ్చిన ఆయన మృతితో గ్రామంలో విషాదం నెలకొంది. పంజాబ్‌లోని పఠాన్‌కోట్‌లో విధులు నిర్వహిస్తున్న మల్లేశం ఆత్మహత్యకు పాల్పడ్డాడు. అయితే, ఆయన మృతికి గల కారణాలు ఇంకా తెలియరాలేదు. జవాన్ మృతితో కుటుంబ సభ్యులు కన్నీరుమున్నీరవుతున్నారు.
ఏపీలో Rare Earth కార్పొరేషన్?
AP: రాష్ట్రంలో రేర్ ఎర్త్ మినరల్స్ అభివృద్ధి, వ్యాపారం కోసం ప్రత్యేక కార్పొరేషన్ ఏర్పాటు చేయాలని గనుల శాఖ ప్రతిపాదించింది. ప్రతిపాదిత ‘AP TIRAM’ పాలసీ ప్రకారం.. 2030 నాటికి ఈ రంగంలో 40 వేల కోట్ల పెట్టుబడులు, 20 వేల ఉద్యోగాలు వస్తాయని అంచనా. 2035 నాటికి పెట్టుబడులు రెట్టింపవుతాయని, 2040 నాటికి లక్ష కోట్లకు చేరడంతో పాటు 65 వేల ఉద్యోగాలు లభిస్తాయని అంచనా. మరోవైపు, భవిష్యత్ ప్రాజెక్టుల నేపథ్యంలో APMDCని IPOకు తీసుకెళ్లే ప్రతిపాదన కూడా ఉన్నట్లు సమాచారం.
శారీల్లో మగవాళ్లు.. శాపమా?
గుజరాత్, షాపూర్ ప్రాంతంలో.. ఏటా నవరాత్రుల్లోని 8వ రాత్రి బరోట్ సమాజ మగవారు చీరలు కట్టుకొని సాధు మాతా గౌరవార్థం గర్బా చేస్తారు. ఇది దాదాపు 200 ఏళ్ల నాటి సంప్రదాయం. అప్పట్లో సాధు మాతపై కన్నేసిన పాలకుడు ఆమెను తెమ్మని సైనికుల్ని పంపాడు. దాంతో సాధు మాత ఫ్యామిలీ ఆత్మార్పణ చేసుకుంది. తర్వాత బారోట్ తెగలో పురుషుల మరణాలు పెరగడానికి సాధు మాత శాపమే కారణం అని భావించారు. మగవారు చీరలతో ప్రార్థనలు చెయ్యడంతో మరణాలు తగ్గాయని చెబుతున్నారు. ఇప్పటికీ ఆ ఆచారాన్ని పాటిస్తున్నారు.
రూల్స్ మరిచి ముసుగు వేశారు..జనం ఫైర్
అంబేడ్కర్ కోనసీమ జిల్లా సఖినేటిపల్లి మండలం గొంది గ్రామంలో ఎలక్షన్ కోడ్ రూల్స్ పేరుతో రాజ్యాంగ నిర్మాత అంబేడ్కర్ విగ్రహానికి ముసుగు వేయకూడదనే రూల్స్ ఉన్నా, పంచాయతీ సిబ్బంది కావాలనే ఇలా చేశారంటూ స్థానికులు ఆగ్రహం వ్యక్తం చేశారు. దీనిపై పంచాయతీ సెక్రటరీ స్పందిస్తూ, మిగతా విగ్రహాలతో పాటు పొరపాటున వేశామని, వెంటనే తొలగిస్తామని చెప్పారు. భవిష్యత్తులో అంబేడ్కర్ విగ్రహాల విషయంలో ప్రత్యేక జాగ్రత్తలు తీసుకోవాలని ప్రజలు కోరుతున్నారు.